মালাখি 2
2
ধর্মগুরুগুনো ইধু উজিয়ার কধা
1-2বেগত্তুন্ খেমতাবলা লগেপ্রভু কত্তে, “ও ধর্মগুরুগুন, ইক্কিনে তমা ইধু মুই এই উজিয়ার্ কধাগান পাদাঙর্। তুমি যুনি মঅ কধাগান ন-শুনো আর মঅ সর্মান ইন্দি মনযোগ্ ন-দুয়ো সালে মুই তমা উগুরে এক্কান অভিশাব্ পাদেম্ আর তর্ বেক আশিদ্বাদ্তানরে অভিশাবত্ বুদুলি দিম। অয়, মুই আগে সিয়েনি গোজ্যং, কিত্যে মঅ সর্মান ইন্দি তুমি মনযোগ ন-দুয়ো। 3তমাত্যে মুই তমা বংশধরুনোরে সাজা দিম; তমা পরবর্ উৎসর্বর য়েমানুনোর্ কাজরানি মুই তমা মুয়োত্ লিবি দিম আর সেই কাজরান্ সুমুত্তো তমারে দূর্ গুরি দিয়্যে অবঅ।”
4বেগত্তুন্ খেমতাবলা লগেপ্রভু আরঅ কত্তে, “তুমি হবর্ পেয়ো, মুই তমা ইধু এই উজিয়ার কধাগান পাদেয়োং যেনে লেবির বংশত্তে থিদেবর্ গোজ্যে মর্ সুদোমান চালু থায়। 5তারাত্তে মুই যে সুদোমান থিদেবর্ গোজ্যং সিয়েন অলঅ জিংকানি আর ভালেদির্ সুদোম। এ সুদোমান মুই তারারে দুয়োং। এনেবাদে ইয়েন দর্গরেপারা সুদোম ধোক্ক্যেন, যেন তারা মরে ভোক্তিগুরিনে দরান্; ঘেচ্চেকগুরি তারা আমারে ভোক্তিগুরিনে দোরেদাক্। 6তারা মুজুঙোত্ সত্যর্ শিক্ষ্যে এলঅ আর সিয়েনত্ কনঅ মিজে ন-থেদঅ। সুগে শান্দিয়্যে আর গমেডালে তারা মঅ সমারে আদাউদো গুরিদাক্ আর ভালোক্ জনরে পাপত্তুন্ ফিরেদাক্। 7আজলে গোজেন আওজ পৌইদ্যেনে শিক্ষ্যে দেনা ধর্মগুরুগুনোর উচিত্ যেনে সেই শিক্ষ্যেগান আযি ন-যায়। ইয়েনি বাদেয়ো গোজেন কধানি জানিবাত্তে ধর্মগুরুগুনো ইধু মানুচ্চুনোর্ যানা উচিত, কিত্যে তারা বেগত্তুন্ খেমতাবলা লগেপ্রভুর হবর্ হোইয়্যে। 8মাত্তর্ তুমি ঠিগ্ পধত্তুন্ সুরি যেইয়ো আর তমা শিক্ষ্যেলোই বোউত্ মান্জ্যরে উজোত্ হাবেয়ো। এবাবোত্যেগুরি লেবির বংশত্তে থিদেবর্ গোজ্যে সুদোমান্ তুমি বাদ দুয়ো। মুই বেগত্তুন্ খেমতাবলা লগেপ্রভু কঙর্। 9তুমি মঅ পধেদি ন-চলঅ বরং রীদি-সুদোম পৌইদ্যেনে মানুচ্চুনো সমারে তুমি এক মোক্ক্যে ওইয়ো। সেনত্তে বেক্ মানুচ্চুনো মুজুঙোত্ মুই তমারে ঈচ্ গরে পারা আর অসর্মান অই পারা গুরিম।”
যিহূদার মানুচ্চুন অবিশ্বেজি
