Nʋnʋlii 3

Piɛlɩ ‑nyɛ Zaa 'sɔ wa yɛ kpälɛkpälɛnyɔ yɛmanɩ

1'Ylɩ ‑bhlʋ 'mö, 'tɛnyɩɩ wa bhibhee 'kwädlɩ 'möö, ɛ ghlɛɛ, ‑kidogïle ta 'mö, Piɛlɩ ‑nyɛ Zaa 'sɔ, 'n wa yiɛ ‑mä Lagɔbudu 'Kɔdʋʋ 'mö mö wa 'kä Lagɔ bhibhe. 2Wa ‑wʋ ‑mä mö dɔ'wʋ, 'ligbëa a ngloluëa wa laa ‑a nɛnɩ 'ylimö a nuë 'wʋ, 'n wa yiɛ ‑lɛ nɩkpɛ ‑bhlʋ ghlɩnɩ, ɔ glɩ ‑lɛ. Nɩkpɛ 'la, kpälɛkpälɛnyɔɔ. 'Ɔ guu, 'pɩwʋ ɔ ‑nyʋʋ yiɛ. Zila 'wuë 'mö 'n wa ‑nyɔɔ yiɛ ‑lɛ 'n wa 'gïloo ‑lɛ sɛ, nzɩɩ ‑wa plɛɛ ‑mä Lagɔbudu 'Kɔdʋʋ 'mö ɔ 'kʋä moni zɛla. 3Nɩkpɛ 'la, ɔ 'yɩɛ Piɛlɩ ‑nyɛ Zaa 'sɔ 'ylɩmöö, wa lɛ 'kä ‑mä plɛ, 'n ɔ yuëë zɛla. 4Piɛlɩ ‑nyɛ Zaa 'sɔ, 'n wa yoo 'wʋ yɩlɩ, Piɛlɩ lɛ naa: «Yɩlɩnyɩɛ ‑ka 'wʋ.» 5'N nɩkpɛɛ yuëë 'wʋ yɩlɩ, ɔ ‑tɔnɩ ‑lu wa 'kɔ 'nyɛ. 6‑Maa Piɛlɩ lɛ naa: «N'n‑ä moni ‑kä, n'n‑ä ‑sika ‑kä, ‑maa 'saa n kää 'mö n ‑kamöä 'nyɛ. Nazalɛɛtɩ a Zezwii a 'nglɩ 'mö, n nyɩamö 'dɩ, ‑sɔ 'wʋ ‑n 'kä nɛmö.» 7'N Piɛlɩ yoo sɔ köbhänɩ, 'n ɔ yoo 'wlu 'libhï. Cuu 'n 'ɔ kplɩɩ ‑nyɛ swɩɩ 'sɔ yiɛ nyɛmʋ 'mö yi. 8'N nɩkpɛɛ yiɛ 'mö ‑bulu, 'n ɔ yiɛ ghäyɩ 'nɩgbönɩ, 'n ɔ yiɛ 'mö zi. Ɔ ‑nyʋä 'sɔ, 'n wa yiɛ ‑mä Lagɔbudu 'Kɔdʋʋ 'mö plɛ. Ɔ zimö, ɔ ‑bulu 'mö, ɔ 'ghlimanɩ Lagɔ a 'nglɩ. 9Ɔ ‑wʋä ‑sɩbhä nɛmö dɔ'wʋ 'n ɔ 'ghlimanɩɛ Lagɔ a 'nglɩɩ, ‑mä Lagɔbudu 'Kɔdʋʋ 'mö a ‑nʋa 'wuë, wa 'yo 'ylɩmö. 10‑Maa wa yɩbhlɩnɩɛ sɛ nɩɩ, zɛlazɛlanyɔɔ ‑ɔ glɩ a‑a ‑lɛ ngloluë 'wʋ mɔɔ ‑buluä 'möö, wa 'wuë, zuzuu 'bhuëë ‑gömö tenyii, 'n wa kluä ɔ gbʋ 'mö.

