Zaa 19

1'N Pilaatɩ yiɛ 'slʋja 'dɩ 'nyɛ nɩɩ, wa nɩ 'libhï Zezwii 'wʋ, wa 'kɔ 'sɛlɩ. 2'Slʋjaa 'libhoo 'wʋʋ, 'n wa yiɛ ‑dɛglaglipë lɩbhä, 'n wa yonyɩɛ 'wlu zʋ. 'N wa yoo ‑bäna 'käda 'mö päla, a 'zɩzla. 3Wa 'zoo sa'a 'wëë, 'n wa 'dioo 'yila 'klʋ, 'n wa nʋä: «Zwiiföwaa a 'bhlɩlowlii, ‑na nyɛmʋ nɩ zumanɩ!» 'N wa ‑dɩnɔɔ 'yukwïla 'mö kɛ. 4'N Pilaatɩ yi'ɛɛ ‑mä 'ligbë 'mö 'wlʋ, 'n ɔ yiɛ Zwiiföwaa 'dɩ 'nyɛ, ɔ lɛ naa: «Nɩkpɛɛ a ‑laaa, mä'ä n 'kanyɔɔ 'pɩwʋ ‑lɛ. A 'kä sɛ yɩbhlɩmanɩ nɩɩ, 'kïbhë a ‑maa 'kɔɔ gbʋ köbhaa, n 'nɔnyɩɛ 'mö ghlɩ.» 5'N wa ‑nyɛ Zezwii yiɛ zɛmö 'wlʋ, ‑dɛglaglipëa wa 'zo a‑a 'wluu, a ‑wʋ ‑mä, ‑bänazla 'kädaa, ɔ ‑soa 'mö, 'n wa ‑nyɔɔ yiɛ ‑lɛ 'pɩwʋ 'dio. Wa ghlɛɛ ‑lɛ, Pilaatɩ lɛ naa: «Nɩkpɛɛ mɔɔ da'a.» 6‑Maa Lagɔbʋbɔwaa a 'kifiea wa ‑nyɛ 'wa ‑kʋkʋwaa 'sɔ, wa 'yoo 'ylɩmöö, 'n wa yiɛ tenyii 'mö 'kpa, wa lɛ: «‑Alee, kʋnɔɔ su 'klʋ ɔ 'kä 'ku aa, ɔ 'kä 'ku aa!» Pilaatɩ lɛ naa: «A nɩ 'libho anyɩgäsɛ 'wʋ, a 'kɔ su 'klʋ kʋnɩ, ‑maa ‑amö na a, 'kïbhë a ‑maa 'kää 'nglɩ ‑kä n 'kɔ su 'klʋ kunɩɩ, n 'naa 'wʋ yɩlɩ.» 7Ɔ gbää sa'aa, Zwiiföwaa lɛ naa: «‑A kä ‑a'a gbö. ‑A'a gbö 'la a dɔ'wʋ, nɩkpɛ nɩ, 'ku ɔ kää ɔ 'kä 'ku. Ɛ'ɛ ‑bhö nyɩasɛ, ‑maa ɔ lɛ Lagɔ a 'Yu ɔ glɩnɩɛ.» 8Wa gbää sa'aa, 'n nganɔ yiɛ tenyii Pilaatɩ köbhä, 9'n ɔ ‑nyɛ Zezwii yi'ɛɛ ‑mä 'ligbë 'mö plɛ, 'n ɔ yoo nimï 'yɩbhä, ɔ lɛ naa: «'Lɩlɩlɩ a dɔ'wʋ, dɛ ‑n 'bhöönɩ bhä a'bhë 'nɩ?» ‑Maa ɔ 'yɩbhɔɔ sa'a nimï, Zezwii 'nɔɔ ngli pälɩ. 10'N Pilaatɩ yo'ɛɛ nimï 'yɩbhä, ɔ lɛ naa: «‑Amö ‑n ‑gɔ bhä 'wʋ ‑a? ‑Nn bhä sɛ ‑yi nɩɩ, ‑amöö 'kämanɩɛ, n bhɛnɩ n ‑kamö 'yi 'tatinɩ, n bhɛnɩ'ɛ n 'kä gbä ‑wa ‑kamö su 'klʋ kʋnɩ ‑a?» 11Zezwii lɛ naa: «'N ɛ 'nɩ ‑bhö nɩɩ Lagɔ mɔɔ ngulu 'wʋ a za‑a, ‑na'a ‑zɩbʋ 'mö, ‑nn‑ä bhɛnɩ ‑n 'kä ‑mä na ‑gömö ‑na'a 'kämanɔɔ 'yli 'wälanɩ. ‑Sɩbhä a za nɩkpɛ ‑ɔ plɩnɩɩɛ ‑nmö kä'möö, 'ɔ nyinylolii a gbʋʋ 'tɛɛ 'mö wʋ zi ‑na ‑nʋʋ 'wʋ.» 12Zezwii gbää sa'aa, 'n Pilaatɩ yiɛ ‑li 'mö yɛla ɔ 'kɔ a 'yi 'tatinɩ. 'N Zwiiföwaa yi'ɛɛ 'mö 'kpa, wa lɛ naa: «Nɩkpɛ a ‑mɔɔ laa ɔnyɩ 'bhlɩlowlii, Sezaa a ‑gblɩnyɔ ɔ glɩnɩɛ. Zaa, n‑n ‑kɔɔ ‑naa 'yi 'tatinɩɩ, ‑nn‑ä Sezaa nimï ‑wʋ.» 13Wa nʋä sa'aa, 'n Pilaatɩ ‑nyɛ Zezwii yi'ɛɛ ‑mä 'libgë 'mö 'wlʋ, 'n ɔ ‑nyɔɔ yiɛ ‑lɛ 'pɩwʋ 'dio. Pilaatɩ 'a ‑zijlituklikpëa, 'n wa ‑nyaa yiɛ yi. Dɛ ‑bhlʋ dɛ wa 'zʋä sɛ'ɛ kpɩ glu 'tɩɩ, dɛ wa laa Ebleegbʋ 'mö Gabataa, 'n wa yeaa ‑lɛ 'zʋ, 'n Pilaatɩ yiɛ sɛ glɩ, ɔ kä ‑zijlea 'wlu ‑dɩ. 14‑Lɛ a zlɩ 'la 'mö, Galɛ'möwlʋfɛtɩɩ a ‑lii a 'wlugïganɩzlɩɩ mɛɛ, ylʋʋ lɛ 'kä 'du 'mö ghlɛ a sɛ, 'n Pilaatɩ yuëë 'dɩ 'nyɛ, ɔ lɛ naa: «'A 'bhlɩlowlii mɔɔ dɛ'ɛ.» 15‑Maa ɔ gbää sa'aa, wa 'wuë 'n wa yi'ɛɛ 'mö 'kpa, wa lɛ: «Ɔ nɩ 'ku aa, ɔ nɩ 'ku aa, kʋnɔɔ su 'klʋ ɔ 'kä 'ku aa!» Pilaatɩ lɛ naa: «'A 'bhlɩlowlii 'mö a gbä bhä n nɩ kʋnɩ su 'klʋ ɔ 'kä 'ku ‑a?» Ɔ gbää sa'aa, Lagɔbʋbɔwaa a 'kifiea, wa lɛ naa: «'N ɛ 'nɩ ‑bhö Sezaa a 'yize mɔɔ, ‑aa mä'ä käböbhlɩlowli ‑kä.» 16Wa gbää sa'aa, 'n ɔ yia'aa Zezwii 'slʋjaa yowʋ 'nyɛ wa 'kɔ su 'klʋ kʋnɩ. 'N slʋjaa yiɛ Zezwii 'wʋ 'libhï.

