Zaa 21

Zezwii yɛ'ɛ ɔnyɩ 'ɔ ‑gänɩwaa 'ylimö tulanɩ

1Zezwii 'wlʋä glu 'wëë, ylɩ ‑mɛmɛɛ 'mö'ɛ, ‑mä Tibeliadɩ a 'nyu 'kɔdʋʋ#21.1 Tibeliadɩ a 'nyu 'kɔdʋʋ: Zenezalɛɛtɩ a 'nyu kɔdʋʋ 'mö wa gaaa. yɔwʋ, 'n ɔ yiɛ ‑mä 'ɔ ‑gänɩwaa ɔnyɩ 'ylimö tulanɩ. Sɛ yɩ 'plɩɛ 'wʋʋ, ‑sɩbhä ma‑a dɛ'ɛ. 2'Ylɩ ‑bhlʋ 'mö, Simɔɔ Piɛlɩ mɔ, Tomaa wa laa Pʋwayu mɔ, Galilee‑bhölɩɩ 'mö a ‑glɔɔ wa laa Kanaa, ‑mä a nɩkpɛɛ Natanaɛlɩ mɔ, Zebedee ‑yowluwa muë 'n Zezwii a ‑gänɩwa ‑mumuë 'sɔ 'yɛ, wa 'wuë wa glɩ ‑lɛ. 3'N Simɔɔ Piɛlɩ yuëë 'dɩ 'nyɛ, ɔ lɛ naa: «N yɛɛ ‑dɛda ‑pää mö.» Wa lɛ naa: «‑A yi 'mämö.» 'N wa yiɛ 'wʋ ‑sɔ 'n wa yiɛ mö. Wa möä, 'n wa yiɛ 'gɔlʋ 'wʋ 'libhï, ‑maa ‑lɛ a sabʋ 'la, wa 'pää, wa'aa ‑lu 'lɩbhä. 4‑Maa zlɩzɩdɔ'wʋ, wa lɛ zʋ a sɛ'ɛ cuu, Zezwii 'nɩgbö ‑lɛ 'nyu nuë 'wʋ. Wa 'yo 'ylɩmö, ‑maa wa 'nɔɔ yɩbhlɩnɩ. 5Ɔ lɛ naa: «Na 'yuënyɩ, a 'lɩbhä ɔ ‑lu ‑a?» Wa lɛ naa: «N'nn, ‑aaa ‑lu 'lɩbhä.» 6Ɔ lɛ naa: «A nɩ 'pänɩ ‑mä gɔlʋʋ a luukɛ 'wʋ 'a ‑dɛdaa, ‑maa a yi ‑lu 'lɩbhä.» 'N wa yeaa ‑mä 'pä. ‑Maa wa 'kaa'a jli wa 'ka ‑mä ‑sɛɛ yii, zibhï a zunɔɔ a za, wa 'naa bhɛnɩ.

