1 Korinthiko 13
13
Dulạṛ reaṅ
1Manwakoakʼ ar serma goḍetkoakʼ pạrsiteń roṛlere hõ dulạṛ bạnukʼtiń khan, raṛaṅ raṛaṅokʼkan ghonṭa ar chaṅ chaṅokʼkan kortalgeń hoyakana. 2#Mat 17.20; 21.21; Mrk 11.23 Nạbi leka roṛ reakʼ ektiạri tahentiń, ar sanam okoakʼ iń baḍae daṛeakʼ ar joto lekan akel tahentiń, se buruko ucạṛ daṛeakʼ leka purạ biswạs tahentiń, menkhan dulạṛ bạnukʼtiń khan, cetʼ porho hõ bạnukʼtińạ. 3Jãhãnakʼge menakʼtiń ona joto do reṅgecʼ orecʼko jom ocoko lạgitʼ iń danlere ar atar giḍikʼ lạgitʼ ińakʼ hoṛmoń alaelere hõ, dulạṛ bạnukʼtiń khan cetʼ porho hõ bạnukʼtińạ.
4Dulạṛ doe soboria, dulạṛ doe susṭoba; dulạṛ do bae hiskạwa, 5dulạṛ do bae phulạukʼa, dulạṛ do bae becola, dulạṛ do bae hạr dogokʼa; dulạṛ do bae kaḍraokʼa; dulạṛ do bae adopa; dulạṛ do bạṛicʼ bae hisạba; 6dulạṛ do bedhoromakʼte bae rạskạkʼa bickom oka sạriyakʼkan onateye rạskạ midokʼa. 7Dulạṛ do sanamakʼgeye sahaoa, sanamkogeye pạtiạuakoa; sanamakʼrege ase dohoya; ar sanamakʼgeye sumbhrạua.
8Dulạṛ do tisge baṅ mucạdokʼa. Nạbi lekate roṛ reakʼ ektiạri cabakʼa, ar eṭakʼ pạrsite roṛ reakʼ ektiạri menakʼtae khan ona do adokʼa; ar baḍaeakʼ menakʼ khan ona hõ mạutạkʼa; 9ente abon do jotowakʼ purạute babon baḍaea, ar nạbi lekate purạute hõ babon nạbiyeda. 10Menkhan purạwakʼ seṭerlen khan bin purạuwakʼ do mạutạkʼa.
11Iń do gidrạń tahẽkanre gidrạ lekań roṛetʼ tahẽkana, gidrạ lekań hudisetʼ tahẽkana ar gidrạ lekageń bicạretʼ tahẽkana; ar ńitokʼ doń sẽṛã akana, onate gidrạ reakʼakʼko doń bạgi akada. 12Abo do ńitokʼ ạrsire pusṭạute babo ńeleda, menkhan unre samna sạmni bon ńel ńama. Iń do ńitokʼ okań baḍaekan ona do purạute bạń baḍaea, menkhan Isor do cetʼleka purạteye baḍaeyediń kan, unre onkage purạteń baḍaea.
13Menkhan ńitokʼ do biswạs, as, ar dulạṛ noako penege tahenkana; menkhan noako modre joto khon soros utạrakʼ do dulạṛkangea.
Currently Selected:
1 Korinthiko 13: SBT
Highlight
Share
Copy
Want to have your highlights saved across all your devices? Sign up or sign in
Santali Bible © Bangladesh Bible Society, 2021.
