Netume 16

Mana boa ntem nsaṅ num kônkwa

1Bo lo Elim boa njoṅ tunndà bon Israél fa nzin nkum kônkwa Sin, netèt Elim bo Sinaï. A na' mb'a lé'njù ntshob tàn gham ntùm ṅwù bàa, mba bo tum ntùm ngô Egipto là. 2Tunndà bon Israél tshobte tun ntô num kônkwa, num Mosé bo Aron. 3Bon Israél tshob bo ndù: Bu Tshùaben na' mbe ke zwite yag ntùm ngô Egipto, ndùse bag na' ntswete mbaṅ nkab mbàb, nke njù njwèt là numke? Bin lo lo' yag nse' yi num yen kônkwa li ndù njoṅ yen bwoṅ benntùn ni kwùte.

4Tshùaben #Yoha. 6.31tshob Mosé ndù: M'a' ghù bàn swe' mfe tù mfètte num bin. Ngô ke ntum nkebnjù ntswitte njoṅ bàn ta' lé'njù. A nsi tshùa ndùlala me laṅt'é njen mbe z'a nsi tshùb nkàn màm nà, ṅ, ke nga lo. 5A be mbatte lé'njù ntôge, bo nabte ju ze bo lo ndo' à tôgte mfi' là; yen nà b'a ndù yen jujù là nsi tshùa z'a ke mbe mba sit lé'njù lo là.

6Mosé bo Aron tshob njoṅ bon Israél fa ndù: Bin nsi lèn yen mfetnjù li ndù a b'a Tshùaben bèn nsô zin ntùm ngô Egipto; 7a nsi be nkebnjù bin yen nkuni Tshùaben, nummb'a ju' mba bin tshobte tun ntô num i là. Mba bag là, bag b'a ba we kà bin nke ntshobte tun ntô num bag à? 8Mosé ke ndiag netshob à ndù: Ndùse Tshùaben nsi fà mbàb mfetnjù li bin fèle, fà bàn bin nkebnjù ndamnjù là, mb'a b'a nummbe a ju' mba bin tshobte tun ntô num i là. Mba bag là, bag b'a ba we? Bin ke' tshobte tun ntô à num bag, là bin tshobt'a num Tshùaben.

9Mosé tshob Aron ndù: Tshob njoṅ tunndà bon Israél fa ndù bo kù'te nse' mbaṅ Tshùaben, nummb'a ju' mba bo tshobte tun ntô là. 10Ndùse Aron ke ntshob nu bon Israél là, bo kaṅ wut nke ndôte nze mfe kônkwa. Bo yen nkuni Tshùaben ṅwag ntùm ndot.

11Ndùlala Tshùaben tshob Mosé ndù: 12Me ju' mba bon Israél tshobte tun ntô là. Ndùlala tshob bo ndù bo nsi fèt mbàb mfetnjù, a be nkebnjù bo jù bàn njwèle, a tshùa ndùlala bo lèn ndù a b'a me bèn mbe Tshùaben Nsi yub. 13A be be num yen mfetnjù là ntem nsaṅ ko' ndo' mbàn fa; a be nkebnjù mo' tu' ndot naṅ ntùm mbàn ndiaṅ mbume, ngù kub i. 14Tu' ndot là sate, mo' ju be num kônkwa mba nkun nà, ndù a kagte, ndo' dù' fa. 15Bon #1 Korin. 10.3Israél be yen yen ju li, nto' nke mbètte bo bo ndù: Yen ni b'a ke li à? Bo lo ke lèn ju mbile. Mosé tshob bo ndù: A b'a bàn ze Tshùaben fà ndù bin jù là. 16Tshù ju Tshùaben bètte mbe bin ghù li: Bin ṅwat jujù njoṅ z'a ku' là, ta' kesoṅ num ta' mènntùn, ndùlala ndù jujù ku' mba num zit mèn no, nummbe bin yàm neshu. Bin ṅwat jujù num njoṅ benntùn tse bo be ntùm ntàb mba we lo là. 17Ba Israél ghù ndùlala: Mo' mèn ṅwat yàme, mo' ṅwat mo' njoṅ i. 18Là #2 Korin. 8.15ndùse bo ke ndo' kesoṅ mfi' yi là, mèn z'a ṅwat yàm nà ke ṅwat ntshùate, mèn z'a ṅwat mo' njoṅ i là ke bwoṅ ju. Mba we lo lo yen mb'a ṅwat njoṅ z'a ku'ni nejù là.

