Mfa' Ghantum 6

Netsho' ben sammbàa num mfa'

1A lo be num tshen lé'njù là, ghazi'te nke nkwi'te, là ba Yuda tse bo fe Grikia là nke nzwete tun ntô num ba Héber, nummbe bo lo ke ngwag tshob fôg bènnzwi ntùm fa' neghabte jujù s'a ke ntôg njoṅ lé'njù fa là. 2Tse ntshob bàa gham tsiaṅ njoṅ ghazi'te fa, ntshob bo ndù: A ke' bwô ndù bag faṅ netshob ntshob Nsi num fa' téblé num neghabte jujù. 3Fètfèt, bin tsho' ben sammbàa tse bo num nkwé nta mub kua' mebwô, tse bo dun Ywèt Nelàn mba zenu là netèt bin; bag nsi fà sen fa' là bo. 4Mba bag là, bag nsi kagtùn num le'te Nsi mba num fa' ntshob Nsi. 5Men nkwate li bwô njoṅ ntse'te fa. Bo tsho' Etiènne, mèn ze bamntù mba Ywèt Nelàn dun num i là, Filibo, Nikanôr, Timon, Parmena mba Nikôla ze Antiôkia z'a bam nu ba Yuda là. 6Bo tswite yub ghantum, bo le'te Nsi, njab mbu num bo.

7Ntshob Nsi nke nèn be mbwe, ghazi'te nke njàm Yérusalém neyàme, mba mo' bwoṅ ghale'te Nsi ju' ntshu bamntù.

Etiènne mbwe ghatsho'te ntsha

8Etiènne dun kondèn mba neta Nsi, nke ngù nu netshàme, mba nsà ndùbndùb netèt benntùn. 9Là tsemo' ben tse bo tum ntùm sinagogue ze bo ke ntsiaṅ sinagogue ben bo tshu' yub là, tsemo' ba Yuda tse Kiréné mba tse Aléksaṅdria, tse Kilikia mba tse Asia, nkam Etiènne ntsha. 10Bo ke ku'ni netshùa i num zenu mba num Ywèt z'a ke ngù a ntshob là. 11Là bo tù' tènte benntùn ndù bo tshob ndù bo lo ju' a nke ntshabte Mosé mba Nsi. 12Bo kam benntùn, ghakwé mbwe, ghalèn ṅwa'ni Nsi; bo yoṅ nse' be ndende, ngom Etiènne, nèn yi mbwe ntse'te ghatsho'te ntsha. 13Bo tsho bwe, ngù ghakwénta tatte nke ntshob ndù: Yen mèn ni ke' be tsin netshob nukebwô num dù' nelàn mba num ntshù' Mosé. 14Bag lo ju' a tshob ndù: Yen Yésu ze Nazarèt là nsi sate yen dù' li, mbate ntenu tse Mosé na' mfà bag là. 15Njoṅ benntùn fa tse bo tswe ndàntsha là, lo te miag num Etiènne; se i tswe bo mba se Angél là.

Currently Selected:

Mfa' Ghantum 6: BMa

Highlight

Copy