Piɛlɩ yɛ Zezwii a dɛ bhïla

11Nɩkpɛ 'la, ɔ'ɔɔ Piɛlɩ ‑nyɛ Zaa 'sɔ 'bɩwʋ 'bhöö, ‑maa ɔ ‑gënuë 'yize. ‑Mä Lagɔbudu 'Kɔdʋʋ 'mö a ‑gligbëa wa 'pää Salomɔɔ 'a nglɩɩ, 'n wa yeaa zɛmö ghlɛ. Nɩkpa 'wuë wa 'yɩɛ nɩkpɛɛ 'ylɩmöö, zuzu yɩ ‑sʋää ‑gömö tenyii zaa, 'n wa yiɛ guë, 'n wa yiɛ yi. 12'N Piɛlɩ yuëë 'dɩ 'nyɛ, ɔ lɛ naa: «Yizlaɛlɩ a nɩkpanyɩ, nɩkpɛ nɩ, sɛ ɔ yɛmanɩ a za nza zuzu 'bhöanyɩ bhä ‑gömö ‑a? 'Saa bhä 'n a yɩlɩnyɩ bhä sa'a 'wʋ 'nɩ? Nɩkpɛ nɩ, ‑anyɩgäsɛ a 'mötɛɛnɔ 'mö ‑a 'nɔɔ yɩ yɛmanɩ. A nɩ ti ‑sɩbhä ‑tɔnɩ. Sɛ ‑a glɩnɩ nɩkpa a ‑muëë zlɔnɩ 'mö Lagɔ a 'yila 'klʋ a dɔ'wʋ a za, nza ɔ'ɔɔ yɛmanɩ. 13‑Maa Lagɔ ‑ɔ ‑nyɛ ‑aa dɩbawa 'kädɩɩ Ablaamö, Yizaakö 'n Zakɔɔbö mɛnɩnɩ a‑a, mɔɔ 'ghlimanɩɛ ɔ yowli Zezwii a 'nglɩ dɛ'ɛ a 'yila 'klʋ. ‑Maa abhʋa abhlɩ, 'mö a plɩɛ, 'mö a ‑sɛɛ nimï, ‑gɔmla Pilaatɩ a 'yila 'klʋ. Pilaatɩ gbää wa nɩ 'tatinɔɔ yii, a lɛ naa, wa nɩ to 'yi tatinɩ, ‑maa 'kulɩbhänyɔɔ ‑ɔ ‑wʋ a‑a ‑mä ‑jie 'möö, 'mö wa nɩ 'tatinɩ 'yi. 14A 'zʋä sa'aa, Zezwii ‑ɔ ‑wʋä 'wlɩlɩ, ‑ɔ zlɔnɩɛ 'mö Lagɔ a 'yila 'klʋ a dɔ'wʋʋ, 'mö a ‑sɛɛ da'a nimï. 15Zezwii ‑ɔ kää 'nglɩ 'n nɩkpa 'kää 'pɩwʋ mää 'naa 'kää 'yli bhɩɛ ghlɩɩ, 'mö a gbä a‑a wa nɩ 'lɩbhä, 'n wa yoo 'lɩbhä, 'n ɔ yi a‑a 'ku. ‑Maa Lagɔ kɔ gäla ɔ kɔ glu ‑sɛ. ‑Abhʋa 'ɔ tietiewaa, ‑a ‑yi ‑lɛ a wɛlɩ 'la, nza ‑a bhïliɛ. 16Zezwii, mö ‑a 'tɛɛnɩɛ dlɩ a za, nza a 'lilɛ ‑ɔɔ a‑a ‑yɛ, ‑a 'nyɔɔ 'dɩ nɩɩ: Zezwii a 'nglɩ 'mö, ‑sɔ 'wʋ. ‑A 'nyɔɔ ‑sɩbhä 'dɩɩ, Zezwii 'a 'mötɛɛnɔɔ 'mö, 'n 'ɔ ‑lii yiɛ nyɛmʋ 'mö yi, sɛ ɔ 'tɛɛnɔɔ'ɛɛ dlɩ a za, nza ɔ ‑sɔɔ 'wʋ, 'n ɔ yiɛ yɛmanɩ 'tɩɩ. 'Mö a yɩlɩɛ dɛ'ɛ 'wʋ. 17‑A'bhɩanyɩ, miɛ abhlɩ ‑tiamö. ‑Maa a ‑nyɛ 'a 'kifiea 'sɔ, ‑lii a nʋ a‑a da'a Zezwii 'wlu a dɔ'wʋ, a'aa la 'saa a nʋä ‑yi. 18Lagɔ 'a 'möbhïlanɩwaa, wɛlɩɩ wa bhïlanɩ a‑a ‑pa 'wʋ nɩɩ, Puënyɔɔ Lagɔ 'kä a‑a ‑lɛ ‑sɛ, ɔ yi a 'zwɩ zii, mɩɩ 'wlʋnɩɛ da'a Zezwii a dɛ 'yli. 19Zaa, ‑sɩkaa a dɔ'wʋ, a nɩ ligba a 'kä 'a ‑lizokuu kɛ'mö ‑sɛ, a 'kä Lagɔ yɩbhlɩnɩ, nzɩɩ ɔ 'kä 'a 'nyinylolii a gbʋʋ 'yi 'tatinɩ. 20‑Lɛ a dɔ'wʋ, 'tɛnyɩ a ‑tɛnyɩ a ‑kʋnɩɛ, Lagɔ ye 'yli 'wälanɩ. 'Tɛnyɩ 'la 'mö, Puënyɔɔ ɔ ‑sɛɛ ‑lɛ, a ‑kʋnɩɛ, Lagɔ yo tie ɔ yi yi. Zezwii mɔɔ glɩnɩɛ ‑lɛ a Puënyɔ 'la. 21‑Maa ɔ yi ‑bhlɛ ‑mä Lagɔ yɔwʋ ‑wʋ ‑këë, 'n ‑lɛ a 'tɛnyɩ 'la 'kää ghlɛ, 'n ɔ 'kää yi ɔ 'kä 'pɩwʋ a ‑lii 'wuë nɛmanɩ. Lagɔ 'a 'möbhïlanɩwaa, ‑sɩbhä wa 'nyanyɩ a‑a ‑pa 'wʋ 'dɩ. 22‑Aa dɩba 'kɔdɔ Moyizɩ a'bhë, sɛ'ɛ ɔ gbä a‑a nɩɩ: A ‑lowli Lagɔ yi ‑mä a jijo'wʋ ɔ 'möbhïlanɩnyɔ ‑ɔ 'kää na saa ‑wʋ ‑sɛ. Nɩkpɛ 'la, 'ɔ bhïlawɛlɩɩ 'wuë a nɩ ‑pʋni sasɛ 'yukwli a 'kɩ 'klʋkpamö zʋ. 23‑Maa ‑ɔ 'ni 'yukwli ‑pʋnɩɩ, Lagɔ yo ‑mä 'ɔ ngëyii ɔ ‑sɛɛ ‑lɛ 'mö a ‑nʋa gla'mö ‑sɛ.#3.22-23 Detlenɔɔmö 18.15,18-19.

