যোহন 16
16
1মুই তমারে এ বেক্ কধানি কলুং যেন তুমি বিশ্বেজে ঠিগ্ থাগঅ। 2মানুচ্চুনে সমাজ-ঘরত্তুন্ তমারে নিগিলেই দিবাক্; এন্ কি, সময় এজের্ যেক্কে তমারে যিগুনে মারে ফেলেবাক্ তারা মনে গুরিবাক্ যে, তারা গোজেনর্ সেবা গত্তন্। 3তারা ইয়েনি বেক্কানি গুরিবাক্ কিয়া তারা বাবারেয়ো ন-চিনোন্, মরেয়ো ন-চিনোন্। 4মুই তমারে ইয়েনি বেক্কানি কলুং যেন সেই সময়বো এলে পরেদি তমাত্তুন্ ইদোত্ উদে যে, মুই তমারে এ কধাগান্ কোইয়োং।
মুই পৌইল্যাত্তুন্ ধুরি এদক্কানি কধা তমারে ন-কং, কিয়া মুই তমা সমারে সমারে এলুং। 5যে মরে দিপাধেয়্যে মুই ইক্কিনে তা ইধু যাঙর্, আর তমাত্তুন্ কেঅ মরে পুযোর্ অ ন-গরন্, তুই কুধু যর্? 6মুই তমারে ইয়েনি কোইয়োং কিনেই বরং তমা মনানি দুঘে ভুরি যেইয়্যে। 7তো মুই তমারে সত্য কধা কঙত্তে, মর্ যানাগান্ তমা পক্ষে গম্, কিয়া মুই ন-গেলে সেই সাহায্যগুরিয়্যেবো তমা ইধু ন-এবঅ। মাত্তর্ মুই যুনি যাং সালে তারে তমা ইধু দি পাধেম্। 8তে এইনে পাপ পৌইদ্যেনে, গোজেন আওজ্-মজিম্ চলানা পৌইদ্যেনে আর গোজেন বিচের পৌইদ্যেনে মানুচ্চুনোরে চেতনা দিবো। 9তে পাপ পৌইদ্যেনে চেতনা দিবো, কিয়া মানুচ্চুনে মঅ উগুরে বিশ্বেজ্ ন-গরন্; 10গোজেনর্ আওজ্-মজিম্ চলানা পৌইদ্যেনে চেতনা দিবো, কিয়া মুই বাবা ইধু যাঙর্ আর তুমি মরে আর্ ন-দেগিবা; 11বিচের পৌইদ্যেনে চেতনা দিবো, কিয়া জগদ গিরোজর্ বিচের্ ওই যেইয়্যে।
12তমা ইধু আরঅ বোউত্ কধা মর্ কবার্ আঘে, মাত্তর্ ইক্কিনে তুমি সিয়েনি সোজ্য গুরি ন-পারিবা। 13মাত্তর্ সেই সত্যর্ আত্মাগান্ যেক্কে এবঅ সেক্কে তে তমারে পধ দেগেইনে পুরোপুরি সত্যত্ নেযেব। তে নিজোত্তুন্ কধা ন-কবঅ, মাত্তর্ যিয়েনি শুনে সিয়েনি কবঅ, আর যিয়েনি ঘুদিবো সিয়েনি তে তমারে জানেব। 14-15সেই সত্যর্ আত্মাগানে মর্ মহিমাগান্ ফগদাং গুরিবো, কিয়া মুই যিয়েনি গরং আর কং সেনত্তে তে তমা ইধু ফগদাং গুরিবো। বাবার্ যিয়েনি আঘে সিয়েনি বেক্কানি মর্। সেনত্তে মুই কোইয়োং, মুই যিয়েন গরং আর কং সেনত্তে তে তমা ইধু ফগদাং গুরিবো।
16“কয়েক্ দিন পরে তুমি আর মরে ন-দেগিবা, আরঅ কয়েক দিন পরে তুমি মরে দেগিবা।”
শিচ্চ্যগুনোরে বুঝোনা
17এ কধাগান্ শুনিনে যীশুর শিচ্চ্যগুনো ভিদিরে কুয়ো কি গরা ধুরিলাক্, “ইবে আমারে ইয়েন্ কি কর্, ‘কয়েক্ দিন বাদে তুমি আর মরে ন-দেগিবা, আরঅ কয়েক্ দিন বাদে তুমি মরে দেগিবা’? আরঅ তে কত্তে, ‘মুই বাবা ইধু যাঙর্।’ 18যে কিজু কালর্ কধা ইবে কর্, সিবে কি? আমি বুঝি ন-পারির্ তে কি কর্।”
