मर्कुस् 9
9
1ओसेम् येसुचे थेङ्यीमात, “ङ एङ्यीमात देमेन्नो पङ्ब, चुरी रप्टीबे म्हीमान्हङ्री डेत्-डेत्चे पर्मेस्वर्की य्हुल् ङ्हच्छ्यङ् सक्तीरी खबल अम्रङ्गदे थेङ्यीमा स्यीस्ये अरे” बी सुङ्ज्यी।
येसुइ ल्हीः पोबल
(मत्ती १७:१-१३; लुका ९:२८-३६)
2डुरेत् लीप्चे येसुचे पत्रुस, याकुब ओसेम् युहन्नात र्हङ्तेङ् बक्च्य नोम्ज्यीम् नोबे गङ् गीःरी स्येःज्यी। हुजुरी थेङ्माकीनो मुबल। ओसेम् थेङ्यीमाचे च्यान-च्याननो येसुइ ल्हीः पोज्यी।#२ पत्रुस १:१७,१८ 3ओसेम् थेङ्की न्हम्ज य्हक्को तर् तज्यी। जम्बुलीङ्री चोतेबे तर् खल्चेएनो ख्रुज्यीम् तनलब अखम्।
4ओसेम् हुजुरी मोसातेङ् एलीयात येसुतेङ् बक्च्य तम् पङ्टीबल थेङ्यीमाचे म्रङ्ज्यी। 5ओसेम् पत्रुसचे येसुत, “लोप्पोन्, ङ्यीमा चुरी तब ज्यब तनेम्। ङ्यीमाचे चुरी गोरा सोम् स्य्हेङ्गे, गीः थेङ्की लागीरी, गीः मोसाइ लागीरी ओसेम् गीः एलीयाकी लागीरी” बी पङ्ज्यी। 6थेङ्यीमा य्हक्को लोङ्बल तज्यीम् पत्रुसचे त पङ्थोब बी अस्ये। 7हुजु बेलोरीनो मुक्प खज्यीम् थेङ्यीमात उप्ज्यी। ओसेम् मुक्प न्हङ्चे चोतेबे केत् युज्यी, “चु ङइ म्होइबे ज य्हीन्ब, एङ्यीमाचे थेइ तम् ङ्येनो।”#मत्ती ३:१७; मर्कुस् १:११; लुका ३:२२ 8चोले पङ्ब थ्येःब बीसेम् थेङ्यीमाचे हुजुरी कोरोरो च्यामम् येसु बीम ल्हो-ल्हो खलेएनो अम्रङ्।
9ओसेम् गङ्चे क्रसु फप्युटीबे बेलोरी येसुचे डबमात, “म्हीइ ज स्यीज्यीम् लीक्यम् स्यीब ग्यम्से असो गदे तीङ्यी म्रङ्बे तम् एङ्यीमाचे खल्तेएनो थस्येतो” बी सुङ्ज्यी।
10होत्तज्यीम् थेङ्चे सुङ्बे तम् थेङ्यीमाचे ङ्येन्ज्यी। तर थेङ्यीमाचे र्हङ्न्हङ्, “स्यीज्यीम् सोब पङ्बलम् त य्हीन्ब?” बी तम् लज्यी। 11ओसेम् थेङ्यीमाचे येसुत, “धर्म लोप्पोन्माचे ङोन्ग्यम् एलीया अगम्बक्त खथोब बी तले पङ्ब?” बी ङ्योत्ज्यी। #मलाकी ४:५; मत्ती ११:१४
12येसुचे थेङ्यीमात सुङ्ज्यी, “य्हीन्ब, ङोन्ग्यम् एलीया खज्यीम् जम्मनो तम्मा टोप् लस्ये मुब। तर म्हीइ जचे य्हक्को दुख नाबतेङ् थेत म्हीमाचे अखोस्ये मुब बी धर्मइ छ्येःरी तले ब्रबील? 13तर ङ एङ्यीमात पङ्ब, एलीया खज्यीन्बल मुब। ओसेम् थेइ बारेरी धर्मइ छ्येःरी ब्रीब र्हङ्लेनो म्हीमाचे थेत ता स्य्हेङ्गे म्हेन्ज्यी हुजुनो स्य्हेङ्ज्यी।”
येसुचे म्हङ् स्यप्पे कोलत फेन्न लजेत्पल
(मत्ती १७:१४-२१; लुका ९:३७-४३)
