Nʋnʋlii 1

Zezwii lɛ ɔ yi ɔ ‑nʋa 'Wugɔmʋʋ 'Wlɩlɩ 'wʋ tie

1‑Ayo Teofilɩ. ‑Amö Lwiikö, 'na tɛkäbɔgʋʋ n paamöä 'wʋʋ, ‑mä wʋ 'mö, ‑lii 'wuë Zezwii nʋä, 'n ɔ 'cɩaa tɛɛtɛɛdɔ'wʋʋ, yɩ dɛ n bhïla a‑a. 2Tɛɛnɩ ‑lɛ ‑këë zlɩ Lagɔ wäzɩnɔɔ ‑mä ɔ yɔwʋ 'möö, 'n n yee 'wʋ ghlɛ. Ɔ lɛ 'kää möä yii, 'Wugɔmʋʋ 'Wlɩlɩ 'a 'mötɛɛnɔɔ 'mö, 'ɔ tietiewaa 'mö ɔ 'zʋä 'dɩ 'mö. 3Zezwii 'kuä ɔ 'wlʋä glu 'wëë, ɔ tulanɩɛ ɔnyɩ 'ki a ‑bɛ 'mö 'ɔ tietiewaa 'yli 'mö. Wa 'kä sɛ ‑yi nɩɩ, ɔ ‑bhölɩ. 'Ylɩ a gwlɩ 'sɔ 'mö, ɔ tulanuë ɔnyɩ 'ylimö, 'n ɔ yuëë 'pɩwʋ mää Lagɔ 'kämanɩɛ a wɛlɩɩ 'nyɛ. 4'Ylɩ ‑bhlʋ 'mö, Zezwii ‑nyɛ 'ɔ tietiewaa 'sɔ wa ‑wʋ 'wʋ linɩ dɔ'wʋ, 'n ɔ yuëë 'dɩ 'nyɛ, ɔ lɛ naa: «Zeluzalɛɛmö a ‑glɔɔ, a nɩ tu gwë 'dionɩ. ‑Maa a nɩ ‑kʋnɩ 'saa na Dɩba gbä a‑a ɔ 'kanyɩ 'nyɛ, ‑wʋnyɩɩ 'dɩ n 'nyanyɩ a‑a. 5Zaa Batisɩ, 'nyu 'mö ɔ wɔlʋnɩ a‑a nɩkpa 'wlu. ‑Maa abhʋa abhlɩ, 'ylɩya ‑kä 'plɩɩ, 'Wugɔmʋʋ 'Wlɩlɩ, 'mö Lagɔ 'kanyɩɛ 'wlu wɔlʋnɩ.» 6'Ɔ tietiewaa ‑wʋ ‑lɛ ɔ yɔwʋ 'n wa yoo nimï 'yɩbhä, wa lɛ naa: «‑Atʋ, ‑sɩkaa a 'tɛnyɩɩ ‑a ‑wʋä dɛ'ɛ 'möö, mö ‑n lɛ 'kä bhä Yizlaɛlɩ 'a ngëyii 'mö a ‑nʋa 'wa ‑gblɩwaa ngli ‑sɛ, nzɩɩ Lagɔ a 'yize 'käa'a wa 'kämanɩnyɔ glɩnɩ ‑a?» 7Ɔ lɛ naa: «Zlɩ ‑lɛ a 'tɛnyɩ 'la 'kää 'yli 'wlʋnɩɩ, a 'kɛ ‑yi a dɔ'wʋ, yɩ'ɩɛ dɛsɛ ‑kä. Ɛ'ɛ ‑bhö nyɩasɛ, ‑maa na dɩba Lagɔ, ɔ'bhë mɔɔ ‑deee zaa, nɩkpɛ 'naa 'kɛ ‑yi. 8‑Maa 'Wugɔmʋʋ 'Wlɩlɩ mɔɔ 'kanyɩɛ ‑gömö yi, a 'kä 'mötɛɛnɔɔ ghlɩ. ‑Sɩbhä a dɔ'wʋ a 'kää nɩkpabhë a 'yila 'klʋ na dɛ bhïla, tɛɛnɩ ‑mä Zeluzalɛɛmö ‑këë ‑mä Zwidee‑bhölɩɩ 'wuë 'mö, ‑mä Samalii‑bhölɩɩ 'wuë 'mö, 'n ‑mä dʋdʋ a 'gbë 'wʋ a këtiea 'wuë 'wʋ.» 9Zezwii 'zʋä ‑sɩbhä 'ɔ ‑gänɩwaa 'dɩ 'mö 'wëë, 'n ɔ yiɛ ‑lɛ wa 'yila 'klʋ 'wlu 'libho. Wa yiloo 'wʋ, 'n ɔ yiɛ ghäyɩ mö. 'N ‑kpu yuënyɩɛ 'yli zizanɩ. 10Zezwii möä 'wëë, wa ‑glɛ ‑bhlɛ ‑mä zlɩ 'mö 'yila, wa lɛ zʋa sɛ'ɛ cuu, ‑lɛ wa yɔwʋ nɩkpa 'sɔ 'nɩgbö ‑lɛ. Wa ‑pla ‑banɩ 'pɩpɩ 'mö. 11'N nɩkpa 'la 'sɔ ‑kpɔ yuëë nimï 'yɩbhä, wa lɛ naa: «Galilee a nɩkpanyɩ, sɛ yɩ ‑wʋ ɔ 'mö 'n a 'nɩgbö bhä ‑bhlɛ dɛ'ɛ 'n a yɩlɩ bhä ‑mä zlɩ 'mä 'nɩ? Zezwii ‑ɔ 'bhöanyɩɛ da'a jijo'wʋ, ‑ɔ möä ‑mä Lagɔ yɔwʋʋ, sa'a sɛ a yilooo 'wʋ, 'n ɔ yiɛ mö, a yo 'ylɩ ‑bhlʋ 'mö ‑sɩbhä 'wʋ yɩlɩ 'n ɔ 'kää 'wʋ 'sɔ mä'ä dʋdʋ 'wʋ yinɩ.»

