Maakö 6

Zezwii a 'bhele a ‑nʋa 'nɔɔ dlɩ 'wʋ ‑kä

(Matie 13.53-58; Lwiikö 4.16-30)

1Zezwii 'bhööä ‑lɛ, 'n ɔ yiɛ ‑mä ɔ 'bhele Nazalɛɛtɩ mö, ɔ ‑nyɛ 'ɔ ‑gänɩwaa 'sɔ. 2‑Gwlɛnɩzlɩ ghlɛɛ, wa möä ‑mä Lagɔbuduu 'möö, 'n ɔ yiɛ nɩkpa Lagɔwɛlɩ 'cɩa. Nɩkpa ‑wa ‑pʋnɔɔ 'yukwlii, ‑zu wa ‑zuä. Wa 'wuë 'n ngli yuëë mla, 'n wa nʋä: «Dɛ ɔ ‑sɛ bhä ‑mi'la 'wuë? Dɛ ɔ ‑sɛ bhä sa'a a 'nɛɛnɔ? Zaa, zɩzɛ 'wuë ɔ pää, ‑ɔ 'nyɔ bhä 'mötɛɛnɔ 'n ɔ pɛ bhä 'nɩ? 3Ɛ'ɛ ‑bhö ɔ da'a Malii ‑yowli ‑ɔ tɛlɩ'ɛ swii mɔ ‑a? Zaakö ‑nyɛ Zoozɩ 'sɔ, Zwiidɩ kökä 'n Simɔɔ, mʋa 'nɩɛ bhä'ɛ ɔ ‑daayuë glɩnɩ? Ɔ nglʋdaayuë 'nɩɛ bhä'ɛ mä'ä ‑aa jijo'wʋ ‑wʋmö?» ‑Yɩ 'la 'wuë mɩɩ kää 'nglɩ, nza wa'aa Zezwii dlɩ 'wʋ ‑kä. 4Nza ɔ 'nyʋä 'dɩ nɩɩ: «Lagɔ a 'möbhïlanɩnyɔ, saa 'wuë wa zo ‑sɩbhä 'klʋkpamö, ‑maa ‑mä ɔ 'bhele, ‑mä 'ɔ ‑kosu yɔwʋ, 'ɔ waa 'wuë jijo'wʋ, 'ylimö ɔ ‑flanɩɛ.» 5‑Sɩbhä a za, ‑mä ɔ 'bhele Nazalɛɛtɩ ɔ'ɔɔ ‑mä zɩzɛli ‑bhɛnɩ, 'n ɛ 'nɩ ‑bhö wa gla'mö a 'yɛya ɔ 'zʋä kätɩkpö 'wlu 'n wa yiɛ yɛmanɩ muë. 6Ɔ 'yɩɛ sɛɛ ɔ 'bhele a ‑nʋa 'nɔɔ dlɩ 'wʋ ‑kä 'ylɩmöö, yɩ 'nɔɔ gbʋdɩdɛ 'nyɛ. Ɔ 'bhööä ‑mä, ‑mä a ‑kʋkʋ yɔwʋ a ‑gwlɩɩ 'mö ‑mä ɔ möä 'n ɔ yiɛ ‑mä a ‑nʋa Lagɔwɛlɩɩ 'nyɛ.

Zezwii yɛ 'ɔ ‑gänɩwaa kʋgbä 'sɔ ‑kpɔ tie

(Matie 10.5-15; Lwiikö 9.1-6)