7‑Maa Zezwii 'a ‑gänɩwaa a gla'mö a ‑nɔɔ ‑ɔ ‑glɛɛ tenyii Zezwii dlɩ 'wʋʋ, ɔ 'yiɛ ‑sɩbhä 'ylɩmöö, ɔ lɛ: «Piɛlɩ, ‑Alowli mɔaa.» Ɔ 'nyɛɛ Piɛlɩ sa'a 'dɩɩ, Piɛlɩ 'nɩɛ a 'ɔ ‑bänaa 'mö ‑pla zaa, 'n ɔ yeaa 'mö päla, 'n ɔ yiɛ ‑lɛ 'nyu 'klʋ bhlinɩ. 8Piɛlɩ bhlinɩɛ ‑lɛ 'nyu 'klʋ 'wëë, ‑muë'la wabhlɩ wa ‑wʋ ‑mä 'gɔlʋ 'mö, ‑dɛdaa yie zibhï 'wʋ, wa ‑waa jli dɔ'wʋ, 'n wa yiɛ ‑mä 'kïkë 'wlu mö, wa'aa a 'yuku ‑wʋ. 'Bhöö ‑lɛ 'kïkë 'wlu, 'mɛtile a gwlɩ ngbï 'wʋ a sɛ wa ‑wʋ a‑a. 9Wa köbhää kïkëa, wa kwliɛ, wa lɛ 'bhöö'ɛ, ‑lɛ 'kïkë 'wlu, ‑kosu ganɩɩ ‑lɛ, zibhï ‑ngu ‑mä, 'fɔlɔ ‑wʋmö'ɛ ‑lɛ. 10'N Zezwii yuëë 'dɩ 'nyɛ nɩɩ: «Zibhïï a 'lɩbhää da'aa, a nɩ ‑laa ‑ka yɩ 'yɛya.» 11Ɔ gbää sa'aa, 'n Simɔɔ Piɛlɩ yiɛ ‑mä 'gɔlʋ 'mö ‑gbälɛ, 'n ɔ yiɛ ‑dɛdaa gbɩsɩ, zibhïi a yiee 'wʋʋ, yɩ 'kädɩ 'kädɩ, wa zeliɛ, yɩ ‑bhli zibhï a gwlɩ ngbi'sɔ zibhïya kʋgbä ta, ‑maa ‑sɩbhä yɩ ‑wʋ 'mö, ‑dɛdaa 'nɩɛ 'kpɔ do. 12Wa zeliɛ 'wëë, Zezwii lɛ naa: «A nɩ yi, a 'kä li.» ‑Maa wa 'wuë wa yɩbhlɩnɔɔ, wa ‑yi sɛ nɩɩ, wa ‑lowli mɔɔ zaa, wa gla'mö a ‑nɔ ‑bhlʋ a'bhë 'nɔɔ nimï 'yɩbhä nɩɩ: «‑Mɔ ‑n glɩnɩ bhä?» 13'N Zezwii yiɛ 'fɔlɔɔ 'wʋ 'libhï 'n ɔ yuënyɩɛ dilanɩ, 'n ɔ yuë'ɛɛ zibhïï dilanɩmö. 14‑Maa sɛɛ Lagɔ 'maa 'kä a Zezwii gäla, ɔ 'kɔ glu ‑sɛ 'wëë, ɔ 'wʋ tanadɔ'wʋ ɔ tulanɩɛ da'a ɔnyɩ 'ɔ ‑gänɩwaa 'ylɩmö.

Sɛ'ɛ Zezwii 'nyɛɛ Piɛlɩ 'dɩ

15Wa liɛ 'wëë, 'n Zezwii yiɛ Simɔɔ Piɛlɩ nimï 'yɩbhä, ɔ lɛ naa: «Zaa ‑yowli Simɔɔ, ‑muë nɩ 'wuë a dɔ'wʋ, n ‑glamö bhä tenyii dlɩ 'wʋ ‑a?» Ɔ lɛ naa: «Nn, ‑Alowli, ‑n ‑yi sɛ nɩɩ n ‑wamö.» Zezwii lɛ naa: «Zaa, 'zʋnɩ 'na wïlaa 'yli.» 16'N ɔ yo'ɛɛ 'wʋ 'sɔ nimï 'yɩbhänɩ, ɔ lɛ naa: «Zaa ‑yowli Simɔɔ, n ‑glamö bhä tenyii dlɩ 'wʋ ‑a?» Ɔ lɛ naa: «Nn, ‑Alowli, ‑n ‑yi sɛ nɩɩ n ‑wamö.» Zezwii lɛ naa: «Zaa, 'zʋnɩ 'na wïlaa 'yli!» 17'N ɔ yo'ɛɛ 'wʋ tanadɔ'wʋ nimï 'yɩbhä, ɔ lɛ naa: «Zaa ‑yowli Simɔɔ, ‑n ‑waa bhä ‑a?» Zezwii 'yɩbhänɔɔ sa'a 'wʋ tanadɔ'wʋ nimï nɩɩ: «‑N ‑waa bhä ‑a?» 'N swɩ yoo yɔwʋ 'kunɩ, ɔ lɛ naa: «'Ɔ! ‑Alowli, ‑nmö ‑yiɛ ‑lii 'wuë, ‑n ‑yi sɛ nɩɩ n ‑wamö.» Zezwii lɛ naa: «Zaa, 'zʋnɩ 'na wïlaa 'yli!» 18‑Tiamö n nyɩamöä dɛ'ɛ 'dɩ nɩɩ, 'tɛnyɩ 'mö dɛɛ ‑n glɩnɩ a‑a nyɛgbayuu, ‑nanyɩgäsɛ n‑n nyɔlanɩ a‑a yɔwʋ, mää ‑n yɩbhää, n‑n mö a‑a ‑mä. ‑Maa ‑n ‑kä gɔɔ, ‑na'a swɩɩ mö ‑n 'kää 'mö lɛlɩ ‑mɔmɔɔ ‑kamö yɔwʋ nyɔlanɩ, dɛ ‑nn‑ä yɩbhää, ɔ ‑kamö ‑lɛ kwä. 19Zezwii gbää sa'aa, sɛɛ Piɛlɩ 'kää 'ku, 'ɔ kwie 'kä Lagɔ a 'nglɩ 'ghlimanɩɩ, ‑sɩbhä ɔ tulanɔɔ ‑bhlɛ 'ylimö. Ɔ gbää ‑sɩbhä 'wëë, ɔ lɛ naa: «‑Sɔ 'wʋ ‑n ‑kaa ‑gänɩ!»

