Maakö 5

Zezwii yɛ nɩkpɛ zuzukuzoku ‑gömö kpëti

(Matie 8.28-34; Lwiikö 8.26-39)

1Wa möä ‑këë, ‑mä nyuu a kïkë ‑mä'la ‑gömö, ‑mä Zelaza‑bhölɩɩ 'mö, 'n wa yiɛ ‑mä ghlɛ. 2Zezwii 'wlʋä ‑mä gɔlʋʋ 'mö cuu, nɩkpɛ ‑bhlʋ 'bhöönɩ ‑mä lesikpï jijo'wʋ, 'n ɔ yoo gbanɩɛ yi. Nɩkpɛ 'la, zuzukuzoku ɔ kää ‑gömö. 3‑Mä lesikpïï jijo'wʋ ‑mä ɔ glɩnɩɛ. Nɩkpɛ 'nɩɛ ɔ 'gbumözʋzwɛ bhɛnɩ. Ɛ yi ɔ 'gogwigwanɩdɔ'wʋ ‑kë, ‑bɛ 'nɩɛ bhɛnɩ. 4Wa ‑kä 'ɔ bhɩɩ ‑nyɛ 'ɔ swɩɩ 'sɔ 'gogwi gwanɩɩ, yɩ 'wuë, ‑dɩ ɔ diɛ. Zaa, ‑bɛ 'nɔɔ bhɛnɩ. 5Zila 'wuë 'mö, ɛ yi sabʋ oo, ɛ yi zlɩ ‑gä oo, ‑mä lesikpïï jijo'wʋ 'n ‑mä ‑gägö 'klʋ ‑mä ɔ nɛmöä, 'n ɔ kpaa 'mö 'n ɔ 'tanɩɛ ɔnyɩ kpɩɩ. 6Zezwii ‑wʋ 'yuku 'n nɩkpɛ 'la yoo 'ylɩmö, 'n ɔ yɩɛ guë, 'n ɔ yoo gbanɩɛ yi. ‑Lɛ ɔ dlɩ 'mö, 'n ɔ yiɛ ‑lɛ ‑kokomïladigbï glu 'pä. 7'N ɔ yiɛ 'mö 'kpa, ɔ lɛ: «Lagɔtapɛ a 'Yu Zezwii, wɛlɩ ‑mi ‑n ‑nya'mö kä bhä? Lagɔ a 'nglɩ 'mö, n bhiamö yɔwʋ ‑tɩɩ 'klɩ 'yɩa.» 8Zuzukwëzokwëa ɔ kää ‑gömöö, 'mö Zezwii 'nyɛɛ 'dɩ nɩɩ, a nɩ 'bhoo ‑gömö, nza ɔ kpaa 'mö. 9'N Zezwii yoo nimï 'yɩbhä nɩɩ: «A 'yɩ bhä ‑na 'nglɩ?» Ɔ lɛ: «‑Aaa muënɩ, zaa na nglɩɛ 'Kɔkɔmlɛ.» 10'N zuzukwë 'la yiɛ Zezwii yɔwʋ bhibhe nɩɩ, ɔ nɩ ta ‑mä bhlɩ 'la 'mö kpëti. 11‑Mä a ‑gäga ‑bhlʋ 'wlu, kokotie a ‑zɩkpa 'käda ‑wʋ a ‑mä. Yɩ ‑wʋ 'wʋ li dɔ'wʋ. 12Zuzukuu ‑yɩ ‑wʋä nɩkpɛ 'la ‑gömö, 'n yɩ yiɛ Zezwii yɔwʋ bhibhe nɩɩ: «‑N ‑kanyɩ kpëtii, 'tatinɩnyɩ 'yi, ‑a 'kä ‑mä kokotie 'la 'mö plɛ.» 13'N Zezwii yiɛ 'wʋ nglu, 'n yɩ yiɛ nɩkpɛɛ ‑gömö 'bhöö 'n yɩ yiɛ ‑mä kokotiea 'mö plɛ. Yɩ plɩɛ 'mö cuu, kokotiea 'wuë, 'n yɩ yiɛ ‑mä ‑gägaa 'wlu 'bhöö, 'n yɩ yiɛ ‑mä 'nyu 'mö bhlinɩ 'n nyuu yiɛ 'lɩbhä. Yɩ wuë, yɩ ‑bhli kokotie a 'dwi ngbï a sɛ (2.000). 14Yɩ ‑gänɩwaa 'yɩɛ ‑sɩbhä 'ylɩmöö, 'n wa yiɛ futo. Saa 'wuë, ‑mä glɔ 'mö 'n ‑mä 'kwlɛgligbï 'wʋ 'n wa yiɛ ‑mä 'dɩ kwä. Nɩkpa 'wuë 'nwiɛ, 'n wa yiɛ yi, wa 'kä 'saa 'plɩɛ 'wʋ 'ylɩmö. 15Wa lɛ 'bhöö 'lɛ, nɩkpɛɛ ‑ɔ kä a‑a zuzukuzokuu ‑gömöö, ɔ ‑wʋ 'tɩɩ, ɔ glɩ ‑lɛ, ɔ ‑pla 'mö. 'N nganɔ yuëë köbhä. 16Wa ‑wʋ a‑a ‑lɛ 'n Zezwii yiɛ nɩkpɛɛ zuzukuzoku ‑gömö kpëtii, 'n sɛɛ kokotiea bhlinɩɛ ‑mä 'nyu 'mö 'a tɩtɩɩ, 'n wa yiɛ ‑sɛ. 17Wa 'nwiɛ, 'n wa yiɛ Zezwii yɔwʋ bhibhe nɩɩ, ɔ nɩ 'bhöö ‑mä 'wa bhlɩɩ 'mö. 18Zezwii ‑wʋ ‑mä gɔlʋ 'mö ‑gbälɛ dɔ'wʋ ɔ 'kä mö, nɩkpɛɛ ɔ yɛmanɩ a‑a, 'n ɔ yoo yɔwʋ bhibhe nɩɩ: «N bhiamö yɔwʋ, n 'kä 'mämö.» 19Zezwii 'niɛ 'wʋ nglu, ‑maa 'dɩ ɔ 'nyɔɔ nɩɩ: «Mö 'ligbë 'mö, ‑na'a ‑kosuu yɔwʋ a ‑nʋa, sɛɛ Lagɔ 'pää ‑na ngäzɩdlɩ 'n ɔ ‑yimöä yɛmanɩ a tɩtɩɩ, ‑n 'kʋänyɩ 'nyɛ.» 20Nɩkpɛɛ ‑ɔ yɛmanɩ a‑a, ɔ 'bhele mä wa laa Dɛkapɔɔlɩ, 'n ɔ yiɛ ‑mä mö. Sɛɛ Zezwii puoo a tɩtɩɩ, 'n ɔ yiɛ saa 'wuë ‑sɛnɩ. Nɩkpaa 'wuë, ‑wa 'nwiɛ, zuzu 'bhuëë ‑gömö.