10আমা বেক্কুনোর্ বাপ্পো কি একজন নয়? এক্কো গোজেনে কি আমারে ন-বানায়? সালে আমি কিত্তে একজন আর একজন লগে বেঈমানি গুরিনে আমা পূরোণি মানুচ্চুনোত্তে থিদেবর্ গোজ্যে সুদোমান অসর্মান গুরিই। 11যিহূদা বেঈমানী গোজ্যে। ইস্রায়েলত্ আর যিরূশালেমত্ জঘন্য কাম্ গরা ওইয়্যে। যিহূদার মানুচ্চুনে দেবেদা পূজিয়্যে মিলেগুনোরে লোইনে লগেপ্রভু যিগুনোরে কোচ্পায় তারারে অসিজি গোজ্যে। 12যিগুনে এবাবোত্যে কাম্ গরন তারা যুনিয়ো বা বেগত্তুন্ খেমতাবলা লগেপ্রভুর নাঙে উৎসর্বর জিনিস্ আনন্ তো লগেপ্রভু যাকোব বংশ ভিদিরেত্তুন্ তারারে বেক্কুনোরে শেষ্ গুরি দিবো।
13আর এক্কান ভান্ন্যেই কাম্ তুমি গুরি থাগঅ; সিয়েন অলঅ, চোগো পানিয়ে তুমি লগেপ্রভুর পূজোবো ভাজঅ। তুমি কানাকুদি আর বিলেপ্ গরঅ, কিত্যেই তুমি যিয়েনি দুয়ো সিয়েনি উগুরে তে আর মনযোগ্ ন-দে বা হুজি মনে তমা আঢত্তুন্ সিয়েনি গুজিয়ো ন-লয়। 14তুমি কত্তে, “কিত্তে ন-গরঅ?” ইয়েনর্ কারনান্ অলঅ, লগেপ্রভু তমার্ পত্তি মান্জ্যরে আর তার্ গাবুজ্যে কালর্ মোগ্ লনার্ সাক্ষী ওইয়্যে; মাত্তর্ যুনিয়ো সেই মিলেবো তা সমাজ্যে, তার্ মেলালোই চুক্তি গোজ্যে মোগ্, তো তে তা লগে বেঈমানী গোজ্যে। 15লগেপ্রভু কি নেক্কোরে আর মোক্কোরে এক ন-গরে? কিয়্যেদি আর আত্মাদি তারা তারই। তারা কিত্তে এক? কিত্যে তে তারা মাধ্যমে এক্কো গোজেন ভক্ত বংশ রোক্ষ্যে গুরিবাত্তে চেইয়্যে। সেনত্তে তুমি তমা মন পৌইদ্যেনে উজিয়ার্ অ; গাবুজ্যেকালর্ মোগো লগে তুমি বেঈমানী ন-গোজ্য। 16ইস্রায়েলর গোজেন লগেপ্রভু কত্তে, “মুই মোগোরে ছাড়ি দেনা ঈচ্ গরং।” ইয়েনি বাদেয়ো বেগত্তুন্ খেমতাবলা লগেপ্রভু কত্তে, “যে মানুচ্চো কাবড়্ বুনেদে ধোক্ক্যেন নিজোরে অত্যেচার্ দিইনে সাজে তার সেই কামানি মুই ঘিনাং। সেনত্তে তুমি তমা মন পৌইদ্যেনে উজিয়ার অ, বেঈমানী ন-গোজ্য।”
বিচেরর্ দিন
17তুমি নিজো কধালোই লগেপ্রভুরে বল্পোজ্যে গোজ্য। তো তুমি কত্তে, “কেধোক্ক্যেন্গুরি আমি তারে বল্পোজ্যে গোজ্যেই?” তুমি এবাবোত্যেগুরি গোজ্য-তুমি কোইয়োদে, “যিগুনে অন্যেই গরন্ তারা বেক্কুনে লগেপ্রভুর চোগেদি গম্ আর তে তারা উগুরে হুজি,” বা কোইয়োদে, “কুদু সেই গোজেনে যিবে ন্যায়বিচের্ গরে?”
Currently Selected:
মালাখি 2: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