Zezwii 'a tietiewaa yɛ ‑mä Zeluzalɛɛmö 'bɩwʋ mö

12'N Zezwii 'a tietiewaa yiɛ ‑mä Olivieswii a ‑gägaa 'wlu 'bhöö, 'n wa yiɛ ‑mä Zeluzalɛɛmö 'bɩwʋ mö. ‑Gäga 'la, ‑lɛ a ‑wʋä Zeluzalɛɛmö a ‑glɔ yɔwʋ 'kilo ‑bhlʋ 'wʋ a sɛ. 13Wa ghlɛɛ glɔɔ, 'tasɩ 'wlʋ a ‑budukïbhë ‑bhlʋ 'mö, mä wa glɩ a‑a, 'n wa yiɛ ‑mä plɛ. Piɛlɩ mɔ, Zaa mɔ, Zaakö mɔ, Adlee mɔ, Filiipö mɔ, Tomaa mɔ, Batlemii mɔ, Matie mɔ, Alɩfee ‑yowli Zaakö mɔ, Simɔɔ ‑ɔ ‑wʋ a‑a bhla'mö ‑mä ‑zɩkpa wa laa zɛlɔɔtɩ 'mö mɔ, 'n Zaakö ‑yowli Zwiidɩ, mʋa plɛɛ ‑mä ‑budu 'la 'mö. 14Wa 'wuë, 'n wa yɩbhää 'kwädlɩ 'wlu 'n wa bhibhee Lagɔ dlɩ ‑bhlʋ 'mö. Ngwlɩ ‑mumuë ‑wʋmö a ‑mä wa jijo'wʋ, wa ‑nyɛ Zezwii a ‑da Malii 'sɔ, ɔ ‑daayuë kökämö.

Wa yɛ Matiasɩ ‑sɛ ɔ 'kä Zwidaa a 'bhle 'mö 'plɩ

15'Ylɩ ‑bhlʋ 'mö, Zezwii a ‑nʋä ‑wa 'yɩbhää 'wluu, ‑wa ‑bhli nɩkpa a gwlɩ gbʋplʋ a sɛ. ‑Mä wa gla'mö, Zezwii a ‑gänɩnyɔ Piɛlɩ, 'n ɔ yiɛ 'wʋ ‑sɔ, 'n ɔ yuëë 'dɩ 'nyɛ, ɔ lɛ naa: 16«‑Atʋayuënyɩ, wɛlɩɩ ‑yɩ cɛlɩɛ ‑mä Lagɔ 'a wɛlɩɩ a 'bɔgʋʋ 'mö, ‑yɩ bhïlaa Zwidaa ‑ɔ 'pänɩɛ Zezwii 'a 'lɩbhäwaa 'yioo, 'Wugɔmʋʋ 'Wlɩlɩ bhïlanɩ a‑a Daviidɩ 'möö, yɩ kä a yɩ 'kä 'yli 'wlʋnɩ klɩpaa. 17Zwidaa, ‑aa kʋgbä 'sɔ ‑kpɔ a gla'mö a ‑nɔ ɔ glɩnɩmö a‑a. ‑Mä libhoo Lagɔ nyɩanyɩɛ 'mö, ɔ kä a ‑mä 'ɔ 'bhle. 18'Ɔ jɛzlʋli 'la a moni wa 'pɛnɔɔ, 'mö ɔ 'libhïä 'wʋ 'n ɔ yiɛ 'lagblɛ pɩa. ‑Mä 'lagblɛ 'la 'mö, ‑mä ɔ bhlinɩɛ wluu, 'n ɔ yiɛ dlɩ ghɔlɔ, 'n 'ɔ 'mɩyʋʋ yiɛ ‑mä 'wlʋ, 'n wʋ yiɛ sɛ 'sulo, 'n ɔ yiɛ 'ku. 19Zeluzalɛɛmö a nɩkpaa 'wuë, wa 'nʋ ‑lɛ a wɛlɩ 'la. ‑Lɛ wa 'bhöönɩɛ, 'lagblɛ 'la, 'n wa lɛɛ Ebleegbʋ 'mö Akɩlɩdamaa, mɩɩ sɛɛ zɛmö nɩɩ, nɩkpɛdlu a 'lagblɛ. 20Sɛ'ɛ yɩ cɛlɩ a‑a 'kɩ Zwidaa a dɛ ‑mä Lagɔ 'a 'nglɩghlimanɩlwɩɩ a 'bɔgʋʋ 'mö nɩɩ:

'Ɔ ‑buduu,

‑bɛ nɩ tu 'wʋ 'libhï,

‑bɛ nɩ tu 'mö glɩ. # 1.20 Soomö 69.26; 109.8.

21-22Kïbhë ‑mämaa ‑wʋ'ɛ ‑mä, sɛ'ɛ a nʋä nɩɩ: Käbönɩkpɛ nɩ 'plɩ ɔ 'bhle 'mö. Zaa, ‑a'bhɩanyɩ, sa'a yɩ ‑kä ‑wʋʋ, nɩkpɛ ‑bhlʋ kä ɔ ‑kanyɩ gla'mö plɛ, ɔ 'kä Zwidaa 'a bhlea 'mö 'plɩ, ‑a ‑nyɔɔ 'sɔ ‑a 'kä nɩkpabhë a 'yila 'klʋ ‑Alowli Zezwii Lagɔ ‑sɛɛ glu a tɩtɩɩ bia. ‑Lɛ a nɩkpɛ 'la, ɔ nɩ tɩ nyɩasɛnɔ glɩnɩ, ‑maa dɛ ‑a ‑gänɩ a‑a Zezwii, nɩkpa ‑mumuë ‑gänɩnyɩ a. Wa gla'mö, ‑mä ‑a nɩ ‑sɛ nɩkpɛ ‑bhlʋ ‑ɔ ‑gänɩmönyɩ a‑a, tɛɛnɩ ‑mä 'tɛnyɩ 'mö Zaa Batisɩ wɔlʋ a‑a Zezwii 'wluu, ‑këë 'n Lagɔ ‑yinyɩɛ Zezwii jijo'wʋ ‑sɛ. ‑Sɩbhä a nɩkpɛ mö ‑a nɩ ‑sɛ, ɔ 'kä Zwidaa 'a bhlea 'mö 'plɩ.»

23Piɛlɩ gbää sa'aa, wa ‑sɛ ‑lɛ nɩkpa 'sɔ. Zɩzɛɛfʋ wa laa Basabasɩ, wa 'pä'ɛɛ nglɩ ‑mimii wa laa Zwitusɩ mɔ, 'n Matiasɩ, 'mö wa ‑sɛɛ ‑lɛ, 24'n wa yiɛ Lagɔ bhibhe. Wa lɛ naa: «‑Atʋ Lagɔ, ‑nmö ‑yiɛ nɩkpaa 'wuë a 'mlɩ a dila. Zaa, nɩkpa nɩ 'sɔɔ, mö ‑a zʋʋmöä 'yila 'klʋ, ‑n ‑kanyɩ wa gla'mö a ‑mɔ ‑n ‑sɛɛ ‑lɛ sʋlʋnɩ, 25ɔ 'kä Zwidaa 'a bhlea 'wʋ 'libhï, ‑abhʋa Zezwii 'a tietiewaa, ɔ 'kä ‑aa kʋgbä'sɔnanɔ 'zʋ, ‑maa Zwidaa, ɔ ‑kanyɩ jijo'wʋ 'bhöö, bhlea ‑a sa‑a a‑a ‑lɛ ɔ za‑a, ɔ ka 'mö mö.» 26Wa bhibhee sa'a 'wëë, 'n wa yiɛ ‑nɩgbɩ 'pä, 'n ɛ yiɛ Matiasɩ 'wʋ bhli. Wa kʋgbä ‑bhʋlʋ ‑kpɔ gla'mö, 'n wa yoo ‑mä 'zʋ, 'n wa yia'aa kʋgbä'sɔ bhli.

Currently Selected:

Nʋnʋlii 1: bet

Highlight

Copy