14थेङ्यीमा ल्हो-ल्हो डबमा मुबे ग्लारी दोःब बीसेम् हुजुरी कोरोरोले य्हक्को म्हीमा र्हुब् तबल मुबल। ओसेम् धर्म लोप्पोन्मा थेङ्की डबमातेङ् तम् ज्योप्टीब मुबल। 15ओसेम् येसुत म्रङ्ब साच्चेनो य्हक्को म्हीमा जम्मनो तेङेन् तज्यीम् छ्योङ्य्हरज्यीम् थेङ्त स्वागत स्य्हेङ्ज्यी। 16येसुचे डबमात, “एङ्यीमा थेङ्यीमातेङ् तइ तम् ज्योप्टीबल?” बी ङ्योत्जेत्ज्यी। 17य्हक्को म्हीमान्हङ्चे म्ही गीःचे येसुत पङ्ज्यी, “लोप्पोन्, ङचे ङइ जत थेङ्ज बबल मुब। तलेपङ्सम् म्हङ् स्यप्ज्यीम् थेत म्हङ्चे लेम्ब तनलबल मुब। 18थेत म्हङ्चे चुङ्बे बेलोरी सरी म्य्हाज्यीम् थेइ सुङ्से कोप्स्यो डोङ्ब। ओसेम् थे स क्रीतीक्ज्यीम् कङ्लङ् कुङ्लुङ् तब। ङचे थेङ्की डबमात हुजु म्हङ् तेत्लापीनो बी फ्या स्य्हु लज्यी। तर थेङ्यीमाचे अखम्।” 19येसुचे थेङ्यीमात सुङ्ज्यी, “ओ बीस्वास् अरेबे म्हीमा, ङ एङ्यीमातेङ् खेम सम्म टील? ङ एङ्यीमात गत्ते नाब? हुजु ठीटत ङइज बोउ।” 20थेङ्यीमाचे हुजु ठीटत येसु मुबे ग्लारी बज्यी। येसुत म्रङ्ब साच्चेनो म्हङ्चे ठीटत तोर्म्य्ह-मोर्म्य्ह स्य्हेङ्ज्यी। ओसेम् ठीट सरी बोलोक्ज्यीम् सुङ्चे कोप्स्यो तेत्प तीप्ज्यी। 21ओसेम् येसुचे हुजु कोलइ अपत, “खेम य्हङ्स्ये चु कोलत चोले तबल?” बी ङ्योत्जेत्ज्यी। ओसेम् कोलइ अपचे पङ्ज्यी, “थे ज्यीद मुब य्हङ्स्येनो चोले तबल य्हीन्ब। 22ओसेम् थेत सेत्पे लागीरी म्हङ्चे य्हम्चे य्हम्रीनो मेतेङ् यीरी इलाब। थेङ्चे खम्सम् ङ्यीमात दय स्य्हेङ्ज्यीम् थेत फेन्न लपीन्जेतो।” 23येसुचे थेत सुङ्ज्यी, “‘खम्सम्’ बी तले पङ्बल? बीस्वास् स्य्हेङ्बलत जम्मनो तब खम्ब।” 24चु थ्येःब साच्चेनो हुजु कोलइ अपचे क्रीङ्ज्यीम्, “ङ बीस्वास् स्य्हेङ्ब। तर ङइ अकोङ्बे बीस्वासत र्हो स्य्हेङ्जेतो!” बी पङ्ज्यी।
25य्हक्को म्हीमा र्हङ् मुबे ग्लारी खटीबल म्रङ्ज्यीम् येसुचे म्हङ्त, “ओ लेम्बतेङ् न्हादीङ् तनलबे म्हङ्, चु कोल ग्यम्से डोङो! ओसेम् दोःज्यीम् चु कोलइ ल्हीरी खेमेएनो थवङो!” बी बराज्यीम् कुल्जेत्ज्यी। 26ओसेम् हुजु म्हङ् क्रीङ्ज्यीम् हुजु कोलत तोर्म्य्ह-मोर्म्य्ह स्य्हेङ्ज्यीम् डोङ्य्हर्ज्यी। ओसेम् हुजु कोल स्यीब र्हङ्ब तज्यीम् जम्मचेनो, “लौ कोलम् स्यीनेम्” बी पङ्ज्यी। 27तर येसुचे थेइ या चुङ्ज्यीम् सेन्जेत्प बीसेम् कोल रेःज्यी।
28ओसेम् दीम्न्हङ् स्येःब बीसेम् डबमाचे ल्हो-ल्हो म्हीमा अरेबे बेलोरी थेङ्त, “ङ्यीमाचे हुजु म्हङ्त तले तेत्प अखम्?” बी ङ्योत्ज्यी। 29ओसेम् येसुचे, “चोतेबे म्हङ्मी प्रार्थनाचेकीनो ल्हप्लाब खम्ब” बी सुङ्ज्यी।
