Mfa' Ghantum Ju z'a ntùm bwe là
Ju z'a ntùm bwe là
Ṅwa'ni Ghantum b'a bu' ṅwa'ni mbatte bàa num mfa' Lukas. A se' ntùm mbwe bu' se, se bo tsiaṅ ndù Nkùn Mebwô Lukas là, Lukas tshob nu mfà à nda' num mfa' Yésu ngelaṅ z'a be num nsitsha' là. Neto'te mba Yésu ko' mfe kamànyam nà (1.1-11), ze nebe Yésu netèt ghazi'te nu i bate mbe mi: a be bo ke bèn ndo' miag mbàb wut njen i yi. A b'a ju z'a ghù ṅwa'ni ghantum tsho' nze, nte tun ndà Nsi nsi là: Yésu a' tù' ke mbe bo Ndà Nsi à ntùm Ywèle, Ywèt sen nà s'a nsi ke tshagte bônke' tse là.
Yôg dun ntùm tshô li. Mbumte benkristô te tun nsi netèt ba Yuda ntshùa njam ngantum Nsi Pétro, ntse'te benkristô be Yérusalém netèt ba Yuda mba netèt ben tse bo ke' b'a ba Yuda là, ndaṅndaṅ mba Antiôkia, Korintô mba Filibo là. Be num njen mfa' ngantum Nsi Paulo num njoṅ tshen dù' là fa. Be ku'ni neyà yen nge' ze Ndà Nsi yen kà ntaṅ nga ntùm tshen dù' là là, mbèn njen mat ze Ywèt Tshùaben tshagte Ndà Nsi yi kà nzin nkum nà.
A bwô ndù be nèn netèt ba tshu tse Lukas yé'te bwe kà nkite ze ṅwa'ni là, ntsi lén “ṅwa'ni Nkùn ze bo num ntshob mb'a b'a “ṅwa'ni Nkùn Lukas” là. A ntùm yen ṅwa'ni nkùn Lukas là, a be tshob nu, ntshob à mbe me, nelo' nsoṅ tshô manze z'a na' nzin neto' Trôa nèn nkum Filibo là (16.10-40), ndo bwe nèn nkum Yérusalém dù' ze bo ghom Paulo là (20.5—21.18), mbe miagte, ndo Sézaré nèn nkum Roma, dù' ze Paulo nsi tswe bwe ngu'njù bàa kà bo tsho'te ntsha i là (27—28).
Neto'te, ṅwa'ni li fà ze kuzin a làn (1.8):
— mba mbwe Ndà Nsi na' nte tun nsi Yérusalém ngelaṅ ze Yésu yà ko' mfe kamànyam nà (1.1—8.3);
— nesa Nkùn Mebwô ntùm njoṅ dù' fa ntùm ngô (8.4—12.25),
— nebèn nsa Nkùn Mebwô tà nèn nkum ntùm ngô Méditérané mba tèt ngô Roma (13.1—28.31).
Fe num yen ngelaṅ nà, ghantum Nsi nke nsa Nkùn Mebwô ntùm njoṅ ntôg dù' fa. Ntùm yen Nkùn Mebwô ze ghantum ke ntswite benntùn yi là, bo nke njen à kua' Yésu z'a na' njôg Palèstina là, k'o be ze Yuda k'o ke be yi lo. Num njoṅ ngelaṅ fa, Ywèt Nsi nke nsoṅte bônke' Yésu nèn yi kua' mbaṅ yi Yésu, mbaṅ mfa' mi num nezin mum ntshob mi.
Njoṅ tshu fa tse bo kite ntùm ṅwa'ni mfa' ghantum là, ke ntsho' à manze Ndà Nsi mbèn nke nsoṅ à mfa' mi Ndà Nsi nsi ke fa' num njoṅ ngelaṅ fa, fe tà mbwe kà nse' nkum ndonni là. Men mfa' là b'a nesoṅ Nkùn Mebwô Yésu Kristô njoṅ benntùn fa ntùm njù sag kuà.
Currently Selected:
Mfa' Ghantum Ju z'a ntùm bwe là: BMa
Highlight
Share
Copy
Want to have your highlights saved across all your devices? Sign up or sign in
La Sainte Bible en Bamiléké-Medùmba © Alliance Biblique du Cameroun, 1993. All rights reserved.