Zaa 20

Zezwii 'nɩɛ ‑mä lesikpë 'mö tʋʋnɩ

(Matie 28.1-8; Maakö 16.1-8; Lwiikö 24.1-12)

1'Dimasi a 'zɔkpɔ 'pii 'mö, zlɩ 'nɩɛ ‑bhlɛ sasɛ zɩ, Madalaa a 'ylikwii Malii, 'n ɔ yiɛ 'wʋ ‑sɔ, 'n ɔ yiɛ ‑mä lesikpë 'wʋ mö. ‑Maa ɔ ghlɛɛ ‑mä, ɔ lɛ 'bhöö 'lɛɛ, kpiyii wa ‑gbanɩ a‑a lesikpëa nuë 'wʋʋ, ɛ sa‑a ‑lɛ. 2Ɔ 'yiɛ ‑sɩbhä 'ylɩmöö, ɔ ‑wʋ guë dɔ'wʋ 'n ɔ yiɛ 'wlu sɩbhä, Simɔɔ Piɛlɩ mɔ, 'n Zezwii 'a ‑gänɩnyɔ ‑mɔ'la ‑ɔ ‑glɛ a‑a tenyii Zezwii dlɩ 'wʋʋ, 'n ɔ yuëë ‑mä ghlɩ, ɔ lɛ naa: «Wa yɛ ‑mä ‑Alowli a ‑gäzɛɛ lesikpëa 'mö ‑sɛ, n'n‑ä dɛ wa kɛ 'zʋä ‑yi.» 3Ɔ gbää sa'aa, Piɛlɩ ‑nyɛ nɩkpɛ ‑mɔ'la 'sɔ, 'n wa yiɛ 'wʋ ‑sɔ, 'n wa yiɛ ‑mä lesikpëa 'wʋ 'mö. 4Wa 'sɔ ‑kpɔ wa ‑wʋ 'gämö guënɩ dɔ'wʋ, 'n wa yiɛ mö. ‑Maa Zezwii 'a ‑gänɩnyɔ ‑mɔ'la ɔbhlɩ, mɔɔ guëë tenyii Piɛlɩ a za, 'n ɔ yiɛ tɛɛ ‑mä lesikpëa 'wʋ ghlɛ. 5Ɔ ghlɛɛ ‑lɛ, 'n ɔ yiɛ 'wlu sɛ bhlɩ, 'n ɔ yiɛ ‑mä lesikpëa 'mö 'ylɩmö, lokuu wa 'pä a‑a ‑gäzɛɛ yɔwʋʋ, yɩ pö ‑lɛ, 'n ɔ yiɛ 'ylɩmö, ‑maa ɔ'ɔɔ ‑mä plɛ. 6Ɔ ‑wʋ ‑lɛ, 'n Simɔɔ Piɛlɩ yiɛ ‑lɛ ghlɛ, 'n ɔ yiɛ ‑mä lesikpëa 'mö plɛ. Lokuu wa bibe a‑a Zezwii a ‑gäzɛɛ 'n ɔ yiɛ 'ylɩmö, yɩ pö ‑lɛ. 7‑Mɛ'la wa bibe a‑a 'ɔ 'wukpëleaa, ɛ ‑nyɛ loku ‑mi'la 'nɩɛ ‑gömö pöpönɩ, ‑maa ɛ ‑gïganɩ 'wlu 'tɩɩ, ɛ pö 'ɛ dɛ, 'n ɔ yee 'ylɩmö. 8Zezwii a ‑nɔ ‑mɔ'la ‑ɔ ghlɛ a‑a tɛɛ ‑lɛ lesikpëa 'wʋʋ, 'n ɔ yia'aa ‑mä plɛmö, 'n ɔ yiɛ ‑mä 'ylɩmö, 'n ɔ yia'a dlɩ 'wʋ ‑kä nɩɩ Zezwii yɛ glu 'wlʋ. 9'Lɩlɩlɩ a dɔ'wʋ, ‑mä Lagɔbɔgʋʋ 'mö a wɛlɩkïbhëa a nʋä nɩɩ, Zezwii yi a glu 'wlʋʋ, 'ɔ ‑gänɩwa 'la 'naa a ‑bhlɛ 'mö 'nʋ. 10'Ɔ ‑gänɩwa 'la 'sɔ ‑kpɔ, 'n wa yiɛ 'wlu sɩbhä, 'n wa yiɛ 'ligbë 'mö mö.

