Nʋnʋlii 2

Patekɔɔtɩ a zlɩ 'Wugɔmʋʋ 'Wlɩlɩ yiɛ mä'ä dʋdʋ 'wʋ

1'Ylɩ ‑bhlʋ 'mö, Zwiiföwaa a 'fɛtɩ wa laa Patɩkɔɔtɩ ghlɛɛ, Zezwii a ‑nʋa 'wuë wa yɩbhä dɛ ‑bhlʋ 'wlu. 2Wa lɛ zʋa a sɛ'ɛ cuu, ‑gëbë 'bhöönɩ ‑mä zlɩ 'mö. Ɛ ‑bhɩɛ 'vuu 'kɔdʋ lɛ 'kä yi. N ‑gëbë 'la yiɛ ‑buduu wa ‑wʋ a‑a 'mö 'wʋ yie. 3'N wa yiɛ ‑li 'ylɩmö. ‑Li 'la, yɩ 'ka ‑bhɩɛ ‑kosubïli, 'n yɩ yuëë bhʋlʋbhlʋ 'wlu sɛ glɩ. 4'N 'Wugɔmʋʋ 'Wlɩlɩ yuëë ‑gömö yi tenyii, 'n wa yiɛ käbögbɩ gbä. Sɛɛ 'Wugɔmʋʋ bhïlanuëë 'möö, 'n wa sɛnɩɛ ‑sɩbhä 'mö. 5‑Maa ‑lɛ a 'tɛnyɩ 'la 'mö, Zwiiföwa ‑mumuë, wa ‑wʋ a ‑mä Zeluzalɛɛmö. Nɩkpa a ‑muëë zʋä Lagɔ 'klʋkpamöö, 'mö wa glɩnɩɛ. ‑Mä dʋdʋ a këtiea 'wuë 'wʋ, ‑mä wa 'bhöönɩ a‑a. 6Nɩkpa 'la a gla'mö a ‑nʋa a ‑bɛ, wa 'kää ‑gëbë 'la 'nʋʋ, ‑buduu Zezwii a ‑nʋa ‑wʋä 'möö, wa ‑wʋ guë dɔ'wʋ 'n wa yiɛ ‑lɛ wʋ nuë 'wʋ 'wlu 'titanɩɛ yi. Wa lɛ zʋ a sɛ'ɛ, 'wa ‑dagwälɩgbɩɩ, 'mö Zezwii a ‑nʋa bhïlanɩɛ 'mö, 'n wa yiɛ 'nʋ. 7'N yɩ yuëë zuzu ‑gömö ‑sɛ tenyii, 'n wa nʋä: «'Ɔɔ! Nɩkpa nɩ ‑wa bhïlaa dɛ'ɛɛ, wa'a ‑bhö bhä'ɛ wa 'wuë Galilee a nɩkpa? 8Zaa, sɛ yɩ ‑wʋ yɩa'a 'mö 'n wa bhïla bhä ‑a'a ‑dagwälɩgbɩɩ, a‑a ‑nguë bhä bhʋlʋbhlʋ 'mö 'nɩ? 9‑Aa gla'mö, nɩkpa ‑mumuë ‑wʋ ‑mä, ‑wa 'bhöönɩɛ ‑mä Paatɩ‑bhölɩɩ 'möö, ‑mä Mɛɛdɩ, 'n Elaamö, ‑mä Mezopotamii, ‑mä Zwidee 'n Kapadɔɔsɩ, ‑mä Pɔɔ, 'n ‑mä Azii, 10‑Mä Flizii 'n Pafilii, ‑mä Ezipötɩ 'n Libii a 'bhlɩkïbhë ‑maa tlʋnɩɛ ‑mä Silɛɛnɩ‑bhölɩɩ yɔwʋʋ. ‑Mumuë 'bhöönɩ'ɛ Ghlɔɔmö. 11Klɛɛtɩ a nɩkpa plɛ 'n Alabii a ‑nʋa plɛ. Sa'a ‑sɩbhä ‑a 'bhöönɩɛ saa 'wuë bhʋlʋbhlʋ. ‑Aa gla'mö a ‑mumuë, Zwiiföwaa gwëluëë, 'n ‑wa bʋbɔ'ɛɛ Zwiiföwaa a saa Lagɔ, wa ‑wʋmö'ɛ ‑mä. Bhʋlʋbhlʋ ‑a gbää gbɩ, ‑maa nɩkpa nɩ wa ‑kä bhïlaa, ‑a'a ‑dagwälɩgbɩ 'la 'wuë 'mö wa bhïlanɩɛ bhʋlʋbhlʋ 'mö. Lagɔ 'a ‑li a ‑li 'kädɩɩ ɔ nʋä, yɩ dɛ wa bhïlaa, ‑a 'wuë, a‑a ‑nguëë 'mö.» 12Sa'a yɩ ‑sʋää zuzu ‑gömö tenyii, 'n ngli yuëë mla, 'n wa 'yɩbhäyɩbhänɩɛ nimï nɩɩ: «Sɛ yɩ sɛ bhä sa'a zɛmö 'nɩ?» 13‑Maa ‑mumuë ‑kä Zezwii a ‑nʋa 'wʋ yɩlɩɩ, nɛpɔ wa nɛpʋää, wa lɛ naa: «Nʋʋ lɩbhʋä.»

