Mfa' Ghantum 7

Ntshob Etiènne

1Ngale'te Nsi ze ndùb bètt'é ndù: A b'a ndùlala ké? 2Etiènne #Net. 12.1tshob ndù: Fèt tshàm mba tà tshàm, bin ju'u! Nsi nekuni lo tèt tà be Abraham, ngelaṅ z'a na' mbe Mèsôpôtamia kà ndo nèn ntswe Haran nà, 3ntshob yi ndù: Tum ntùm ngô o mba ntùm tunndà o, nèn ntùm ngô ze me nsi la'te wù là. 4A #Net. 11.31; 12.4ndùlala a tum ntùm ngô ba Kaldéa ntswe ntùm ngô Haran. A lo be ngelaṅ tàab kwù là, Nsi ghù a tsho ntùm ngô ze bin tshwèt ntswe bwe ndonni là. 5A #Net. 12.7; 13.15; 15.18; 17.8ke fà mo' ju yi nsen ni, mba nda' dù' nete ku i bwe; a ka' yi mba mb'a na' mbe ke ghù mén nà ndù a' fà tshu yi mba tunndà i. 6Nsi #Net. 15.13-14tshob yi ndù nzwil i nsi be ngùn ntùm ngô ba tum; bo nsi lo' yub ghù ba kuan yi, ghùtni yub ngu'njù nkù kuà. 7Nsi #Netu. 3.12bèn ntshob ndù: Ngô ze bo nsi be kuan bwe là, me nsi tsho't'é ntsha. Yen nà nsi be tôge, bo tum bwe; bo nsi ke fa' me yen dù' li. 8Nsi #Net. 17.10-14; 21.2-4; 25.26; 29.31—35.18fà nesi ket bon yi. Ndùlala, Abraham bwe Isak ngù a si ket num mbatte lé'njù fome. Isak ghù be ndaṅndaṅ Yakob, Yakob ghù be ndaṅndaṅ ghate ngô ntshob bàa gham.

9Ghate #Net. 37.11,28; 39.2,21ngô ghù kebàn num Yosèf, nswèn i ndù bo lo' i nèn yi Egipto, là Nsi be bo yi. 10Nsi #Net. 41.39-41nke njôg i num njoṅ nge' tse fafa, mfà zenu yi, mbèn ngù Faraon mfen Egipto kô i, ndo' i ngù ngatô ngô Egipto mba njoṅ tunndà i fa yi. 11Là #Net. 42.1-2mo' kekua lo vù ntùm njoṅ Egipto fa mba ntùm Kanaan; nge' lo b'a ze ndùb, ba tà be ke ghù jujù. 12Yakob ju' ndù nsa num mà Egipto, ntum tà be bwe, num mbwe i. 13Bo #Net. 45.1,16be bèn mbatte nkatte yoṅ bàa, Yosèf ghù fèt tse lèn i, Faraon lèn tunndà ze Yosèf tum bwe là. 14Yosèf #Net. 45.9-10; 17.18; Net. 46.27tum bo nèn ndo' tàab Yakob mba njoṅ tunndà i fa: Benntùn ntshob tàn ṅam sammbàa. 15Yakob #Net. 46.1-7; 49.33swe' nèn Egipto, ntsho nkwù bwe mba ba tà be. 16Bo #Net. 23.3-16; 33.19; 50.7-13; Yosh. 24.32ket yub nèn yi Sikém, njab yub ntùm fi se Abraham na' njun bon Hamor mà Sikém, mfà silba bo là. 17Là #Netu. 1.7-8ngelaṅ ze nka'ni mi Nsi na' nka' Abraham ke ngebte nebumte là, ba Israél nke njàme, nke nkwi'te nèn mbwe Egipto, 18tà nkum ngelaṅ ze mo' mfen na' ndo Egipto ke lèn Yosèf là. 19Yen #Netu. 1.10-11,22mfen nà lo' nkùnkù ntsho nzwit be yi, ngùtni ba tà be ngù bo nke ngua' bonfi, ntshètte yub ndù kà bo yôg. 20Num #Netu. 2.2yen ngelaṅ nà, bo bwe Mosé; a lo bwô num miag Nsi. Bo lo ze i maṅwù tat ntùm ndà tàab. 21Bo #Netu. 2.3-10ghua' i ngon Faraon lo' i nkwiagt'é mba mén i là. 22Mosé zi'te njoṅ zenu ba Egipto fa; a na' mb'a neta mèn num ntshobe, mba mfa' mi.

