যোহন 15
15
প্রভু যীশু আংগুর্ গাজ্, শিচ্চ্যগুনে ডেলা-পাদা
1মুয়ই আজল্ আংগুর্ গাজ্ আর মঅ বাপ্পো গিরোজ্। 2মর্ যিদুক্কুন্ ডেলাত্ গুলো ন-ধরন্ সিগুন তে কাবি ফেলায়, আর যিদুক্কুন্ ডেলাত্ গুলো ধরন্ সিগুন তে ছাজিনে সাব্ গরে যেন আরঅ ভালোক্কুন্ গুলো ধুরি পারন্। 3মুই যে কধাগান্ তমারে কোইয়োং সিয়েনত্তে তুমি আগে সাব্ ওইয়ো। 4মঅ সমারে থাগঅ আর মুইয়ো তমা মনত্ থেম্। আংগুর্ গাজ লগে ন-থেলে ডেলাগুন্ যেবাবোত্যেগুরি নিজে নিজে গুলোগুলি ধুরি ন-পারে, সেবাবোত্যেগুরি মঅ লগে ন-থেলে তুমিয়ো নিজে নিজে গুলোগুলি ধোরেই ন-পারঅ।
5মুয়ই আংগুর্ গাজ্, আর তুমি সিবের্ ডেলা-পাদা। যুনি কেঅ মঅ সমারে থায় আর মুই তা সমারে থাং সালে তা জিংকানিত্ সয়-সাগোজ্যে গুলোগুলি ধরে, কিয়া মরে বাদে তুমি কিচ্চু গুরি ন-পারঅ। 6যুনি কেঅ মঅ সমারে ন-থায় সালে কাপ্প্যে ডেলা ধোক্ক্যেন্ তারে বারেদি ফেলেই দিয়্যে অয় আর সিবে শুগেই যায়। সেক্কে সেই ডেলাগুন্ কুড়েইনে আগুনোত্ ফেলে দিয়্যে অয় আর সিগুন পুড়ি যান্। 7যুনি তুমি মঅ সমারে থাগঅ আর মঅ কধানি তমা মনত্ থায় সালে তমার্ যিয়েন আওজ্ সিয়েন চেইয়ো; তমাত্যে সিয়েন গরা অবঅ। 8যুনি তমা জিংকানিত্ জদবদে গুলো ধরে আর এবাবোত্যেগুরি তুমি নিজোরে মঅ শিচ্চ্য বিলিনে প্রমাণ গরঅ সালে মঅ বাপ্পোর্ বাঈনী অবঅ। 9বাবা যেবাবোত্যেগুরি মরে কোচ্পেইয়্যে মুইয়ো সেবাবোত্যেগুরি তমারে কোচ্পেইয়োং। মঅ কোচ্পানা লগে থাগঅ। 10মুই মঅ বাপ্পোর্ বেক্ উগুমানি পালেনে যেবাবোত্যেগুরি তা কোচ্পানাত্ আঘং, সেবাবোত্যেগুরি তুমিয়ো যুনি মঅ উগুমানি পালঅ সালে তুমিয়ো মঅ কোচ্পানাত্ থেবা।
11এ বেক্ কধানি মুই তমারে কলুং যেন মঅ হুজীগান্ তমা মনত্ থায় আর তমার হুজীগান্ পূরোণ্ অয়। 12মঅ উগুমান্ ইয়েন, মুই যেবাবোত্যেগুরি তমারে কোচ্পেইয়োং, সেবাবোত্যেগুরি তুমিয়ো একজন আরেক জনরে কোচ্পেইয়ো। 13কেঅ যুনি তা সমাজ্যেগুনোত্তে নিজো পরাণান্ দে সালে তাত্তুন্ বেশ্ কোচ্পানা আর কারর্ নেই। 14যেদক্কানি উগুম্ মুই তমারে দুয়োং সিয়েনি যুনি তুমি পালঅ সালে তুমি মঅ সমাজ্যে। 