Piɛlɩ yɛ nɩkpabhë a 'yila 'klʋ Zezwii a dɛ bhïla

14Zezwii 'a tietiewaa kʋgbä ‑bhlʋ ‑kpɔ, wa ‑nyɛ Piɛlɩ 'sɔ, 'n wa yiɛ 'wʋ ‑sɔ, 'n Piɛlɩ yiɛ wɛlɩ ghäyɩ 'pä, ɔ lɛ naa: «Abhʋa Zwiiföwaa 'n a 'wuë abhʋa glɩɛ mä'ä Zeluzalɛɛmö, a ‑pʋnɩ sasɛ sɛ 'n 'kanyɩɛ dɛ'ɛ 'dɩ 'nyɛ 'yukwli. 15Nɩkpa nɩ, nʋʋ 'nuëë 'lɩbhä, sɛ a ‑tɔnuëë da'aa, ɛ'ɛ ‑bhö ‑sɩbhä ma. A yɩɛ, 'zɔkpɔgïle ngbï ‑mʋäna mö ‑a ‑wʋä dɛ'ɛ. 16‑Maa sɛɛ Lagɔ a 'möbhïlanɩnyɔɔ Zʋɛlɩ gbä a‑a, ‑sɩbhä ma‑a 'wlʋnɩɛ da'a 'yli. Sɛ'ɛ ɔ gbä a‑a nɩɩ:

17Lagɔ lɛ naa:

'Pɩwʋ ‑kä 'yli bhɩɛɛ yi a zila 'mö,

‑amö Lagɔ,

n yi nɩkpa 'wuë 'na 'Wugɔmʋʋ ‑gömö 'zʋ,

'a nyɩbhɛlɩyuëa ‑nyɛ 'a nglʋyuëa 'sɔ,

n yuë 'mö bhïlanɩ.

'A nyɛgbayuëa ‑nyɛ 'a 'dumöwʋyuëa 'sɔ,

'wa yilaa yi do.

'A nyɛbhlʋgö, n yuë 'yɛla 'mö 'ylimö ghlɛ.

18 'Na libhonʋwaa ‑nyɛ 'na libhonʋngwlɩɩ 'sɔ,

n yuë ‑tiamö 'na 'Wugɔmʋʋ ‑gömö 'zʋ, ɔ 'kʋä 'mö bhïlanɩ,

19 ‑Mä zlɩ 'mö, n yi ‑mä nganɔ'wʋbhöli 'yli 'wälanɩ.

Mä'ä dʋdʋ 'wʋ, n yi ‑mä zɩzɛli 'kädɩ ‑lɛ, dlu, ‑kosu ‑nyɛ gbeylokwë 'sɔ,

20 'ylʋväla yi ylumanɩ,

cʋʋ yi zɛlɩ gbɛɛ dlu a sɛ.

‑Li 'la 'wuë, yɩ yi 'yli 'wlʋnɩ 'wë,

'n ‑Alowli 'a yiyizlɩ 'kädɛɛ 'kää ghlɛ.

21 ‑Lɛ a zila 'la 'mö,

nɩkpɛ ‑mɔɔ ‑kä ‑Alowli 'mö winɩɩ, ɔ yi 'pʋ. # 2.21 Zowɛɛlɩ 3.1-5.

