Zaa 18

Wa yɛ Zezwii köbhä

(Matie 26.47-56; Maakö 14.43-50; Lwiikö 22.47-53)

1Zezwii bhibhee ‑sɩbhä Lagɔ 'wëë, 'n ɔ yiɛ 'wʋ ‑sɔ, ɔ ‑nyɛ 'ɔ ‑gänɩwaa 'sɔ, 'nyudɔlʋ wa laa Sedlɔɔ 'n wa yiɛ ‑mä wʋ kïkë ‑mä'la ‑gömö mö. ‑Mä a dɛ ‑bhlʋ dɛɛ swi ‑glʋä, 'n wa yiɛ ‑lɛ mö, 'n wa yiɛ ‑mä swi 'la zɛmö plɛ. 2‑Maa ‑lɛ a swi 'la zɛmö, 'kwädlɩ a dɔ'wʋ, Zezwii ‑nyɛ ɔ ‑nʋa 'sɔ, 'tɛnyɩ ‑mɛmɛɛ ‑kä ghlɛɛ, ‑lɛ wa mö a‑a 'yize zaa, Zwidaa ‑ɔ 'kɔɔ 'ɔ ‑gblɩwaa kä'mö plɩnɩɩ, ɔ ‑yi ‑lɛ dɛ. 3Zaa, wa ‑wʋ ‑lɛ 'n Zwidaa yuëë ‑lɛ ghlɩnɩ. Lagɔbudu 'Kɔdʋʋ a ‑kʋkʋwa a gla'mö a ‑mumuë, wa ‑nyɛ 'slʋja 'sɔ, ɔ ‑suë 'bɩwʋ. Zwiiföwaa 'a Lagɔbʋbɔwaa a 'kifiea ‑nyɛ Falizɩɛwaa 'sɔ, mʋa 'pɔnyɩɛ 'bɩwʋ, wa 'kä Zezwii köbhä. Wa ‑su 'päpäli, wa ‑su 'wapö, wa ‑su ywlɩ, 'n wa yiɛ yi. 4‑Maa wa ghlɛɛ ‑lɛ, Zezwii ‑yi ɔbhlɩ 'kɩ 'saa 'kɔ ghlɩ zaa, 'n ɔ yuëë gbanɩɛ mö, 'n ɔ yuëë nimï 'yɩbhä, ɔ lɛ naa: «‑Mɔ a tɛlɩ bhä sɛ 'nɩ?» 5Wa lɛ naa: «Nazalɛɛtɩ a Zezwii mö ‑a tɛlɩɛ sɛ.» Ɔ lɛ naa: «‑Amöä dɛ'ɛ.» Zwidaa ‑ɔ plɩnuënyɩɛ kä'möö, ɔ ‑wuë jijo'wʋ. 6‑Maa Zezwii nʋä nɩɩ: «‑Amöä dɛ'ɛ,» wa 'wuë, nimï wa yinɩɛ, 'n wa yiɛ zɛmö bhli. 7'N Zezwii yuë 'wʋ 'sɔ nimï 'yɩbhänɩ, ɔ lɛ naa: «‑Mɔ a tɛlɩ bhä sɛ 'nɩ?» Wa lɛ: «Nazalɛɛtɩ a Zezwii mö ‑a tɛlɩɛ sɛ.» 8Ɔ lɛ naa: «N kanyɩ a 'dɩ 'nyɛ nɩɩ, ‑amöä dɛ'ɛɛ. Zaa, na za a ‑kä yii, a nɩ tɩ ‑muë'la kɛ 'wʋ fä wa 'kä mö.» 9Zezwii gbää sa'aa, wɛlɩkïbhëa ɔ bhïla a‑a nɩɩ, ‑Atʋ Lagɔ, ‑na ‑nʋa ‑n nyɩaaa, n kpëtuë 'wʋ, wa gla'mö a ‑nɔ ‑bhlʋ a'bhë 'nɩɛ tʋʋ, ‑lɛ a wɛlɩ 'la mɩɩ 'wlʋnɩɛ da'a 'yli.

