मत्ती 16
16
तेःङेन्की लक् स्य्हेङो पङ्बल
(मर्कुस् ८:११-१३; लुका १२:५४-५६)
1डेत्-डेत् फरीसीमातेङ् सदुकीमा येसुइज खज्यीम् थेङ्त जाच्तीबरी स्वर्ग ग्यम्से तेःङेन्की लक् ङोनो पङ्ज्यी। 2थेङ्चे सुङ्ज्यी, “दीनी गल्य्हम्ब बीसेम् एङ्यीमाचे मुरी च्याज्यीम् पङ्ब ‘मु वल तनेम् न्हम्स्यो मु सङ्स्ये टीम्।’ 3ओसेम् स्य्होरी पङ्ब, ‘मु वलतेङ् मुक्पचे तुन्बल मुब, तीङ्यीम् नम् युस्येटीम्’, चोले एङ्यीमाचे मुरी च्याज्यीम् दीन् खतेब तस्येटीम् पङ्बल स्येःब, तर एङ्यीमाचे तीन्हम्स्यो तटीबे तम्मा गोअखम्। 4दुस्टतेङ् ब्यभीचारी म्हीमाचेकीनो चीनो म्हइब। तर ङचे एङ्यीमात योनाइ चीनो बीम ल्हो-ल्हो चीनो पीन्बल तस्ये अरे।” हुजु लीप्चे थेङ् हुजु ग्ला ख्लेथेन्ज्यीम् स्येःजेत्ज्यी।
फरीसीतेङ् सदुकीमाकी खमीर्
(मर्कुस् ८:१४-२१)
5येसुतेङ् थेङ्की डबमा ग्येइ क्योम्सङ् दोःमम् डबमाचे ग्येङ् बोर्ब म्लेत्नेम्। 6ओसेम् येसुचे थेङ्यीमात, “एङ्यीमा फरीसीमातेङ् सदुकीमाकी खमीर् ग्यम्चे होसीयार् तउ” बी सुङ्ज्यी। 7ओसेम् डबमा र्हङ्न्हङ्री, “ङ्य्हङ्माचे ग्येङ् अबबल तज्यीम् थेङ्चे चोले सुङ्बल य्हीन्थोब” पङ्ज्यीम् तम् लज्यी। 8चोले तम् लटीबल येसुचे खेम्ज्यीम् थेङ्यीमात सुङ्ज्यी, “खइ एङ्यीमाकी बीस्वास्? एङ्यीमा र्हङ्न्हङ्री ग्येङ् अरे पङ्ज्यीम् तले तम् ज्योब्टीबल? 9देरेसम्म एङ्यीमाचे गोबल अरे? हजार् ङ्ह म्हीमात ग्येङ् ङ्हचे ख्वाबल एङ्यीमात व्हल् अरे? ओसेम् एङ्यीमाचे डलो गदे र्हुब् लज्यी? 10ओसेम् हजार् ब्ली म्हीमात ग्येङ् ङ्यीस्चे ख्वाबे बेलोरी एङ्यीमाचे डलो गदे र्हुब् लज्यी? 11ङचे एङ्यीमात ग्येङ्की बारेरी तम् पङ्बल अय्हीन् बी एङ्यीमाचे तले अगोबल? ङ एङ्यीमात पङ्ब फरीसीमातेङ् सदुकीमाकी खमीर् ग्यम्से होसीयार् तउ।” 12हुजु लीप्चे डबमाचे, थेङ्चे ग्येङ् फुनलबे खमीर् ग्यम्से होसीयार् तउ बी सुङ्बल अय्हीन्, तर फरीसीमातेङ् सदुकीमाचे लोप्पे तम् ग्यम्से होसीयार् तउ बी सुङ्बल टीम् बी गोज्यी।
येसु खल?