22 Yizlaɛlɩ a nɩkpanyɩ, wɛlɩɩ n 'kää dɛ'ɛ bhïlaa, a ‑pʋni 'yukwli, Nazalɛɛtɩ a Zezwii, Lagɔ mɔ tioo, ‑sɩbhä a 'yiɛ 'ylɩmö. Miɛ nɩɩ, Lagɔ ghälanɔɔ mä'ä a jijo'wʋ zɩzɛli 'kädɩ 'mö, 'n a yiɛ 'ɔ 'ghïlinɔɔ 'ylɩmö. Ɔ nʋnɔɔ ‑li a ‑bɛ mö. ‑Li 'la, a'bhï a 'yi 'ylɩmö. 23‑Sɩbhä yɩ ‑wʋ 'mö 'n a yoo nɩkpaa ‑waaa Lagɔ ‑yi kä'mö plɩnɩ, 'n wa yoo su 'klʋ kʋnɩ 'n ɔ yiɛ 'ku. ‑Maa yɩ 'wuë a dɔ'wʋ, sɛɛ Lagɔ gbä a‑a yɩ nɩ 'plɩ 'wʋʋ, ‑sɩbhä ma‑a 'wlʋnɩɛ da'a 'yli. 24‑Maa Lagɔ kɔ gäla, ɔ kɔ glu ‑sɛ. Ɛ'ɛ ‑bhö nyɩasɛ, ‑maa Zezwii 'nɩɛ ‑kä ɔ 'kä ‑mä 'kuduwaa gla'mö tʋʋnɩ. Zaa, sɛ wa sɛ'ɛ nɩkpɛ ‑jie 'möö, ‑sɩbhä Lagɔ ‑sɔɔ ‑mä 'kuduwaa gla'mö. 25Sɛ'ɛ Daviidɩ gbä a‑a Zezwii a dɛ nɩɩ:

‑Alowli Lagɔ, n yiloo 'kwädlɩ 'wʋ 'yize.

Mɔɔ ‑suuä nzɩɩ ‑lizoku ‑tɩɩa ghlɩ.

26 Zaa, na dlɩ zɛmö 'wuë 'mäna a 'yize, nza n bhlɩɛ.

N yi 'ku dɔ'wʋ ‑wʋ ‑kë, ‑mä na dlɩ zɛmö yi ‑pälɛpälɛ ‑wʋ 'yize.

27 N ‑yi sɛ nɩɩ, ‑nmö Lagɔ, ‑nn‑ä ‑kaa 'yi 'tatinɩ

n 'kä ‑mä 'kuduwaa gla'mö tʋʋnɩ.

‑Na 'yize a ‑nɔ n glɩnɩɛ zaa,

‑nn‑ä ‑kaa 'yi 'tatinɩ n 'kä zɛ.

28 ‑Maa sɛ n 'kää 'pɩwʋ mää 'naa 'kää 'yli bhɩɛ ghlɩɩ,

‑sɩbhä ‑n sʋlʋnɩɩɛ zaa, 'mäna ‑yii 'lɩbhä tenyii,

sɛ n ‑nyɛmö 'sɔ ‑a 'kää 'wʋ glɩnɩ a za. # 2.25-28 Soomö 16.8-11.

29‑A'bhɩanyɩ, ‑aa dɩbawaa a dɩba Daviidɩ a wɛlɩɩ, 'mö n 'kanyɩɛ dɛ'ɛ dlɩ ‑gömö ‑sɛsɛnɩ. Daviidɩ, ɔ 'ku, 'n wa yoo ziza. 'Ɔ lesikpëa, a ‑wʋ mä'ä ‑a 'bhele. 30‑Maa Lagɔ a 'möbhïlanɩnyɔɔ ɔ glɩnɩ a‑a zaa, ‑lii ‑yɩ 'kä a‑a zɩkö 'yli 'wlʋnɩɩ, yɩ 'dɩ ɔ 'nyɛ a‑a nɩkpa. 'N Lagɔ yo a‑a wɛlɩ 'yukwli 'mö zʋ nɩɩ:

‑Na 'yu a 'yu ‑bhlʋ, sɛ ‑n glɩnɩɛ 'bhlɩlowli 'kɔdɔɔ,

ɔ yi ‑sɩbhä 'bhlɩlowli 'kɔdɔ zʋ. # 2.30 Soomö 132.11.

