Netume 17

Ntse Masa bo Mériba

(Nes. 20.1-13)

1Njoṅ tunndà bon Israél fa lo kônkwa Sin, nke nkù' ntsin mba Tshùaben tshob bo là. Bo te mbàn Refidim. Nda' ndù ngô ke ghù ntse mi bo nu là. 2Ngô kam Mosé ntanta ntshob ndù: Fà ntse bag nu. Mosé tshob bo ndù: Bin kam àm ntanta numke? Numke bin nke ndaṅte Tshùaben à?

3Nzi ntse ya ngô bwe, bo tshobte tun ntô num Mosé ntshob ndù: O na' ngù bag ko' mà Egipto a numke? Neghù ndù bag bon tshàm kwù nzi ntse nsen ni mba nyàm tshàm ké? 4Mosé bu' mbu Tshùaben ntshob ndù: M'a' ghù à ndùke bag yen nzwit mèn ni à? A tù' mén nda'nda' bo tamt'àm ndoṅ. 5Tshùaben tshob Mosé ndù: Tshùa mbwe ngô, ndo' tsemo' ghakwé mbwe ntùm ngô bin à bo be. Lo' kôg s'o na' ndab ta'ntse yi là ntshùb bu o nène. 6Tu wul àm nsi tsin mbwe o, num sen gho din, Horéb. O nsi lab gho ntse tum bwe ngô nu. Mosé ghù ndùlala num miag ghakwé mbwe bon Israél.

7A tsiaṅ lén yen dù' là Masa bo Mériba nummbe bon Israél lo ghù ntanta bwe, mbèn ndaṅte Tshùaben bwe ntshob ndù: Tshùaben num netèt bag ké? Ṅ, ke nga à?

Amalék vù ntsho

8Ndùlala Amalék kam Israél ntsho Refidim. 9Mosé tshob Yoshua ndù: Tsho' tse be benntùn ntum nèn nde' Amalék ntsho bin à bo; a nsi be ndamnjù me tshùb kôg Nsi bu àm, nko' nèn mfe ntshùa kô. 10Yoshua le' Amalék ntsho mba Mosé tshob là, Mosé, Aron bo Hur ko' nèn mfe ntshùa kô. 11A nke mbe ndùse Mosé bù' bu i tù là, Israél ta num ntsho, ndùs'a tshag bu i nsi là, Amalék ta num ntsho. 12Mbu Mosé lèt, mbole, bo lo' loṅ ntomte yi bag bag, a tswe nsi. Aron bo Hur tswe mbaṅ i bag bag nke ntomte mbu mi. Ndùlala mbu mi ghô tù ndùlala tà nèn nkum mfetnjù. 13Yoshua ton Amalék ntsho boa ben tse, njoṅ yub fa vù num ntshùag ṅwi.

14Tshùaben #Neb. 25.17-19; 1 Sam. 15.2-9tshob Mosé ndù: Kite yen nu là ntùm ta' ṅwa'ni neke nkwimte, ntshob Yoshua ndù me nsi biagte Amalék, bwete lén se tun bam kamànyam. 15Mosé bom tômbwôg num lén Tshùaben ntswi lén se ndù: Tshùaben b'a mèn ze me num nte miag num i ngelaṅ ntsho là. 16A tshob ndù: Mba bu mènntùn bù' nsi num kô ntsho Tshùaben nà, ntsho nsi ke be netèt Tshùaben bo Amalék ngu'ngu'.

Currently Selected:

Netume 17: BMa

Highlight

Copy