7‑Mi'la 'plɩɛ 'wëë, 'n Zezwii yiɛ 'ɔ ‑gänɩwaa kʋgbä'sɔ ‑kpɔ wäzɩ, 'n ɔ yuëë 'sɔ 'sɔ 'sɔ tie, 'n ɔ yuëë 'mötɛɛnɔ 'nyɛ wa 'kä nɩkpa zuzukuzoku ‑gömö kpëti. 8'N ɔ yuëë 'dɩ 'mö zʋ, ɔ lɛ naa: «A ‑kä möä yii, a nɩ tɩ 'yiobhlinɩlu ‑su, 'n ɛ 'nɩ ‑bhö nɛmönɩpeyi a 'yize. A nɩ tɩ lile ‑su, a nɩ tɩ ‑kotoku ‑su, a nɩ tɩ moni ‑su. 9A nɩ ‑su 'siikpli 'mö, ‑maa a nɩ tɩ ‑banɩ 'sɔ 'sɔ ‑su.» 10'N ɔ yuë'ɛɛ 'dɩ 'nyɛ nɩɩ: «A ‑kä möö, ‑budu ‑mu a ‑kä 'mö plɛɛ 'n ‑mä a nɩkpa ‑kaanyɩ pälaa, a nɩ gʋʋ ‑lɛ wa yɔwʋ ‑këë, 'a mömötɛnyɩɩ ‑kä ghlɛ a 'kä mö. 11A ‑kä dɛ ‑mämaa ghlɛ 'n ‑lɛ a ‑nʋa 'nanyɩ 'yukwli ‑pʋnɩ, wa 'nanyɩ pälaa, a nɩ gbɔtɔ 'a kplɩzɛmödʋdʋʋ nzɩɩ a 'kä 'plɩ. ‑Sɩbhä a dɔ'wʋ, ‑mä a ‑nʋa yi sɛ yɩbhlɩmanɩ nɩɩ, abhʋa 'nɩɛa'a wa gbʋ ‑kä.» 12Sa'a Zezwii 'zʋä 'ɔ ‑gänɩwaa kʋgbä'sɔ ‑kpɔ 'dɩ 'mö 'wë, 'n wa yiɛ Lagɔ 'a 'Mänatɩtɩɩ bia 'mö nɩɩ: «A nɩ ligba a 'kä a ‑lizokuu kɛ 'mö ‑sɛ.» 13Wa möä, 'n wa yiɛ nɩkpa a ‑bɛ zuzukuzoku ‑gömö kpëti. Wa 'zʋ guzuwa a ‑bɛ 'kpö 'wlu 'n wa yiɛ yɛmanɩ.

Sɛ'ɛ Eloodɩ gbää Zezwii a dɛ

(Matie 14.1-12; Lwiikö 9.7-9)

14Zezwii 'a nglɩɩ, mö yɩ möä tenyii 'n yɩ yiɛ saa 'wuë mlɩmanɩ, 'n 'bhlɩlowli Eloodɩ yiɛ 'nʋ. Nɩkpa ‑mumuë, sɛ'ɛ wa nʋä ɔ dɛ nɩɩ: «Zaa Batisɩ mɔɔ 'wlʋä glu nza ɔ kää 'mötɛɛnɔ 'n ɔ bhɛɛ sa'a a zɩzɛli.» 15Mumuë lɛ naa: «Elii mɔɔ.» ‑Mumuë lɛ naa: «Lagɔ a 'möbhïlanɩwa ‑mumuë, wa sɛ a ‑nɔ ‑bhlʋä.» 16'Bhlɩlowli Eloodɩ 'nwiɛ, ɔ lɛ naa: «Zaa Batisɩ n gbä a‑a wa nɩ ‑dɩ 'wluu, mɔɔ 'wlʋä glu.»

