যোহন 19
19
1সেক্কে পীলাতে যীশুরে নেযেইনে অমকদ চাবুক্ মারিবার্ উগুম্ দিলো। 2সৈন্যগুনে কাদা-লুদিলোই এক্কো মুকুট্ বানেইনে যীশু মাঢাবোত্ পিনেই দিলাক্। 3পরেদি তারে বেগুনো রঙর্ কাবড় উরেই দিলাক্ আর তা ইধু যেইনে কলাক্, “ও যিহূদী-রাজ, জয় ওক্!” ইয়েন কোইনে সৈন্যগুনে তারে চুয়োড়্ মারা ধল্ল্যাক্।
4পীলাতে আরঅ বারেদি এইনে মানুচ্চুনোরে কলঅ, “চঅ, মুই তারে তমা ইধু নিগিলেই আনঙর্ যাতে তুমি বুঝি পারঅ, মুই তার্ কনঅ দুষ্ ন-পাঙর্।” 5যীশু সেই কাদা বলা মুকুট্তো আর বিগুনো রঙর্ কাবড়ান্ উজ্যে অবস্থায় বারেদি এলঅ। সেক্কে পীলাতে মানুচ্চুনোরে কলঅ, “এইয়্যে চঅ, সে মানুচ্চো।”
6যীশুরে দেগিনে আজল্ ধর্মগুরুগুনে আর কামগুরিয়্যেগুনে রঅ ছাড়িনেই কলাক্, “ত্রুুশোত্ দুয়ো, তারে ত্রুুশোত্ দুয়ো।”
পীলাতে মানুচ্চুনোরে কলঅ, “তুমি তারে নেযেইনে ত্রুুশোত্ দুয়ো, কিয়া মুই তার্ কনঅ দুষ্ ন-দেগঙর্।”
7যিহূদী নেতাগুনে পীলাতরে কলাক্, “আমার্ এক্কো আইন আঘে, সেই আইন মজিম্ তার্ মরণ অনা উচিত, কিয়া তে নিজোরে গোজেনর্ পুয়ো কোইয়্যে।”
8পীলাতে যেক্কে এ কধাগান্ শুনিলো সেক্কে তে আরঅ দোরেল। 9তে আরঅ ঘর ভিদিরে যেইনে যীশুরে পুযোর্ গুরিলো, “তুই কুত্তুন্ এচ্চ্যচ্?” মাত্তর্ যীশু পীলাতরে কনঅ জোব্ ন-দিলো।
10ইয়েনত্যে পীলাতে যীশুরে কলঅ, “তুই কি মঅ লগে কধা ন-কবে? তুই কি হবর্ ন-পাজ্, তরে ইরি দিবার্ বা ত্রুুশোত্ দিবার্ খেমতা মর্ আঘে?”
11যীশু জোব্ দিলো, “উগুরেত্তুন্ তরে খেমতা দিয়্যে ন-অলে মঅ উগুরে তর্ কনঅ খেমতা ন-থেদঅ। সেনত্তে যে মরে তমা আদত্ দিয়্যে তা পাপ্পান্ বেশ্।”
12এ কধাগান্ শুনিনে পীলাতে যীশুরে ইরি দিবার্ চেষ্টা গরা ধুরিলো, মাত্তর্ যিহূদী নেতাগুনে রঅ ছাড়িনে কলাক্, “তুই যুনি এ মানুচ্চোরে ইরি দুয়োচ্ সালে তুই সম্রাট কৈসরর্ সমাজ্যে নয়। যে কেঅ নিজোরে রাজা বিলি দাবি গরে তে দঅ সম্রাট কৈসরর্ শত্রু।”
13এ কধাগান্ শুনিনে পীলাতে যীশুরে বারেদি আনিলো আর শিলো কুড়্ নাঙে এক্কান্ জাগাত্ বিচেরর্ আসনত্ বলঅ। ইব্রীয় ভাষায় সেই জাগানরে গাব্বাথা কুয়ো অদঅ। 14সেই দিন্নো এলঅ উদ্ধোর্-পরবর্ জুগেলেবার্ দিন। সেক্কে বেলান্ প্রায় দিবুজ্যে।
পীলাতে যিহূদী নেতাগুনোরে কলঅ, “এইয়্যে চঅ, তমা রাজাবো।”
15সেক্কে তারা রঅ ছাড়িনে কলাক্, “দূর্ গর্, দূর্ গর্; তারে ত্রুুশোত্ দুয়ো।”
পীলাতে তারারে কলঅ, “তমা রাজাবোরে কি মুই ত্রুুশোত্ দিম্?”
