Mk 7

Ajô Befarizieñ a metume me bôt betô

(Mt 15:1-20)

1E nde Befarizieñ be nga sulan vôm a nga too, baa Beyeme bekalate bevok, be so'o Yérusalém. 2Ane be nga yene beyé'é bé bevok be ja'a bidi a mo mvit, nalé a ne na teke sôbe mo. 3Amu na, Befarizieñ a Beyude bese, be ne teke di nge be ngenan te taté tu'a mane sôbe mo, mbôle ba tôñe metume me bôbetô.

4E nde fe, éyoñe ba so nseñ, nge be te taté mane sôban, be teke di, a mam mefe abui be nga nyoñ e be bôbetô, aval ane nsôbane mekob, a meviek, a bisoo bi mvot. 5Ane Befarizieñ a Beyeme bekalate be nga sili nye na: Amu jé beyé'é bôé be ne te wulu aval ane ñye'elan metume me bô-betôl ô né, ve ba viane di bidi a mvin ése mo'

6Ane a nga jô be na:

Ezayi a nga yeme fo'o kobô ajô denan,

a mia bôte medu'an,

éyoñ a nga tili na:

Ayoñe bôte di da wumulu ma ve biyaé,

ve minleme miab kik mi tyete ma ôyap.

7Ba kañe ma momo nkañan,

ñye'elan ba ye'ele bôte ki

ô too mebendé me bôt.

8Mia viane li'i, metiñ me Zambe, mi nga tôñe metume me bôt. 9Yaa, mebendé me Zambe e me mia tindi a mvuse mo, na mi viane ba'ale metume menan mia bebien. 10Môze ny'a nga jô na: Ô semé'é éso ba nyua, a na: E môt a kobô ésaa *abé, nge nyia, a ye fo'o wu a si. 11Mfa'a wônane kik mia jô na: Nge môt éziñ a jô ésaa nge nyia na: E jôm ése ô ne bi mfi e be ma é nto korban, nalé a tinane na mvean asu Zambe, 12mia jô'é nye teke beta bo mone jôm éziñ asu ésaa nge nyia. 13Nalé ate ajô Zambe e nde mia wôé ntuk, amu metume menan mia zu mia kalane bôt. Mia bo fe mam mefe abui avale te. 14E nde a nga beta loone babôtô a jô be na: Mia bese tameka vô'ôlane ma, a tu'a wôk. 15Teke jôm éziñ ja so atan é za'a nyiin abume môt é ne ngule ya ve nye nsem. Ve mame ma so abume môt me za'a kui nseñ, e me ma ve môt mvit e *nsisim. 16Nge môt éziñ a be'e melo ya wôk, a wô'ôk! 17Eyoñ a kandaneya a bôt a ke *nda, ane beyé'é bé be nga sili nye mesuu ya *nkana ôte. 18E nde a jô be na: Nde mia fe mi ne be-te-fe'e avale di! Ye mi nji yeme wô'ô na e jôm ése ja so atan é kele abume môt été é se ngule ya ve nye mvit e *nsisim. 19Amu é nji nyiine nye e *nlem été, ja ke ve abum, é ke fe lôt a ke fé? Nalé a nga mane fubu bidi bise. 20E nde fe a zu jô na: E jôme ja so môt mfa'a ya été é za'a kui atan, e nje éte ja ve môt nsem. 21Amu na, mfa'a y'été, e minlem mi bôt été, mbia b'asimesan ba so, ajô bibon, wup, ñwôane bôt, 22*mejian, ôzañ akum, mbia *nlem, medu'an, bijabô, ébamba, mbia be mis, nkoban Zambe ébiasé, mebun, mboan ôkukut. 23Mame mete mese me ne *abé, ma so mfa'a ya été, me nga ve môt mvit e *nsisim.

Mbunane minga Sirôfénis

(Mt 15:21-28)

24Akôlô a nga kôlô valé, ane a nga ke mfa'a ya Tir. Eyoñ a nyiineya e *nda été, a nji kômbô na môt éziñ a yeme nalé; ve da teke zene ya sobô. 25Eté été, minga éziñ a nga wô'ôtane nye, ngone jé ki é bili mbia *nsisim, e nde a nga ke so a zu kute nye meboñe si. 26Minga ate a mbe ngon Grék, teke a too e ñyebe Beyude, ngon Sirôfénis e mebialé. Ane a nga ye'elane nye na a vaa ngo jé mbia *nsisim. 27Ane a nga jô nye na: Tame jô'é *bon e mbe be taté di, be jaé, amu e nji bo mvaé na be nyoñe bidi bi *bon, a wua bie bo-bemvu. 28E nde minga ki a nga yalan a jô nye na: Wo bele fo'o, a Nti; ve da ke bo-bemvu ba bo fe be ja'ak menyuñe bidi bi *bon e tebele si. 29Ane a nga jô nye na: Amu éfia jôé te, kele ñhe, mbia *nsisim a kôlôya ngo jôé e nyôl. 30Ake a nga ke *nda jé, ake koé mon a bôô énoñ, mbia *nsisim a suuya nye.

Yésus a bo môt a too ndok a mvuk mvo'é

31Akôlô a nga beta kôlô si ya Tir, e nde a nga ke lôte Sidoñ, éfas ya mañe me Galilé, ézezañe si ya Dékapôl. 32Ane be nga zuu nye môt a too ndok a mvuk, be nga ye'elane nye na a betéé nja'a nye mo. 33Avaa a nga vaa nye e bôt été a kelee nye étam e fefe, e nde a futi nye anyu e melo été, a tui menden, a nambe nye ôyem, 34a bete mise yôp, a suu mvebe, a jô nye na: Effata, nalé a tinane na: Yombô'ô. 35E nde melo me nga yombô nye, a été été e nkol ô nga tii nye ôyem ô mane fe tyi'i, a nga kobô ne sañe sañ. 36Ane a nga ve be atiñe na, be bo te kate de môt éziñ. Abim a nga bo a bendé'é be, abime te e nde be kik be nga dañe dañe ke ba be'ele de. 37Be mbe be semé'é angôndô ya abui, be jô'ô na: A boya mame mese mvaé, a bo'o mindôndok na mi wôk, a bo'o mimvumvuk na mi kobôô.

Currently Selected:

Mk 7: BDCB

Highlight

Copy