31Zaa, ‑lii Lagɔ 'kä a‑a zɩkö 'yli 'wälanɩ, Daviidɩ 'yi a 'ylɩmö. Miɛ nɩɩ, Daviidɩ ‑kä nɩɩ:

Lagɔ 'naa 'kɔ 'yi 'tatinɩ ɔ 'kä ‑mä 'kuduwaa gla'mö tʋʋnɩ,

ɔ 'yize a ‑nɔ ɔ glɩnɩɛ zaa, ɔ 'naa 'kɔ 'yi 'tatinɩ ɔ 'kä zɛ. # 2.31 Soomö 16.10.

Daviidɩ ‑kä ‑sɩbhä gbää, Puënyɔɔ Lagɔ 'kä a‑a ‑lɛ ‑sɛ 'mö ɔ gaaa, sɛɛ Lagɔ 'kɔ a‑a glu ‑sɛ a dɛ ɔ bhïlaa da'a. 32Zezwii n gaaa dɛ'ɛɛ, ɔ 'kuä 'wëë, Lagɔ ‑sɔɔ glu. ‑Abhʋa 'ɔ tietiewaa, ‑a ‑yi ‑lɛ a wɛlɩ 'la, nza ‑a bhïliɛ. 33Ɔ möä ‑mä Lagɔ a luukɛ 'wʋ sɛ glɩɛ, 'Wugɔmʋʋ 'Wlɩlɩ ɔ dɩba Lagɔ gbä a‑a ɔ yi nɩkpa ‑gömö 'zʋʋ, 'mö ɔ zʋʋnyɩɛ dɛ'ɛ ‑gömö, mɔɔ kää 'nglɩ, a‑a zʋä sɛ'ɛ. 34-35Daviidɩ mɔɔ gbä a 'yɛɛ nɩɩ:

‑Atʋ Lagɔ mɔɔ 'nyɛɛ na ‑lowli 'dɩ nɩɩ:

Glɩ dɛ'ɛ na luukɛ 'wʋ sɛ,

n 'kä ‑na'a ‑gblɩwaa ‑mä ‑na kplɩzɛmö 'zʋ. # 2.34-35 Soomö 110.1.

‑Sɩbhä Daviidɩ gbä a‑a. ‑Maa ɔ'bhë, ‑mä Lagɔ yɔwʋ ‑mä ɔ'ɔɔ mö. Zaa, ɔ ‑kä sa'a gbää, ɔnyɩ a dɛ ɔ'ɔɔ bhïla, ‑maa Zezwii 'mö ɔ gaaa.

36Zaa, abhʋa Yizlaɛlɩ a ‑nʋa 'wuë, a nɩ yɩbhlɩnɩ sɛ nɩɩ: Zezwii a kʋnɩ a‑a su 'klʋʋ, 'mö Lagɔ 'zʋaa ‑aa 'bhlɩlowli ‑nyɛ ‑aa puënyɔ 'sɔ 'wʋ.»