Eloodɩ lɛ wa nɩ ‑dɩ Zaa Batisɩ 'wlu

17 Eloodɩ mɔɔ tiee nɩkpa 'n wa yiɛ Zaa köbhä, 'n wa yoo ‑jie 'mö 'pä, ɔ pälɩ 'gogwi. Nglɔɔ wa laa Elodiadɩ, Eloodɩ ‑sɛɛ ɔ'bhë a ‑daayu Filiipö yɔwʋ, 'n ɔ yoo kwä a za, 18'kwädlɩ Zaa nyɔɔ 'dɩ nɩɩ: «‑Nn‑ä ‑kä ‑n 'kä ‑na ‑daayu 'nglɔ yɔwʋ ‑sɛ ‑n 'kɔ kwä.» 19Wɛlɩ 'la a za 'klɛ lɩbhä 'kwädlɩ Elodiadɩ. Ɔ tɛlɩ sɛ ɔ 'kä Zaa 'lɩbhä ɔ 'kä 'ku, ‑maa ɔ'ɔɔ bhɛnɩ. 20Eloodɩ ‑yi sɛ nɩɩ, Zaa Batisɩ, nɩkpɛ a ‑mɔɔ zʋä Lagɔ 'klʋkpamö, ‑ɔ nɛnɩ Lagɔ dlɩ yɔwʋ 'mö ɔ glɩnɩɛ zaa, ɔ 'kɔ ‑lizoku 'wlu nʋ a dɔ'wʋ, dlɩ yɩ libhoo. Nza ɔ gwɩɛ Zaa Batisɩ 'wʋ. Zaa Batisɩ ‑kɔɔ Lagɔwɛlɩɩ 'nyɛɛ, dlɩ 'yli yɩ sioo tenyii, ‑maa ‑sɩbhä yɩ ‑wʋ 'mö, ɔ yɩbhä 'kwädlɩ ɔ 'kɔ 'yukwli ‑pʋnɩ. 21'Ylɩ ‑bhlʋ 'mö, 'n Elodiadɩ a dadaa yiɛ ghlɛ. Eloodɩ 'a gwälɩzlɩ a 'wʋbhlizlɩ mɛɛ ghlɛɛ. 'N ɔ yiɛ 'ɔ bhlɩɩ 'mö a 'kädɩɩ 'wuë wäzɩ ɔ ‑nyʋä 'sɔ wa 'kä 'wʋ linɩ. 'Slʋjaa a 'kifiea muë, 'n Galilee‑bhölɩɩ 'mö a dɛsɛkäwaa ‑muë'la 'wuë, 'mö ɔ wäzɩɛ. 22Wa ‑wʋ li dɔ'wʋ, 'n Elodiadɩ a yɛnglɛ yiɛ ‑mä ‑budu 'mö plɛ, 'n ɔ yiɛ yɩ. 'Ɔ yɩyɩbhʋʋ, 'n wʋ yiɛ Eloodɩ ‑nyɛ 'ɔ 'wʋlinɩwaa 'sɔ dlɩ 'mlɩ ‑sɛ. 'N Eloodɩ yiɛ nglʋyuu wäzɩ 'n ɔ yoo 'dɩ 'nyɛ, ɔ lɛ naa: «'Saa ‑n ‑kä ‑waa, 'yɩbhänɩ'mu, ‑maa n ‑yimu 'nyɛ.» 23'N ɔ yiɛ zligo nɩɩ: «'Saa ‑n ‑kä 'yɩbhä ‑kë, n ‑yimu 'nyɛ. Ɛ yi 'na bhlɩɩ n 'kämanɩɛ a kïbhëa ma ‑kë, n ‑yima 'nyɛ.» 24'N nglʋyuu yiɛ ‑mä 'wlʋ, 'n ɔ yiɛ ɔ ‑da nimï 'yɩbhää mö, ɔ lɛ naa: «'Nyɩa, 'bhlɩlowli lɛ naa, 'saa n ‑kɔɔ 'yɩbhänɩ ‑kë, ɔ ‑yi'mu 'nyɛ, zaa 'saa n nɩ 'yɩbhä bhä?» ‑Daa lɛ naa: «Zaa Batisɩ 'a 'wukpëlea.» 25'N nglʋyuu yiɛ ‑jiji 'mö 'wlu sɩbhänɩ, 'n ɔ yiɛ ‑mä 'bhlɩlowli ghlɩ, ɔ lɛ naa: «Nyɩaa Zaa Batisɩ 'a 'wukpëlea. 'Zʋa ‑sɩkaa 'bëë 'mö, ‑n ‑ka'ma yowʋ 'nyɛ.» 26'N Eloodɩ yiɛ kɔmanɩ. ‑Maa ɔ yɛ a ‑lɛ 'ɔ 'wʋlinɩwaa a 'yila 'klʋ zligonɩ 'wë zaa, ɔ'ɔa'a 'yɩbhä ɔ 'kä nimï ‑sɛ. 27'N ɔ yiɛ ɔ 'slʋjeyi ‑bhlʋ tie, 'n ɔ yoo 'dɩ 'nyɛ nɩɩ: «‑Lɛmöö Zaa Batisɩ 'a 'wukpëlea.» 'N 'slʋjeyii yiɛ ‑mä ‑jiebudu 'mö mö, 'n ɔ yiɛ Zaa Batisɩ 'wlu ‑dɩ. 28'N ɔ yiɛ ɔ 'wukpëlea 'bëë 'mö zʋ, 'n ɔ ‑nyaa yiɛ yi, 'n wa yeaa nglʋyuu yowʋ 'nyɛ, 'n ɔ yeaa ‑mä ɔ ‑da kwä. 29Zaa Batisɩ 'a ‑gänɩwaa 'nʋä ɔ 'wludɩtɩtɩɩ, 'n wa yiɛ ɔ ‑gäzɛɛ kie mö, 'n wa yee ziza.

