Mfa' Ghantum 1

Yésu bù ywèt nelàn bônke' tse

1Téofilo, #Luk. 1.1-4ntùm mbwe ṅwa'ni àm, me lo tshob njoṅ tshu fa tse Yésu na' ngù, mbèn ntswite fe neto'te, 2tà nèn nkum lé'njù s'a na' nko' mfe kamànyam, mbe ndù a tshùa njam Ywèt Nelàne, mfà ntshù' mi ghazi'te nu i ts'a na' ntsho' là. 3A lo be miagte neyen nge', nda'te bo ndù a b'a ntùn ntùm bon nu nzenze, nke ntswite wul i bo mum lé'njù ṅam nkuà, mbèn ntshob nu bo mfà num nufen Nsi.

4Mo' #Luk. 24.49lé'njù se bo à bo na' mbe là, a tshob bo ndù kà bo tum Yérusalém, là ndù bo béb bwe ndù nka'ni mi Tà na' nka' là bumte, nka'ni mi bin ke nju' me tshob là. 5Nummbe #Mat. 3.11; Mark. 1.8; Luk. 3.16; Yoha. 1.33Yohané lo ke nyu' benntùn à ntse, là bo nsi nyu' zin à ntùm Ywèt Nelàne, ntùm tsemo' bon lé'njù.

Mba Yésu ko' mfe kamànyam nà

6Ben tse bo tse'te mbaṅ i là, bètt'é ndù: Tshùaben, a yen ngelaṅ nà z'o nsi bèn nabte nufen Israél là ké? 7A bùnte bo ndù: A ke zin nu nelèn ngelaṅ ke ntswe'njù lo mi Tà na' njab tu wul i ntùm ze ngù' là. 8Là #Mat. 28.19; Mark. 16.15; Luk. 24.47-48bin nsi kwé nta Ywèt Nelàn ts'a nsi swe' num bin ndù bin be ghakwénta màm ntùm Yérusalém, ntùm Yudéa mba Samaria tà nèn nkum num miagte tsha' là.

9A #Mark. 16.19; Luk. 24.50-51be miagte netshobe, nko'o, bo nke ndôt'é mb'a nèn nà, mo' ndot se' ndam i, nj'é i num miag mube. 10Bo tswe bwe, mbù' miag mub nke ndôte mfe kamànyam, ngelaṅ z'a ke nèn nà, tshù, tsemo' ben bàa tèt yube, ndù bo ma' nzwe fôgtab, 11ntshob bo ndù: Ba Galiléa, numke bin tswe nsen nà nke ndôte mfe kamànyam à? Yen Yésu li z'a lo netèt bin nko' mfe kamànyam nà nsi bèn se' be mal i mba bin yen i a nke nèn nà.

Ghantum Yésu ntùm to'ndà tù

12Bo lo num mbat ze bo ke ntsiaṅ mbat nten z'a be mbaṅ Yérusalém, a b'a njoṅ kam manze nkatte là, mbèn njam Yérusalém. 13Bo #Mat. 10.2-4; Mark. 3.16-19; Luk. 6.14-16bèn njam ntùm ngô, nko' ntùm to'ndà z'a be tù, dù' ze bo ke ntse'te bwe là; a na' mb'a ba Pétro, Yohané, Yakobo mba Andréa, Filibo mba Tomas, Bartélémi mba Matio, Yakobo mén Alféo, Simon Zélôte, mba Yuda mén Yakobo. 14Bo lo ke nkagtùn njoṅ yub fa ntùm ntù ntshù' ntùm le'te Nsi boa bènnzwi, mba Maria mà Yésu mba fèt Yésu.

Mba bo tsho' Matia là

15A lo be num tshen lé'njù là, Pétro lo tù netèt fètfèle, bwoṅ benntùn nguan bon bàa nkù lo be bwe, ntshob ndù: 16Fèt tshàm, a lo bwô ndù ju ze Ywèt Nelàn na' ntshob ntshùa num ntshu David mfà num Yuda z'a be ngatshagte ben tse bo ghom Yésu là, bumte mb'a be ntùm ṅwa'ni Nsi là. 17Nummbe a na' mb'a mèn netèt tse be ben ndù a lo kwé ze bag i num fa' be. 18Yen #Mat. 27.3-8mèn ni, ngelaṅ a na' ndo' nkàb nukebwô i, njun nà yi là, a vù nsi mbwembwe, mbèle, nkebe, tshubam tse tum, nsate. 19Njoṅ ba Yérusalém fa lèn yen nu là; a ndùlala bo num ntsiaṅ yen nà là num ntshob mub ndù: Nà lem. 20Tshù, #Yobk. 69.25; 109.8bo lo kite ntùm ṅwa'ni Yobkwi ndù:

A bwô ndù dù'ntswe i tù' kônkwa

ndù kà mèn tswe bwe,

mba ndù:

Mo' mèn lo' ze dù' fa.

21Ndùlala, a bwô ndù mo' mèn tù' ngakwénta nelo num vù Yésu mba be là. A bwô ndù yen mèn nà b'a mo' mèn netèt ben tse bag à bin bo ke nzin njoṅ ngelaṅ fa ze Tshùaben Yésu na' mbe netèt be là, 22neto' #Mat. 3.16; Mark. 1.9; 16.19; Luk. 3.21; 24.51fe num kwéntse Yohané tà nèn nkum mum lé'njù s'a lo netèt be, nko' mfe kamànyam nà. 23Bo fà benntùn bàa, Yosèf ze bo ke ntsiaṅ Barsaba ndù bo lo bèn njab lén se Yustô là, mba Matia. 24Bo le'te Nsi ntshob ndù: Tshùaben, wù z'o lèn ntù njoṅ benntùn fa là, la'te mèn z'o tsho' i netèt tshen ben bàa li, 25num nelo' dù' Yuda ntùm fa' mba ntum z'a na' ngua'a, nèn kua' num ze dù' là. 26Bo tam tô, Matia jù, ntamte num ghantum ntshob ntshù' gham.

Currently Selected:

Mfa' Ghantum 1: BMa

Highlight

Copy