10‑Maa, Simɔɔ Piɛlɩ, ɔ ‑su a 'ɔ ‑gbälɛ zaa, 'n ɔ yee 'ba 'mö ‑sɛ, ‑wa yiɛ Zezwii köbhää a gla'mö a nɩkpɛ ‑bhlʋ, wa laa Makwisɩ ‑ɔ glɩnɩɛ Lagɔbʋbɔnyɔ 'kɔdɔɔ a libhonʋnyɔɔ, 'n Piɛlɩ yiɛ 'ɔ luukɛyukwlii ‑lɛ ‑dɩ. 11Ɔ 'zʋä sa'aa, 'n Zezwii yoo 'dɩ 'nyɛ nɩɩ: «Piɛlɩ, ‑na'a ‑gbälɛɛ, 'zwe ‑sɩkaa 'ba 'mö. ‑Maa 'klɩyɩyɛ a ‑dɔkɔ nɩ, na dɩba Lagɔ a'bhë mɔɔ 'yɩbhää n nɩ 'nɩmʋ. Zaa, n kä n 'kʋ 'nɩmä klɩpaa.»

Wa yɛ Zezwii ‑mä Aanɩ a 'yila 'klʋ kwä

12'Slʋjaa, wa ‑nyɛ 'wa kämanɩnyɔɔ 'sɔ, 'n Zwiiföwa a ‑kʋkʋwaa kökä, 'n wa yiɛ Zezwii 'wʋ 'libhï, 'n wa yoo gwa. 13Wa ‑nyɔɔ möä, nɩkpɛ ‑bhlʋ wa laa Aanɩ, ‑mä 'ɔ mä'a ‑mä wa kwɔɔ. Kayiifö ‑ɔ glɩnɩ a‑a ‑lɛ a 'ylʋba 'la 'mö a Lagɔbʋbɔnyɔ 'kɔdɔɔ, ɔ 'wʋtowli Aanɩ glɩnɩɛ. 14Kayiifö 'la, mɔɔ zʋ a‑a 'ylɩ ‑bhlʋ 'mö Zwiiföwaa 'dɩ 'mö nɩɩ: «Nɩkpɛ ‑bhlʋ ‑kpöö ‑kä 'bhlɩbhë a 'wlumö 'kuu, mɩɩ nɛnɩɛ.#18.14 Zaa 11.49-52.»

Piɛlɩ yɛ Zezwii cɛlɩ

(Matie 26.59-66,69-70; Maakö 14.55-64,66-68; Lwiikö 22.55-57)

15‑Wa ‑nyɛ Zezwii ‑wʋä mö dɔ'wʋʋ, Simɔɔ Piɛlɩ ‑nyɛ Zezwii 'a ‑gänɩwaa a gla'mö a ‑mɔmɔɔ ‑bhlʋ 'sɔ 'n wa yuëë 'bɩwʋ bhlinɩ. Zezwii a ‑nɔ ‑mɔ'la ɔbhlɩ, Lagɔbʋbɔnyɔ 'kɔdɔɔ ‑yoo zaa, wa ‑nyɛ Zezwii plɛɛ ‑mä 'ligbëa a 'mlɩɩ, 'n ɔ yiɛ plɛmö. 16‑Maa Piɛlɩ ɔbhlɩ, ‑lɛ 'ligbëa a ngloluë 'wʋ ‑lɛ ɔ tʋʋä. Zezwii a ‑nɔ ‑mɔ'la Lagɔbʋbɔnyɔ 'kɔdɔɔ ‑yiɛ, 'n ɔ yiɛ ‑mä 'wlʋ, 'n ɔ yiɛ nglɔɔ ‑ɔ ‑kʋä ngloluëa 'dɩ 'nyɛ, 'n Piɛlɩ yiɛ plɛmö. 17Nglɔɔ ‑ɔ ‑kʋä ngloluëa, 'n ɔ yiɛ Piɛlɩ nimï 'yɩbhä, ɔ lɛ naa: «Nɩkpɛɛ wa ‑suä dɛ'ɛɛ, ‑nmö nɩkpɛ nɩ ‑nn ‑bhö bhä'ɛ ɔ ‑gänɩnyɔ?» Nglɔɔ gbää sa'aa, Piɛlɩ lɛ: «‑Gbëaa! N'n ‑bhöa ɔ ‑gänɩnyɔɔ.» 18Wëtlokwëyidɔ'wʋ a‑a zaa, libhonʋwaa ‑nyɛ Lagɔbudu 'Kɔdʋʋ a ‑kʋkʋwaa 'sɔ, ‑kosu wa ‑dɩɛ 'yi, 'mö wa ‑wʋä 'wɔlɔ dɔ'wʋ. ‑Mä nɩkpa 'la jijo'wʋ, ‑mä Piɛlɩ plɛɛ, ɔ 'kä 'wɔlɔmö.