येसुचे र्हङ् स्यीस्येकी बारेरी देबेएनो सुङ्बल
(मत्ती १७:२२-२३; लुका ९:४३-४५)
30ओसेम् येसुतेङ् थेङ्की डबमा हुजु ग्ला पीत्थेन्ज्यीम् गालील तज्यीम् स्येज्यी। थेङ्यीमा मुबे ग्ला खल्चेएनो अस्येखइ पङ्बे थुः थेङ्ल मुबल, 31तलेपङ्सम् थेङ्चे र्हङ्की डबमात लोप्जेत्टीब मुबल। थेङ्चे थेङ्यीमात सुङ्ज्यी, “म्हीइ जत म्हीमाकी यारी सोप्तीस्ये मुब, ओसेम् थेङ्यीमाचे थेत सेत्स्ये मुब। तर स्यीज्यीम् सोम्रेत् लीप्चे थे सोज्यीम् रेःस्ये मुब।” 32तर डबमाचे थेङ्की चु फ्रोइ गोअखम्। ओसेम् थेङ्त ङ्योत्परीएनो थेङ्यीमा लोङ्ज्यी।
खल ङ्हच्छ्यङ्?
(मत्ती १८:१-५; १०:४२; लुका ९:४६-५०)
33थेङ्मा कफर्नहुम पङ्बे ज्यीद सहर्री दोखजेत्ज्यी। ओसेम् दीम्री स्य्हुजेत्टीबे बेलोरी येसुचे डबमात, “दोलो एङ्यीमा ग्यम्री तइ तम् पङ्टीबल?” बी ङ्योत्जेत्ज्यी। 34तर थेङ्यीमाचे तेएनो अपङ्। तलेपङ्सम् थेङ्यीमान्हङ्री, “खल ङ्हच्छ्यङ् य्हीन्ब?” पङ्बे तम् लटीबल मुबल।#लुका २२:२४ 35ओसेम् येसु स्य्हुजेत्ज्यीम् चुङ् ङ्ही डबमात ङ्होत्जेत्ज्यीम्, “खल्त जम्मन्हङ्री ङ्हच्छ्यङ् तबे सेम् मुज्यी थेचे जम्म न्हङ्री ज्यीद तज्यीम् जम्मइ स्य्हप्तो स्य्हेङ्थोब” बी सुङ्ज्यी। #मत्ती २०:२६,२७; २३:११; मर्कुस् १०:४३,४४; लुका २२:२६ 36हुजु लीप्चे येसुचे थेङ्यीमाकी गुङ्री कोल गीःत रप्पुङ्जेत्ज्यी। ओसेम् थेङ्चे कोलत तङ्री थोज्यीम् सुङ्ज्यी, 37“खल्चे ङइ मीन्री चोतेबे कोलत स्वागत स्य्हेङ्ज्यी थेचे ङतेएनो स्वागत स्य्हेङ्ब। ओसेम् ङत स्वागत स्य्हेङ्बलचे ङतकीनो अय्हीन् ङत पीत्युजेत्पे अपतएनो स्वागत स्य्हेङ्ब।”#मत्ती १०:४०; लुका १०:१६; युहन्ना १३:२०
38युहन्नाचे येसुत पङ्ज्यी, “लोप्पोन्, म्ही गीःचे थेङ्की छेन्री म्हङ्मा ल्हब्टीबल ङ्यीमाचे म्रङ्ज्यी। ओसेम् थे ङ्य्हमा न्हङ्ल अय्हीन्बल तज्यीम् ङ्यीमाचे थेत होले थलोउ पङ्ज्यी।” 39येसुचे थेङ्यीमात सुङ्ज्यी, “होले थपङो! तलेपङ्सम् खल्चे ङइ मीन्री तेङेन्की लक् स्य्हेङ्ब थेचे ग्योन्-ग्योन्नो ङइ बीरोद् स्य्हेङ् अखम्। 40खल्चे ङ्य्हङ्की बीरोद् अस्य्हेङ्ज्यी थे ङ्य्हङ्लनो य्हीन्ब।#मत्ती १२:३०; लुका ११:२३ 41ङ एङ्यीमात पङ्ब, खल्चे एङ्यीमात मुक्ती न्हङ्बे ख्रीस्ट्की म्ही पङ्ज्यीम् बोङ्न नङ् यी पीन्ज्यी थेचे यङ्थोबे बक्सीस् यङ्स्येनो मुब।” #मत्ती १०:४२
पाप ग्यम्से खले थर्ब?
