Genesis 34
34
Dinai nosṭo ocokʼkan
1-2Leawakʼ kukhire Dina ńutuman Jakobren okoeṭakʼ kuṛiye janamlen uni do mitʼdin onḍenko kuṛi sãote ńapamokʼ lạgitʼe oḍoken khan Sikem ńutuman mitʼṭen hoṛakʼ mẽtʼreye paṛaoena. Nui Sikem do Hiwikoren sordar Hamorren hopone tahẽkana. Sikem do uniye sapʼ idikedete jor julumkate uni tulucʼe giticʼmitʼena are nosṭokedea. 3Ar Dinare ạḍi mon tolentaea. Uni do Dinae dulạṛkedea ar acʼakʼ dulạṛ reakʼ kathae baḍae ocokedea. 4Sikem do acʼren baba Hamore metadea, “Nui kuṛi sãote ińakʼ bapla reakʼ bebostaeme.”
5Jakob doe ańjomkeda Sikem do acʼren kuṛi Dinai bạṛicʼ akadea. Unre uniren hoponko do ṭạnḍire palren mĩhũ-merom gupiko lạgitʼko calao akan tahẽkana, ar onko ạuriko ruạṛ hijukʼ hạbicʼ uni do hapegeye tahẽyena.
6Ar Sikemren apat Hamor do Jakob sãote katha roṛ lạgitʼ nagraha khone oḍok hecʼena. 7Jakobren hoponko ona kathako ańjomketʼ khan gupi ṭạnḍi khonko hecʼena. Ar monre cetʼleka kosṭoko ạikạuketʼ onkage ạḍi bạṛicʼko raṅgaoena, ente Sikem do Jakobren hoponerawakʼ kũạritetʼe nosṭoketʼtaete Israel lạgitʼ mitʼṭecʼ opoman reakʼe kạmikeda, one okaṭakʼ kạmi do baṅ ganokʼakʼ tahẽkan. 8Menkhan Hamor do Jakob ar uniren hoponkoe metatʼkoa, “Ińren hopon do amren kuṛire ạḍi mon lagao akantaea. Onate ińren hopon tulucʼ amren hoponera baplaye lạgitʼ baṛe emokʼme. 9Ar ale sãote bapla reakʼ bebostaepe. Aperen hoponerako emalepe ar aleren hoponerako hõ ape hataokope. 10Ape do ale talare girobasokʼpe. Ente goṭa disạm do ape samaṅrege menakʼa. Nonḍege tahenpe, ar apeakʼ kusi leka dãṛã baṛaepe ar dhon sompottiren mạlik hoyokʼpe.”
11Ona chaḍa Sikem hõ kuṛiren apattetʼ ar boehakoe metatʼkoa, “Iń cetanrepe daya akan khan enḍekhan ape okape khoj onageń emapea. 12Noa bapla reakʼ gonoṅ ar dan lekate ape okaṭakʼpe goṭae onageń emokʼa. Menkhan aperen kuṛi baṛe iń sãote baplayepe.”
13-14Sikem do onkoren boeha kuṛi Dinawakʼ kũạritetʼe nosṭoketʼ iạte Jakobren hoponko do cạtur salakʼ unkinko roṛ ruạṛatʼkinạ, “Bin khatna akan nonkan okoe tulucʼ hõ aleren misera do bale bapla daṛeaea ente ona do ale lạgitʼ bemanotakʼ kana. 15Menkhan mitʼṭecʼpe kạmi lekhan ale dole rạjigea. Ona do hoyokʼkana, aperen sanam herel hoṛ ale leka khatnakʼ hoyokʼtapea. 16Ar enḍekhan aleren kuṛiko apele emapea ar aperen kuṛiko hõ alele hataokoa; ar ale do ape sãote mitʼ jạt lekale tahena. 17Menkhan aleakʼ katha bape ańjom ar khatnakʼ bape rebenokʼ, enḍekhan aleren miserawante nonḍe khonle calakʼa.”
18Onkoakʼ noa kathate Hamor ar uniren hopon Sikem do ạḍikin kusiyena. 19Ar gharońjren manotan hoṛ Sikem do ar bae bilomletʼte uni doe rạjiyena, ente Jakobren kuṛi lạgitʼ ạḍiye ṭanokʼkan tahẽkana. 20Ona iạte nagraha reakʼ phaṭok duạr ṭhen senkate Hamor ar uniren hopon Sikem do onḍenko hoṛkin metatʼkoa, 21“Noko hoṛ do aboren gate kanako. Ar aboakʼ disạmre onko tahen lạgitʼ hõ aema jaega menakʼa. Noko do nonḍegeko tahẽ ocowa ar akoakʼ kusi lekako dãṛã baṛaema. Ar abo do onkoren kuṛiko bon hataokoa ar aboren kuṛihõ onko bon emakoma. 22Eken mitʼṭecʼ bon kạmi lekhan onko do abo sãoteko girobasokʼa ar mitʼ jạt leka tahenko rạjigea. Ona do hoyokʼ kana, onko leka aboren sanam herel hoṛ do khatnakʼ lagao abona. 23Onkoren ḍaṅgrako-bhiḍiko, dhon-sompotti ar sanam mĩhũ meromko hõ abo talaregeko tahena. Onate dela, onkoakʼ kathare bon rạjikʼma. Enḍekhan onko do abo sãoteko girobasokʼa.” 24Onate nagraharen sanam herel hoṛ do Hamor ar uniren hopon Sikemakʼ kathateko rạjiyena, arko khatna ocoyena.
25Niạ pe din hilokʼ tinre herel hoṛ do hasoteko thakao caba akan tahẽkana unre Dinaren boeha, metakʼme Jakobren banar koṛa Simeon ar Liwi do tarwaṛewante nagrahate bolokate mitʼke mitʼ herel hoṛkin gocʼketʼkoa. Nonka hoyokʼ do nagraharen celege bako hudis akatʼ tahẽkana. 26Unkin do Hamor ar uniren hopon Sikem hõkin gocʼkedea ar uniyakʼ oṛakʼ khon Dinakin oḍok ạgukedea. 27Ar Jakobren eṭakʼ hoponko do ona nagrahate bolokate okare akoren miserate nosṭo ocolen onḍe eken mạ̃ṛĩko ńelketʼ khan ona nagrahako luṭkeda. 28Ar nagraha bhitri ar bahrere onkoren tinạkʼ ḍaṅgra-bhiḍi ar gadhako tahẽkan onko sanamko hatketʼkoa. 29Onko do onkoakʼ sanam dhon-durib ar onkoren gidrạko ar maejiukoko luṭketʼkoa; ar onkokoakʼ oṛakʼre tahẽkanakʼ cetʼge bako bạgi oṭowada.
30Jakob do noa tayom Simeon ar Liwiye metatʼkinạ, “Aben do noa disạmren hoṛko ṭhen, bạ̃ṛtikaete Kananrenko ar Pherisiko ṭhen sĩṛĩcʼge ben so ocokedeńte muhinre ben paṛao ocokedińa. Aboren hoṛ doko thoṛagea. Onko do jarwa mitʼkate abo cetanre jhãpko ema, ar onate iń do gharońj sudhạń meṭao utạrokʼa.”
31Simeon ar Lewi dokin menkeda, “Menkhan ạlińren misera sãote cetʼ jãhãege kusumbi lekae beohara?”
Currently Selected:
Genesis 34: SBT
Highlight
Share
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