Aanɩ yɛ Zezwii 'kïbhï 'wʋ 'yɩbhänɩ

19Lɛ a 'tɛnyɩ 'la 'mö, 'n Lagɔbʋbɔnyɔ 'kɔdɔɔ Aanɩ yiɛ Zezwii, 'ɔ ‑gänɩwaa ‑nyɛ 'ɔ wɛlɩɩ ɔ 'cɩaa 'sɔ a 'kïbhï 'wʋ 'yɩbhänɩ. 20‑Maa Zezwii lɛ naa: «'Wi 'mö n'n‑ä a bhïla. 'Kwädlɩ a dɔ'wʋ, ‑mä Zwiiföwaa 'a Lagɔbïdii 'mö, 'n ‑mä Lagɔbudu 'Kɔdʋʋ 'mö, mää Zwiiföwaa 'wuë yɩbhää 'wluu, ‑mä n bhïlanɩɛ Lagɔ 'a wɛlɩɩ, wa 'wuë a 'yila 'klʋ. 21Zaa, sɛ yɩ ‑wʋ ɔ 'mö n‑n yɩbhaa bhä nimï? N ‑wʋ a‑a bhïla dɔ'wʋ a ‑wa ‑pʋnɩɩ a‑a 'yukwlii, mö ‑n nɩ 'yɩbhä nimï, ‑maa wa ‑yi 'saa‑wɛlɩɩ n yɛ bhïlaa.» 22Zezwii gbää sa'aa, Lagɔbudu 'Kɔdʋʋ a ‑kʋkʋwaa gla'mö a ‑nɔ ‑bhlʋ, ‑ɔ 'nigboo a‑a yɔwʋʋ, 'n ɔ yoo kɛ 'yukwli 'mö 'pä, ɔ lɛ naa: «Lagɔbʋbɔnyɔ 'kɔdɔɔ mö ‑n bhïlanɩ bhä sa'a 'yila 'klʋ ‑a?» 23Zezwii lɛ naa: «Wɛlɩ nɩ n bhïlaa dɛ'ɛ 'n yɩ ‑kä 'kïbhëzokwë 'mö ‑kää, ‑daa ‑ka 'nglɩ. ‑Maa sɛ n bhïlaa dɛ'ɛ 'n ‑sɩbhä ‑kä nɛnɩɩ, sɛ yɩ ‑wʋ ɔ 'mö, n‑n lɩbhaa bhä 'nɩ?» 24‑Mi'la 'plɩɛ 'wëë, Zezwii ‑gwa sa'a 'yize, ‑mä Lagɔbʋbɔnyɔ 'kɔdɔɔ Kayiifö a mä'a, Aanɩ lɛ wa nɩ kwɔ ‑mä zaa, 'n wa yoo ‑mä kwä.

Piɛlɩ yɛ'ɛ Zezwii cɛlɩ

(Matie 26.71-75; Maakö 14.69-72; Lwiikö 22.58-62)

