Yoa 21
21
Yésus a yené e be beyé'é zamgbwa
1Mvuse éte, ane Yésus a nga zu beta liti beyé'é nyôle jé e mañe ya Tibériade. A nga liti be nyôl avale di: 2Be mbe vôma wua, Simon Pierre, baa Thomas ba loone na Didimi, a Natanaél a so'o Kana ya Galilé, a bone be Zébédé, a beyé'é befe bebaé. 3E nde Simon Pierre a zu jô be na: Ma tame ke yob kos. Ane be nga jô nye na: Bia be wo bia ke. E nde ñhe be nga dañ éfunga été. Ve da alu te be nji ke bi jôm éziñ. 4Esala tyé, Yésus a ntele e kindi'i mañ, ve beyé'é teke yeme na a ne Yésus. 5Ane Yésus a nga jô be na: A *bon, ye mi bili fo'o jôme ya di? E nde be nga yalane nye na: Teke'e jôm. 6Ane a nga jô be na: Tameka yaan avot mfa'a éfunga ya mbo nnôm, wôna mia ye bi. E nde be nga ya de, be nga kate dutu avot, amu kos é dañeya abui. 7Eyoñe te ñye'é Yésus a mbe a nyeke'e a nga jô Pierre na: Nti le! Awô'ô Simon Pierre a nga wô'ô na, a ne Nti, e nde a nga tiñeti éyé angeteñ, amu a mbe soé, a wua émiene e mañ été, 8beyé'é bevo'o be nga zu éfunga été, amu kindik é nji ke fe bo be ôyap, ve bebé tañ menyi'i me mo mintete mibaé, be za'a ba dutu avot kos. 9Eyoñe be maneya sis e kindik, be nga yene ma'a me nduane nkôban, kos a belet bi bete été yôp. 10E nde Yésus a nga jô be na: Za'ane kos éziñe ya nyô mi ndôme bi. 11Ane Simon Pierre a nga dañ éfunga été a mane dutu avot e kindik, njalan a beta be kos tañe ntet a mewôm metan a éla. Ve akôsabo abim abui te, avote teke nyaé. 12E nde Yésus a zu jô be na: Zaka dian! Teke'e môt éziñ ya nsamba beyé'é a nga zômbô sili nye na: O ne za? Amu be nga yeme na a ne Nti. 13Ane Yésus a nga zu nyoñe belet a ve be je, avale te fe kos. 14Eyoñe lale le a nga liti beyé'é bé nyôl, e mvuse ñwômane soñ a kôlô'ô miñwuan.
Yésus baa Simon Pierre
15Eyoñe be maneya di e nde Yésus a nga jô Simon Pierre na: A Simon mone Yôanes, ye wo nye'e ma ô dañe bôte ba? Simon nyee nye na: Owé, a Nti, wo yeme na ma nye'e wo. Ane Yésus a nga jô nye na: Ba'ale'e bone mintômba bam. 16Ane a nga jô nye éyoñe baa na: A Simon mone Yôanes, ye wo nye'e ma? Simon nyee nye na: Owé, a Nti, wo yeme na ma nye'e wo. E nde Yésus a nga jô nye na: Ba'ale'e mintômba miam. 17Ane a nga beta jô nye éyoñe lale na: A Simon mone Yôanes, ye wo nye'e ma? Valé ñhe Pierre a nga wô'ô ôlun, amu a nga jô nye éyoñ lale na: Ye wo nye'e ma? E nde a nga jô nye na: A Nti, wo wo yeme mame mese, ke womien wo kôme fe yeme na ma nye'e wo. Ane Yésus a nga jô nye na: Ba'ale'e mintômba miam. 18Bebela, bebela fo'o nye ma kate wo na, éyoñ ô mbe ésoé ndôman, ô tiñeti'i womiene kandé, ô kele mulu môé mfa'a ôse wo kômbô. Eyoñe ke wo ye bo nnôm, wo ye bo ô same ve mo, môte mfe nye a nga tiñeti wo kandé angeteñ, a kee wo e mfa'a ô nji kômbô. 19A nga kobô nalé a liti aval awu avé Pierre a ye vee de Zambe duma. Eyoñ a maneya kobô nalé, ane a nga jô nye na: Tôñe ma.
Yésus baa ñye'é a nga nye'e
20E nde Pierre a nga kôñelan a yene ñye'é Yésus a mbe a nyeke'e a za'ak, e môt a nga ye'ebe Yésus e tôé, be ja'ak, a sili nye na: A Nti, za nye a koñe wo' 21Ayene Pierre a nga yene nye, ane a nga jô Yésus na: A Nti, nyuna nye a ye bo aya' 22E nde Yésus a nga jô nye na: Nge ma kômbô na a tabee akekui ma ye so, ô nee za ajôô été? Wô tôñe ma. 23Foé é ke ñhe jimbi a mialan e be bobenyañe na ñye'é ate a ye bo te wu. Ve Yésus ki, nye a nji jô nye na a ye bo te wu, ve na: Nge ma kômbô na a tabee akekui ma ye so, ô nee za ajôô été' 24Nye'é ate e nye a kañete mame ma a tili me, a bia yeme na nkañetane wé ô ne bebela.
25Mam mefe Yésus a nga bo me ne abui abui, nge be nga ye tili me mese daa daa a anyenyame mam y'été, ma buni na, ja'ane si ndôn ébiene nyô, é nga ye bo te bi vôm a ne yiane bekalate be nga ye tiliban.
Currently Selected:
Yoa 21: BDCB
Highlight
Share
Copy

Want to have your highlights saved across all your devices? Sign up or sign in
Bible en langue Bulu © L'Alliance Biblique du Cameroun, 2007, 2015.