(मत्ती १८:६-९; लुका १७:१-२)
42येसुचे देबेएनो सुङ्ज्यी, “ङत बीस्वास् स्य्हेङ्बे चोतेबे कोलमा न्हङ्री गीःत खल्चे पाप स्य्हेङ्न लपुङ्ज्यी, हुजुत खारीरी र्हन्द च्योज्यीम् समुन्द्र न्हङ् युलाब ज्यब तब। 43एइ याचे पाप स्य्हेङ्न लपुङ्ज्यी पङ्सम् हुजु या थाज्यीम् ख्लागो#९:४३ या थाज्यीम् ख्लागो येसुचे या थाज्यीम् ख्लागो बी सुङ्बलमी देमेन्नो यानो थागो बी सुङ्बल अय्हीन्। तर ङ्य्हङ्की या मीःतेङ् कङ् ग्यम्से पाप स्य्हेङ्बल तब। होत्तज्यीम् हुजुमा थाज्यी ख्लाब र्हङ्ले पाप स्य्हेङ्ब पीत्लाथोब बी सुङ्बल य्हीन्ब। । या ङ्य्हीतेङ् छ्यम् खेमेएनो अस्यीबे मे लुम्टीबे नर्करी ङ्यीब बीमम् या गीःतेङ्कीनो खेमेएनो अबेबे जीवन्री वङ्ब ज्यब तब। 44[नर्करी न्ह च्योङ्लोङ्मा स्यीब न्ह मे स्यीब।]#९:४४ ४४ तेङ् ४६ पद्मी य्हक्को बर्स ङोन्ग्यम्की बाइबल्मारी ब्रीबल अरे 45ओसेम् एइ कङ्चे एत पाप स्य्हेङ्न लपुङ्ज्यी पङ्सम् हुजु थाज्यीम् ख्लागो। कङ् ङ्य्हीतेङ् छ्यम् नर्करी ङ्यीब बीमम् कङ् गीःतेङ्कीनो खेमेएनो अबेबे जीवन्री वङ्ब ज्यब तब। 46[नर्करी न्ह च्योङ्लोङ्मा स्यीब न्ह मे स्यीब।] 47होलेनो एइ मीःचे पाप स्य्हेङ्न लपुङ्ज्यी पङ्सम् हुजु तेत्ज्यीम् ख्लागो। मीः ङ्य्हीतेङ् छ्यम् नर्करी ङ्यीब बीमम् मीः गीःतेङ् पर्मेस्वर्की य्हुल्री वङ्ब ज्यब तब#मत्ती ५:२९ 48नर्करी न्ह च्योङ्लोङ्मा स्यीब न्ह मे स्यीब। #यसैया ६६:२४
49“चदचे ठात सुद्द स्य्हेङ्ब र्हङ्ले जम्म म्हीमातनो मे ग्यम्से सुद्द स्य्हेङ्स्ये मुब#९:४९ चदचे ठात सुद्द स्य्हेङ्ब र्हङ्ले जम्म म्हीमातनो मे ग्यम्से सुद्द स्य्हेङ्स्ये मुब फुट नोट तोब।। 50चद ज्यबे स्हे य्हीन्ब। तर चदइ ब्रोत् य्हर्ज्यी पङ्सम् ताचे दोःज्यीम् ब्रोत् खनलस्ये? एङ्यीमा चद र्हङ्ब तउ। ओसेम् र्हङ्न्हङ्री थुन्ज्यीम् टीउ।” #मत्ती ५:१३; लुका १४:३४,३५
Currently Selected:
मर्कुस् 9: WTDG
Highlight
Share
Copy
Want to have your highlights saved across all your devices? Sign up or sign in
© 2024 (Active), Wycliffe Bible Translators, Inc. All rights reserved.