Zezwii yɛ Madalaa a 'ylikwii Malii ɔnyɩ 'ylɩmö tulanɩ

(Matie 28.9-10; Maakö 16.9-11)

11Malii yiɛ 'bɩwʋʋ, ‑lɛ 'pɩwʋ, lesikpëa nuë 'wʋ, ‑lɛ ɔ ‑wʋä 'n ɔ wiɛ. Ɔ ‑wʋ 'wi dɔ'wʋ, 'n ɔ yiɛ ‑mä lesikpëa 'mö 'wlu sɛ bhlɩ. 12'N ɔ yiɛ Lagɔzuzuku 'sɔ 'ylɩmö, yɩ ‑pla ‑banɩ 'pɩpɩ 'mö, dɛɛ Zezwii a ‑gäzɛɛ pö a‑a, yɩ glɩ ‑lɛ. ‑Ma glɩ ‑lɛ 'wukpëlea a ‑gbaa 'mö, ‑ma glɩ ‑lɛ kplɩɩ a ‑gbaa 'mö. 13Lagɔzuzuku 'la 'n yɩ yiɛ Malii nimï 'yɩbhä, yɩ lɛ naa: «Bhɩa, 'saa ɔ n‑n wi bhä 'nɩ?» Ɔ lɛ naa: «Na ‑lowli, wa kɔ ‑mä lesikpëa 'mö ‑sɛ, n'n‑ä dɛ wa kɔ 'zʋä ‑yi.» 14Ɔ gbää sa'a 'wëë, 'n ɔ yiɛ 'mö 'bhɛlɔ. Ɔ lɛ zʋ a sɛ'ɛ Zezwii 'nɩgbö ‑lɛ. ‑Maa Malii 'nɔɔ yɩbhlɩnɩ. 15Zezwii lɛ naa: «‑Bhɩa, 'saa ɔ n‑n wi bhä 'nɩ? ‑Mɔ ‑n tɛlɩ bhä sɛ 'nɩ?» Ɔ gbää sa'aa, Malii ‑tɔnɩ ɔbhlɩ 'lagblɛɛ 'mö a libhonʋnyɔɔ mɔ zaa, ɔ lɛ naa: «‑Atʋ, ‑nmöö ‑kä na ‑lowlii a ‑gäzɛɛ 'wʋ 'libhïï, dɛ ‑n 'zwee, sʋlʋnɩɩ ‑lɛ dɛ, n 'kɛ kie mö.» 16'N Zezwii yoo wäzɩ, ɔ lɛ naa: «Malii!» Malii 'bhɛlɔɔ 'möö, ɔ lɛ: «Ghlabuni!» Ebleegbʋ 'mö, mɩɩ sɛɛ zɛmö nɩɩ, 'Cɩanyɔ. 17Ɔ gbää sa'aa, Zezwii lɛ naa: «Malii, ‑tɩɩ sɛ köbhä, ‑maa ‑mä na Dɩba yɔwʋ, n'n‑ä ‑bhlɛ ‑mä mö, ‑maa, na ‑daayuë, mö ‑n 'kʋä 'dɩ 'nyɛ nɩɩ, na Dɩba ‑ɔ glɩnɩmöä a Dɩbaa, na Lagɔ ‑ɔ glɩmnɩmöä a Lagɔ, ‑mä ɔ yɔwʋ, ‑mä n ‑wʋä mö dɔ'wʋ.» 18Zezwii 'nyɔɔ sa'a 'dɩɩ, 'n ɔ yiɛ 'wʋ ‑sɔ, 'n ɔ yiɛ Zezwii 'a ‑gänɩwaa 'dɩ kwä, ɔ lɛ naa: «‑Alowli, n kɔ 'ylɩmö.» Sɛɛ Zezwii 'nyɔ a‑a 'dɩɩ, 'n ɔ yuëë ‑sɩbhä 'dɩ 'nyɛ.

Zezwii yɛ 'ɔ ‑gänɩwaa ɔnyɩ 'ylɩmö tulanɩ

(Matie 28.16-20; Maakö 16.14-18; Lwiikö 24.36-49)

19‑Lɛ a 'dimasi 'la ‑bhʋlʋ ‑kpɔ a sabʋsɛ, Zezwii 'a ‑gänɩwaa, wa yɩbhää ‑mä ‑budu ‑bhlʋ 'mö 'wlu, Zwiiföwaa 'mö wa guä zaa, ‑buduu gba‑a, wa lɛ zʋ a sɛ'ɛ cuu, Zezwii 'nigbuë jijo'wʋ. Ɔ lɛ naa: «'Pʋpʋɛ nɩ ghlanyɩ 'wʋ!» 20Ɔ bhäluëë 'wëë, 'n ɔ yuëë 'ɔ kätɩkpöö 'mö ‑nyɛ ɔ gbäközɛmö 'sɔ a 'kpakwɩɩ 'ylimö tulanɩ. Wa yɩbhlɩnɔɔ nɩɩ, wa ‑lowli mɔɔ, 'n 'mäna yuëë 'wlu 'mänanɩ. 21'N ɔ yuë'ɛɛ 'dɩ 'nyɛ nɩɩ: «'Pʋpʋɛ nɩ ghlanyɩ 'wʋ. Sɛɛ ‑aa dɩba Lagɔ tieaa a‑a, ‑sɩbhä n tiemanyɩ'ɛɛ na a dɛ'ɛɛ.» 22Ɔ gbää sa'a 'wëë, 'n ɔ yuëë nyɛmʋ 'wʋ 'pä, ɔ lɛ naa: «'Wugɔmʋʋ 'Wlɩlɩ nɩ yeanyɩ ‑gömö. 23‑Ɔnyɩɩ 'nyinylolii a gbʋʋ a ‑kä 'yi 'tatinɩɩ, Lagɔ a 'yila 'klʋ a dɔ'wʋ, wʋ kɔ ‑gömö 'bhöö. ‑Mɔ a ‑kä 'dɩ 'nyɛ nɩɩ, ɔ kä gbʋ ‑gömöö, Lagɔ a 'yila 'klʋ a dɔ'wʋ, wʋ yo ‑gömö ‑wʋ 'yize.»

