মথি 15
15
চলেত্তে সুদোমান্
(মার্ক ৭:১-১৩)
1যিরূশালেমত্তুন্ কয়েক্কো ফরীশী আর ধর্ম-মাষ্টর যীশু ইধু এইনে কলাক্, 2“পুরোণি দিনোর্ ধর্ম-মাষ্টরুনোরে দিয়্যে যে সুদোমানি চলি এজের্ তঅ শিচ্চ্যগুনে সিয়েনি মানি ন-চলদন্ কিত্তে? হেবার্ আগেদি তারা গমেডালে আঢ্ ন-ঢন্।”
3জোবত্ যীশু কলঅ, যে সুদোমান্ পালেই এজর্ সিয়েনত্তে তুমিই বা কিত্তে গোজেনর্ উগুমান্ অমান্য গরর্? 4গোজেনে কোইয়্যেদে, মা-বাবরে সর্মান গরঅ আর যিবের্ কধালোই মা-বাবঅ উগুরে অশ্রদ্ধা থায় তারে হামাক্কায় মারে ফেলা পড়িবো। 5মাত্তর্ তুমি কোই থাগঅ, যুনি কনজনে তার মা-বাবরে কয়, মর্ যে জিনিস্চান্দোই তর্ সাহায্য অদঅ, সিয়েন গোজেন ইধু দিয়্যে ওইয়্যে, 6সালে মা-বাবরে তার আর সর্মান গুরিবার দরকার্ নেই। তমার্ এই বেক্ নিজো সুদোমানিত্তে তুমি গোজেন কধানি বাদ্ দুয়ো। 7ভন্ডগুন! তমা পৌইদ্যেনে ভাববাদী যিশাইয় ঠিগ্ কধা কোইয়্যে,
8এ মানুচ্চুনে মুয়োদি মরে সর্মান গরন্,
মাত্তর্ তারার্ মনানি মত্তুন্ দূরোত্ থায়।
9তারা মিজে মিজে মর্ উবোসনা গরন্;
তারার্ দিয়্যে শিক্ষ্যেনি মান্জ্যর্ বানেয়্যে কয়েক্কান সুদোম্ বানা।
কেধোক্ক্যেন্ গুরি মানুচ্ অসিজি অন্
(মার্ক ৭:১৪-২৩)
10পরেদি যীশু মানুচ্চুনোরে ডাগিনে কলঅ, “মঅ কধাগান্ শুনো আর বুঝো। 11মুয়ো ভিদিরে যিয়েনি যায় সিয়েনি মান্জ্যরে অসিজি ন-গরে, মাত্তর্ মুয়ো ভিদিরেত্তুন্ যিয়েনি নিগিলি এজে সিয়েনি মান্জ্যরে অসিজি গরে।”
12সেক্কে তা শিচ্চ্যগুনে এইনে তারে কলাক্, “ফরীশীগুনে তর্ এ কধাগান্ শুনিনে যে অগমান্ পেইয়োন, সিয়েন্ কি তুই হবর্ পাজ্?”
13জোবত্ তে কলঅ, “যে চারাবো মর্ স্বর্গর্ বাপ্পো ন-লাগায় সিগুন বেক্কুন্ উগুরে ফেলা অবঅ। তারা কধা বাদ্ দুয়ো। 14তারাত্যে চিদে ন-গোজ্জ্য! তারা দঅ কান্ মানুচ্চুনোর কানা নেতা; কান্ মান্জ্যে কানরে পথ্ দেগেবাত্তে গেলে দ্বি'জনে গাঢত্ পড়ন্।”
15সেক্কে পিতর যীশুরে কলঅ, “তুই যে উপমাগান্ দিলে সিয়েন্ আমারে বুঝেই দে।”
16-17যীশু তারারে কলঅ, “তুমি কি এজঅ অন্যগুনোত্তুন্ অবুঝ্ আগঅ? তুমি কি ন-বুঝো যে, যেদক্কানি মুয়ো ভিদিরে যায় সিয়েনি পেদ ভিদিরে সমে আর যেরেদি নিগিলি যায়? 18মাত্তর্ যিয়েনি মুয়ো ভিদিরেত্তুন্ নিগিলি এজে সিয়েনি মনত্তুন্ এজে, আর সিয়েনিয়ে মান্জ্যরে অসিজি গরে। 19মনত্তুন্ ভান্ন্যেই চিন্তে, খুন, নানান্ বাবোত্যে বেভিচের্, চুর্, মিজে মাদানা আর ইংসে-নিন্দে নিগিলি এজে। 20ইয়েনি বেক্কানিয়ে মান্জ্যরে অসিজি গরে, মাত্তর্ আঢ্ ন-ধোইনে হেলে মানুচ্ অসিজি ন-অন্।”
অযিহূদী মিলের্ বিশ্বেজ্
(মার্ক ৭:২৪-৩০)