আজল্ ধর্মগুরুগুনে জোব্ দিলাক্, “সম্রাট কৈসর বাদে আমার আর কনঅ রাজা নেই।” 16সেক্কে পীলাতে যীশুরে ত্রুুশোত্ দিবাত্যে তারা আদত্ দি দিলো।
ত্রুুশোত্ প্রভু যীশুর্ মরণ
(মথি ২৭:৩২-৫৮; মার্ক ১৫:২১-৪১; লূক ২৩:২৬-৪৯)
সেক্কে সৈন্যগুনে যীশুরে নেযেলাক্। 17যীশু নিজো ত্রুুশ্চান্ নিজে ভুগিনে কুলো চারা নাঙে এক্কান্ জাগাত্ গেলঅ। সেই জাগানর্ ইব্রীয় নাঙান্ এলঅ গল্গথা। 18সিয়েনত্ তারা যীশুরে ত্রুুশোত্ দিলাক্-যীশুরে সংমধ্যে আর তা দ্বিধাগেদি অন্য দ্বিজনরে দিলাক্।
19পীলাতে এক্কান্ দুষ্ গোজ্যে বিলি চিদি লিগিনে যীশুর ত্রুুশো উগুরে লাগেই দিলো। সিয়েনত্ লেগা এলঅ, “নাসরতর্ যীশু, যিহূদীগুনোর্ রাজা।” 20যিয়েনত্ যীশুরে ত্রুুশোত্ দিয়্যে ওইয়্যে সেই জাগায়ান্ শঅর কায়-কুরে এলঅ বিলিনে যিহূদীগুনোত্তুন্ ভালোক্জনে সেই দুষ্ গোজ্যেদে চিদিগান্ পড়িলাক্। সিয়েন ইব্রীয়, রোমীয় আর গ্রীক ভাষায় লেগা এলঅ।
21সেক্কে যিহূদীগুনোর আজল্ ধর্মগুরুগুনে পীলাতরে কলাক্, “ ‘যিহূদীগুনোর রাজা,’ এ কধাগান্ ন-লিগিবা, বরং লেগঅ, ‘ইতে কধঅ, মুই যিহূদীগুনোর্ রাজা’।”
22পীলাতে কলঅ, “মুই যিয়েন্ লেক্ক্যং সিয়েন্ লেক্ক্যং।”
23যীশুরে ত্রুুশোত্ দেনার্ পরেদি সৈন্যগুনে তা কাবড়-চুগোড়ানি লোইনে নিজো ভিদিরে চের্ ভাগ্ গুরিলাক্। পরেদি তারা যীশুর্ সুলুম্মোয়ো নেযেলাক্। সেই সুলুম্মোত্ কনঅ সিলেই ন-এলঅ, উগুরেত্তুন্ ধুরি তলেদি সং বেক্কান্ বুন্ন্যে এলঅ। 24সিয়েন্ দেগিনে সৈন্যগুনে একজন আরেক্ জনরে কলাক্, “ইবে ন-ফাদিনে বরং ভাগ্য পোরোক্ষ্যে গুরি চেই ইবে কার্ অবঅ।”
ইয়েন্ ঘোট্যে যেন পবিত্র বোইবোর্ এ কধাগান্ পূরোণ অয়,
তারা নিজো ভিদিরে মঅ কাবড়-চুগোড়ানি ভাগ্ গত্তন্,
আর মঅ কাবড়ানিত্ত্যে তারা ভাগ্য পোরোক্ষ্যে গত্তন্।
আর ঘেচ্চ্যেক্গুরি সৈন্যগুনে ইয়েনি বেক্কানি গুরিলাক্।
25যীশুর্ মাবো, তা মাবোর্ বোন, ক্লোপার মোক্ মরিয়ম আর মগ্দলীনী মরিয়মে যীশুর ত্রুুশো কায়কুরে থিয়্যেই এলাক্। 26যীশু তা মারে আর যে শিচ্চ্যবোরে কোচ্পেদঅ তারে থিয়্যেই থাগদে দেগিলো। পত্তমে তে তা মারে কলঅ, “উইয়ো চাহ্, তঅ পুয়োবো।” 27যেরেদি সেই শিচ্চ্যবোরে কলঅ, “উইয়ো চাহ্, তঅ মাবো।” সেক্কেত্তুন্ ধুরি সেই শিচ্চ্যবো যীশুর্ মাবোরে তা নিজো ঘরত্ নেযেল।
28ইয়েন পরেদি বেক্কানি থুম্ ওইয়্যে কোই পারিনে পবিত্র বোইবোর্ কধানি যেন পূরোণ্ অয় সেনত্তে যীশু কলঅ, “মত্তুন্ তিরেচ্ পেইয়্যে।”