Nzenze ntshù' num Mana

19Mosé tshob bo ndù: Kà sàm mènntùn lé' ju num ndamnjù. 20Tsemo' ke ju' ntshu Mosé, ndé' tà nèn nkum nkebnjù; l'a bi, ywèt tsho bwe, a nke ndame. Ndùlala Mosé ya ntù num bo.

21Bo nke ṅwat njoṅ nkebnjù fa, mba we lo ṅwat mb'a ku' num i là. Ndùse nyam tum nke ndum nà, yen ju là yag.

22A be mbatte lé'njù ntôge, mba we lo ṅwal a kesoṅ mbàa num tu ta' mènntùn. Njoṅ tà tunndà fa nèn nsoṅ Mosé. 23A #Netu. 20.8-11tshob bo ndù: Tshù ju ze Tshùaben tshob li: Ndamnjù b'a Sabbat, lé'njù se bo yab Tshùaben nà. Bin na ju z'a bwô nena là, ntshu'te z'a bwô netshu'te là. Ju z'a tôgte bwe là bin lem num nkebnjù. 24Bo lem mba Mosé tshob là tà nèn nkum nkebnjù. Sàm ju ke lam, ywèt ke bèn mbe bwe. 25Mosé tshob ndù: Bin jù i sènni. Sènni b'a Sabbat Tshùaben. Be bin ke fon sàm ju ntshundà sènni. 26Bin nsi ke ṅwat num lé'njù ntôge, l'a be mbatte lé'njù sammbàa, a be Sabbat. Ju ke nsi be sen lé'njù là. 27L'a lo be num mbatte lé'njù fome, tsemo' benntùn tum ntùm ngô nèn neṅwat jujù, ke fon sàm. 28Tshùaben tshob Mosé ndù: Bin nsi ke gha neze ntag màm boa ntshù' màm tà kum à ndùke? 29Bin yen ndù me Tshùaben na' mbèn mfà Sabbat bin; a bèn mfà mba mbatte lé'njù ntôg bin, mfà bàn lé'njù bàa bin. A bwô ndù mba we lo tswe ze dù'. A ke' bwô ndù mènntùn tum la' i num mbatte lé'njù sammbàa. 30Ndùlala ngô fite wut num mbatte lé'njù sammbàa.

31Tunndà #Nes. 11.7-8Israél tswi lén se ndù mana. A na' mb'a mba miag nkun nà, mfôge, nsén i be mba makela' ze bo lo' ṅwa' nka yi là.

32Mosé tshob ndù: Tshù ju ze Tshùaben tshob li: A bwô ndù bo lem ta' kesoṅ se, ngù nda'te nzwit zin, ndù bo yen bàn ze me na' nkém zin yi kônkwa, ndùse me na' nsô zin Egipto là. 33Mosé #Héb. 9.4tshob Aron ndù: Lo' ta' kab nso kesoṅ mana s'a dun nà ntùm bwe, nte mbwe Tshùaben, ndem bwe num neghù nda'te nzwit zin. 34Ndùlala Aron te i mbwe Koṅ ndaṅndaṅ mba Tshùaben na' ntshob Mosé là, ndem i bwe.

35Bon #Yosh. 5.12Israél jù mana num ngu'njù ṅam nkuà tà nkum ndùse bo kum num tsha' ntùn, ntswe bwe là. Bo ke njù à mana kà nèn nkum mbaṅ tsha' Kanaan.

36Kesoṅ b'a ta' bag éfa ntshù' num bag tse gham.

Currently Selected:

Netume 16: BMa

Highlight

Copy