15মুই তমারে আর চাগর্ ন-কং, কিয়া গিরোজে কি গরে চাগরে সিয়েন্ কোই ন-পারে; বরং মুই তমারে সমাজ্যে কোইয়োং, কিয়া মঅ বাবাত্তুন্ যিয়েনি শুন্ন্যং সিয়েনি তমারে কোইয়োং। 16তুমি মরে বেঈ ন-লঅ, মাত্তর্ মুয়ই তমারে বেঈ লোইনে কামত্ লাগেয়োং যেন তমা জিংকানিত্ গুলো ধরন্ আর তমার্ সেই গুলোগুন্ যেন থিগি থায়। সালে মঅ নাঙে বাবা ইধু যিয়েনি মাগিবা সিয়েনি তে তমারে দিবো। 17এ উগুমান্ মুই তমারে দোঙত্তে যেন, তুমি একজন আরেক জনরে কোচ্পঅ।
পিত্থিমীগান্ বিশ্বেজিগুনোর্ শত্রু
18জগদ মানুচ্চুনে তমারে ঘিনান্, মাত্তর্ মনত্ রাগেয়ো, তা আগেদি তারা মরে ঘিনেয়োন্। 19যুনি তুমি এ জগদর্ অদা সালে মানুচ্চুনে তারারে নিজোর্ বিলি তমারে কোচ্পেদাক্। মাত্তর্ তুমি এ জগদর্ নয়, বরং মুই তমারে জগদ ভিদিরেত্তুন্ বেঈ লোইয়োং কিনেই জগদ মানুচ্চুনে তমারে ঘিনান্। 20মর্ এ কধাগান্ তুমি পুরি ন-ফেল্ল্য, চাগরে তা গিরোজত্তুন্ দাঙর্ নয়। সেনত্তে মানুচ্চুনে যুনি মরে মারে ফেলেবাত্তে চেষ্টা গুরি থান্ সালে তমারেয়ো সিয়েন্ গুরিবাক্; যুনি তারা মঅ কধা শুনি থান্ সালে তমা কধায়ো শুনিবাক্। 21তারা মত্যে তমা উগুরে ইয়েনি বেক্কানি গুরিবাক্, কিয়া যে মরে দিপাধেয়্যে তারা তারে ন-চিনোন্।
22মুই যুনি ন-এদুং আর তারা ইধু কধা ন-কদুং সালে তারার্ দুষ্ ন-অদঅ; মাত্তর্ ইক্কিনে পাপত্যে তারার্ কনঅ ছলনা ধুরি ন-পারিবাক্। 23যে মরে ঘিনায় তে মঅ বাপ্পোরেয়ো ঘিনায়। 24যেদক্কানি কাম্ আর কেঅ কনদিন্অ ন-গরন্ সে কামানি যুনি মুই তারা ইধু ন-গত্তুং সালে তারার্ দুষ্ ন-অদঅ। মাত্তর্ ইক্কিনে তারা মরে আর মঅ বাপ্পোরে দেক্ক্যন্ আর ঘিনেয়োন্। 25ইয়েন ওইয়্যে যেন তারার্ আইন-কানুনোত্ লেগা এ কধাগান্ পূরোণ্ অয়, তারা অকারণে মরে ঘিনেয়োন্।
26যে এজাল্ দিয়্যেবোরে মুই বাবা ইত্তুন্ তমা ইধু পাধেই দিম্, তে যেক্কে এবঅ সেক্কে তেয়ই মঅ পৌইদেনে সাক্ষি দিবো। তে অলঅ সত্যর্ আত্মা যিবে বাবাত্তুন্ এবঅ। 27আর তুমিয়ো মঅ পৌইদ্যেনে সাক্ষি দিবা, কিয়া পৌইল্যাত্তুন্ ধুরি তুমি মঅ সমারে সমারে আঘঅ।
Currently Selected:
যোহন 15: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
