Netume 18

Mosé bo ntse i Yétro

1Yétro, ngale'te ze Madian, ntse Mosé, ju' bo nke ntshob nu mfà num ju ze Nsi na' ngù Mosé bo num ze nzwit mèn, Israél là. Tshùaben lo sô Israél Egipto. 2Yétro #Netu. 2.21-22ntse Mosé lo' Séfora nzwi Mosé z'a na' nta' i là, 3boa #Mfa' Gha. 7.29bon tse bàa nèn mbaṅ Mosé. Lén mo' nshum i be Guershom nummbe Mosé lo tshob ndù: Me b'a nkùla' ntùm ngô me bwe là. 4Lén mo' be Eliézer nummbe Mosé lo tshob ndù: A b'a Nsi tàa bèn njwimt'àm, ntshu' àm num ntshùag ṅwi bu Faraon. 5Yétro ntse Mosé, bon Mosé mba nzwi i nèn mbaṅ i num kônkwa dù' z'a te mbàn bwe num mbat Nsi là. 6Yétro ghù bo tshob Mosé ndù: A b'a me Yétro ntse o bèn nse' mbaṅ o bag nzwi o mba bon tse bàa. 7Mosé tum, nèn mbumte bo ntse i, ngwù nsi mbwe i, ntat'é. Bo tsha'te bo bo, nèn ntsho ntùm ntàb.

8Mosé soṅ ntse i ju ze Tshùaben ghù Faraon bo ngô Egipto num nu Israél là; a soṅ i njoṅ nge' fa bo yen manze là bo mba Tshùaben na' ntshu' yub là. 9Yétro tsiaṅte num njoṅ mebwô fa ze Tshùaben na' ngù Israél, ntshu' i bu ba Egipto là. 10Yétro tshob ndù: Ghamte be Tshùaben z'a na' ntshu' zin bu ba Egipto mba bu Faraon, ntshu' mba ngô bu ba Egipto là. 11Ndonni me lèn ndù Tshùaben lo b'a mèn ndùb ntshùa tsemo' nsi fa, nummbe Nsi la'te ndùlala ndùse bo ke ngùtni zin nà. 12Yétro ntse Mosé be ze nsi ndùse bo ke nton nyàm nà bo ndùse bo ke mfà tshule'te là. Aron boa njoṅ ghakwé mbwe ba Israél fa lo se' mbwe Nsi mba ntse Mosé njù jujù bwe.

Mosé te kamkam ghatsho'te ntsha

(Neb. 1.9-18)

13Tshù, njù be làn Mosé tswe nsi, netsho'te ngô, ngô tsin mbwe Mosé neto' nkebnjù nèn nkum mfetnjù. 14Ntse Mosé yen ju z'a tshwèt ngù ngô là, ntshob ndù: Ke z'o tshwèt ngù ngô ndù à? Numk'o ntswe nsi tù' wù, ngô ntsin mbwe fe nkebnjù nkum mfetnjù à? 15Mosé tshob ntse i ndù: Ngô se' mbwe àm num nebètt'a Nsi nu. 16A num mbe ndùse bo ghù ntsha netèt bo là, mba bo a' se' njen àm, me tsho'te yube, ngù bo lèn ntshù' Nsi boa nkàn mi.

17Ntse Mosé tshob yi ndù: Yu mat neghù ke' bwô. 18O nsi zwi yu wut bèn zwi yen nzwit mèn ze bin yi be là. Fa' lèt num o tù' wù; b'o ke fa' sen fa' là tù' wù. 19Ndonni ju' ntag mi me tshob wù là. A bwô ndù Nsi be wù. A bwô ndù o be nganze ngô mbwe Nsi. O nsi ke lo' ntsha nèn yi mbwe Nsi. 20Ke nsoṅ benntùn ntshù' boa nkàn mi a nsi la'te yub manze z'a bwô nezin bwe, bo mb'a bwô yub mat be là. 21Yen nà mbe tôge, o lôte ntùm ngô, ntsho' kum benntùn bwe, tse bo be mbwôg Nsi, tse ngô lèn yube, tse be mèn ke fùte yub là, nte yub mum ngô, mo' ke nsa' ben ntsha' mbùm, mo' sa' ben nkù, mo' sa' ben ṅam ntàn, mo' sa' ben gham. 22Tshen ben ni nsi ke tsho'te ngô njoṅ ndù fa. A be ze nu ta là mba bo nsi se' yi mbwe o. Mbe ze nu fùag là, mba tu wut tshob nsi tsho'te yen nu là. A bwô netsho'te lèt num o. A bwô bin à bo tamte nket yen lèt là. 23A be z'o ghù ndùlili là, mba Nsi a' fà nkàn mi wù, o ku'ni netshùbe, a tshùa ndùlala ngô bèn njam la' ntùm fite.

24Mosé ju' ju ze ntse i tshob là, ngù mb'a tshob là. 25Mosé tsho' kum benntùn ntùm njoṅ ngô Israél fa, njab yub num tu ngô, mo' num ben ntsha' mbùm, mo' num ben nkù, mo' num ben ṅam ntàn, mo' num ben gham. 26Tshen ben ni nke ntsho'te ngô njoṅ ndù fa. Bo nke ndo' nu ts'a ta là nèn yi mbwe Mosé, nke ntsho'te ts'a fùag là yub tu.

27Mosé lé'te bo ntse i; a bèn njam ntùm ze ngô.

Currently Selected:

Netume 18: BMa

Highlight

Copy