যোহন 12
12
মরিয়মর শ্রদ্ধা
1উদ্ধোর-পরব ছদিন্ আগে যীশু বৈথনিয়াত্ গেলঅ। যিবেরে তে মরণত্তুন্ জেদা গোজ্যে সেই লাসারে বৈথনিয়াত্ বজত্তি গুরিদো। 2সিধু তারা যীশুত্যে হানার্ যুক্কোল গুরিলাক্। মার্থা হানা লবিয়োত্ গরের্। যিগুনে যিশু সমারে হেবাত্যে বোচ্চ্যন্ তারা ভিদিরে লাসারেয়ো এলঅ।
3এমন সময়োত্ মরিয়মে কমেদি তিনশত্ গ্রাম অমকদ মংগা, খাটি তুম্বাচ্ তেলান্ আনিলো আর যীশুর্ টেঙত্ ঢালি দিইনে নিজো চুল্লোই তা টেঙানি পুযি দিলো। সেই আতর তুম্বাচে গোদা ঘরানি ভুরি গেল। 4যীশু শিচ্চ্যগুনোত্তুন্ এক্কো, যে তারে শত্রুগুনো আঢত্ ধুরি দিবো, সেই যিহূদা ইষ্কারিয়োতে কলঅ, 5“এ আতরান্ তিনশত দীনার্লোই বেজিনে নাঢা মানুচ্চুনোরে দিয়্যে যেদঅ। কিত্ত্যে সিয়েন্ গরা ন-অলঅ?”
6যিহূদা যে নাঢা মানুচ্চুনো পৌইদ্যেনে চিন্তে গুরিনে এ কধাগান্ কোইয়্যে সিয়েন্ নয়। আসলে তে এলদে চুর্। টেঙা বাক্সুবো তাইধু থেদঅ বিলি যিগুন্ থুয়ো অদঅ সিগুনোত্তুন্ চুর্ গুরিদো।
7যীশু কলঅ, “তুমি তারে মনত্ দুঘ্ ন-দুয়ো। মরে কবর্ দিবার্ সময়োত্ সাজেবাত্যে তে ইয়েন্ থোইয়্যে। 8নাঢা মানুচ্চুনে দঅ নিত্য তমা ইধু আগন্, মাত্তর্ মরে তুমি নিত্য ন-পেবা।”
9যীশু বৈথনিয়াত্ আঘন্ কোই পারিনে যিহূদীগুনো ভিদিরেত্তুন্ বোউত্ মানুচ্ সিধু এলাক্। তারা যে বানা যীশুত্যে সিধু এচ্চ্যন্ সিয়েন্ নয়, মাত্তর্ যিবেরে যীশু মরণত্তুন্ জেদা গোজ্যে সেই লাসাররেয়ো চেবাত্যে এলাক্। 10সেক্কে আজল্ ধর্মগুরুগুনে লাসাররেয়ো মারে ফেলেবাক্ বিলি ঠিগ্ গুরিলাক্, 11কিয়া লাসারর্ কারনে যিহূদীগুনো ভিদিরে ভালোক্জনে নেতাগুনোরে ফেলেইনে যীশু উগুরে বিশ্বেজ্ গুরিলাক্।
যিরূশালেমত্ সমানা
(মথি ২১:১-১১; মার্ক ১১:১-১১; লূক ১৯:২৮-৪০)
12যিদুক্কুন্ মানুচ্ পরবত্ যেয়োন্ তারা সে পরেদি দিনোত্ শুনিলাক্ যীশু যিরূশালেমত্ এজের্। 13সেক্কে তারা খাজোর্ পাদালোই তারে আগ্ বারেই আনিবাত্যে গেলাক্ আর রঅ ছাড়িনে কুয়ো ধুরিলাক্,
“হোশান্না, যে প্রভুর নাঙে এজের্
তার্ বাঈনী ওক্।
তেয়ই ইস্রায়েলর্ রাজা।”
14পবিত্র বোইবোর্ কধা মজিম্ যীশু এক্কো গাধা দেগিনে তা উগুরে বুজিলো। বোইবোত্ লেগা আঘে,
15ও সিয়োন-ঝিবো, ন-দোরেচ্। রিনি চাহ্, তর্ রাজাবো গাধা ছঅ উগুরে চরিনে এজের্।
16যীশুর্ শিচ্চ্যগুনে পত্তমে ইয়েনি বুঝি ন-পারিলাক্। যেরেদি যীশুর্ মহিমাগান্ যেক্কে ফগদাং অলঅ সেক্কে তারার্ মনত্ পড়িলো পবিত্র বোইবোর্ সে কধাগান্ যীশু পৌইদ্যেনে লেগা ওইয়্যে। তারার্ আরঅ মনত্ পড়িলো মানুচ্চুনে যীশুত্যে ইয়েনি বেক্কানি গোজ্যন্।
