Met 32

1Ndibe tyé, Laban a nga kôlô si, a mane wubane bendômane bé a bengo bé, a a nga botane be. Wôna Laban a nga ke asu ya bulane jale dé.

2Yakob a nga ke dulu dé ôsu a beéngele be Zambe be nga ke koone nye. 3Eyoñ a nga yene be, Yakob a nga jô na: Minkane mi Zambe le! A a nga yôlé vôm ate jôé na: Mahanayim.

Yakob a lôm Esô mbañete

(Sam 9:91:11; 2 Bb 6:15-17; Met 33:1-3; Sam 50:15; Met 31:3; 28:10-15)

4Yakob a nga lôme bebe'e mimbañete ôsu vié e be monyañe wé Esô, e Séyir, afan Edom. 5A nga bendé be na: E jam mia ye jô masa wom Esô e nde di: Avale di e nde mbo ésaé wôé Yakob a jô: Me nga tabe be Laban a me nga langane wé a kui éyoñe ji; 6me bili benyak, bijakas a mbame bone biyem, bebo bisaé befam a binga, ma lôme bôt be kate de masa wom, nalé ma ye yene mvame be nye.

7Bebe'e mimbañete be nga bulane be Yakob a jô na: Bi nga ke e be monyoñ Esô; nye fe a zu tôbane wo a nsamba bôte mintete minyin. 8Woñ a biyebe bi nga bi Yakob. A nga kabe bôte be mbe a nye ngab ébaé, nalé mbame bone biyem a mbame beta biyem, a bekamel. A nga jô na: 9Nge Esô a dili wua ya minkan, wu wo li'i wo ye bo ngule ya mate. 10Yakob a nga jô na: E Zambe ésaa wom Abraham, e Zambe ésaa wom Izak, Nti, Nyô a nga jô me na: Bula'an e si jôé, e tin abialé dôé, a ma ye liti wo mvaé! 11Ma dañe tyôtyoé a mvame jôé ése a asu zôsôôô ase ô nga liti mbo ésaé wôé; amu me nga dañe Yordane nyô a ntume wom, a éyoñe ji me mbili minkane mibaé. 12Ma ye'elane wo na: Kôté'é ma e mo me mojañ, e mo m'Esô! Amu ma ko woñe na a zu a bôme ma, nalé fe nyia a *bon. 13A wo ô nga jô me na: Ma ye liti wo mvaé a ma ye bo mvoñe bôte jôé ane nsele'e ya mañ ô ne teke alañé.

Yakob baa Esô ba tôban

(Met 38:8-11; 1 S 25:13-28)

14E nne Yakob a nga lôt alu valé. A nga nyoñe jôm é mbe énjé, asu ya ve monyañe wé Esô mvaka: 15beyale bikela mintete mibaé, a beyôme bikela mewôm mebaé, beyale mintômba mintete mibaé a beyôme mintômba mewôm mebaé. 16Beyale bekamel mewôm melaa, a bone be mbe be nyañek, beyale benyak mewôm menyin a beyôm awôm, beyale bijakas mewôm mebaé a beyôm awôm. 17A nga kalane bie bebo bisaé bé, mbam ôse nkandan a mi mivok, a a nga jô bebo bisaé bé na: Lôtane ma ôsu a li'ane nkandan e zañe mbame biyem a wu ôvok. 18A nga bendé mbo ésaé a nga tele ôsu na: Eyoñe mojañ Esô a ye tôbane wo a sili wo na: O ne mbo ésaé za? Wo ke vé? A za a nee mbame biyem ô ne wo ôsu wu' 19Wo ye yalane na: Mbo ésaé wôé Yakob; mvaka a lôme masa wom Esô. Emiene le a zu bia mvus. 20A nga bendé mbo ésaé baa jame da, nyô lale a ba bese be mbe be tôñe mimbame biyem, nye na: Avale di e nde mia ye kobô masa wom Esô, éyoñe mia ye koone nye. 21Mia ye jô na: Tame yene mbo ésaé wôé Yakob le a zu e mvuse jangan, amu a mbe a jô'ô na: Ma ye je'e nye *nlem a mvaka ja ke ma ôsu nyô; wôna ma ye yene nye asu, a ndô'ôtô na a ye nyoñe ma *mvo'é. 22Mvaka é nga lôte nye ôsu, a alu te, a nga li'i minkan. 23Alu te ebien, a nga kôlô si, a nyoñe binga bé bebaé, bebo bisaé be binga bé bebaé a bone bé awôm a wua, a dañe mbale Yabôk. 24A nga nyoñe be, a bo be na be dañ ôtôñ a biôme bise a nga bili.

Yakob a juane môt éziñ

(Oz 12:4-5; 2 Ko 12:7-10)

25Yakob a nga li'i étam. Ane môt éziñ a nga juane nye a kui melendé me tyé. 26Eyoñe môt ate a yeneya na a nji bo nguleya dañe nye, a nga bibi nye e jua y'angeteñ nté be mbe be ju'an. 27Môt ate a nga jô na: Jôké'é ma me ke, amu tyé é nga lendé. Yakob a nga yalane na: Me se nguleya suu wo ô ke te na ô mane botane ma. 28Môt ate a nga jô nye na: Jôé dôé é ne aya? Nye na: Yakob. 29Môt ate a nga beta nyoñe nkobô na: Ba ye bo te beta loone wo jôé na Yakob, ve na Israél; amu ô maneya juane Zambe a bôt, a dañe be. 30Yakob a nga sili nye nsili na: Ma ye'elane wo, kate ma jôé dôé. Nye na: Amu jé wo sili jôé dam? A a nga botane nye valé. 31Yakob a nga yôlé vôm ate jôé na: Péniél, amu a nga jô na: Me yeneya Zambe mesu mesu, a nsisime wom wo te kôme nyiñ. 32Jôp e mbe e tô'ô éyoñ a nga lôte Penuél, Yakob a mbe a feñke'e ébôk. 33Ajô te bone b'Israél be ne teke di nsôn ô ne jua ya angeteñ; amu Zambe a nga nnambe Yakob ébôk.

Currently Selected:

Met 32: BDCB

Highlight

Copy