21পরেদি যীশু সে জাগায়ান্ ছাড়িনে সোর আর সীদোন চাগালাত্ গেলঅ। 22সিদুগোর্ এক্কো কনানীয় মিলে এইনে রঅ ছাড়িনে কুয়ো ধুরিলো, “ও প্রভু, দায়ূদোর্ গুট্টি, মরে দোয়্যে গর্। ভান্ন্যেই আত্মায় পেইনে মঅ ঝিবো অমকদ দুঘ্ পার্।”
23মাত্তর্ যীশু তারে এক্কান্ কধায়ো ন-কলঅ। সেক্কে তা শিচ্চ্যগুনে এইনে তারে কোজোলী গুরি কলাক্, “তারে বিদেয় গুরি দুয়ো, কিয়া তে আমা পিজে পিজে রঅ ছাড়ের্।”
24জোবত্ যীশু কলঅ, “মরে বানা ইস্রায়েল-গুট্টির আরেয়্যে ভেড়াগুনো ইধু পাধা ওইয়্যে।”
25সে অক্তত্ মিলেবো তাইধু এইনে তা টেঙত্ পড়িনে কলঅ, “প্রভু, মরে সাহায্য গর্।” 26যীশু জোবত্ কলঅ, “পুয়ো-ঝিগুনোর হানা লোইনে কুগুরো মুজুঙোত্ ফেলানা গম্ নয়।”
27তে কলঅ, “ঠিগ্ কধা, প্রভু; মাত্তর্ গিরোজ টেবিলোত্তুন্ যিয়েনি উগুরে সিয়েনি কুগুরে হান্।”
28সেক্কে যীশু তারে কলঅ, “যদবদে তঅ বিশ্বেজ্চান অমকদ বেশ্। তুই যেবাবোত্যে চাজ্ সেবাবোত্যে ওক্।” আর সেক্কে তা ঝিবো গম্ ওই গেলঅ।
চের্ আজার্ মান্জ্যরে হাবানা
(মার্ক ৮:১-১০)
29পরেদি যীশু সে জাগায়ান্ ছাড়িনে গালীল সাগর পারদি যাহ্ ধুরিলো আর এক্কো মুড়োত্ উদিনে সিয়েনত্ বুজিলো। 30সেক্কে মানুচ্চুনে লেং, কান্, আদুড়্, ববা আরঅ ভালোক্কুনোরে নিইনে তাইধু এলাক্। তারা সেই বেক্ মানুচ্চুনোরে তা টেঙ কায় কুরে রাগেলাক্ আর তে তারারে গম্ গুরিলো। 31মানুচ্চুনে যেক্কে দেগিলাক্ ববা কধা কর্, আঢুড়ে গম্ অর্, লেঙ্ মান্জ্যে আঢাউদো গত্তন্ আর কান্ মান্জ্যে দেগদন্, সেক্কে তারা আমক্ অলাক্ আর ইস্রায়েলীয়গুনোর গোজেনরে বাঈনী গরা ধুরিলাক্। 32ইয়েনর্ পরেদি যীশু তা শিচ্চ্যগুনোরে ডাগিনে কলঅ, “এ মানুচ্চুনোত্তে মর্ মেয়্যে লাগের্, কিয়া এচ্চ্যে তিন দিন অলঅ ইগুনে মঅ লগে লগে আগন্, আর ইগুনো ইধু কনঅ হানা নেই। এ অবস্থায় মুই ইগুনোরে বিদেয় দিবাত্তে ন-চাং; অয়ত বা তারা পদথ্ অজ্ঞান্ ওই পড়িবাক্।”
33শিচ্চ্যগুনে তারে কলাক্, “এই ধূল্যেচর চাগালাত্ ইদুক্কুন্ মান্জ্যরে হাবেবাত্তে হানা আমি কুদু পেবং?”
34যীশু তারারে কলঅ, “তমাইধু কয়ান্ রুটি আঘে?”
শিচ্চ্যগুনে কলাক্, “সাত্তান্ রুটি আর কয়েক্কো চিগোন্ মাছ আঘে”
35-36মানুচ্চুনোরে মাদিত্ বুজিবাত্তে উগুম্ দিইনে যীশু সেই সাত্তান্ রুটি আর মাছ্চুন ললঅ। পরেদি তে গোজেনরে ভালেদি জানেইনে সিগুন ভাঙিলো আর শিচ্চ্যগুনো আঢত্ দিলো, আর শিচ্চ্যগুনে সিয়েনি মানুচ্চুনোরে দিলাক্। 37মানুচ্চুনে বেক্কুনে পেট্ ভুরি হেলাক্, আর যে কট্টানি পড়ি রলঅ শিচ্চ্যগুনে সিয়েনি তুলিনে সাত্তো লেই ভোরেলাক্। 38যিগুনে হেইয়োন্ তারা ভিদিরে মিলে আর চিগোনগুড়ো বাদে চের্ আজার্ মরদ্ এলাক্। 39ইয়েনর্ পরেদি যীশু মানুচ্চুনোরে বিদেয় দিইনে নৌকোত্ উদিনে মগদন চাগালাত্ গেলঅ।
Currently Selected:
মথি 15: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
