মথি 14

বাপ্তিস্মদিয়্যে যোহনর মরাণা

(মার্ক ৬:১৪-২৯; লূক ৯:৭-৯)

1-2সে সময়োত্ যীশু পৌইদ্যেনে শুনিনে গালীল রেজ্যর্ শাসনগুরিয়্যে হেরোদে তা কাম্ গুরিয়্যেগুনোরে কলঅ, “ইবেই বাপ্তিস্মদিয়্যে যোহন; যিবে মরণত্তুন্ জেই উঠ্যে। সেনত্তে তে এই বেক্ আমক্ কামানি গোজ্যে।”

3হেরোদে নিজোর্ ভেই ফিলিপ মোক্কো হেরোদিয়ার কারনে যোহনরে বন্দী গুরিনে নেযেইনে জেল্‌খানাত্ রাগেল, 4কিয়া যোহনে তারে কোইয়্যেদে, “হেরোদিয়ারে মোগ্ ইজেবে রাগানা তর্ উচিত নয়।” 5হেরোদ যোহনরে মারে ফেলেবাত্তে চেইয়্যে, মাত্তর্ তে ইহূদী মানুচ্চুনোরে দোরেদ কিয়া মান্‌জ্যে যোহনরে ভাববাদী বিলি মানিদাক্।

6হেরোদ জর্মদিনোত্ হেরোদিয়ার ঝিবো তুবেয়্যে বেক্ মানুচ্চুনো মুজুঙোত্ নাজিনে হেরোদরে হুজি গুরিলো। 7সেনত্তে হেরোদে এদক্ হুজি ওইয়্যেদে যে তা ঝিবো ইধু শমক্ হেলদে, তুই যিয়েন্ চাজ্ সিয়েনই মুই তরে দিম। 8ঝিবো তা মাত্তুন্ সল্লা পেইনে কলঅ, “থালত্ গুরি বাপ্তিস্মদিয়্যে যোহনর্ মাঢাবো ইয়েনত্ মইধু আনি দে।”

9সেক্কে রাজা হেরোদে মনত্ দুঘ্ পেলঅ, মাত্তর্ যিগুনে তা সমারে হেবাত্তে বোচ্চ্যন্ তারা মুজুঙোত্ শমক্ হেইয়্যে বিলিনে তে সিবে দিবাত্তে উগুম গুরিলো। 10তে মানুচ্ পাধেইনে জেল্‌খানা ভিদিরে যোহন মাঢাবো কাবিলো। 11পরেদি মাঢাবো থালত্ গুরি আনিনে ঝিবোরে দিয়্যে অলে পরেদি তে তার্ মাবো ইধু সিবে নেযেল। 12ইয়েনর্ পরেদি যোহন শিচ্চ্যগুনে এইনে তার্ মরা কিয়্যেগান্ নেযেইনে গোরত্ দিলাক্ আর সেই হবরান্ যীশুরে যেইনে দিলাক্।

পাচ্ আজার্ মান্‌জ্যরে হাবানা

(মার্ক ৬:৩০-৪৪; লূক ৯:১০-১৭; যোহন ৬:১-১৪)

13যোহনর্ মরাণার্ হবর্ শুনিনে যীশু গায় গায় সিয়েনত্তুন্ নৌকোত্ গুরিনে মানুচ্ নেইয়্যে জাগাত্ গেলঅ। মানুচ্চুনে সে কধাগান্ শুনিনে নানান্ আদামত্তুন্ টেঙোই আঢিনে তা পিজে পিজে যাহ্ ধুরিলাক্। 14যীশু নৌকোত্তুন্ লামিনে সয়-সাগোজ্যে মানুচ্ দেগিলো আর মেয়্যে লাগিনে তারা ভিদিরে যিগুনে অসুগ্ এলাক্ তারারে গম্ গুরিলো।

15সাজোন্যে অক্তত্ তা শিচ্চ্যগুনে তাইধু এইনে কলাক্, “অমকদ দেরি ওইয়্যে, জাগায়ান্ নিরিবিলি। মানুচ্চুনোরে পাধেই দে যেন তারা কায়কুরে আদামত্ যেইনে নিজোত্তে হানা কিনি পারন্।”

16যীশু তারারে কলঅ, “তারার্ যানা দরকার্ নেই, তুমি তারারে হেবাত্তে দুয়ো।”

17শিচ্চ্যগুনে তারে কলাক্, “আমা ইধু পাচ্চান্ রুটি আর দ্বিবে মাছ বাদে আর কিচ্ছু নেই।”