25‑Maa ‑lɛ a 'tɛnyɩ 'la 'mö, Simɔɔ Piɛlɩ ɔbhlɩ, ɔ ‑wʋ ‑lɛ ‑kosu yɔwʋ 'yize, ɔ 'wɔlɔ. 'N wa yoo nimï 'yɩbhä, wa lɛ naa: «‑Nmö nɩkpɛ nɩ, nɩkpɛɛ ‑ɔnyɩ gbʋʋ gbɔɔ dɛ'ɛɛ, ‑nn ‑bhö bhä'ɛ ɔ ‑gänɩnyɔ?» 'N Piɛlɩ yiɛ cɛlɩ, ɔ lɛ naa: «‑Gbëaa! N'n ‑bhöa ɔ ‑gänɩnyɔɔ.» 26Ɔ gbää sa'aa, Lagɔbʋbɔnyɔ 'kɔdɔɔ 'a libhonʋwaa, wa gla'mö a ‑nɔ ‑bhlʋ ‑ɔ glɩnɩɛ nɩkpɛɛ Piɛlɩ ‑dɩ a‑a 'yukwli 'wlu a nyɔɔ, ɔ lɛ naa: «Nɩkpɛɛ ‑n gbää dɛ'ɛ ‑nn ‑yii, ‑mä swi zɛmö mä ‑a mɔɔ da'a köbhää, ‑n ‑wʋmö a ‑mä, n yɩɩmö ‑mä 'ylɩmö.» 27'N Piɛlɩ yi'ɛɛ cɛlɩ. Ɔ kɩ ngli cuu, 'n ‑kɔkɔbhɛlʋ yiɛ wɛlɩ 'pä.

Wa yɛ Zezwii ‑mä Pilaatɩ a 'yila 'klʋ kwä

(Matie 27.1-2,11-14; Maakö 15.1-5; Lwiikö 23.1-5)

28Wa ‑nyɛ Zezwii 'bhööä ‑mä Kayiifö a mä'aa, 'n wa yoo ‑mä ‑gɔmla 'kɔdɔɔ Pilaatɩ a ‑gɔmlagbʋ 'wʋ kwä. ‑Lɛ a dɔ'wʋ, 'zɔkpɔ 'pii 'mö ma‑a. ‑Maa wa ghlɛɛ ‑lɛɛ, sɛɛ Zwiiföwaa 'a gböö gbää nɩɩ, nɩkpɛ a ‑mɔ ‑ɔɔɔ Zwiiföyi glɩnɩɩ, wa nɩ tɩ ɔ 'ligbë 'mö plɛ, wa tɩa fɩ plɛ Lagɔ a 'yila 'klʋ a dɔ'wʋ, ‑sɩbhä a za, Zwiiföwaa 'nɩɛ ‑mä ligbë 'mö plɛ, nzɩɩ wa 'käa 'wlɩlɩ ‑wʋ, wa 'käa Galɛ'möwlʋfɛtɩ ‑sɛmö. 29‑Sɩbhä a za, 'n Pilaatɩ yiɛ ‑mä 'ligbë 'mö 'wlʋ, 'n ɔ yuëë ‑lɛ 'pɩwʋ nimï 'yɩbhää mö, ɔ lɛ naa: «Nɩkpɛɛ a ‑laaa dɛ'ɛɛ, kïbhë ‑ma ɔ nyima bhä 'nɩ?» 30Wa lɛ naa: «‑N pää dlɩ a dɔ'wʋ, 'n ɔ 'nɩ a ‑lizoku nʋʋ, ‑a ‑yimɔ a bhä ‑lɛ ‑a?» 31Pilaatɩ lɛ naa: «Zaa, a nɩ 'libho 'wʋ, sɛɛ 'a gböö gbää, a'bhï a 'kɔ ‑sɩbhä ‑zijle tu.» Wa lɛ: «'Kämanɩwaa lɛ naa, ‑a'bhï ‑aaa ‑kä ‑a 'kä nɩkpɛ 'lɩbhä ɔ 'kä 'ku.» 32‑Maa sɛ wa gbää da'a a dɔ'wʋ, Zezwii ‑kä a 'kwädlɩ sɛ ɔ 'kää 'ku a dɛ bhïlaa a sɛ ɔ gbä a‑a, ‑sɩbhä ma‑a 'kää da'a 'yli 'wlʋnɩ.#18.32 ‑Lɛ a 'tɛnyɩ 'la 'mö, Ghʋmɛɛwaa ‑wa 'kämanɩ a‑a Zwiiföwaa ‑gömöö, sa'a ‑sɩbhä wa 'lɩbhä a‑a 'wa jɛzlʋwaa. 33Wa gbää sa'aa, 'n Pilaatɩ yiɛ ‑mä 'ligbë 'mö plɛ, 'n ɔ yiɛ nɩkpa tie wa ‑nyɛ Zezwii 'kä yi. Wa ‑nyɔɔ yiɛ, 'n ɔ yoo nimï 'yɩbhä nɩɩ: «‑Nmö glɩnɩ bhä Zwiiföwaa 'a 'bhlɩlowlii?» 34Zezwii lɛ naa: «Kïbhë nɩ ‑n 'yɩbhänɩɩɛ dɛ'ɛ 'wʋʋ, ‑nanyɩgäsɛ a dlɩ zɛmö ‑mä a 'bhöönɩ bhä, ‑maa käbönɩkpaa nyɩamö bhä ‑sɩbhä 'dɩ?» 35Ɔ lɛ naa: «Zwiiföyi n glɩnɩ bhä ‑a? ‑Na 'bhɩa Zwiiföwaa a'bhï, Lagɔbʋbɔwaa a 'kifiea, mʋa ‑lamöä mä'ä n ‑kamö ‑zijle tu. Zaa, sɛ ‑n 'zʋ bhä a'bhë 'nɩ?» 36Zezwii lɛ naa: «'Na 'kämanɔɔ 'nɩ ‑bhö mä'ä dʋdʋ 'wʋ a ‑lu. Mä'ä dʋdʋ 'wʋ a ‑lu wʋ ‑kä a glɩnɩɩ, 'na nɩkpaa yɛ laa'a na 'wlumö gwɩ zaa, Zwiiföwaa 'naa ‑kaa a köbhä. ‑Maa 'na 'kämanɔɔ 'nɩɛ mä'ä dʋdʋ 'wʋ a ‑lu glɩnɩ.» 37Ɔ nʋä sa'aa, Pilaatɩ lɛ naa: «‑Aa zaa, 'bhlɩlowli ‑n glɩnɩɛ?» Ɔ lɛ naa: «‑Na'bhë ‑sɩbhä ‑n gbää da'a, 'bhlɩlowli n glɩnɩɛ. Wɛlɩɩ yɩ 'kää gbëaa 'möö, n 'kɩ kɛ ‑gömö 'zʋ, nza n yiɛ mä'ä dʋdʋ 'wʋ, zaa wɛlɩ a ‑mii kää gbëaa 'mö, ‑ɔ ‑wɩɩɛ, mɔɔ ‑pʋnɩɩɛ 'yukwli.» 38Ɔ gbää sa'aa, Pilaatɩ lɛ naa: «'Saa wa laa bhä wɛlɩ a ‑mii kää gbëaa 'mö 'nɩ?»

