Mfa' Ghantum 3

Neyate kekale

1Pétro mba Yohané ko' nèn Ndà Nsi nyam bwe'e nele'te Nsi. 2Mo' mèn z'a na' mbe kekat fe bam màab là lo be bwe, bo lo ke nkel i njoṅ lé'njù fa, njab nzendà Ndà Nsi, bo ke ntsiaṅ i mbwô nzendà là, ndù a lon tshu benntùn tse bo ke ntsho Ndà Nsi là. 3A be yen Pétro mba Yohané mba bo tshwèt tsho Ndà Nsi là, ndon yub ju. 4Pétro mba Yohané te miag num i, ntshob yi ndù: Lôte yage! 5Kekat te miag num bo kua' mebwô, nke mbéb ndù bo nsi fà ju yi. 6Là Pétro tshob yi ndù: Me ke' ghù silba ke gol lo, là ju ze me ghù là, me nsi fà wù: Num lén Yésu Kristô ze Nazarèt, zine! 7Pétro tshob ndùlala, ntshùb bu i ze zwim, ngù a lo tù. Be num yen ngelaṅ nà nga nku mi nyit, nta; 8a tsho' ketshat, ntsin tù, nto' nezine, ntsho bo à bo Ndà Nsi, nzine, ntsho' ketshat, nke ngamte Nsi. 9Njoṅ benntùn fa yen mb'a tshwèt nzine, ngamte Nsi là. 10Bo be lèn ndù a b'a mèn z'a ke ntswe mbwô nzendà Ndà Nsi, nke ndon tshu là, ntshàm neshu; bwôg bèn ntshùb yub num nu z'a se' kekat là.

11Mba yen mèn ni be ke kô nekag Pétro mba Yohané là, njoṅ benntùn fa nkù nde nèn mbaṅ bo bam ntshundà ze bo ke ntsiaṅ bam ntshundà Salomon nà ntùm netshàme. 12Pétro be yen ndùlala, ntshob benntùn ndù: Bon Israél, numke bin nke ntshàm num ju z'a lo netshùa l'à? Numke bin nke nte miag num bag mba bag lo' à yag neta ke yag nebwôg Nsi lo kà ngù yen mèn ni nzin à?

13Nsi #Netu. 3.15Abraham, Isak mba Yakob, Nsi tà tshag kuni ngafa' i Yésu ze bin na' mfà i, mbèn nga i mbwe Pilato z'a na' nke ndiag nekag i là. 14Bin #Mat. 27.15-23; Mark. 15.6-14; Luk. 23.13-23; Yoha. 19.12-15lo gha mèn nelàne, mèn netsine, mbètte ndù bo ko ndèn ngazwi benntùn, mfà i bin. 15Bin lo ghù mfen yôg kwù, Nsi bam i num vù; bag b'a tse ghakwénta. 16A tshùa num bamntù num lén Yésu, sen lén nà fà neta yen mèn ni ze bin tshwèt njen mbe ndù bin lèn i là. Bamntù z'a num Yésu là yate yen mèn ni yoṅ ntshù' mbwe njoṅ zin fafa.

17Fèt tshàm, me lèn ndù bin mba kamkam tsin na' ngù ndùlal'a ntùm kagni. 18Là Nsi lo tshùa num yen mat là ngù nu z'a na' mbwôgmbwe ntshob num ntshu njoṅ ghatshob ntshob Nsi fa ndù Kristô i nsi yen nge' là, bumte. 19Ndùlala bin kaṅ ntù tsine, mbate ngùninu mine, ndù Nsi bwete nukebwô tsine, 20ndùlala Tshùaben fà ngelaṅ nefite bin, mbèn ntsho' mèn z'a na' ntsho' njab bin, Yésu Kristô.

21Z'a bwô ndù kamànyam lé' i tà nkum ngelaṅ ze njoṅ tshu fa tse Nsi na' ntshob num ntshu ghatshob ntshob Nsi tse tse nelàn tse mbwe nsi bumte là. 22Mosé #Neb. 18.15,18lo tshob ndù: Tshùaben Nsi nsi tsho' mo' ngatshob ntshob Nsi mba me là netèt fèt tsin fà bin; a bwô ndù bin ju' ntshu i num njoṅ nu fa ts'a nsi tshob bin nà. 23Mèn #Neb. 18.19z'a ke nsi ju' ntshu yen ngatshob ntshob Nsi là là, mba bo a' sô i netèt benntùn. 24Be ndaṅndaṅ, njoṅ ghatshob ntshob Nsi fa tse bo tshob nu fe num Samuél mba tse bo tum njam i là, lo tshob nu mfà num tshen lé'njù là.

25Bin #Net. 22.18b'a bon ghatshob ntshob Nsi mba bon kàn se Nsi na' ngwat boa tà be là, a lo tshob Abraham ndù: Njam nzwil o, njoṅ nzwit benntùn fa ntùm njù nsi ghù mbotni. 26Nsi lo bwôgmbwe ntum ngafa' i z'a tsho' là bin ndù a naṅ mbotni num bin, mbèn nkaṅ mba we lo num nukebwô tse.

Currently Selected:

Mfa' Ghantum 3: BMa

Highlight

Copy