18-19তে কলঅ, “সিয়েনি মইধু আন।” পরেদি তে মানুচ্চুনোরে ঘাস উগুরে বুজিবাত্তে উগুম গুরিলো, আর সেই পাচ্চান্ রুটি আর দ্বিবে মাছ লোইনে স্বর্গ ইন্দি রিনি চেইনে গোজেনরে ভালেদি জানেল। ইয়েন পরেদি তে রুটি ভাঙিনে শিচ্চ্যগুনো আঢত্ দিলো আর শিচ্চ্যগুনে সিয়েনি মানুচ্চুনোরে দিলাক্। তারা পত্তিজনে পেট্ ভরে সং হেলাক্। 20বেক্কুনে পেট ভরে সং হেলাক্। সে পরেদি শিচ্চ্যগুনে সিয়েনি তুলি নিলাক্, আর সেক্কে বারবো লেই ভরণ্ অলঅ। 21যিগুনে হেইয়োন্ তারা ভিদিরে মিলে আর চিগোন্ গুরো বাদে কমবেশ্ পাচ্ আজার্ মরদ এলাক্।

পানি উগুরেদি আঢানা

(মার্ক ৬:৪৫-৫৬; যোহন ৬:১৫-২১)

22ইয়েনর্ পরেদি যীশু শিচ্চ্যগুনোরে উগুম্ দিলো যেন তারা নৌকোত্ উদিনে তা আগে আগে সাগরর্ অন্য পারত্ যান্, আর ইন্দি তে মানুচ্চুনোরে পাধেই দের্। 23মানুচ্চুনোরে বিদেই দিইনে তবনা গুরিবাত্তে তে গায় গায় মুড়োবোত্ উদি গেলঅ। যেক্কে সাজোন্যে ঘোনেই এলঅ সেক্কেয়ো তে সিয়েনত্ গায় গায় থেলঅ। 24সেক্কেনে শিচ্চ্যগুনোর্ নৌকোগান্ কুলচরত্তুন্ বোউত্ দূরোত্ যেইনে লুম্মেগোই আর বৌইয়্যেরান্ উল্লো মোক্ক্যে থানায়্ তুবোলত্ অমকদ দুলের্। 25শেজ্ রেদোত্ যীশু সাগর উগুরেদি আঢিনে শিচ্চ্যগুনো ইধু এজের্। 26শিচ্চ্যগুনে একজনরে সাগর উগুরেদি আঢি যাদে দেগিনে অমকদ দোরেইনে কলাক্, “ভূত্, ভূত্,” আর সে পরেদি রঅ ছাড়ি উদিলাক্।

27যীশু সেক্কেনে তারারে কলঅ, “ইবে দঅ মুই; ন-দোরেয়ো, সাহচ্ গরঅ।”

28পিতরে তারে কলঅ, “প্রভু, যুনি তুই অচ্ সালে পানি উগুরেদি তইধু যেবাত্তে মরে উগুম্ দে।”

29যীশু কলঅ, “আয়।”

সেক্কে পিতরে নৌকত্তুন্ লামিনে পানি উগুরেদি আঢিনে যীশু ইধু যাহ্ ধুরিলো। 30মাত্তর্ জোর্ বোইয়্যের্ দেগিনে তে দোরেইনে ডুবি যাহ্ ধুরিলো আর রঅ ছাড়িনে কলঅ, “প্রভু, মরে বাজা।”

31যীশু সেক্কে আঢ্ বাড়েইনে তারে ধুরিলো আর কলঅ, “কম্ বিশ্বেজি, কিত্তে সন্দেহ গুরিলে?”

32-33যীশু আর পিতরে নৌকোগানত্ উদোনার্ পরেদি বৌইয়্যেরান্ থামেল। যিগুনে নৌকো ভিদিরে এলাক্ তারা যীশুরে গোজেনর সর্মান দিইনে সালাম গুরি কলাক্, “ঘেচ্চেকগুরি তুই গোজেনর্ পুয়ো।”

34পরেদি তারা সাগরান্ পার্ ওইনে গিনেষরৎ চাগালাত্ এইনে লুমিলাক্। 35সিদুগো মানুচ্চুনে যীশুরে চিনি পারিনে বেক্ চাগালাগানিত্ হবর্ পাধেলাক্। 36সেক্কে মানুচ্চুনে পীড়েল্যেগুনোরে যীশু ইধু আনিলাক্ আর তারে কোজোলী গুরিলাক্ যেন সেই পীড়েল্যেগুনে তা কাবড়র কণাবো বানা ধুরি পারন্; আর যিগুনে তারে ধুরিদাক্ তারা গম্ অদাক্।

Currently Selected:

মথি 14: CBT

Highlight

Copy