Zezwii yɛ nglɔɔ ‑jɛzlɛzlɛ lɩbhää yɛmanɩ

(Matie 9.18-26; Lwiikö 8.40-56)

21Zezwii ‑nyɛ 'ɔ ‑gänɩwaa 'sɔ, wa 'libhïä gɔlʋʋ 'wʋʋ, ‑mä nyuu a kïkë ‑mä'la ‑gömö mä wa 'bhöö a‑a, ‑mä wa möä. Wa ghlɛɛ ‑mä, Zezwii ‑wʋ lɛ 'nyunuë 'wʋ 'n nɩkpa 'kɔkɔmlɛ yoo yɔwʋ yi. 22Nɩkpɛ ‑bhlʋ wa laa Zayilwiisɩ, Lagɔbudu a 'kifi ɔ glɩnɩɛ, ɔ yiɛ, ɔ 'yɩɛ Zezwii 'ylɩmöö 'n ɔ yiɛ ‑lɛ ɔ dlɩ 'mö ‑kokomïladigbï glu 'pä, 23'n ɔ yoo yɔwʋ bhibhe. Ɔ lɛ naa: «‑Atʋ, ‑yaya, na nglʋyuu ‑wʋ 'ku dɔ'wʋ, yi ‑n 'kɔ kɛ zɩ ɔ 'kä yɛmanɩ.» 24'N Zezwii yiɛ 'wʋ nglu. Ɔ ‑nyɛ nɩkpɛ 'la 'sɔ wa ‑wʋ ‑mä ɔ 'ligbëa 'mö mö dɔ'wʋ, nɩkpa 'susunɩ ‑mä, ‑muë tʋ mä'ä 'wʋ, ‑muë tʋ mä'ä 'wʋ. Wa ‑gänɩ Zezwii. 25'Nglɔ ‑bhlʋ ‑wʋmö a ‑mä ‑bʋbʋ 'la jijo'wʋ, ‑jɛzlɛzlɛɛ kɔɔ ‑bhlɛ 'ylʋbö kʋgbä 'sɔ 'lɩbhänɩ. 26'Klɩ ɔ 'yɩɛ tenyii ‑mä ‑dʋtaawa kä'mö. Ɔ 'saa ɔ kä a‑a 'wuë, ɔ kʋänyɩ kä'mö plɩnɩ 'wë, ‑maa ɔ'ɔɔ yɛmanɩ. Guu, 'mö wʋ 'tɛmanɩɛ 'yize. 27Ɔ 'nʋä Zezwii a 'dɩɩ, 'n ɔ yiɛ yi. 'N ɔ yiɛ ‑bʋbʋ 'nyɛka. Ɔ ghlɛnɩɛ ‑mä Zezwii a nimïi, 'n ɔ yiɛ ɔ ‑bäna kɛ zɩ. 28Ɔ dlɩ zɛmö a dɔ'wʋ, ɔ lɛ nɩɩ: «'N n ‑kä 'ɔ ‑bänaa a 'yize kɛ zɩɩ, n yi yɛmanɩ.» 29Ɔ lɛ zʋ a sɛ'ɛ cuu, 'ɔ dluu yɛ donɩ. Ɔ ‑yi sɛ nɩɩ ɔ yɛ yɛmanɩ. 30‑Gba ‑bhlʋ ‑kpɔ 'mö 'n Zezwii yiɛ sɛ yɩbhlɩmanɩ nɩɩ, 'mötɛɛnɔ kɔ 'mö 'bhöö. 'N ɔ yiɛ 'nɩgbö, 'n ɔ yiɛ nimï 'lɛ. Ɔ lɛ naa: «‑Ɔ zɩ bhä 'na ‑bänaa kɛ 'nɩ?» 31'Ɔ ‑gänɩwaa lɛ naa: «‑Atʋ, ‑n yɩlɩ nɩkpaa ‑wa 'sunɩmöä ‑gbʋbgʋ 'wʋ, n‑n nʋ ‑ɔ zɩɩ bhä kɛ.» 32Wa gbää sa'aa, 'n Zezwii yiɛ 'yila 'pä ɔ 'kä ɔ zoo kɛ 'ylɩmö. 33Nglɔɔ ‑yi sɛ nɩɩ mɔɔ, zaa 'n nganɔ yoo 'lɩbhä. Ɔ kuu ‑wʋ tɩtlɛnɩ dɔ'wʋ, 'n ɔ yiɛ ‑lɛ Zezwii a dlɩ 'mö ‑kokomïladigbï glu 'pä, sɛ yɩ 'plɩplɩnɩɛ 'möö, 'n ɔ yoo yɩ 'wuë ‑sɛnɩ. 34Zezwii lɛ naa: «Na 'yu, ‑na'a dlɩ'wʋkänɔɔ ‑kamö puë, ‑na'a guu yɛ bhɩɛ. Zaa, bhlɩ dlɩ sɛ ‑n 'kä mö.»

