Netume 3

Tswe' fiaṅ ghe' mbwôge

1Mosé lo ke mbéb nyàm ntse i Yétro, z'a be ngale'te Madian nà. A be num mo' lé'njù nèn nyàm tà njam tshwèt, nzin tà nkum num mbat Nsi, Horéb. 2Angél #Mfa' Gha. 7.30-34Tshùaben ṅwag yi ntùm mo' lambwôg z'a ke ntum tèt mo' tswe'tù là. Mosé lôte, tswe'tù là nke nge'e, là ke nkù. 3Mosé tshob ndù: M'a' Kù'te nèn ndôte yen kuni ju li, ndèn ju z'a ghù tswe'tù ke ke nkù là. 4Tshùaben yen mb'a tshwèt nkù'te nèn lôte là; Nsi tsin tèt tswe'tù ntsiaṅ Mosé ndù: Mosé! Mosé! A bùnte ndù: Me li: 5Nsi tshob yi ndù: Kà se' nsen ni. Sô nketo' nku mu, nummbe dù' tsha' z'o tsin bwe là b'a dù' tsha' nelàne. 6A bèn ntshob ndù: Me b'a Nsi tàan Abraham, Nsi Isak, mba Nsi Yakob. Mosé lem se i, ke bam nelôte Nsi. 7Tshùaben tshob ndù: Me yen nge' yàm nzwit mèn be ntùm bwe Egipto là, nju' kua' tse ghaghùtni yub be nke ngù bo nkua' là. Me lèn kua' nge' a be ntùm bwe là. 8Ndùlala me swe' num netshu' yub bu ngô Egipto, mba ndù bo ko' ntùm yen ngô li nèn ntùm mbwô ngô nezi, ntùm ngô ze mbùn nyàm be nswe' bwe bo ṅwa' là, ntùm dù' ze ba Kanaan, ba Hétia, ba Amor, ba Férésia, ba Hévia boa ba Yébusia be ntswe là. 9Ndonni nkua' bon Israél ko' tà nse' nkum mbaṅ àm. Me yen nge' ze ba Egipto tshwèt njab num bo là. 10Nène, me tum o mbaṅ mfen Faraon ndù o sô bon Israél, yàm nzwit mèn mà Egipto.

11Mosé tshob Nsi ndù: Me b'a we kà nèn tèt Faraon sô Israél Egipto à? 12Nsi bùnte ndù: Bag wù nsi ke be; tshù keki z'a tshwèt nda'te mbe me bèn ntum o li: Ndùs'o nsi ghù nzwit mèn àm tum Egipto là, bin à bo nsi ghamt'àm num yen mbat li.

Nsi la'te lén se Mosé

13Mosé #Netu. 6.2-3tshob Nsi ndù: A be ndùlala mba me nsi nèn tèt bon Israél tshob bo ndù: Nsi tà tsin tum àm mbaṅ bin. A be ze bo bètt'àm lén so là mba me nsi bùnte bo à ndùke? 14Nsi #Apok. 1.4,8tshob Mosé ndù: Me b'a mèn ze me be là. A bèn ntshob Mosé ndù: Tshù ju z'o nsi bùnte bon Israél li: Mèn z'a be là bèn ntum àm mbaṅ bin. 15Nsi bèn ntshob Mosé ndù: O nsi tshob bon Israél ndù: Tshùaben Nsi tà tsine, Nsi Abraham, Nsi Isak, Nsi Yakob bèn ntum àm mbaṅ bin. Tshù lén sàm nà num njoṅ zwiaṅ njù fa, a mba bo nsi tù' ke ntsiaṅ àm nà. 16Nène, o nsi tse'te njoṅ tse ghakwé mbwe ba Israél fa tshob bo ndù: Tshùaben Nsi tà tsin lo ṅwag me, yi Nsi Abraham, Isak mba Yakob, ntshob me ndù: Me lo se' lôte zine, njen ju ze bo tshwèt ngù bin Egipto là; 17ndùlala me tshob ndù: Me nsi ghù bin tum ndà kuan bin be bwe Egipto là, nèn ntùm ngô ba Kanaan, ba Hétia, ba Amor, ba Férésia, ba Hévia boa ba Yébusia, ngô ze mbùn nyàm be nswe' bwe bo ṅwa' là. 18Bo nsi ju' ntshu o, bin à bo nèn ntèt mfen Egipto ntshob yi ndù: Tshùaben Nsi ba Héber ṅwag bag. Bam bag ndù bag zin lé'njù tat, nèn num kônkwa, mfà jule'te Tshùaben Nsi yag! 19Me lèn kua' ndù mfen Egipto ke nsi faṅ bin nène, k'a ke be ndù mo' bu neta lo nsi num bwe. 20Là, me nsi nyit bu àm, lo' nsà tse me nsi ghù là lab Egipto yi, nsà tse me nsi ghù netèl i là ghù a ta' zine. 21Me #Netu. 12.35-36nsi ghù bin be ghafen num miag ngô Egipto, a be ndùse bin nsi nène, bin be tum ke b'a mbu ndaṅe! 22Mba zit mènnzwi lo nsi lon tshu silba bo gol nshun i ke mèn z'a tshwèt ntswe ndà i lo, lon nzwe ts'a ma' num tse nshum boa tse ngon nà. A nsi tshùa ndùlala bin sô tshu bu ba Egipto.

Currently Selected:

Netume 3: BMa

Highlight

Copy