(मर्कुस् ८:२७-३०; लुका ९:१८-२१)
13येसु कैसरीया फीलीप्पीइ प्रदेस्री स्येःज्यीम् थेङ्चे र्हङ्की डबमात, “म्हीमाचे म्हीइ जत खल पङ्ब?” बी ङ्योत्जेत्ज्यी। 14डबमाचे पङ्ज्यी, “डेत्चे बप्तीस्मा पीन्बे युहन्न, डेत्चे एलीया पङ्ब ओसेम् डेत्चेम् की यर्मीया की खलपङ्लेनो ल्हो-ल्हो अगम्बक्तमा न्हङ्री गी य्हीन्ब पङ्ब।”
15येसुचे ङ्योत्जेत्ज्यी, “एङ्यीमाचेम् ङत खल पङ्ब?” 16ओसेम् सीमोन् पत्रुस्चे, “थेङ् सोम्बो पर्मेस्वर्की ज मुक्ती न्हङ्बे ख्रीस्ट् य्हीन्ब” बी पङ्ज्यी। 17येसुचे थेत सुङ्ज्यी, “ओ योनाइ ज सीमोन्, ए मोलम् यङ्बे म्ही य्हीन्ब! तलेपङ्सम् चु तम् एचे म्हीमा ग्यम्से यङ्बल अय्हीन्, तर ङइ स्वर्गइ अपचेनो एत स्येःन लजेत्पल य्हीन्ब। 18ङ एत पङ्ब, ए पत्रुस् य्हीन्ब। ङ ङइ मन्डली चु कोङ्बे युङ्बजोरी स्य्हेङ्स्ये मुब, ओसेम् नर्कइ सक्तीमाचेएनो हुजुत डाब खम्स्ये अरे। 19ङ एत स्वर्गइ य्हुल्की साचोमा पीन्स्ये मुब। एचे जम्बुलीङ्री ता खीःज्यी हुजु स्वर्गरीएनो खीःस्ये मुब, ओसेम् एचे जम्बुलीङ्री ता फ्रेन्ज्यी हुजु स्वर्गरीएनो फ्रेन्स्ये मुब।” 20हुजु लीप्चे येसुचे थेङ्की डबमात थेङ् मुक्ती न्हङ्बे ख्रीस्ट् य्हीन्ब पङ्बे तम् खल्तेएनो थस्येतो बी कुल्जेत्ज्यी।
येसुचे थेङ् स्यीस्येकी बारेरी सुङ्जेत्पल
(मर्कुस् ८:३१-३३; लुका ९:२२)
21हुजु बेलो य्हङ्सेनो येसुचे थेङ्की डबमात सुङ्ज्यी, “ङ यरुस्लेम्री ङ्यीथोब, ओसेम् अगुवामातेङ् ङ्हच्छ्यङ् लम्बुमा ओसेम् धर्म लोप्पोन्मा ग्यम्से दुख नाथोब, ओसेम् ङ स्यीस्ये मुब, तर सोम्रेत्कुनो स्यीब ग्यम्से सोस्ये मुब।”
22पत्रुस्चे येसुत तोव क्योर् बोर्ज्यीम् बराज्यीम् पङ्ज्यी, “पर्मेस्वर्चे थेङ्त चोतेब अस्य्हेङ्जेत्खइ, प्रभु! थेङ्त चोतेब खेमेनो अतखइ।” 23येसुचे पत्रुस्त दोःज्यीम् स्हीःज्यी ओसेम् सुङ्ज्यी, “ओ सैतान्, ए ङ ग्यम्से थारीङ् य्हरो, ए ङइ लागीरी थोक्पे युङ्ब य्हीन्ब, तलेपङ्सम् एचे म्हेन्बे चु तम् पर्मेस्वर्की थुः ग्यम्से अय्हीन् तर म्ही ग्यम्से य्हीन्ब।”
येसुइ लीप्चे ब्रबे डबचे र्हङ्की क्रुस नाथोब
(मर्कुस् ८:३४-९:१; लुका ९:२३-२७)
24हुजु लीप्चे येसुचे थेङ्की डबमात सुङ्ज्यी, “खल पङ्लेनो ङइ डब तब म्हेन्सम् थेचे र्हङ्चे र्हङ्तनो म्लेत्थोब। ओसेम् र्हङ्की क्रुस् नाज्यीम्#१६:२४ र्हङ्की क्रुस् नाज्यीम्- र्हङ्की क्रुस् नाज्यीम् ब्रब पङ्बलम् येसुइ लागीरी दुख नाबतेङ् स्यीबरीएनो तयार तब य्हीन्ब। ङइ लीप्चे ब्रथोब। 25तलेपङ्सम् खल्चे र्हङ्की जीवन् थर्नलब म्हइज्यी थेइ जीवन् म्हस्ये मुब। तर ङइ लागीरी जीवन् म्हन लबलचे र्हङ्की खेमेएनो अबेबे जीवन् यङ्स्ये मुब। 26म्हीचे जम्बुलीङ्नो र्हङ्की यारी यङ्लेनो तर र्हङ्की खेमेएनो अबेबे जीवन् म्हलाज्यी पङ्सम् थेचे तानो यङ्ज्यी स्यीम्? थेइ खेमेएनो अबेबे जीवन् दोःज्यीम् ताचे पीन्ब? 27तलेपङ्सम् म्हीइ ज र्हङ्की स्वर्गदुत्मातेङ् बक्च्य थेइ अपइ महीमारी युस्ये मुब। ओसेम् थेचे म्ही र्हङ्स्यीनो थेङ्यीमाइ लक् अनुसार् न्याय स्य्हेङ्स्ये मुब। 28देमेन्नो ङ एङ्यीमात पङ्ब, चुरी रप्टीबलमा न्हङ्री डेत्डेत्मी म्हीइ जत थेइ य्हुल्री युटीबल अम्रङ्गदे स्यीस्ये अरे।”
Currently Selected:
मत्ती 16: WTDG
Highlight
Share
Copy
Want to have your highlights saved across all your devices? Sign up or sign in
© 2025 by Mother Tongue Translators Society, Nepal Bible Society
and Wycliffe Bible Translators, Inc.