17লাসাররে কবরত্তুন্ ডাগিনে জেদা গুরি তুলিবার্ অক্তত্ যিদুক্কুন্ মানুচ্ যীশুর্ কায়কুরে এলাক্ তারা লাসারে জেদা ওই উদোনা পৌইদ্যেনে সাক্ষি দিয়্যে ধুরিলাক্। 18সেনত্তে মানুচ্চুনে যীশুরে অাগ্বারেই আনিবাত্যে যেয়োন্, কিয়া তারা শুন্ন্যন্দে যীশুই সেই আমক্ অবার্ কামান্ গোজ্যে। 19ইয়েন দেগিনে ফরীশীগুনে একজন আরেকজনরে কলাক্, “আমার কনঅ লাভ্ ন-অর্। চঅ, গোদা দুনিয়েগান্ তা দলত্ যেয়েগোই।”
নিজো মরণ পৌইদ্যেনে প্রভু যীশু
20সেই পরবত্ যিগুনে উবোসনা গুরিবাত্যে এচ্চ্যন্ তারা ভিদিরে কয়েক্কো গ্রীকঅ এলাক্। 21তারা ফিলিপ ইধু এইনে তারে কোজোলি গুরিনে কলাক্, “এইয়্যে শুন্, আমি যীশুরে দেগিবাত্তে চেই।” ফিলিপে অলঅ গালীল রেজ্যর্ বৈৎসৈদা আদাম মানুচ্। 22ফিলিপে যেইনে কধাগান্ আন্দ্রিয়রে কলঅ। যেরেদি আন্দ্রিয় আর ফিলিপে যেইনে যীশুরে কলাক্।
23যীশু সেক্কে আন্দ্রিয় আর ফিলিপরে কলঅ, মান্জ্য পুয়োবোর্ মহিমাগান্ ফগদাং পেবার্ অক্ত এইচ্চ্যে। 24মুই তমারে ঘেচ্চ্যেক্গুরি কঙর্, গম বীজিবো মাদিত্ পরিনে যুনি ন-মরে সালে বানা এক্কো বীজ্ থায়, মাত্তর্ যুনি মরে সালে বোউত্ শোজ্য জর্মায়। 25যে নিজো পরাণানরে বেশ্ কোচ্পায় তে তার্ ঘেচ্চেক্গুরি জিংকানিগান্ আরায়, মাত্তর্ যে এ জগদত্ সিয়েন্ ন-গরে তে তার্ ঘেচ্চেক্গুরি জিংকানিগান্ উমরত্যে রোক্ষ্যে গুরিবো। 26কনজনে যুনি মরে সেবা গুরিবাত্তে চায় সালে তে মঅ পধেদি চোলোক্। মুই যিধু আঘং মর্ সেবাগুরিয়্যেবোয়ো সিধু থেবঅ। কনজনে যুনি মরে সেবা গরে সালে বাবা তারে সর্মান গুরিবো।
27“মঅ মনান্ ইক্কিনে ওলোজোলো ওইয়্যে। মুই কি এ কধাগান্ কোম্, ‘বাবা, যে সময়বো এচ্চ্যে সে সময়বোত্তুন্ মরে রোক্ষ্যে গর্’? মাত্তর্ ইয়েনত্যে দঅ মুই এ সময়ান সং এচ্চ্যং। 28বাবা, তঅ মহিমাগান্ ফগদাং গর্।”
স্বর্গত্তুন্ সেক্কে এ কধাগান্ শুনো গেলঅ, “মুই মঅ মহিমাগান্ ফগদাং গোজ্যং আহ্ আরঅ সিয়েন্ ফগদাং গুরিম।”
29যে মানুচ্চুনে সিয়েনত্ থিয়্যেই এলাক্ তারা সিয়েন্ শুনিনে কলাক্, “সিয়েন মেঘ গুজুরোনি।”
কেঅ কেঅ আরঅ কলাক্, “কন্ স্বর্গদূতে তা সমারে কধা কলঅ।”
30সেক্কে যীশু কলঅ, “এ কধাগান্ মত্যে কুয়ো ন-অয়, মাত্তর্ তমাত্যে কুয়ো ওইয়্যে। 31এ জগদ মানুচ্চুনোর্ বিচের সময় এবেরা এচ্চ্যে, আর জগদর্ গিরোজ আঢত্তুন্ ইক্কিনে রাজাগিরি কাড়ি নেযা অবঅ। 32মরে যেক্কে মাদিত্তুন্ অজলত্ তুলো অবঅ সেক্কে মুই বেক্কুনোরে মঅ কায়কুরে টানি আনিম্।” 33তার্ কিবাবোত্যে মরণান্ অবঅ সিয়েন বুঝেবাত্যে তে এ কধাগান্ কলঅ।
34সেক্কে মানুচ্চুনে যীশুরে কলাক্, “আমি পবিত্র বোইবোত্তুন্ শুন্ন্যেই মশীহ উমরত্তে থেবঅ। মাত্তর্ তুই কিবাবোত্যে গুরি কর্ যে, মান্জ্য পুয়োবোরে অজলত্ তুলো অবঅ? সালে এ মান্জ্যপুয়োবো কন্না?”