Zezwii yɛ nɩkpa a 'dwi kʋgbä 'sɔ nɩkpa a gwlɩ kʋgbä (5.000) lile 'nyɛ

(Matie 14.13-21; Lwiikö 9.10-17; Zaa 6.1-14)

30Mää Zezwii tie a‑a 'ɔ tietiewaa, ‑mä wa 'bhööä 'n wa yiɛ yi. 'N wa yiɛ ‑lɛ ɔ yɔwʋ sɛ glɩ. 'Saa wa nʋä, 'n sɛ wa 'cɩaa nɩkpaa, 'n wa yoo yɩ 'tɩtɩ ‑sɛnɩ. 31'N Zezwii yuëë 'dɩ 'nyɛ, ɔ lɛ naa: «A yi, dɛɛ ‑bɛ 'nɩɛ ‑wʋ, ‑a 'kä ‑lɛ mö, a 'kä 'tikïyie 'wʋ nyɛpɛ.» Nɩkpa a 'kɔkɔmlɛ, ‑muë mö, ‑muë yi ‑lɛ ɔ yɔwʋ, zaa ɔ ‑nyɛ 'ɔ ‑gänɩwaa 'sɔ, wa'a ghlɩ 'tɛnyɩ wa 'kä li, nza ɔ gbää ‑sɩbhä. 32Zaa, 'n wa yiɛ 'gɔlʋ 'wʋ 'libhï, dɛɛ nɩkpɛ 'nɩɛ ‑wʋ, wa 'kä ‑lɛ mö. 33Nɩkpa a ‑bɛ 'yuë 'ylɩmö, 'n wa yuëë yɩbhlɩnɩ. ‑Gwlɩ 'wuë 'mö 'n nɩkpa yiɛ ‑mä 'bhöönɩ, wa ‑wʋ nɛmö dɔ'wʋ, 'n wa yuëë ‑mä ‑kʋnɩɛ mö. 34Zezwii kwliɛ ‑mä gɔlʋʋ 'möö, 'n ɔ yiɛ nɩkpa 'kɔkɔmlɛ 'ylɩmö wa 'kä ‑bhɩɛ wïla a ‑mii 'nɩ'ɛ 'ylizʋnɩnyɔ 'wʋ ‑kä, zaa 'n ngäzɩ yoo tenyii 'lɩbhä. 'N ɔ yuëë li a ‑bɛ 'cɩa. 35Swe lɛ 'kä ylu, 'n 'ɔ ‑gänɩwaa yoo yɔwʋ 'dio, wa lɛ naa: «Dɛ ‑a ‑wʋä dɛ'ɛ, 'klokwëjijo'wʋä, 'n zlɩ yɛ'ɛ fäla. 36Zaa, 'nyɛ nɩkpaa 'dɩ wa 'kä mö, mä'ä a ‑gwlɩ ‑nyɛ ‑gligbïï 'sɔ 'wʋ, wa 'käa ‑mä wanyɩ a lile sɛ tɛlɩɛ mö.» 37'N Zezwii yuëë 