Zezwii yɛ yuu ‑ɔ 'ku a‑a gäla

35Zezwii kɩ ngli cuu, 'n nɩkpɛ ‑bhlʋ yiɛ ‑lɛ 'wʋ ghlɛnɩ. Ɔ 'bhöönɩ ‑mä Zayilwiisɩ a 'ligbë 'mö. Ɔ lɛ naa: «Zayilwiisɩ, yuu yɛ 'ku, ‑maa tɩ nyɩasɛ ‑Atʋ bʋanɩ.» 36Wɛlɩɩ wa bhïlaa da'aa, Zezwii 'niɛ 'klʋ yɩlɩ, ‑maa Zayilwiisɩ mö ɔ 'nyɛɛ 'dɩ nɩɩ: «Tɩ ngänɩ, ‑maa kä dlɩ 'wʋ 'yize.» 37Nɩkpaa ‑wa ‑gänɔ a‑a, 'n Zezwii yuëë 'dɩ 'nyɛ nɩɩ wa nɩ tɩ ‑mä Zayilwiisɩ a 'ligbë 'mö 'mämö. Piɛlɩ ‑nyɛ Zaakö 'sɔ, 'n Zaakö a ‑daayu Zaa, wa 'yize mʋa 'mämöä. 38Wa ghlɛɛ ‑mä Zayilwiisɩ a 'ligbë 'möö, nɩkpaa nʋ bidibidi, wa wi, wa kpa 'mö. 39'N Zezwii yiɛ wa 'wuë nimï 'yɩbhä nɩɩ: «'Saa bhä 'n a wi ɔ? Yuu 'nɩɛ 'ku, ‑maa ngämö ɔ ngämöä.» 40Zezwii gbää sa'aa, 'n wa yoo gla pälɩ. 'N ɔ yiɛ wa 'wuë kpëti. Yu a ‑dɩba ‑nyɛ ɔ ‑da 'sɔ, 'ɔ ‑gänɩwaa ta ‑kpɔ kökä, ‑budukïbhëa yuu a ‑gäzɛɛ pöä 'mö, 'n Zezwii ‑nyʋä yiɛ ‑mä plɛ. 41Wa plɛɛ ‑mä 'n Zezwii yiɛ ‑gäzɛɛ sɔ köbhänɩ, ɔ lɛ: «Talita kumi!» Mɩɩ sɛɛ zɛmö nɩɩ: «Ngluyu 'tikëyi ‑nmö n nyɛɛ 'dɩ, ‑sɔ 'wʋ!» 42Gba ‑bhlʋ ‑kpɔ 'mö, n yuu yiɛ 'wʋ ‑sɔ 'n ɔ yiɛ nɛmö. Yu 'la kä 'ylʋbö kʋgbä 'sɔ. ‑Wa ‑wʋ a‑a ‑lɛ, 'n zuzu yuëë ‑gömö 'bhöö. 43'N Zezwii yuëë kä'mö 'titli nɩɩ, wa nɩ tɩ 'saa wa 'yɩɛ 'ylɩmö a 'dɩ ‑sɛ. ‑Maa wa nɩ 'nyɔ lile.

Currently Selected:

Maakö 5: bet

Highlight

Copy