Wa yɛ Zezwii su 'klʋ kʋnɩ

(Matie 27.32-44; Maakö 15.21-32; Lwiikö 23.26-43)

17Wa ‑nyɔɔ ‑wʋä ‑mä glɔ 'mö 'wlʋ dɔ'wʋʋ, suu wa 'kɔɔ 'klʋ kʋnɩɩ, ɔ'bhë ɔ ‑suu 'n wa ‑nyɔɔ yiɛ ‑mä 'wlʋ. Dɛ ‑bhlʋ, dɛ wa laa Ebleegbʋ 'mö Gogotaa ‑yɩ sɛɛ zɛmö nɩɩ 'wutɔkʋʋ, 'n wa yiɛ ‑lɛ mö. 18Da'a ‑lɛ wa kʋnɩɛ Zezwii su 'klʋ. Wa kʋnɩmö'ɛ nɩkpa ‑mumuë 'sɔ 'wa swii 'klʋ. ‑Mɔ ‑wʋ mä'ä ɔ luukɛ 'wʋ, ‑mɔ ‑wʋ mä'ä ɔ kɔpɛ 'wʋ. 19‑Maa suu wa kʋnɔɔ 'klʋʋ, ‑lɛ wʋ ghäyɩdaa, Pilaatɩ lɛ wa nɩ 'cɛlɩ wɛlɩkïbhë ‑bhlʋ wa 'ka ‑lɛ mɩanɩ. 'N wa yeaa ‑lɛ mɩanɩ. Sɛ'ɛ a nʋä nɩɩ: Nazalɛɛtɩ a Zezwii, Zwiiföwaa a 'bhlɩlowli. 20Dɛ wa kʋnɩɛ Zezwii su 'klʋʋ, ‑lɛ glɔ yɔwʋ ma‑a, kïbhëa Pilaatɩ mɩanɩɛ ‑lɛ 'ɔ su 'klʋʋ, a cɛlɩnɩ Ebleegbʋ 'mö, a cɛlɩnɩ Latɛɛgbʋ#19.20 Latɛɛ: Ghlʋmɛɛwaa 'a gbʋʋ muä. 'mö, 'n a cɛlɩnɩ'ɛɛ Glɛkögbʋ 'mö zaa, Zwiiföwa a ‑bɛ zɛla 'mö. 21'N 'wa Lagɔbʋbɔwaa a 'kifiea yiɛ Pilaatɩ ‑mä ghlɩ, wa lɛ naa: «Sɛ ‑n 'cɛlɩɛ da'a ‑lɛ nɩkpɛ 'la a suu 'klʋʋ, ‑sɩbhä 'nɩɛ nɛnɩ, ‑maa sɛ'ɛ ‑n 'kä a‑a nɩɩ, nɩkpɛ nɩ, ɔ lɛ mɔɔ glɩnɩɛ Zwiiföwaa a 'bhlɩlowli.» 22‑Maa Pilaatɩ lɛ naa: «'Saa n yɛɛ da'a 'cɛlɩ 'wëë, n kʋ 'cɛlɩ 'wë.»

23'Slʋjaa kʋnɩɛ Zezwii su 'klʋ 'wëë, 'n wa yiɛ 'ɔ 'möpälalii 'wʋ 'libhï, 'n wa yiɛ 'ki ‑mʋäna 'mö 'ylimö dlinɩ, ‑mɔ ‑bhlʋ 'ɔ dɛ, ‑mɔ ‑bhlʋ 'ɔ dɛ. 'Ɔ ‑bäna ‑vʋkwaa ‑aaa 'ylimögönadɛ ‑kä, ‑a ‑wʋä ‑bhlokoo, 'n wa yea'ɛɛ 'wʋ 'libhïmö. 24Wa 'libhëaa 'wʋʋ, wa lɛ naa: «A‑a nɩ ta 'mö ghlɛghlɛnɩ, ‑maa a‑a nɩ 'pa ‑nɩgbɩ 'wʋ, ‑ɔnyɩɩ ‑nɛ ‑kä lii, ɔ 'ka 'wʋ 'libhï.» Sa'a ‑sɩbhä 'kïbhë ‑bhlʋ, ‑a cɛlɩɛ a‑a ‑mä Lagɔbɔgʋʋ 'mö 'wlʋnɩɛ 'yli. 'Kïbhë 'la, sɛ'ɛ a nʋä nɩɩ:

Wa yɛ 'na 'möpälalii 'ylimö dlinɩ.

'Na ‑bäna ‑vʋkwa a'bhë,

wa ka ‑nɩgbɩ 'wʋ 'pä. # 19.24 Soomö 22.19.

25‑Maa suu wa kʋnɩɛ Zezwii 'klʋʋ, ‑lɛ wʋ yɔwʋ, ɔ ‑da mɔ, ɔ ‑da a ‑daayu mɔ, nɩkpɛ ‑bhlʋ wa laa Klʋpasɩ, ɔ 'lɛnglɛ Malii mɔ, 'n Madalaa a 'yikwlii Malii, ngwlɩ 'la ‑mʋäna ‑kpɔ mʋa 'nɩgböä ‑lɛ. 26‑Lɛ Zezwii a ‑da yɔwʋ, 'ɔ ‑gänɩnyɔɔ ‑ɔ ‑glɔɔ tenyii dlɩ 'wʋʋ, ɔ 'nɩgbömö ‑lɛ. 'N ɔ yiɛ ɔ ‑da 'dɩ 'nyɛ nɩɩ: «‑Bhɩa, ‑na'a yuu mɔɔ da'a.» 27'N ɔ yiɛ 'ɔ ‑gänɩnyɔ 'la 'dɩ 'nyɛmö, ɔ lɛ naa: «‑Na ‑da mɔɔ da'a.» 'Bhöönɩa'a ‑lɛ, mɔɔ ‑sua'aa Zezwii a ‑da.

