মালাখি 1
1
1মালাখিরে দিইনে ইস্রায়েল ইধু লগেপ্রভুর কধানি।
যাকোবরে কোচ্পানা আর এষৌরে এলাফেলা গরানা
2-3লগেপ্রভু কত্তে, “মুই তমারে কোচ্পেইয়োং,” মাত্তর্ তুমি কত্তে, “তুই কেধোক্ক্যেন গুরি আমারে কোচ্পেইয়োচ্?” ইয়েনর্ জোবত্ লগেপ্রভু কত্তে, “এষৌ কি যাকোবর ভেই ন-এলঅ? তো দঅ মুই যাকোবরে কোচ্পেইয়োং মাত্তর্ এষৌরে এলাফেলা গোজ্জ্যং। মুই তা মুড়োগুন ভস্তর্ জাগা বানেয়োং আর তার জাগাগান ধূল্যেচর-চাগালার শিয়েলুনোরে দুয়োং।”
4ইদোমে অয়ত কবঅ, “আমারে কট্টা কট্টা গরা অলেয়ো আমি ভস্ত ওইয়্যে জাগায়ানি আরঅ তুলিবোং।” মাত্তর্ বেগত্তুন্ খেমতাবলা লগেপ্রভু কত্তে, “তারা তুলি পারন্ মাত্তর্ মুই ভাঙি ফেলেম। তারারে কুয়ো অবঅ, ‘পাজি দেশ’ আর ‘যে জাদ্তো নিত্য লগেপ্রভুর রাগর্ তলে রোইয়্যে ।’ 5তুমি সিয়েন নিজে চোগেদি দেগিবা আর কবা, ‘ইস্রায়েলর দুযির্ বারেন্দিয়ো লগেপ্রভু দাঙর্।’ ”
ধর্মগুরুগুনোর বিরুদ্ধ কধা
6বেগত্তুন্ খেমতাবলা লগেপ্রভু কত্তে, “পুয়ো তা বাবরে আর চাগর্ তা গিরোজোরে সর্মান গরে। যুনি মুই বাপ্ ওই থাং সালে মুই পাঙ্গে সর্মানান্ কুদু? যুনি গিরোজ্ ওই থাং সালে মর্ পাওনা শ্রদ্ধাগান্ কুদু? ও ধর্মগুরুগুন, তুমি মরে ঈচ্ গোজ্য। মাত্তর্ তুমি কত্তে, ‘আমি কেধোক্ক্যেনগুরি তরে ঈচ্ গোজ্যেই?’ 7মর্ ডালি পূজোবো উগুরে তুমি অসিজি হানা রাগেইনে মরে ঈচ্ গোজ্য। মাত্তর্ তুমি কত্তে, ‘সিয়েন্দোই কি তুই অসিজি ওইয়োচ্?’ তুমি যেক্কে কঅ, ‘লগেপ্রভুর টেবিলান ঈচ্ গরে পারা,’ সেক্কে দঅ তুমি মরে অসিজি কোইয়ো। 8য়েমান্-উৎসর্বর অনুষ্ঠানত্তে যেক্কে চোগ্ নেইয়্যে য়েমান্ আনঅ সেক্কে সিয়েন কি অন্যেয় নয়? যেক্কে তুমি লেং আদুড়্ আর পীড়ে ধোজ্যে য়েমান্দোই উৎসর্বর অনুষ্ঠান গরঅ, সেক্কে কি সিয়েন অন্যেয় নয়? তমা শাজন্গুরিয়্যেবো ইধু সিগুন উৎসর্ব গুরিলে তে কি তমা উগুরে হুজি অবঅ? তে কি তমারে গুজি লবঅ? মুই বেগত্তুন্ খেমতাবলা লগেপ্রভু তমারে পুযোর্ গরঙর্।”
9ইক্কিনে গোজেন ইধু দোয়্যে চেইনে কি লাভ? তমা আঢ্তানিলোই যেক্কে এবাবোত্যে উৎসর্ব গরা ওইয়্যে, সেক্কে তে কি আমারে গুজি লবঅ? শুনো, বেগত্তুন্ খেমতাবলা লগেপ্রভু কি কোইয়্যে, 10“হায়! যুনি তমা ভিদিরে একজনেয়ো উবোসনা-ঘরর দোরানি নাঢি দিদাক্ আর তুমি মঅ ডালি পূজোবো উগুরে অনত্তক্ আগুন ন-জ্বালেদা সালে মুই হুজি অদুং। মুই তমা উগুরে হুজি নয় আর কনঅ উৎসর্বর জিনিস মুই তমা আঢত্তুন্ গুজি ন-লোম্। 11পূগেত্তুন্ ধুরি পোজিমেদি সং বেক্ জাদ ভিদিরে মঅ নাঙান্ মহৎ অবঅ। বেক্ জাগানিত্ মঅ নাঙে আগর্বাট্টি জ্বালা অবঅ আর উৎসর্ব গুরিবাত্তে সিজি জিনিস আনা অবঅ, কিত্যেই বেক্ জাদ ভিদিরে মঅ নাঙান্ মহৎ অবঅ। 12মাত্তর্ তুমি মঅ নাঙান্ অসর্মান গোজ্য, কিত্যে তুমি কত্তে, ‘লগেপ্রভুর টেবিলান অসিজি আর তা উগুরেদি হানাগান জঘন্য।’ 13তুমি তুচ্ছো গুরিবার মনোভাব্পোই ইয়েন অ কোই থাগঅ, ‘ইয়েন কি জ্বালা!’ তুমি দঅ লুদেয়্যে, লেং আদুড়্ বা পীড়েই ধোজ্যে য়েমান্ আনিনে উৎসর্বর অনুষ্ঠানত্তে দুয়ো, মাত্তর্ সিয়েন কি মুই তমা আঢত্তুন্ নেযেই পারং? মুই লগেপ্রভু এ কধাগান কঙর্। 14যিবের্ য়েমান পাল ভিদিরে যগাজ্যে মরদ য়েমান্ আগন্ আর তে সিবে দিবাত্তে মানত্ গোজ্যে মাত্তর্ সে পরেদি এক্কো থুদো য়েমান্ লগেপ্রভুর নাঙে উৎসর্ব গোজ্যে, তে দঅ দগাবাঁজি। তা উগুরে অভিশাব্ পোড়োক্। মুয়ই দাঙর্ রাজা আর বেক্ জাদ্তুনে মরে দরান্। মুই বেগত্তুন্ খেমতাবলা লগেপ্রভু এ কধাগান কঙর্।”
Currently Selected:
মালাখি 1: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