Sɛ'ɛ Zezwii gbää 'ɔ ‑gänɩnyɔɔ ɔ ‑waa tenyii a dɛ

20Zezwii 'nyɛɛ sa'a Piɛlɩ 'dɩɩ, wa ‑wʋ mö dɔ'wʋ 'n Piɛlɩ yiɛ nimï 'lɛ, Zezwii 'a ‑gänɩwaa a gla'mö a ‑nɔɔ ‑ɔ ‑glɛɛ tenyii Zezwii dlɩ 'wʋʋ, 'n ɔ yoo 'ylɩmö. ‑Zlɩ wa ‑wʋ a‑a li dɔ'wʋʋ, 'n Zezwii yi a‑a nɩkpɛɛ ‑ɔ 'kɔɔ 'ɔ ‑gblɩwaa kä'mö plɩnɩ a dɛ bhïlaa, ‑lɛ a nɩkpɛɛ 'la ‑ɔ 'ngungwanɩ a‑a Zezwii nɩɩ, ‑Alowli, ‑mɔ ‑n gaa bhä 'nɩ, ‑lɛ a nɩkpɛ 'la mɔɔ. 21Ɔ 'yoo 'ylɩmöö, 'n ɔ yiɛ Zezwii nimï 'yɩbhä, ɔ lɛ naa: «‑Alowli zaa, ‑mɔ nɩ ɔbhlɩ 'naa, sɛɛ ɔ ‑nɩɩ 'kä bhä 'mö ‑wʋ?» 22Zezwii lɛ naa: «N ‑kä nɩɩ, ɔ nɩ tɩ 'ku, ‑maa ɔ nɩ ‑bhölɩ ‑këë, n ‑kä mä'ä dʋdʋ 'bɩwʋ yii, yɩ yɩlɩmö ɔ 'wʋ ‑a? ‑Maa sɛ'ɛ n gbää nɩɩ, ‑nmö ‑naa ‑gänɩɩ.» 23'Bhöönɩa'a ‑lɛ, ‑lɛ a wɛlɩ 'la mɩɩ gbɔlɔnɩɛ ‑mä Zezwii a ‑nʋa gla'mö, wa lɛ naa: «Sɛ'ɛ Zezwii nʋä nɩɩ, nɩkpɛ 'la ɔ 'naa 'kä 'ku.» ‑Maa ‑tiamö a dɔ'wʋ, sa'a Zezwii 'nɩɛ a ɔbhlɩ gbä. ‑Maa sɛ'ɛ ɔ nʋ a‑a nɩɩ: «N ‑kä nɩɩ, ɔ nɩ tɩ 'ku, ‑maa ɔ nɩ ‑bhölɩ ‑këë, n ‑kä mä'ä dʋdʋ 'wʋ 'bɩwʋ yii, yɩ yɩlɩmö ɔ 'wʋ ‑a?» 24‑Lɛ a nɩkpɛ 'la Zezwii gaa a‑a da'aa, wɛlɩɩ ‑yɩ cɛlɩɛ mä'ä 'bɔgʋ nɩ 'möö, mɔɔ 'yiɛ 'ylɩmö, mɔɔ 'celiɛ. ‑A'bhï ‑a ‑yi sɛ nɩɩ, sɛ ɔ 'celiɛ dɛ'ɛɛ, yɩ 'wuë gbëaa yɩ glɩnɩɛ. 25Zezwii nʋ'ɛ ‑li ‑mimii a ‑bɛ. Yɩ'ɩɛ mä'ä 'bɔgʋ nɩ 'mö cɛlɩ. ‑Maa 'lɩlɩlɩ a dɔ'wʋ, sɛ ɔ nwiɛ, yɩ 'wuë ‑sɩbhä yɩ ‑kä a 'celioo, sɛ n pää dlɩ a dɔ'wʋ, ‑lɛ a 'bɔgwɩɩ wa 'kä a‑a 'cɛlɩɩ, yɩ 'naa 'kä a mä'ä 'bhlɩbhë nɩ 'mö 'zʋdɛ ghlɩ.

Currently Selected:

Zaa 21: bet

Highlight

Copy