যোহন 14
14
প্রভু যীশু পথ
1“তমা মনানি যেন আর থির্ নেইয়্যে ন-অয়। গোজেন উগুরে বিশ্বেজ্ গরঅ, মঅ উগুরেয়ো বিশ্বেজ্ গরঅ। 2মঅ বাবঅ ঘরত্ থেবার্ বোউত্ জাগা আঘে। সিয়েন্ ন-থেলে মুই তমারে কোদুং, কিয়া মুই তমাত্যে জাগা থিক্ গুরিবাত্যে যাঙর্। 3মুই যেইনে তমাত্যে জাগা থিক্ গুরিনে আরঅ ফিরি এইম্ আর মঅ ইধু তমারে নেযেম্, যেন মুই যিধু থাং তুমিয়ো সিধু থেই পারঅ। 4মুই কুদু যাঙর্ সিয়েনর্ পথ্তান্ দঅ তুমি হবর্ পঅ।”
5থোমা যীশুরে কলঅ, “প্রভু, তুই কুধু যর্ সিয়েন্ আমি কোই ন-পারিই, সালে পথ্তান্ কেধোক্ক্যেন্ গুরি হবর্ পেবং?”
6যীশু থোমারে কলঅ, “মুয়ই পথ, সত্য আর জিংকানি। মঅ মাধ্যমে ন-গেলে কনজনে বাবা ইধু যেই ন-পারে। 7তুমি যুনি মরে হবর্ পেদা সালে মঅ বাবারেয়ো হবর্ পেদা। ইক্কিনে তুমি তারে হবর্ পেইয়ো আর তারে দেক্কোয়ো।”
8ফিলিপ যীশুরে কলঅ, “প্রভু, বাবারে দেগা, সেক্কে আমি হুজী অবং।”
9যীশু তারে কলঅ, ফিলিপ, এদক্ দিন মুই তমা সমারে সমারে আঘং, তো কি তুই মরে ন-চিনোচ্? যে মরে দেক্ক্যে তে বাবারেয়ো দেক্ক্যে। তুই কেধোক্ক্যেন্ গুরি কত্তে, বাবারে দেগা? 10তুই কি বিশ্বেজ্ ন-গরচ্ যে, মুই বাবা সমারে আঘং আর বাবা মঅ সমারে আঘে? যেদক্কানি কধা মুই তমারে কং সিয়েনি মুই নিজোত্তুন্ ন-কং, মাত্তর্ বাবা, যে মঅ সমারে আঘে, তেয়ই তা কামানি গরের্। 11মঅ কধানি বিশ্বেজ্ গরঅ যে, মুই বাবা সমারে আঘং আর বাবা মঅ সমারে আঘে। সিয়েন্ ন-অলে অন্তত: মর্ এই বেক্ কামানিত্যে মঅ উগুরে বিশ্বেজ্ গরঅ।
12মুই তমারে ঘেচ্চ্যেক্গুরি কঙর্, কেঅ যুনি মঅ উগুরে বিশ্বেজ্ গরে সালে মুই যেদক্কানি কাম্ গোজ্যং তেয়ো সিয়েনি গুরিবো। আর মুই বাবা ইধু যাঙর্ বিলি তে ইয়েনিত্তুন্ আরঅ দাঙর্ দাঙর্ কাম্ গুরিবো। 13তুমি মঅ নাঙে যিয়েনি মাগিবা সিয়েনি মুই গুরিম্, যেন বাবা মহিমাগান্ পুয়োবোর্ মাধ্যমে ফগদাং পায়। 14মঅ নাঙে যুনি মঅ ইধু কিজু মাগঅ সালে মুই সিয়েন গুরিম্।
পবিত্র আত্মার পৌইদ্যেনে এগেম্
15তুমি যুনি মরে কোচ্পঅ সালে মর্ বেক্ উগুমানি পালেবা। 16মুই বাবা ইধু মাগিম্, আর তে তমা ইধু চিরকাল্ থেবাত্যে আর এক্কো বল্ দিয়্যেরে পাধেই দিবো। 17সেই বল্ দিয়্যেবো সত্যর্ আত্মা। জগদ মানুচ্চুনে তারে মানি লোই ন-পারন্, কিয়া তারা তারে ন-দেগন্ আর তারে হবর্অ ন-পান্। মাত্তর্ তুমি তারে হবর্ পঅ, কিয়া তে তমা সমারে সমারে থায় আর তে তমা মনত্ বজত্তি গুরিবো।