24Lagɔ 'a 'möbhïlanɩwaa, 'saa 'wuë wa bhïla a‑a, tɛɛnɩ ‑mä Samiɛlɩ 'wʋ ‑këë, wa 'wuë sɛ wa gbä a‑a; ‑sɩbhä yɩ 'wlʋnɩɛ yɩ 'wuë zɩ'ɛ 'yli. 25'Tɛnyɩ ‑bhlʋ 'mö, Lagɔ mɔɔ 'nyɛ a‑a ‑aa dɩba Ablaamö 'dɩ nɩɩ: Ablaamö, ‑na 'yuë a 'yuë a za, n yi 'bhlɩbhëa 'wuë 'nyu 'pä.#3.25 Zenɛɛzɩ 22.18; 26.4. Lagɔ gbä a‑a ‑sɩbhää, abhʋa ɔ gaa a‑a, a ‑nyɛ a dɩbawa 'kädɩ 'sɔ. Sa'a ‑sɩbhä ɔ ‑nyɛ abhʋa mɛnɩnɩ a‑a. Nza n gbää nɩɩ, Lagɔ 'a 'möbhïlanɩwaa, wɛlɩɩ 'wuë wa bhïla a‑a, a ‑liɛ, nza yɩ 'wlʋnɩɛ dɛ'ɛ ‑mä 'a 'tɛnyɩ 'mö 'yli. 26‑Sɩbhä a za Lagɔ tie a‑a ɔ yowli, a za ɔ tioo, ɔ 'kanyɩ 'nyu 'pä, nzɩɩ a 'kä 'a ‑lizokuu kɛ 'mö ‑sɛ 'wë, ɔ 'käa'a bhäla 'bhlɩbhëa 'wuë puëmö.»

Currently Selected:

Nʋnʋlii 3: bet

Highlight

Copy