Yɩ 'plɩɛ sa'a 'wëë, 'n Pilaatɩ yi'ɛɛ 'wʋ 'sɔ ‑mä 'ligbë 'mö 'wlʋ 'n ɔ yiɛ Zwiiföwaa 'dɩ 'nyɛ, ɔ lɛ naa: «Nɩkpɛɛ a ‑laaa dɛ'ɛɛ, 'kïbhë a ‑maa 'kɔɔ gbʋ köbhaa, n 'naa ghlɩ. 39‑Maa mä'ä a 'bhele a dɔ'wʋ, a ‑kä 'kwädlɩ 'a Galɛ'möwlʋfɛtɩɩ ‑sɛɛ yii, nɩkpɛ ‑bhlʋ n sɛɛ 'kwädlɩ ‑jie 'mö. Zaa, nza n yɩbhanyɩɛ nimï nɩɩ, Zwiiföwa a 'bhlɩlowli, 'mö n nɩ 'tatinɩ bhä 'yi?» 40‑Maa Pilaatɩ gbää sa'a, Zwiiföwaa 'wuë, 'n wa yiɛ 'mö 'kpa wa lɛ: «Mö ‑n nɩ tɩ 'yi 'tatinɩ aaa, ‑maa Balabasɩ mö ‑n nɩ 'tatinɩ 'yi aaa!» ‑Maa Balabasɩ, wa gaaa da'aa, jɛzlʋnyɔ ɔ glɩnɩ a‑a ɔbhlɩ.

Currently Selected:

Zaa 18: bet

Highlight

Copy