Genesis 33
33
Esau ar Jakobakʼ ńapamokʼ
1Jakob do horte calakʼ jokhecʼe ńelkeda, Esau do pon sae hoṛkowante acʼ secʼe hijukʼkana. Unre uni do Lea, Rahel ar unkin banar kạ̃ṛmĩ erakin talare acʼren gidrạkoe hạṭińketʼkoa. 2Pạhilre uni do kạ̃ṛmĩkin ar unkinren gidrạkoe dohoketʼkoa. Ona tayom do Lea ar uniren gidrạko ar tayom utạrre do Rahel ar Josephe dohoketʼkinạ. 3Menkhan acʼ do onko laha lahateye sen idiyena. Ar sen idikʼ jokhecʼ uni do otre eae dhao ombakʼkate dadattetʼe ḍobokʼadea ar nonkate uni ṭhene seṭerena. 4Unre Esau do uni ṭhen ńir hecʼenteye hạṛupʼkedea are kokekedeteye cokʼadea. Ar ona tayom do bana hoṛkin rakʼana. 5Tayomte Esau do onko maejiu ar gidrạko secʼe beṅgetʼketʼteye kulikedea, “Am sãote noko doko okoe kana?”
Jakobe menkeda, “Isor do dayate amren guti noko gidrạkoe emakadea.”
6Pạhilre kạ̃ṛmĩkin ar unkinren gidrạko senkate Esauko ḍobokʼadea. 7Ona tayom do Lea ar acʼren gidrạko uniko ḍobokʼadea. Ar mucạtʼre do Rahel ar Joseph hõ unikin ḍobokʼadea. 8Unre Esaue menkeda, “Horre one okoe dolbolko sãoteń ńapamen onako do cetʼkana?”
Jakobe menkeda, “Onko do ińren kisạ̃ṛ ṭhen dayań ńam lạgitʼ kanako.”
9Menkhan Esaue menkeda, “Eya, ḍherge hoyakana. Amakʼ oka menakʼtam ona do amakʼge tahẽ ocowakʼme.”
10Jakobe menkeda, “Baṅ, baṅ, nehõram kạnạń, iń cetanre amakʼ daya menakʼ khan enḍekhan noako dan baṛe hataotińme. Ar tinre kusi montem ataṅińạ unre iń ṭhen do Isorakʼ mẽtʼãhã ńel lekage hoyokʼtińạ. 11Isor do ạḍiye daya akawạdińa, ar ińakʼ do ḍherge menakʼtińạ. Ona iạte okaṭakʼ daniń ạguakatʼ ona do dayakate hataome.” Jakob nonkae nehõren khan Esau do onkoe ataṅketʼkoa.
12Tayomte Esaue menkeda, “Dela, ńitokʼ do bon senokʼma. Ar iń do am sãotegeń calakʼa.” 13Jakob do uniye metadea, “Am ińren kisạ̃ṛ dom baḍaegea, noko gidrạkoakʼ umer do komgetakoa. Ona chaḍa okoeko ḍaṅgra ar bhiḍi akoren hoponko toako nunuako kan onko hõ disạko hoyokʼtińạ. Ente mitʼdinte usạra idileko khan enḍekhan sanamgeko gujukʼa. 14Onka do baṅa, amge bickom iń lahate calakʼme. Ar Seyirte am ṭhen ạuriń seṭerokʼ hạbicʼ samaṅren mĩhũ-merom palko ar gidrạkoakʼ calakʼ reakʼ daṛe bujhạukate iń do bại bạiteń calakʼa.”
15Unre Esaue menkeda, “Enḍekhan iń sãoten thoṛa hoṛ do am ṭheniń doho oṭokakoa.”
Jakobe menkeda, “Ona reakʼ jãhãn jạruṛ do bạnukʼa? Ińren kisạ̃ṛ ṭhen dayań ńamakatʼ onage ḍhera.”
16Khange Esau do enhilokʼge Seyirteye ruạṛ calaoena, 17ar Jakob doe uṭhạuente Sukotteye calaoena. Ar onḍe do acʼ lạgitʼ mitʼṭecʼ oṛakʼe benaokeda ar acʼren mĩhũ-merom palko lạgitʼ hõ oṛakʼkoe benaokeda. Ona iạtege ona jaega reakʼ ńutum do Sukot dohoyena (metakʼme “Chạuni oṛakʼ ”).
Jakob do Sikemreye girobasokʼ kan
18-19 #
Josu 24.32; Jhn 4.5 Padam-Aram khon oḍok hecʼ tayom Jakob do napaetege Kanan disạm reakʼ Sikem nagrahateye seṭerena. Uni do nagraha sorre tạmbui ṭaṅgaokeda ar tayomte ona jumi do Sikemren apat Hamorren hoponko ṭhen khon mitʼsae rupạ sikạteye kirińkeda. 20Ar onḍe do mitʼṭecʼ pinḍe benaokeda ar ona reakʼ ńutum do El-Elohe Israele dohokeda (metakʼme “Isor doe Israelkoren Isor kana”).
Currently Selected:
Genesis 33: SBT
Highlight
Share
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