19শিচ্চ্যগুনে যে এ পৌইদ্যেনে কিজু পুযোর্ গুরিবাত্তে চাদন্, সিয়েন্ বুঝি পারিনে যীশু তারারে কলঅ, মুই যে কোইয়োং, কয়েক্ দিন পরে তুমি আর মরে ন-দেগিবা, আরঅ কয়েক দিন পরে তুমি মরে দেগিবা, এ পৌইদ্যেনে কি তুমি নিজো ভিদিরে কুয়োকি গরর্? 20মুই তমারে ঘেচ্চ্যেক্গুরি কঙর্, তুমি কানিবা আর দুঘে ভাঙি পরিবা মাত্তর্ জগদর্ মানুচ্চুনে ফুত্তি গুরিবাক্। তুমি দুঘ্ পেবা, মাত্তর্ যেরেদি তমার্ সেই দুঘ্কান্ আর ন-থেবঅ; সিয়েনর্ বদলে তুমি হুজী অবা। 21পুয়ো ফুদেবার্ অক্তত্ মিলেগুনে দুঘ্ পান্, কিয়া তা অক্তবো ওইয়্যেগি। মাত্তর্ পুয়ো ফুদেবার্ পরেদি জগদত্ এক্কো নুয়ো মানুচ্ এজানায় হুজীয়ে তার্ আর সেই দুঘো কধাগান্ মনত্ ন-থায়। 22সেবাবোত্যেগুরি তুমিয়ো ইক্কিনে দুঘ্-কষ্ট পর্; মাত্তর্ আরঅ তমা লগে মর্ দেগা অবঅ, আর সেক্কে তমা মনানি হুজীয়ে ভুরি উদিবো আর সেই হুজীগান্ কেঅ তমাত্তুন্ কারি ন-লবাক্। 23সেদিন্ন্যে তুমি মরে কনঅ কধা পুযোর্ ন-গুরিবা। মুই তমারে ঘেচ্চ্যেক্গুরি কঙর্, তুমি মঅ নাঙে বাবা ইধু যিয়েনি মাগিবা সিয়েনি তে তমারে দিবো। 24এজঅ সং তুমি মঅ নাঙে কিচ্চু ন-মাগঅ। মাগঅ, তুমি পেবা যেন তমা হুজীগান্ পুরোপুরি অয়।
25“এ বেক্ শিক্ষ্যের্ কধানি মুই তমা ইধু তুলোনা দিইনে কলুং। মাত্তর্ এমন্ অক্ত এজের্ যেক্কে মুই আর তুলোনা দিইনে তমা ইধু কধা ন-কোম্, মাত্তর্ খুলোমেলা গুরি বাবা পৌইদ্যেনে কোম্। 26সেদিন্ন্যে তুমি নিজে মঅ নাঙে মাগিবা, আর মুই ন-কঙত্তে যে, মুয়ই তমা পক্ষ ওইনে বাবা ইধু কোজোলি গুরিম্। 27বাবা নিজে দঅ তমারে কোচ্পায়, কিয়া তুমি মরে কোচ্পেইয়ো আর বিশ্বেজ্ গোজ্য যে, মুই বাবা গোজেনত্তুন্ এচ্চ্যং। 28ঘেচ্চ্যেক্গুরি মুই স্বর্গর্ বাবা ইত্তুন্ এ জগদত্ এচ্চ্যং, আরঅ মুই এ জগদ্তান্ ফেলেইনে বাবা ইধু যাঙর্।”
29সেক্কে তা শিচ্চ্যগুনে তারে কলাক্, “চাহ্, ইক্কে দঅ তুই খুলোমেলা গুরি কধা কর্, তুলোনা দিইনে ন-কর্। 30ইক্কে আমি বুঝি পাজ্জ্যেই, তর্ অজানা কিচ্চু নেই, আর কেঅ যে তরে কনঅ কিজু পুযোর্ গরন্ সিয়েন দরকার্-অ তর্ নেই। ইয়েনত্যে আমি বিশ্বেজ্ গুরিই যে, তুই গোজেনত্তুন্ এচ্চ্যস্।”
31যীশু তা শিচ্চ্যগুনোরে কলঅ, “ইক্কে কি সালে বিশ্বেজ্ অর্? 32চঅ, সেই সময়ান্ এজের্, এন্ কি লুম্মেগি, যেক্কে তুমি দল-নেইয়্যে ওইনে মরে গায় গায় ফেলেইনে যে যার্ জাগাত্ যেবাগোই। তো মুই গায় গায় নয়, কিয়া বাবা মঅ সমারে সমারে আঘে। 33মুই তমারে ইয়েনি বেক্কানি কলুং যেন তুমি মঅ সমারে আঘঅ কিনেই মনত্ শান্তি পঅ। এ জগদত্ তুমি কষ্ট আর চাপ মুয়োত্ আঘ, মাত্তর্ সাহচ্ ন-আরেইয়ো; মুয়ই জগদ্তানরে জয় গোজ্যং।”
Currently Selected:
যোহন 16: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