'dɩ 'nyɛ nɩɩ: «A'bhï, a nɩ 'nyʋä lile.» Wa lɛ naa: «‑N ‑kä nɩɩ, wa 'wuë wa 'kä li nʋʋ, moni a ‑bɛ a 'fɔlɔ ‑a 'käa pɩa.» 38Ɔ lɛ naa: «A'bhï, 'fɔlɔbhï ‑zɩmö a ‑su bhä? A mö a 'kää ‑ka nimï 'yɩbhäyɩbhänɩ.» 'N wa yiɛ mö. Wa yiɛ, wa lɛ naa: «‑A ‑su 'fɔlɔbhï ngbï, 'n zibhïya 'sɔ.» 39'N Zezwii yuëë 'dɩ 'nyɛ nɩɩ: «A nɩ 'nyɛ nɩkpaa 'wuë 'dɩ, wa nɩ glɩ ‑mä ‑putukwëa ‑gömö ‑zɩkpö ‑zɩkpö 'mö sɛ.» 40'N nɩkpaa yiɛ gwlɩ ngbï glwɩ ngbï, 'n gwlɩ 'sɔ kʋgbä gwlɩ 'sɔ kʋgbä a ‑zɩkpö 'mö sɛ glɩ. 41'N Zezwii yiɛ 'fɔlɔbhï ngbï ‑kpɔ ‑nyɛ zibhïya 'sɔ ‑kpɔ 'sɔ 'wʋ 'libhï, 'n ɔ yiɛ ghäyɩ yɩlɩ, 'n ɔ yiɛ yɩ za Lagɔ bhälɩ. 'N ɔ yiɛ 'fɔlɔ 'mö ‑dɩdɩnɩ, 'n ɔ yuä 'ɔ ‑gänɩwaa yowʋ 'nyɛ, n wa yuä nɩkpa 'wuë dilanɩ. 'N ɔ yuë'ɛɛ wa 'wuë zibhïya 'sɔ ‑kpɔ dilanɩmö. 42Nɩkpa 'wuë, 'n wa yiɛ li, 'n wa yiɛ lʋ, 'n lilea yiɛ 'wʋ tʋʋ. 43'Fɔlɔkïbhï ‑nyɛ zibhï 'sɔ ‑yɩ tʋʋä 'wʋʋ, wa 'libhiɛ, yɩ yie ‑käkö kʋgbä'sɔ 'n wa ‑nyɩɩ 'yiɛ mö. 44‑Wa liɛ lile 'laa, ‑n ‑kä nyɩbhɛlɩɩ a 'yize zɛlɩɩ, wa ‑bhli nɩkpa a 'dwi kʋgbä'sɔ nɩkpa a gwlɩ kʋgbä (5.000).#6.44 Wa'aa ngwlɩɩ ‑nyɛ yuëa 'sɔ zɛlɩmö.

Zezwii yɛ ‑lɛ 'nyu 'klʋ nɛmönɩ

(Matie 14.22-33; Zaa 6.15-21)

