मत्ती 15
15
पेठीम्की बारेरी लोप्पल
(मर्कुस् ७:१-१३)
1हुजु लीप्चे डेत्-डेत् फरीसीमातेङ् धर्म लोप्पोन्मा यरुस्लेम् ग्यम्से खज्यीम् येसुत ङ्योत्ज्यी, 2“थेङ्की डबमाचे अप-म्हेम्हे य्हङ्से म्हन्दीज्यीम् खबे पेठीम्मा तले अम्हान्दीबल? तलेपङ्म् थेङ्यीमाचे चब चब बीम ङोन्ग्यम् या अख्रु।” 3येसुचे थेङ्यीमात जोहप् न्हङ्ज्यी, “एङ्यीमाचेम् तले र्हङ्की पेठीम् म्हन्दीबरी पर्मेस्वर्चे कुल्जेत्पे अर्ती अङ्येन्बल? 4तलेपङ्सम् पर्मेस्वर्चे सुङ्बल मुब, ‘र्हङ्की अप-अमत स्य्हेस स्य्हेङो’#प्रस्थान् २०:१२; २१:१७; ब्यबस्था ५:१६; लेबी २०:९, ‘ओसेम् र्हङ्की अप-अमइ बीरुद्दरी तम् पङ्बलत स्यीथोबे सजाय पीनो।’ 5तर एङ्यीमाचे म्हीमात खल्चे पङ्लेनो र्हङ्की अप-अमत ‘थेङ्माचे ङ ग्यम्से यङ्थोस्येकी स्हेःमा ङचे पर्मेस्वर्त सोप्तीबल मुब’ पङ्ज्यी पङ्सम्, 6थेचेम् अप-अमइ स्य्हप्तो स्य्हेङ्अथो पङ्ब। चोले एङ्यीमाचे र्हङ्की पेठीम्मा म्हन्दीज्यीम् पर्मेस्वर्चे कुल्जेत्पे अर्ती अङ्येन्बल मुब। 7ओ कपटीमा! यसैया अगम्बक्तचे एङ्यीमाकी बारेरी सुङ्बे चु तम् डीःब-
8 ‘चु म्हीमाचे ङत सुङ्चेकीनो स्य्हेस स्य्हेङ्ब,
तर थेङ्यीमाकी सेम् ङ ग्यम्से य्हक्को थारीङ् मुब।
9 थेङ्यीमाचे ङत भ्युले तेन्ब,
तलेपङ्सम् थेङ्यीमाचे म्हीमाचे स्य्हेङ्बे नीयम्मकीनो लोप्प।’ #
यसैया २९:१३
”
म्हीमात असुद्द तनलबे स्हेःमा
(मर्कुस् ७:१४-२३)
10हुजु लीप्चे येसुचे म्हीमात थेङ्ज ङ्होत्जेत्ज्यीम् सुङ्ज्यी, “ङ्येनो, ओसेम् गोउ, 11सुङ् ग्यम्से न्हङ्री वङ्बे स्हेःचे म्हीत असुद्द अस्य्हेङ्, तर सुङ् ग्यम्से डोङ्बे तम्चे म्हीत असुद्द तनलब।”
12ओसेम् डबमा खज्यीम् थेङ्त पङ्ज्यी, “थेङ्चे सुङ्बे तम्चे लज्यीम् फरीसीमा बोमो रप्पल थेङ्चे खेम्जेत्ज्यी?” 13येसुचे सुङ्ज्यी, “स्वर्गरी मुबे अपचे असुःबे दोङ्बोमा जम्मनो टा य्हङ्सेनो ओर्लास्ये मुब। 14थेङ्यीमात च्याब पीत्लागो, थेङ्यीमाम् कनमाकी कन अगुवामा य्हीन्ब। कन म्हीचे ल्हो-ल्हो कन म्हीत सेज्यी पङ्सम् ङ्य्हीनो व्हङ्री तइस्ये मुब।”