Zezwii a nyɛmʋ yɛ bhɩɛ

(Matie 27.45-56; Maakö 15.33-41; Lwiikö 23.44-49)

28Yɩ 'plɩɛ sa'a 'wëë, Zezwii ‑yi sɛ nɩɩ, libhoo Lagɔ 'nyɔ a‑a, ɔ kʋ zɛmö bhɩɛ, 'n ɔ yiɛ gbʋ ‑dɩ, ɔ lɛ: «'Nyutʋ lɩbhaa.#19.28 Soomö 69.22.» Ɔ gbää sa'aa, wɛlɩkïbhë ‑bhlʋ ‑a cɛlɩ a‑a 'kɩ ɔ dɛ ‑mä Lagɔbɔgʋʋ 'möö, ma‑a 'wlʋnɩɛ da'a 'yli. 29‑Maa ‑laki ‑bhlʋ ‑wʋ ‑lɛ, ɛ kä nʋ 'mö, kälɩ wʋ kälɩɛ. 'N 'slʋjeyi yiɛ ‑yʋkʋdudukwë 'wʋ 'libhï, 'n ɔ yeaa su ‑bhlʋ wa laa yizɔɔpö#19.29 Yizɔɔpö: Yizlaɛlɩ a yuëa 'kää ‑mä Ezipötɩ 'bhöö yii, su 'la a kïlaa, 'mö wa ngwa a‑a ‑mä 'bhlawʋdɩgbää a dluu 'mö, 'n wa yuä ‑lɛ 'wa ‑gbïlikäyaa nuë 'wʋ tli. Ɛzoodɩ 12.22. a klɩɩ 'yli gwanɩ, 'n ɔ yeaa ‑mä nʋ 'la 'mä 'ngwa 'n ɔ yeaa Zezwii nuë 'wʋ zʋ. 30Zezwii 'nɩmää nʋ 'la 'wëë, ɔ lɛ naa: «Yɩ 'wuë yɛ 'klʋ yie.» Ɔ gbää sa'a 'wëë, 'n 'ɔ 'wukpëlea yiɛ kpëghlele bhli, 'n 'ɔ nyɛmʋʋ yiɛ bhɩɛ.

'Slʋjeyi yɛ Zezwii a ‑gäzɛɛ 'li 'mö tlʋ

31‑Lɛ a zlɩ 'la, Zwiiföwaa 'a ‑gwlɛnɩzlɩ a ‑lii a 'wlugïganɩzlɩɩ mɛɛ. Zaa, Zwiiföwaa 'nɩɛ 'yɩbhä nɩɩ, ‑gäzɛ nɩ ‑wʋ su 'klʋ. Ɛ'ɛ ‑bhö nyɩasɛ, ‑maa ‑lɛ a ‑gwlɛnɩzlɩ 'la, 'fɛtɩ 'kädɛ a zlɩ 'mö ɛ bhliɛ. Nza wa ghlɩɛ ‑mä Pilaatɩ, nɩkpaa wa kʋnɩ a‑a swi 'klʋʋ, 'slʋjaa 'kä wa bhɩɩ 'kätɛ, wa 'käa ‑pa 'ku, nzɩɩ wa 'käa wa ‑gäzɩɩ ‑lɛ swi 'klʋ ‑sɛ. 32'N 'slʋjaa yiɛ yi. Wa yiɛ, nɩkpaa 'sɔ ‑kpɔ ‑wa ‑kʋnɩmö a‑a ‑lɛ Zezwii yɔwʋ 'wa swii 'klʋʋ, 'n wa yiɛ bhʋlʋbhlʋ wa bhɩɩ 'kätɛ. 33‑Maa wa 'kää Zezwii 'wʋ ghlɛɛ, wa lɛ zʋ a sɛ'ɛ, ɔ ku‑u, ‑sɩbhä a za, wa 'nɔa'a bhɩ 'kätɛ. 34‑Maa 'slʋjeyi ‑bhlʋ ɔbhlɩ, mɔɔ 'libhïä 'ɔ lii 'wʋ, 'n ɔ yiɛ Zezwii 'a gbäközɛmö 'fïta. Ɔ 'fïtaa ‑lɛ, 'n dlu ‑nyɛ 'nyu 'sɔ yiɛ ‑lɛ ghlɛnɩ. 35‑Ɔ bhïlaa wɛlɩ nɩ 'dɛɛ, ɔ 'yɩ yɩ da. Zaa, ‑tiawɛlɩɛ, ɔ'bhë ɔ ‑yi sɛɛ nɩɩ gbëaa ɔ bhïlaa. A 'kɩa abhlɩ dlɩ 'wʋ ‑kämö a za nza ɔ bhïliiɛ. 36‑Li 'la 'wuë, kïbhïï ‑yɩ cɛlɩ a‑a ‑mä Lagɔbɔgʋʋ 'möö, yɩ 'kä 'yli 'wlʋnɩ a za, nza yɩ 'plɩɛ ‑sɩbhä 'wʋ. Sɛ'ɛ tɛkäkïbhëa nʋä nɩɩ: Wa 'naa 'kä ɔ 'kwëyi ‑bhlʋ a'bhë 'kätɛ. #19.36 Ɛzoodɩ 12.4; Nɔblɩ 9.12; Soomö 34.21. 37Sɛ'ɛ 'sɔnaa nʋä nɩɩ: Nɩkpɛɛ wa 'fïta a‑a, wa yo zɩla'a 'ylɩmö.#19.37 Zakalii 12.10.