45‑Mi'la 'plɩɛ 'wë cuu, 'n Zezwii yiɛ 'ɔ ‑gänɩwaa 'dɩ 'nyɛ nɩɩ: «A nɩ 'libhï gɔlʋʋ 'wʋ, ‑mä nyuu a kïkë ‑mä'la ‑gömö, ‑glɔɔ wa laa Bɛtɩsayidaa a pɩɔ 'yli, a 'kä ‑bhlɛ ‑mä 'yuku 'plɩ, n 'kä nɩkpaa 'wuë 'dɩ 'nyɛ wa ‑kä mö.» 46Nɩkpa 'wuë möä 'wëë, 'n Zezwii yiɛ ‑gäga ‑bhlʋ 'wlu mö, ɔ 'kä ‑mä Lagɔ bhibhenɩ. 47‑Kidosɛ ghlɛɛ, 'kïkë ‑gömö dɛ ɔ tʋʋ a‑a ɔ 'yizee, ɔ glɩ ‑bhlɛ ‑lɛ, 'n 'ɔ ‑gänɩwaa ‑nyɛ gɔlʋʋ yiɛ ‑mä nyuu a jijo'wʋ ghlɛ. 48'N 'vuu yiɛ yi, wʋ 'bhöönɩ mä wa ‑wʋ a‑a mönɩ dɔ'wʋ, wʋ za, 'ɔ ‑gänɩwaa yia'a 'lu ‑kë, gɔlʋʋ 'nɩɛ ‑mä mö, 'n Zezwii yuëë 'ylɩmö, zlɩzɩdɔ'wʋ, ɔ ‑wʋ ‑lɛ 'nyu 'klʋ nɛmönɩ dɔ'wʋ, 'n ɔ yuëë 'bɩwʋ mö. Ɔ lɛ 'kʋä yɛ'mö bhlɩ, 'n wa yoo 'ylɩmö. 49‑Maa wa yoo 'ylɩmöö, wa ‑tɔnɔɔ ‑zele, 'n wa yiɛ 'mö 'kpa. 50Wa 'wuë nganɔ a za, wa'aa ku yɔwʋ ‑kä. 'N Zezwii yiɛ gbʋ ‑dɩ, ɔ lɛ naa: «A 'zʋ ‑mä dlɩ, nganɔ nɩ tanyɩ 'lɩbhä, ‑maa ‑amöä.» 51'N ɔ yiɛ ‑mä gɔlʋʋ 'mö ‑gbälɛ, 'n 'vuu yiɛ donɩ, 'n yɩ yuëë tenyii zuzu ‑gömö ‑sɛ. 52Wa'bhï, zizɛɛ Zezwii 'pää, 'n ɔ yiɛ nɩkpaa a ‑bʋbʋʋ 'fɔlɔbhïya ngbï 'nyɛɛ, wa dila 'mö yi 'tuuä zaa, wa 'nɛɛ 'mö nʋ.

Zezwii yɛ ‑mä Zenezalɛɛtɩ guzuwa a ‑bɛ yɛmanɩ

(Matie 14.34-36)

53Zezwii ‑nyɛ 'ɔ ‑gänɩwaa 'sɔ, wa 'tʋä nyuu, ‑glɔɔ wa laa Zenezalɛɛtɩ a yɔwʋ a kïkea, 'n wa yeaa köbhä. 54Wa 'wlʋä ‑mä gɔlʋʋ 'mö cuu, 'n nɩkpa yiɛ Zezwii yɩbhlɩnɩ. 55'N wa yiɛ ‑mä bhlɩɩ a këtiea 'wuë 'wʋ 'tɩtɩ kwä. Wa ‑kä 'nʋ nɩɩ, Zezwii ‑wʋ dɛ ‑mämaa mö dɔ'wʋʋ, wa ‑su 'wa guzuwaa ‑gbɔpʋ 'wʋ 'n wa ‑nyʋä möä ‑lɛ. 56‑Mä ‑gwlɩ 'kädɩɩ ‑nyɛ 'tikïyiea 'sɔ 'mö, ‑gligbï 'wʋ kökä, saa 'wuë sɛɛ Zezwii ghlɛnɩɛ, ‑mä 'du 'mö ‑mä wa zʋä 'wa guzuwaa. Ɔ ‑kä yii, 'n wa bhibheoo yɔwʋ, 'wa guzuwaa 'kä 'ɔ ‑bänaa a zɛmö a kpulu a 'yize kɛ zɩ. Guzuwaa 'wuë ‑wa zuä kɛɛ, yɛmanɩ wa yɛmanɩɛ.

Currently Selected:

Maakö 6: bet

Highlight

Copy