15पत्रुस्चे थेङ्त पङ्ज्यी, “ङ्यीमात चु अर्तइ अर्थ गोनलपीन्जेतो।” 16येसुचे सुङ्ज्यी, “एङ्यीमाचेएनो दवम् अगो? 17एङ्यीमाचे स्येःबल अरे? म्हीइ सुङ् ग्यम्से न्हङ्री वङ्बे स्हेः फोरी दोःब, ओसेम् डोङ्ज्यीम् य्हर्ब। 18तर म्हीइ सुङ् ग्यम्से डोङ्बे तम्मा थेइ सेम्न्हङ्से डोङ्बल तब। ओसेम् हुजु तम्माचेनो थेत असुद्द तनलब। 19तलेपङ्सम् म्हीइ सेम् न्हङ्सेनो दुस्ट तम्मा, सेत्प-तुप्प, ब्यभीचार् स्य्हेङ्ब, जम्म थोइ बेस्य स्य्हेङ्ब, य्होलब, भ्यु पङ्ब ओसेम् नीन्द स्य्हेङ्बे अज्यबे तम्मा डोङ्ब। 20चुमानो म्हीत असुद्द तनलबे तम्मा य्हीन्ब। तर या अख्रुनले चब चज्यीम् म्ही असुद्द अत।”
कनानी अमकोलइ बीस्वास्
(मर्कुस् ७:२४-३०)
21ओसेम् येसु हुजु ग्लासे डोङ्जेत्ज्यीम् टुरोस्तेङ् सीदोन् प्रदेस्क्योर् स्येःजेत्ज्यी। 22हुजु ग्लारी टीबे कनानी अमकोल गी खज्यीम् क्रीङ्ज्यीम् पङ्ज्यी, “प्रभु, दाउद्की ज, ङत दया स्य्हेङ्जेतो! ङइ जमेत म्हङ् स्यप्ज्यीम् य्हक्को दुख तटीब मुब।” 23तर येसुचे थेत तेएनो असुङ्। ओसेम् थेङ्की डबमा खज्यीम् थेङ्त फ्या लज्यीम् पङ्ज्यी, “चु अमकोलत चु ग्ला ग्यम्से पीत्जेतो। तलेपङ्सम् थे क्रीङ्ज्यीम् ङ्य्हङ्माकी लीप्चे खटीबल मुब।” 24ओसेम् थेङ्चे सुङ्ज्यी, “ङ म्हबे ग्युः र्हङ्बे इस्राएल्की म्हीमाकी लागीरीकीनो पीत्युजेत्पल य्हीन्ब।” 25तर चु थ्येःज्यीम् हुजु अमकोलचे येसुइ स्य्हब्री पब्लु लज्यीम् पङ्ज्यी, “प्रभु, ङत र्हो स्य्हेङ्जेतो।” 26ओसेम् येसुचे सुङ्ज्यी, “र्हङ्की कोलमाइ#१५:२६ कोलमा- कोलमा पङ्बलम् यहुदीमा य्हीन्ब। चब ब्येन्ज्यीम् नीकीमात#१५:२६ नीकीमा- हुजु बेलोरी यहुदीमाचे यहुदी अय्हीन्बे म्हीमात नीकीमा पङ्ब मुबल। पीन्ब ज्यब अय्हीन्।” 27ओसेम् अमकोलचे पङ्ज्यी, “य्हीन्बनो प्रभु, तर नीकीमाचेएनो र्हङ्की न्याबोचे चबे बेलोरी तइबे स्यीरमा चब।” 28ओसेम् येसुचे हुजु अमकोलत सुङ्ज्यी, “एइ बीस्वास् ङ्हच्छ्यङ् टीम्, एचे म्हेन्बल तखइ।” ओसेम् हुजु बेलोरीनो थेइ जमे फेन्ज्यी।
येसुचे य्हक्को थोइ नबमात फेन्नलजेत्पल
(मर्कुस् ७:३१-८:१०)