35যীশু তারারে কলঅ, “আর কয়েক্ দিনোত্তে পহ্রান্ তমা সমারে সমারে আঘে। পহ্রান্ তমা ইধু থাদে সময়োত্ আঢা মারঅ যেন আন্ধারানে তমারে জিদি ন-পারে। যে আন্ধারত্ আঢে তে কুদু যার্ সিয়েন হবর্ ন-পায়। 36পহ্রান্ তমা ইধু থাদে সময় পহ্রান উগুরে বিশ্বেজ্ গরঅ যেন তুমি সেই পহ্র মানুচ্ ওই পারঅ।”
বিশ্বেজ্ আর অবিশ্বেজর্ ফল
এ বেক্ কধানি কনার্ পরেদি যীশু মানুচ্চুনো মুজুঙোত্তুন্ যেইনে নিজোরে লুগেই রাগেল। 37যুনিয়ো তে তারা মুজুঙোত্ চিহ্নো ইজেবে এদক্কানি আমক্ কাম্ গোজ্যে তো মানুচ্চুনে তা উগুরে বিশ্বেজ্ ন-গরন্। 38ইয়েন ওইয়্যেদে যেন ভাববাদী যিশাইয় কোইয়্যে এ কধাগান্ পূরোণ্ অয়:
প্রভু, আমার দিয়্যে হবরান্ কন্না বিশ্বেজ্ গোজ্জ্যে
কা ইধু বা প্রভুর্ খেমতাবলা আঢ্তান্ ফগদাং ওইয়্যে?
39সেই মানুচ্চুনে ইয়েনত্যে বিশ্বেজ্ গুরি ন-পারন্, কিয়া যিশাইয় যেবাবোত্যেগুরি কোইয়্যে সেবাবোত্যেগুরি 40“গোজেনে তারা চোগ্কুন্ নাঢি দিয়্যে আর মনানি বাজে গুরি দিয়্যে, যাতে তারা চোগেদি ন-দেগন্ আর মনানদি ন-বুঝোন্, আর গম্ অবাত্তে তাইধু ফিরি ন-এজন্।” 41যিশাইয় যীশুর মহিমাগান্ দেক্ক্যে বিলি তা পৌইদ্যেনে এ কধাগান্ কোইয়্যে। 42তো নেতাগুনোত্তুন্ ভালোক্জনে যীশু উগুরে বিশ্বেজ্ গুরিলাক্, মাত্তর্ ফরীশীগুনে সমাজত্তুন্ তারারে নিগিলেই দিবাক্ সেই দরে তারা সিয়েন্ স্বীগের্ ন-গুরিলাক্। 43তারা গোজেনত্তুন্ বাঈনী পানাত্তুন্ মান্জ্যত্তুন্ বাঈনী পানাগান্ বেশ্ গম্ পেদাক্।
44পরেদি যীশু রঅ দাঙর্ গুরিনে কলঅ, “যে মঅ উগুরে বিশ্বেজ্ গরে তে যে বানা মঅ উগুরে বিশ্বেজ্ গরে সিয়েন্ নয়, মাত্তর্ যে মরে পাধেয়্যে তা উগুরেয়ো বিশ্বেজ্ গরে। 45যে মরে দেগে, যিবে মরে পাধেয়্যে তে তারেয়ো দেগে। 46মুই এ জগদত্ পহ্র ইজেবে এচ্চ্যং যেন মঅ উগুরে যে বিশ্বেজ্ গরে তে আন্ধারত্ ন-থায়। 47যুনি কেঅ মঅ কধা শুনিনে সেবাবোত্যেগুরি ন-চলে সালে মুই নিজে তার্ বিচের্ ন-গরং, কিয়া মুই মান্জ্যরে দুষী প্রমাণ গুরিবাত্যে ন-এজং বরং মান্জ্যরে পাপত্তুন্ উদ্ধোর্ গুরিবাত্যে এচ্চ্যং। 48যে মরে খিয়্যে ন-গরে আর মঅ কধা ন-শুনে তাত্যে বিচের্ গুরিয়্যে আঘে। যে কধাগান্ মুই কোইয়োং সেই কধাগান্ শেজ্ দিনোত্ তারে দুষী বিলিনে প্রমাণ গুরিবো; 49কিয়া মুই দঅ নিজোত্তুন্ কিচ্চু ন-কং, মাত্তর্ যে মরে পাধেয়্যে সেই বাবা নিজেই মরে উগুম্ গোজ্যে কি কি কুয়ো পুরিবো। 50মুই কোই পারং তা উগুমানই উমর্অ জিংকানি। ইয়েনত্যে মুই যেদক্কানি কধা কং সিয়েনি মঅ বাবার্ উগুম্ মজিম্ কং।”
Currently Selected:
যোহন 12: CBT
Highlight
Share
Copy
Want to have your highlights saved across all your devices? Sign up or sign in
Copyright © 2021 Bangladesh Bible Society