18মুই তমারে গায় গায় গুরি ফেলেইনে থোই ন-যেম্; মুই তমা ইধু এইম্। 19খানক্কন্ পরেদি জগদ মানুচ্চুনে আর মরে ন-দেগিবাক্, মাত্তর্ তুমি দেগিবা। মুই জেদা আঘং কিনেই তুমিয়ো জেদা থেবা। 20সেদিন্ন্যে তুমি জানিবা যে, মুই বাবা সমারে এগত্তর্ আঘং আর তুমি মঅ সমারে এগত্তর্ আঘঅ আর মুই তমা সমারে এগত্তর্ আঘং। 21যে মর্ বেক্ উগুমানি কোই পারে আর পালন্ গরে তেয়ই মরে কোচ্পায়। যে মরে কোচ্পায় মঅ বাপ্পো তারে কোচ্ পেবঅ। মুইয়ো তারে কোচ্পেম্ আর তা ইধু নিজোরে ফগদাং গুরিম্।
22সেক্কে যিহূদা (ইষ্কারিয়োৎ নয়) তারে কলঅ, “প্রভু, কিত্ত্যে তুই বানা আমা ইধু নিজোরে ফগদাং গুরিবে, জগদ মানুচ্চুনো ইধু ন-গুরিবে?”
23যীশু তারে জোব্ দিলো, যুনি কেঅ মরে কোচ্পায় সালে তে মঅ কধানি মানি চুলিবো। মঅ বাপ্পো তারে কোচ্পেবঅ আর আমি তা ইধু এবং তা সমারে বজত্তি গুরিবোং। 24যে মরে কোচ্ ন-পায় তে মঅ কধানি মানি ন-চলে। যে কধানি তুমি শুনোর্ সিয়েনি মঅ কধা নয় মাত্তর্ যে মরে দিপাধেয়্যে সেই বাবার্ কধা। 25তমা সমারে থাগদে থাগদে এ বেক্ কধানি মুই তমারে কোইয়োং। 26সেই সাহায্যগুরিয়্যেবো, মানে পবিত্র আত্মা যিবেরে বাবা মঅ নাঙে পাধেই দিবো, তেয়ই বেক্কানি পৌইদ্যেনে তমারে শিক্ষ্যে দিবো, আর মুই তমারে যিয়েনি কোইয়োং সিয়েনি বেক্কানি তমারে ইদোত্ তুলি দিবো।
27মুই তমাত্যে শান্তি থোই যাঙর্, মঅ শান্তিগান্ মুই তমারে দোঙর্; পিত্থিমীগানে যেবাবোত্যেগুরি দে মুই সেবাবোত্যেগুরি ন-দুয়োং। 28তুমি শুন্ন্য মুই তমারে কোইয়োং, মুই যাঙল্লোই আরঅ তমা ইধু ফিরি এম্। যুনি তুমি মরে কোচ্পেদা সালে মুই মঅ বাবা ইধু যাঙর্ কিনেই হুজী অদা, কিয়া বাবা মত্তুন্-অ দাঙর্। 29ইয়েনি বেক্কানি ঘুদিবার্ আগেদি মুই তমারে কোই থোলুং যেন ঘুদিলে পরেদি তুমি বিশ্বেজ্ গুরি পারঅ। 30মুই তমা সমারে আর বেশ্ কধা ন-কোম্, কিয়া জগদর্ গিরোজ্সো এজের্। মঅ উগুরে তার্ কনঅ অধিকার্ নেই। 31মাত্তর্ ইয়েন ঘদের্ যেন মানুচ্চুনে কোই পারন্ যে, মুই বাবারে কোচ্পাং আর বাবা মরে যেবাবোত্যে উগুম্ দিয়্যে মুই বেক্কানি সেবাবোত্যে গরং। ইক্কে উদো, আমি ইয়োত্তুন যেই।
Currently Selected:
যোহন 14: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