Zezwii yɛ Tomaa ɔnyɩ 'ylimö tulanɩ

24Tomaa wa laa Pʋwayu, ‑ɔ glɩnɩmöä Zezwii a ‑nʋa kʋgbä 'sɔ ‑kpɔ a gla'mö a ‑nɔ ‑bhlʋ, dɛɛ Zezwii yi a‑a da'a ɔ ‑nʋa jijo'wʋʋ, ɔ'ɔɔ a ɔbhlɩ ‑lɛ ‑wʋmö. 25Zaa, ɔ yiɛ, 'n ɔ 'bhɩa yoo 'dɩ 'nyɛ, wa lɛ naa: «Alowli Zezwii, ‑a kɔ 'ylɩmö.» Tomaa lɛ naa: «'N n 'nɩ ‑mä ɔ kä'mö a pɔɔtɩ a 'kpakwɩɩ 'ylɩmöö, sɛ wa kʋnɩ a‑a pɔɔtɩ, 'n n 'nɩ ‑sɩbhä 'na wïleyii 'ngwa 'wëë, 'ɔ gbäközɛmö dɛ wa 'fïta a‑a, 'n n 'nɩ ‑lɛ kɛ zɩ 'wëë, 'saa a bhïlaa da'aa, 'naa 'kɩ dlɩ 'wʋ ‑kä.»

26'Dimasi ‑bhlʋ 'plɩɛ, Zezwii a ‑nʋa, wa yɩbhänɩ'ɛ 'wʋ ‑sɔ ‑mä ‑budu 'mö 'wlu, Tomaa a'bhë, ɔ ‑wʋmö ‑mä. ‑Buduu gbaa, 'n Zezwii yiɛ yi. Wa lɛ zʋ a sɛ'ɛ, ɔ 'nigbuë jijo'wʋ, ɔ lɛ naa: «'Pʋpʋɛ nɩ ghlanyɩ 'wʋ!» 27'N ɔ yiɛ Tomaa 'yi gö, ɔ lɛ naa: «Yɩlɩɛ ‑ka mä'ä na kätɩkpö 'mö, 'ngwa dɛ'ɛ ‑na'a wïleyii. Plu sɔ 'mö, ‑n 'kä ‑lɛ na gbäközɛmö kɛ zɩ. Tɩa'a gʋgɔ ‑maa kɩ dlɩ 'wʋ!» 28'N Tomaa yiɛ nɩɩ: «Na ‑Lowli, na Lagɔ.» 29Zezwii lɛ naa: «‑N ‑kaaa'a ‑naa ‑sɩkaa 'ylɩmö 'wë, nza ‑n kɩɛ dlɩ 'wʋ. ‑Wa ‑nɩɩɛ wabhlɩ 'ylɩmö, ‑wa kɩɛ dlɩ 'wʋʋ, 'wa ‑jɔlʋ!»

30Zezwii ‑bhɛnɩ'ɛ ‑lɛ ɔ ‑nʋa 'yila 'klʋ zɩzɛli ‑mimii a ‑bɛ. Yɩ'ɩɛ mä'ä 'bɔgʋ nɩ 'mö cɛlɩ. 31‑Maa wɛlɩɩ 'wuë ‑yɩ cɛlɩɛ ‑mä, sɛ'ɛ yɩ tulanɩɛ 'ylimö nɩɩ, Zezwii mɔɔ glɩnɩɛ Kliisɩ, Puënyɔɔ Lagɔ ‑sɛɛ ‑lɛ, Lagɔ 'a Yuu. A 'wuë a 'kɩa ‑sɩbhä yɩbhlɩnɩ, a 'kɔa dlɩ 'tɛɛnɩ a za, nza wɛlɩ nɩ 'wuë cɛlɩɛ mä'ä 'bɔgʋ nɩ 'mö. A ‑kɔɔ dlɩ 'tɛɛnɩ, ɔ 'nglɩ 'mö, 'pɩwʋ mää 'naa 'kää 'yli bhɩɛɛ, a yɛ ‑mä ghlɩ.

Currently Selected:

Zaa 20: bet

Highlight

Copy