Mfa' Ghantum 2

Mba ghantum kwé Ywèt Nelàn nà

1Lé'njù #Lev. 23.15-21; Neb. 16.9-11Pentekôte lo be se' ndù njoṅ yub fa tse'te dù' ntshù'. 2Be ndùse, mo' tshu'te swe' kamànyam mba fetmbaṅ ndùb là, ndun ntùm ndà dù' ze bo tswe là. 3Tsemo' tshu mba ngwatmbwôg là ṅwag bo, njabte num tu bo. 4Bo dun Ywèt Nelàne, nto' neke ntshob ntshob nzenze mba Ywèt Nelàn ke mfà bo ndù bo tshob là.

5Ba Yuda ghabwôg Nsi tse bo na' mfe ntùm njoṅ nzwit benntùn fa tse bo be tun bam kamànyam nà, lo be Yérusalém. 6Bwoṅ benntùn be ju' yen tshu'te là, nkù nde nse'e; tu tshob tshu', nummbe mba we lo netèt bo lo ju' mba ghantum tshwèt ntshob ko' ntshob mi là. 7Bo tshàm neshu, mbwôge, nke ntshob ndù: Tshen ben ni bo tshwèt ntshob là ke b'a ba Galiléa ké? 8A ghù à ndùke kà mba we lo netèt be nke nju' bo ntshob kua' ko' ntshob mi bo bwe i yi l'à? 9Ba Partia, Media, Elam, ba Mèsôpôtamia, Yudéa, Kapadôkia, Pontô, Asia, 10Frigia, Pamfilia, Egipto, mba ngô Libia mba ben tse bo fe Roma, 11ba Yuda mba ben tse bo bam nu ba Yuda là, ba Krèta mba ba Arabia; be tshwèt nju' bo nke ntshob nu ndùbndùb tse Nsi ntùm ntshob be. 12Nu tshùa njoṅ yub fa, bo tshàm, nke ntshob bo bo ndù: Yen ni tswit'à ndùke? 13Là tsemo' ben bèn nke ntshabte yub ntshob ndù: Bo bum à ndu'.

Ntshob Pétro

14Pétro lo tù boa tse ntshob ntshù' gham, ntshob bo kua' mà neta ndù: Ba Yuda mba njoṅ ba Yérusalém fa, bin lèn yen nu li, nkù' ntoṅ nju' ntshob màm. 15Tshen ben ni ke' bum à ndu' mba bin tshwèt nkwate là, nummbe a ke' à nyam bwe'e nkebnjù. 16Là yen ni b'a kua' nu ze ngatshob ntshob Nsi Yoél na' ntshob là ndù:

17Nsi #Yo. 2.27tshob ndù: Me nsi naṅ Ywèt tshàm

num njoṅ benntùn fa

num miagte lé'njù,

bon tsin tse bandum mba tse bènnzwi nke ntshob ntshob Nsi;

tsin bonnshum yen njem,

tsin ywèn benntùn zi njem.

18Ṅ, num tshen lé'njù là, me nsi naṅ Ywèt tshàm num ghafa'

tshàm tse bandum mba tse bènnzwi

ndù bo ke ntshob ntshob màm.

19Me nsi ghù nu netshàm mfe kamànyam

mba nsà num nsitsha'a:

Lem, mbwôge, mba nzembwôge.

20Lagnyam nsi kaṅ tù' njame,

maṅwù tù' lem,

kà lé'njù Tshùaben se ndùb mba se neghamte se'e;

21là mba we lo z'a nsi tsiaṅ lén Tshùaben nà

nsi yôge.

22Ba Israél, bin ju' men ntshob li ndù: Yésu ze Nazarèt, mèn ze Nsi kwé nta mi mbwe bin njam mfa' neta, nu netshàme, mba nsa ts'a ke ngù netèt bin, mba bin lèn nà, 23yen #Mat. 27.35; Mark. 15.24; Luk. 23.33; Yoha. 19.18mèn nà ze Nsi fà mb'a na' nkô, nabte mbèn mbwôgmbwe ntshob là, bin lo zwi i, ngù mbu ben kebwô kwimt'é num fanta'tù, 24Nsi #Mat. 28.5-6; Mark. 16.6; Luk. 24.5lo kwé i ntùm ngùtni vù, mbam i num vù, nummbe vù lo ke ku'ni netshùb i ntùm ze neta. 25Nummbe #Yobk. 16.8-11David num ntshob num i ndù:

Me lo ke njen Tshùaben mbwe àm njoṅ ngelaṅ fa,

nummbe a b'a num bu àm ze zwim,

ndùlala ndù kà sàm ju nyi't'àm.