29সে জাগানত্ সিরকাত্ পুরো এক্কো পিলে এলঅ। সেক্কে তারা এক্কো স্পঞ্জ সেই সিরকাত্ ভিজেলাক্ আর এসোব গাজর্ ডেলাবো মাঢানত্ সিবে লাগেইনে যীশুর্ মুয়োন কুরে ধুরিলাক্। 30যীশু সেই সিরকা হানার্ পরেদি কলঅ, “থুম্ অলঅ।” সিয়েন পরেদি তে মাঢা নিগিরিনে তা আত্মাগান্ গোজেই দিলো।
31সে দিন্নো এলঅ পরবর্ জুগোলোনার্ দিন। যেরেদি দিন্নো এলঅ জিরেবার্ দিন, আর সেই জিরেবার্ দিন্নো এক্কো বিশেষ দিন এলঅ বিলি যিহূদী নেতাগুনে চেইয়োন্ যেন সে দিন্ন্যে কিয়্যেগানি ত্রুুশো উগুরে ন-থায়। ইয়েনত্যে তারা পীলাত ইধু কোজোলি গুরিলাক্ যেন ত্রুুশোত্ যিগুনে আঘন্ তারা টেঙানি ভাঙিনে ত্রুুশোত্তুন্ তারারে সোরেই ফেলা অয়। 32সেক্কে সৈন্যগুনে এইনে যীশু সমারে যিগুনোরে ত্রুুশোত্ দিয়্যে ওইয়্যে তারাত্তুন্ দ্বিজন ঠেং ভাঙি দিলাক্।
33পরেদি যীশু ইধু এইনে সৈন্যগুনে তারে মরা দেগিনে তা ঠেঙানি ন-ভাঙিলাক্। 34মাত্তর্ এক্কো সৈন্য তা বুগোদ্ শেল্লোই গুদো মারিলো, আর সেক্কেনে সিয়োত্তুন লো আর পানি নিগিলি এলঅ। 35যে নিজো চোগেদি ইয়েন্ দেগিলো তেয়ই সাক্ষি দিইনে কোইয়্যে, আর তা সাক্ষিগান্ সত্য। তে কোই পারে, তে যিয়েন্ কোইয়্যে সিয়েন্ সত্য, যেন তুমিয়ো বিশ্বেজ্ গুরি পারঅ।
36ইয়েনি বেক্কানি ঘোট্যে যেন পবিত্র বোইবোর্ এ কধাগান্ পূরোণ অয়, “তার্ এক্কো আড়্অ ভাঙা ন-অবঅ।” 37আরঅ বোইবোর্ আর এক্কান্ কধা ইয়েন-“যিবেরে তারা গুদেয়োন্ তান্দি তারা রিনি চেবাক্।”
প্রভু যীশুর কবর্
(মথি ২৭:৫৭-৬১; মার্ক ১৫:৪২-৪৭; লূক ২৩:৫০-৫৬)
38এ বেক্ ঘটনাগানির্ পরেদি অরিমাথিয়া আদামর্ যোষেফে যীশুর কিয়্যেগান্ নেযেবাত্যে পীলাত ইধু অনুমতি চেলঅ। যোষেফে এলঅ যীশুর্ গুমুরো শিচ্চ্য, কিয়া তে যিহূদী নেতাগুনোরে দোরেদ। পীলাতে অনুমতি দেনার্ পরেদি তে এইনে যীশুর্ কিয়্যেগান্ নেযেল। 39আগেদি যিবে রেদোত্ যীশু ইধু এচ্চ্যে সেই নীকদীমেয়ো প্রায় তেত্রিশ কেজি তুম্বাজ্ তেল্ আর অগুরু মিজেইনে আনিলো। 40পরেদি তারা যীশুর্ কিয়্যেগান্ লোইনে যিহূদীগুনোর্ গোর্ দিবার্ সুদোম্ মজিম্ সেই বেক্ তুমবাচ্ জিনিচ্চানি সমারে কিয়্যেগান্ কাবড়লোই বেড়েলাক্।
41যীশুরে যিয়েনত্ ত্রুুশোত্ দিয়্যে ওইয়্যে সেই জাগানত্ এক্কো বাগান এলঅ আর সিয়েনত্ এক্কো নুয়ো গোর্ এলঅ। সেই গোরান ভিদিরে কাররে কনদিন্অ থুয়ো ন-অয়। 42সেই দিন্নো এলঅ যিহূদীগুনোর্ পরবর্ জুগেলেবার্ দিন, আর গোরান্অ কায়কুরে এলঅ বিলি তারা যীশুরে সেই গোরানত্ থলাক্।
Currently Selected:
যোহন 19: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