37Piɛlɩ 'nyʋä sa'a 'dɩɩ, 'n 'ɔ wɛlɩɩ yuë tenyii 'mö plɛ, 'n wa yiɛ Piɛlɩ ‑nyɛ Zezwii 'a tietiewaa ‑muë'la 'sɔ nimï 'yɩbhä nɩɩ: «‑A'bhɩanyɩ, ‑a kɩ 'nʋ, ‑maa sɛ ‑a nɩ 'zʋ bhäa'a ‑sɩkaa 'nɩ?» 38Piɛlɩ lɛ naa: «A nɩ ligba a 'kä 'a ‑lizokuu kɛ'mö ‑sɛ wa 'kanyɩ bhʋlʋbhlʋ Zezwii Kliisɩ a 'nglɩ 'mö 'wlu wɔlʋ, a 'kä ɔ ‑nʋä 'zʋ. Nzɩɩ Lagɔ 'käa 'a 'nyinylolii a gbʋʋ 'yi 'tatinɩ, ɔ 'kanyɩ 'Wugɔmʋʋ 'Wlɩlɩ ‑gömö 'zʋ. 39‑Maa wɛlɩɩ Lagɔ gbä a‑a ‑pa 'wʋ nɩɩ ɔ yi nɩkpa 'ɔ 'Wugɔmʋʋ ‑gömö 'zʋʋ, a ‑liɛ, a ‑nyɛ 'a 'yuë a 'yuë 'sɔ, 'n ‑mä dʋdʋ a këtiea 'wuë 'wʋ a nɩkpa 'wuë ɔ ‑sɛɛ ‑lɛ ɔ 'kʋä wäzɩ wa 'kä ɔ ‑nʋä 'zʋʋ, a 'wuë a ‑li yɩ glɩnɩɛ.» 40Sa'a ‑sɩbhä Piɛlɩ pluëë dlɩ, 'n ɔ yuë'ɛɛ ‑bɛ 'wʋ 'dɩ 'mö 'zʋ, ɔ lɛ naa: «Nɩkpaa a ‑nyɛ glɩnɩɛ 'wʋʋ, 'wa 'nyinylolii a za, wa kä gbʋ 'kɔdʋ ‑gömö Lagɔ a 'yila 'klʋ. Zaa, a nɩ 'bhuëë 'bɩwʋ, Lagɔ tanyɩa wa saa 'yli bhiamö, a 'käa 'pʋ.» 41Piɛlɩ gbää ‑sɩbhää, ‑wa ‑pʋnɔɔ 'yukwli a gla'mö a ‑nʋä a ‑bɛ, 'n wa yiɛ 'ɔ wɛlɩɩ 'wʋ nglu. Nɩkpa a 'dwi ngbi'sɔ nɩkpa a gwlɩ kʋgbä (3.000) a sɛ, mʋa ngwliɛ 'wʋ, 'n wa yuëë 'wlu wɔlʋ, 'n wa yiɛ Zezwii a ‑nʋa 'wʋ zumanɩ.

Zezwii a ‑nʋa a tɛkäzɩkpaa

42Wa 'wuë, wa ‑kä ‑lɛ glɩɩ, Lagɔwɛlɩɩ Zezwii 'a tietiewaa nyʋää, wa ‑pʋni sasɛ 'yukwli. Wa ‑wawanɩ 'kwädlɩ ‑daayuë a sɛ 'yize. Sɛɛ Zezwii gbä a‑a, 'n wa ‑dɩdɩnɩɛ ‑sɩbhä 'fɔlɔ 'mö, 'n wa linuä 'gämö, 'n wa bhibhee Lagɔ 'yize. 43Zezwii 'a tietiewaa, sɛ wa bhɛɛ zɩzɛli a ‑bɛ Lagɔ 'a 'mötɛɛnɔɔ 'möö, ‑sɩbhä yɩ sɛɛ nɩkpa 'wuë zuzu ‑gömö 'n wa kää tenyii Lagɔ a nganɔ ku 'mö. 44‑Maa ‑wa kää Zezwii dlɩ 'wʋʋ, wa 'wuë, 'wa ‑lii 'wuë, 'wʋ wa ‑gbɩɩɛ. 45Wa gla'mö a nɩkpɛ ‑bhlʋ, 'n ɔ 'nɩ ‑lu ‑kää, ‑wa kä a‑a 'lagbïle 'n ‑wa kä a‑a ‑li ‑mimii 'nɛnɩɩ, 'wa ‑lii, 'pɛlʋ wa pɩɛ, wa ‑nyɔɔ 'sɔ 'n wa dlinɩɛ yɩ moni 'ylimö. 46Zilaa 'wuë 'mö, 'wlu wa yɩbhää 'kwädlɩ ‑mä Lagɔbudu 'Kɔdʋʋ 'mö, 'n ‑mä wa 'ligbïï 'mö, sɛɛ Zezwii gbä a‑a, 'n wa ‑dɩdɩnɩɛ ‑sɩbhä 'fɔlɔ 'mö, wa dila zɛmö ‑wʋ ‑pälɛpälɛ, 'n wa linɩɛ 'mänasɛ 'wʋ. 47Yɩ 'wuë 'mö, Lagɔ a 'nglɩ wa 'ghlimanɩɛ da'a. Nɩkpa 'wuë, wa ‑kä 'wa 'zʋzʋsaa 'ylɩmöö, wa 'mäna wa kää 'mlɩ. Sɛɛ zila zɩɛ 'yize, Lagɔ, nɩkpa ɔ puëë, ‑sɩbhä ɔ ‑lɛmuëë, 'n wa yinɩɛ Zezwii a ‑nʋa ‑muë'la ‑gömö.

Currently Selected:

Nʋnʋlii 2: bet

Highlight

Copy