Marko 12

ABALIMI B’OBUYAGA. — EBYA MUNGU N’EBYA KAIZARI. — KUZOKA KW’ABAFU.

1Natandika kubafumorera mu ngani ati: Omuntu akalima omuzabibu, nagwitir’olugo, nasimba ikamuliro, nayombeka omunara, natamo abalimi, kandi nagira olugendo. 2Enaku ka zahikire, natumira abalimi omwiru, abalimi bamuhe ebirabo by’omuzabibu. 3Bonene nibamukwata nibamutera, nibamusubyaho busa. 4Nabatumira lwa kabili omwiru ondi; ogwo nibamuter’olubale mu mutwe, nibamuzuma kubi. 5Nasuba kutuma ondi, ogwo nibamwita; n’abandi bengi, abandi nibabatera, abandi nibabeta. 6Mbe nasaga n’omutabani omo owe yayendaga muno, ogwo niwe nahereruka kutuma hali bonene, nagira ati: Omwana wange balimutina. 7Nawe abalimi abo nibagambirana bati: Onu niwe omuhunguzi; nimwize tumwite, omuhunguro gwe gube gwetu. 8Nibamukwata, nibamwita, nibamwiha mu muzabibu, nibamunaga. 9Mbe kana muzabibu akugira ata? Akwiza kwita abalimi, omuzabibu naguha abandi. 10Si timukasomaga olwandiko olukugira luti: Ibale elyo abombeki bayangire, likaba lya ha kisago; 11ekigambo echo kikakorwa Omukama, kai kitamize mu meso getu? 12Nibahiga kumukwata, nibatina embaga; kuba bakamanya okwo yagambiriraga bonene mu lugani olwo. Mbe nibamuleka, nibagenda#12, 12 Lora Matayo 21, 44..

13Nibamutumaho abandi bo mu Bafarizayo n’Abaherodyani#12, 13 Lora Matayo 22, 16., bamutege mu bigambo bye. 14Bonene ka bezire, nibamutengera bati: Mwolekerezi, tukumanya okw’okomereze n’okw’otasasirwe muntu; kuba tokulor’ensuso y’abantu, nawe okwolekerera emihanda za Mungu mu bikomereze. Si halagirwe kuha Kaizari omusoro, nangu tuleke kusora? 15Wenene, obwo yamanyaga obuzigi bwabo, nabagambira ati: Mukundoreza ki? Mundetere efweza, ndore. 16Bonene nibamuletera. Nabagambira ati: Olususo lunu n’olwandiko ni by’oha? Nibamugambira bati: Bya Kaizari. 17Mbe Yezu nasubamo nabagambira ati: Mbe nimuhe Kaizari ebya Kaizari, kai Mungu ebya Mungu. Nibatamibwa#12, 17 Lora Matayo 22, 22..

18Abasadusayo, abagiraga bati: Kuzoka tikuliyo, nibamwizaho#12, 18 Lora Matayo 22, 23., nibamubuza bati: 19Mwolekerezi, Musa akatwandikira ati: Mutabani wabo muntu akafwa, akasiga omukazi atali n’abana, mutabani wabo ali no kuswera mukazi we, atereho mutabani wabo embibo. 20Mbe haliga haliho ab’end’ emo musanzu; ow’obuzigezo naswer’omukazi, nafwa atasigireho mwana. 21Kai owa kabili namuswera, nafwa, ogwo wena kusigaho omwana pai. N’owa kasatu wena nikwo. 22Mbe nibamuswera batyo musanzu, tibasigireho omwana. Bona ka bahwere, omukazi wena nafwa. 23Mbe ha kuzoka, ka balizoka, aliba mukazi w’oha muli bonene, kuba bakamuswera ha musanzu gwabo? 24Yezu nasubamo nabagambira ati: Si timukuhabibwa obwo mutakumanya Enandiko n’amani ga Mungu? 25Kuba ka balizoka mu bafu, tibaliswera, kai hona tibaliswerwa, nawe bali nk’abamalaika mw’igulu. 26Eby’abafu, okwo balizoka, timukasomaga mu kitabo cha Musa, mu kisaka#12, 26 Yezu akubezukiza okwo Mungu kara yabonekere Musa mu kisaka ekiyakaga., okwo Mungu yamutengere nagira ati: N’ine Mungu wa Ibrahimu, Mungu wa Izaki na Mungu wa Yakobo? 27Ti Mungu w’abafu, nawe w’abazima. Mbe imwe mwahaba muno.