Wa yɛ Zezwii a ‑gäzɛɛ zizaa

(Matie 27.57-61; Maakö 15.42-47; Lwiikö 23.50-56)

38Yɩ 'plɩɛ sa'a 'wëë, 'n nɩkpɛ ‑bhlʋ yiɛ Pilaatɩ ‑mä ghlɩ. Glɔ ‑bhlʋ wa laa Alimatee, ‑mä a nɩkpɛɛ. 'Mö wa laa Zɩzɛɛfʋ, Zezwii 'mö ɔ ‑gänɩmöä. ‑Maa Zwiiföwaa 'mö ɔ guä zaa, 'wi 'mö ɔ ‑gänɔɔ. Nɩkpɛ 'la, mɔɔ ghlɩɛ ‑mä Pilaatɩ, 'n ɔ yoo Zezwii a ‑gäzɛ 'yɩbhänɩ ɔ 'kɛ zizaa mö. 'N Pilaatɩ yiɛ 'wʋ nglu, 'n Zɩzɛɛfʋ yiɛ ‑gäzɛɛ ‑lɛ suu 'klʋ ‑sɛɛ mö. 39Ɔ ‑nyɛ nɩkpɛ ‑mɔmɔɔ 'sɔ 'n wa yiɛ mö. Nikodɛɛmö, nɩkpɛ 'la ‑ɔ mö'ɛ 'ylɩ ‑bhlʋ 'mö sabʋsɛ Zezwii nimï 'yɩbhää,#19.39 Zaa 3.1-16. mɔɔ. Nikodɛɛmö, gwäzɩ wa lɔɔ ‑gäzɩ yɔwʋ wa laa miilɩ, yɩ ‑nyɛ ‑mimii wa laa alowɛsɩ 'sɔ, yɩ 'dʋadʋanɩ, yɩ kä 'kwili a glʋ ‑bhlʋ 'kwili kʋgbä a sɛ, ɔ ‑swii 'n ɔ yiɛ yi. 40Ɔ ‑nyɛ Zɩzɛɛfʋ 'sɔ 'n wa yiɛ Zezwii a ‑gäzɛɛ 'wʋ 'libhï, 'n wa yiɛ gwäzɩ 'la ‑yɩ pää nglɛ a nglɛ ‑gäzɛɛ yɔwʋ 'lɔ, 'n wa yee loku bibe 'tɩɩ. Zwiiföwaa ‑kä 'kwädlɩ 'wa ‑gäzɩɩ zizaa yi a sɛ wa 'zʋ a‑a, 'n wa yiɛ ‑sɩbhä zʋ. 41‑Maa dɛ wa kʋnɩɛ da'a Zezwii su 'klʋʋ, ‑lɛ a yɔwʋ, 'lagblɛ ‑bhlʋ ‑wʋ a ‑lɛ. ‑Mä ɛ 'mö, lesikpë ‑bhlʋ ‑wʋ ‑mä. Lesikpë 'la 'mö, wa'aa ‑bhlɛ tɛkäsɛ ‑mä nɩkpɛ zizaa.#19.41 Wa 'bhele a dɔ'wʋ, lesikpïï, ‑budubheyi a sɛ wa bhulwiɛ. Zaa, wa bhɛnɩ wa 'kä ‑mä nɩkpa a ‑bɛ ziza. 42‑Maa Zwiiföwaa a ‑gwlɛnɩzlɩɩ yɛ 'dio 'wë, 'n lesikpë 'la 'nɩɛ'ɛ dɛ 'bhʋɔ zaa, ‑mä wa zizaa Zezwii.

Currently Selected:

Zaa 19: bet

Highlight

Copy