23Là #Netu. 2.11-15ngelaṅ ze ngu'njù tse bumte ṅam nkuà là, nkwate se' ntùm ntù i ndù a bwô a nèn ndôte fèt tse bon Israél. 24A be yen mba bo tshwèt ngùtni mo' netèt bo là, nto' netshètte ngayennge', njagte mba' i, ndab mén Egipto. 25A lo ke nkwate ndù fèt tse nsi lèn ndù Nsi nsi tshùa mum bu i, fà yôg bo, là bo ke lèn. 26A be mbatte lé'njù a ṅwag netèt bo, ngelaṅ bo ke nzwe là, ntagte yub ndù bo ke ntswe fite, ntshob ndù: Shun tshàm, bin b'a fètfèle, numke bin nke ngùtni wut tsin bin bin à? 27Mèn z'a ke ngùtni mfèl i là tèn i ntshob ndù: We z'a yab o mfen mba ngatsho'te ntsha netèt bag à? 28O diag nezwi àm mb'o lo nzwi mén Egipto nkôg là ké? 29Num #Netu. 18.3-4men ntshob là Mosé kù nèn ntswe mba ngùn nà ntùm ngô Madian, dù' z'a bwe bon bandum bàa bwe là.

30Ngu'njù #Netu. 3.1-10ṅam nkuà lo be tshùa, mo' Angél ṅwag yi kônkwa num mbat Sinaï, ntùm mo' tswe'fiaṅ mbwôge. 31Mosé be yen i, ntshàm num yen neṅwag là; mb'a ke nkù'te nese' njen nà, nze Tshùaben tshob ndù: 32Me b'a Nsi ba tà tsho, Nsi Abraham, Isak mba Yakob. Mosé vètte ke bèn mfèn ntù nelôte. 33Ndùlala Tshùaben tshob yi ndù: Sô nketo' nku mu, nummbe dù' z'o be bwe là b'a tsha' nelàne. 34Ṅ, me yen nge' ben tshàm tse bo be Egipto là, me ju' mba bo tshwèt nkua' là, me swe' netshu' yube. Ndonni se' me tum o mà Egipto.

35Yen #Netu. 2.14Mosé li ze bo na' nga i ntshob ndù: We z'a yab o mfen mba ngatsho'te ntsha à? A yi ze Nsi tum i mba mfen mba mba ngatshu' yub njam ywimte Angél z'a na' ṅwag yi ntùm tswe'fiaṅ nà. 36A #Netu. 7.5; 14.21; Nes. 14.33yi bèn sô yube, a lo be sô yub ngù nu netshàm mba nsà Egipto, ntùm dibantse meba mba num kônkwa num ngu'njù ṅam nkuà. 37A #Neb. 8.15,18yen Mosé là z'a na' ntshob bon Israél ndù: Nsi nsi tsho' mo' ngatshob ntshob Nsi mba me là netèt fèt tsin fà bin. 38Ntùm #Netu. 19.1—20.17; Neb. 5.1-33yen ntse'te z'a be kônkwa là, a yi na' mbèn mbe nganze netèt Angél z'a ke ntshobte bo yi num mbat Sinaï là, mba ba tà be, nkwé ntshob yôg mfà be. 39A yi là ze ba tà be na' mbe ke kô neju' ntshu i là, a yi ze bo gha i, mbèn njam ntùm ntù tshob Egipto, 40ntshob #Netu. 32.1Aron ndù: Nabte ba nsi tse bo nsi ke zin mbwe bag là, nummbe yen Mosé là z'a sô yag ntùm ngô Egipto là, bag ke' lèn ju z'a ghù i là. 41Num #Netu. 32.2-6tshen lé'njù là, bo nabte mén mfô, mfà ju neghamte yen neto là, nke ntsiaṅte mum mfa' mbu mube. 42Nsi #Am. 5.25-27kaṅ wul i, ngua' yub ntùm neghamte ntshu ntsho mfe kamànyam, mba bo kite ntùm ṅwa'ni ghatshob ntshob Nsi là ndù:

Tunndà Israél, bin lo ghamt'àm nyàm mba tshu nele'te

Nsi yi kônkwa num ngu'njù ṅam nkuà ké?

43Bin lo ket ntàb nzwe Môlôk

mba sa Nsi Refan,

tshen neto là tse bin na' nabte neghamte yub là!

Ndùlala me nsi lo' zin nèn yi tà ngùanesà Babilon.

44Tà #Netu. 25.9,40be lo ghù ntàb nzwe kwénta num kônkwa, ndaṅndaṅ mba Nsi na' nte yen nu là, ntshob Mosé ndù a ghù mat mb'a na' njen nà. 45Ba #Yosh. 3.14-17tà tshag lo kwé ndo' nèn yi boa Yoshua ntùm ngô ghakelèn Nsi tse Nsi ta' yub mbwe tà be là, tà nkum ngelaṅ David. 46Nsi #2 Sam. 7.1-16; 1 Kron. 17.1-14ko ndèn, David bètte nenabte dù'ntswe Nsi Yakob. 47Là #1 Fen. 6.1-38; 2 Kron. 3.1-17Salomon bèn nkut ba' yi. 48Nda' ndù Tshùaben Nsi ke' be tswe ntùm mba' mi mbu benntùn bèn nkut là, ndaṅndaṅ mba ngatshob ntshob Nsi tshob là ndù:

49Kamànyam #Es. 66.1-2b'a diaṅfen sàm,

tsha' bèn mbe nko' nku màm.

Tshùaben tshob ndù:

A zit ba' ze bin nsi kut m'à?

Zit dù' z'a be me fite bwe à?

50A ke bu àm bèn ngù njoṅ tshen tshu là fa ké?

51Bin #Es. 63.10tse kekot tsin ta, ntù tsin mba ntoṅ min fùn nà, bin num nke nta tu Ywèt Nelàn njoṅ ngelaṅ fa, bin be à mba kua' ba tà tsin nà. 52A zit ngatshob ntshob Nsi ze ba tà tsin ke' tsho' nku mi kebàn à? Bo lo zwite njoṅ benntùn fa tse bo ke nsoṅ nese' mèn netsin nà, yen mèn netsin nà ze bin ghù ndàm num i ndonni, nzwi i, 53bin tse bin kwé ntshù' Nsi njam fa' ba Angél ke ze là.

Vù Etiènne

54Bo be ju' men ntshob li yantù dun ntùm ntù tshobe, bo fèt nsô num Etiènne. 55Là, a dun Ywèt Nelàne, mbù' miag mi, nke ndôte mfe kamànyam, njen nkuni Nsi mba Yésu ndù a tsin tù num bag bu Nsi ze zwim. 56A tshob ndù: Tshù, me yen kamànyam gha' nte nge mba Mén mèn ndù a tsin tù num bag bu Nsi ze zwim. 57Ndùlala bo kua' mà neta, njèn ntoṅ mube, ntèn bwoṅ ngwù num i, 58ntum yi ntùm ngô, ntamt'é ndoṅ. Ghakwénta yab nkummbaṅ mub mbaṅ nku mo' ménnshum, lén se Saulo. 59Bo be tamte Etiènne ndoṅ, a nke nde'te Nsi ndù: Tshùaben Yésu, lo' ywèt tshàm. 60A kwim ntunkekwi' mi nsi, nkua' mà neta, ntshob ndù: Tshùaben, kà so ntsha tu bo num yen nukebwô li. A tshob ndùlala nkwù.

Currently Selected:

Mfa' Ghantum 7: BMa

Highlight

Copy