29येसु हुजु ग्लाचे डोङ्ज्यीम् गालील् ग्येइ य-यचे तज्यीम् स्येःजेत्ज्यी, ओसेम् गङ्री स्येःज्यीम् हुजुरी स्य्हुःजेत्ज्यी। 30ओसेम् य्हक्को-य्हक्को म्हीमा थेङ्ज खज्यी। थेङ्यीमाचे खोरा, कनतेङ् लेम्ब ओसेम् ल्हो-ल्होएनो य्हक्को नबमात बज्यीम् थेङ्की ङोन्री थेन्पीन्ज्यी। ओसेम् थेङ्चे हुजुमा जम्मतनो फेन्न लजेत्ज्यी। 31लेम्बमाचे तम् पङ्बल, खोरामा ब्रबल, या कङ् अचल्तीबलमाल चल्तीबल ओसेम् कनमाचे मी म्रङ्बल म्रङ्ब बीसेम् म्हीमा जम्मनो तेःङेन् तज्यी। ओसेम् थेङ्यीमाचे इस्राएल्की पर्मेस्वर्त तोप्ज्यी।
32ओसेम् येसुचे र्हङ्की डबमात ङ्होत्ज्यीम् सुङ्ज्यी, “चु म्हीमात म्रङ्ज्यीम् ङइ सेम्री य्हक्को दया खज्यी। तलेपङ्सम् थेङ्यीमा ङतेङ् टीज्यीम् तीङ्यीम् सोम्रेत् तज्यी, ओसेम् थेङ्यीमातेङ् चबे चबएनो अरे। थेङ्यीमात फोइथेन्नो पीत्पे सेम् ङल अरे, अय्हीन् पङ्सम् थेङ्यीमा ग्यम्री गुर्स्ये मुब।”
33डबमाचे थेङ्त पङ्ज्यी, “चोत्ते य्हक्को म्हीमात चु उजाड् ग्लारी खनचे चब बज्यीम् थेङ्यीमात पीन्स्ये?” 34येसुचे थेङ्यीमात ङ्योत्जेत्ज्यी, “एङ्यीमातेङ् ग्येङ् गदे मुब?” ओसेम् थेङ्यीमाचे, “ङ्यीमातेङ् ग्येङ् ङ्यीस्तेङ् तर्ङ ज्यीदमा चेक् मुब” बी पङ्ज्यी।
35ओसेम् थेङ्चे म्हीमात पङ्गर्री टीउ बी कुल्जेत्ज्यी। 36हुजु लीप्चे थेङ्चे हुजु ग्येङ् ङ्यीस्तेङ् तर्ङ कीन्जेत्ज्यीम् पर्मेस्वर्त व्होर्छ्ये न्हङ्जेत्ज्यी। ओसेम् ग्येङ्तेङ् तर्ङ स्योइज्यीम् डबमात न्हङ्जेत्ज्यी। ओसेम् डबमाचे म्हीमात जुपीन्ज्यी। 37थेङ्यीमा जम्मचेनो म्रेन्बसम्म चज्यी। ओसेम् डबमाचे ल्हाबलमा डलो ङ्यीस् र्हुब् लज्यी। 38हुजुरी चब चबे म्हीमान्हङ्री कोलमातेङ् अमकोलमा अज्यानले अपकोलमाकीनो हजार् ब्ली मुबल। 39हुजु लीप्चे जम्म म्हीमात पीत्प बीसेम् थेङ् दोङ्गरी क्रेत्जेत्ज्यीम् मगादान् पङ्बे प्रदेस्री स्येःजेत्ज्यी।
Currently Selected:
मत्ती 15: WTDG
Highlight
Share
Copy
Want to have your highlights saved across all your devices? Sign up or sign in
© 2025 by Mother Tongue Translators Society, Nepal Bible Society
and Wycliffe Bible Translators, Inc.