26A ndùlala ntù àm tshwèt nke ntsiaṅte,

lém sàm nke njob kwi tsiaṅte;

mba wul àm nsi fite ntùm nenywinte.

27Nummbe o ke nsi faṅ yôg sàm ntùm ngô fe ben,

ke bam ndù Mèn o ze nelàn bi.

28O ghù me lèn manze yôg,

o nsi ghù me dun tsiaṅte mbwe o.

29Fèt tshàm, bin bam me tshob bin mba me lèn mfà num tà be David là ndù: A lo kwù, bo tshoṅ i, fi se bèn neke' netèt be tà nkum sènni. 30Là, #Yobk. 132.11; 2 Sam. 7.12-13a na' mb'a ngatshob ntshob Nsi, ndèn ndù Nsi lo ka' yi, ntshob nsaṅlaṅ bwe ndù mo' mèn ntùm nzwil i nsi tswe num diaṅfen se, 31a lo bwôgmbwe njen nelo num vù Kristô, a yi là z'a na' ntshob ndù: Bo lo ke faṅ i ntùm ngô fe ben, wul i ke bi là. 32Yen Yésu li, Nsi bam i num vù; njoṅ yag fa b'a ghakwénta. 33Ngelaṅ ze bu Nsi ze zwim bù' i là, a kwé Ywèt Nelàn ze Tà na' nka' là, naṅ i, mba bin tshwèt njen mbèn nju' là.

34Nummbe #Yobk. 110.1David ke' ko' nèn kamànyam,

là tu wul i num ntshob ndù:

Tshùaben tshob Tshùaben àm ndù:

Tswe num bag bu àm ze zwim;

35tà nkum ngelaṅ ze me nsi yab ghakeban tsho tun nku mo,

ndù bo be nko' nku mu là.

36A bwô njoṅ ndà Israél fa lèn kua' nenùn ndù Nsi lo' yen Yésu li ze bin kwimt'é num fanta'tù là, ngù Tshùaben mba Kristô yi. 37Bo be ju' men ntshob li a kwag yub tà ntùm ntù tshobe; bo tshob Pétro mba tsemo' ghantum ndù: Fèt tshag, bag nsi ghù à ndùke? 38Pétro bùnte bo ndù: Bin kaṅ ntù tsine, bo nyu' mba we lo netèt bin ntse num lén Yésu Kristô ndù Nsi lagte nukebwô tsine; ndùlala bin nsi kwé Ywèt Nelàne. 39Nummbe nka'ni b'a mine, mi bon tsine, mba mi ben tse bo be ngùanesà, ben yàm tse Tshùaben Nsi be nsi tsiaṅ yub là. 40A tshùa num memo' ntshob yàme, nkwé nta, mfà ntag bo, ntshob ndù: Bin yôg wut tsin netèt yen zwiaṅ ben kebwô li. 41Ben tse bo bam ntshob Pétro là, bo nyu' yub ntse. Benntùn nguan ntsha' tat kwi'te num ghantum sen lé'njù là.

Netamte mbwe ben Kristô

42Bo nke nkagtùn ntùm ju nezi'te ghantum mba ntùm netamte fètfèle, nke mbe'te bàn, mbèn nke nde'te Nsi njoṅ yub fa. 43Nebwôg tshùb ntù njoṅ yub fa, nummbe ghantum lo ke ngù nu netshàm mba nsà yàme. 44Njoṅ #Mfa' Gha. 4.32-35benntùn fa tse bo bam nà nke mb'a ntshu ntshù', tshu tshob b'a ntam. 45Bo nke nswèn nà yub mba tshu tse bo ghù là, ngabte nkàb i netèt bo, mfà mba we lo be mb'a ku'ni num i là. 46Bo nke nkagtùn nèn Ndà Nsi njoṅ lé'njù fa ntùm ntù ntshù', nke mbe'te bàn, mbèn nke njù jujù yub ntùm tsiaṅte mba ntùm nefite ntùm ndà tshobe, 47nke ngamte Nsi, nke ngù nu ts'a bwô benntùn nà. Tshùaben nke nkwi'te ben ts'a ke njôg yub là ntùm ntse'te.

Currently Selected:

Mfa' Ghantum 2: BMa

Highlight

Copy