EKILAGIRO KIKURU MU BILAGIRO. — OMWANA WA DAUDI.

28Naiza omo wo mu bandiki, ayahulire nibahakana, nabona okwo yabasubire kuzima, namubuza ekilagiro cho kutandika mu bilagiro byona. 29Mbe Yezu namusubiramo ati: Ekilagiro ekikwebembera mu bilagiro byona ni kinu: Hulira, Israeli, Omukama Mungu wawe ni Mungu omo; 30mbe noyendega Omukama Mungu wawe n’omutima gwawe gwona, n’omwoyo gwawe gwona, n’obwenge bwawe bwona, n’amani gawe gona. Echo nich’ekilagiro cho kutandika. 31Kandi echa kabili kikususana n’echo: Oyendega owezanu nk’ewe omwene. Ekindi mu bilagiro ekikukira ebyo tikiliyo. 32Omwandiki namugambira ati: Ni kuzima, Mwolekerezi, wagamba ebikomereze, okwo Mungu ali omo, kai tihaliyo ondi atali ogwo; 33mbe ayendwe n’omutima gwona, n’obwenge bwona, n’omwoyo gwona, n’amani gona; kandi kwenda owezanu nk’okw’okweyenda omwene kukukira ebitambo byona n’emiherezo. 34Yezu ka yabwene nk’okwo yamusubire kibuya, namugira ati: Iwe toli hara n’obukama bwa Mungu. Kurug’ aho tihaliho ayahigahere kumubuza.

35Yezu ka yasubiremo, akagamba nayolekerera mw’eklezia ati: Abandiki bakugamba bata okwo Kristu ali mwana wa Daudi? 36Kuba Daudi wenene akagamba na Mwoyo Mutakatifu ati: Omukama akagambira Omukama wange ati: Ikara ha bulyo bwange, kuhika ngire abahate bawe babe buhumuzo bw’amaguru gawe. 37Mbe Daudi omwene akumweta ati: Mukama, kai ni mwana we ata? Ebipipi bingi byasemererwaga kumuhulira#12, 37 Hanu Yezu akwemanyisya okw’ali mwana wa Daudi na Mwana wa Mungu.. 38Yabagambiraga mu bwolekerezi bwe ati: Mwekenge ha bandiki, abakwenda kutura nibarandaza emyenda no kubwakibwa abantu mw’iguliro, 39no kwikara ha bitebe by’obusyo mu masomero na mu myanya z’obusyo mw’ilya; 40abakulya amazu g’abafwerwe beba, nibesusanisya kusoma esala zilehire: bonene balibona elamu mpango muno#12, 40 Lora Matayo 23, 6–12..

OMUHEREZO GWA KIFWERWA IBA.

41Yezu yaliga aikere obusyo y’isandikwa ly’emiherezo, nalora okwo embaga yanagaga efweza mw’isandikwa ly’emiherezo; abahango banamwingi banagamoga bingi. 42Nawe kifwerwa iba omo, ali muhabi, ka yezire, nanagamo chapa ibili, niyo hel’emo. 43Nayeta abahemba be nabagira ati: Koto nkubagambira nti: Kifwerwa iba onu muhabi yatamo kukira bona abateremo mw’isandikwa ly’emiherezo. 44Kuba bona baha mu bingi ebyo bali nabyo, nawe onu mu buhabi bwe yaha byona ebyo ali nabyo, ebimutungire byona.

Currently Selected:

Marko 12: KED1946

Highlight

Copy