Matayo 26

OMUTEGEKO GW’ABAKURU B’EDINI. — YEZU MU NZU YA SIMONI OW’OMUBILI

1Mbe Yezu ka yamazire kwolekerera ebyo byona, nagambira abahemba be ati: 2Mukumanya okwo enaku ibili ka zilarabaho, Paska#26, 2 Paska y’Abayahudi yabezukizaga kuruga kwabo kwa Misri. nehika, kai Omwana w’omuntu aliherezibwa, alegwe ha musalaba. 3Aho abakuru b’abasaserdoti n’abagurusi b’abantu nibasumba mu lukale lw’omukuru w’abasaserdoti, owe bayetaga bati: Kaifa; 4nibategekerana okwo balakwatira Yezu mu bwenge, bamwite. 5Nawe nibagira bati: Ha lunaku lukuru pai, leka eyombo etabaho mu bantu#26, 5 Abakuru abo batinaga abantu, batabazibira kwita Yezu.. 6Mbe Yezu, aho yaliga ali Betaniya mu nzu ya Simoni ow’omubili, 7omukazi ogwo namwizaho ali n’akabya k’amazuta g’obuguzi bwingi, nasesa ha mutwe gwe, aikere nalya#26, 7 Nikwo bagiraga batyo omugeni mukumuke, bamuhe isima mu meso g’abantu.. 8Nawe abahemba ka babwene, bakabihirirwa, nibagira bati: Banaranaliza ki binu? 9Bakubigulize bingi, kai babihe abahabi. 10Yezu, obwo yamanyaga, nabagira ati: Mukubihiririza ki omukazi onu? Kuba yankolera kuzima. 11Kuba abahabi muliba nabo buchabucha, nawe ine timuliba n’ene buchabucha. 12Hatyo onu yaseser’engingo zange amazuta ganu, yagira atyo ha bwo kunzika. 13Koto nkubagambira nti: Honahona eyo Evanjeli enu elyolekererwa mu nsi zona, kiligambwa n’ech’onu yakola cho kumwizukiraho#26, 13 Yezu akubezukiza okw’achali n’enaku nke mu nsi: kufwa kwe kuli hehi..

YUDA NATUNDA YEZU. — YEZU NALAGIRA NAMANYISYA ALAMUTUNDA.

14Aho omo w’ekumi na babili, owe bakweta bati: Yuda Iskaryota, nagenda ha bakuru b’abasaserdoti, 15nabagambira ati: Mukwenda kumpa kiha, ine mmubahe? Bonene nibamulaganisya ebihinzu by’efweza makumi asatu#26, 15 Efweza ezo zainganaga n’obuguzi obwo bagulaga omwiru omo mu naku ezo.. 16Mbe kurug’ aho nahiga omwanya gwo kumukwatiraho.

17Mbe olunaku lwo kutandika lw’azima#26, 17 “Azima” nikwo kugira oti: emikate ezitatumbisibwe. Mu naku munana za Paska Abayahudi balyaga emikate ezitalimo itumbyo; Yezu niz’emikate ezo yalyire olunaku olwo, kai mu Misa niz’emikate ezo bakoza., abahemba nibeza hali Yezu nibamugira bati: Okwenda tukuchumire hai aho kulira Paska? 18Yezu nagira ati: Mugende mu kikale hali nanka, mumugambire muti: Omwolekerezi yagira ati: Akatungu kange kali hehi; owawe niyo nkukolera Paska n’abahemba bange. 19Mbe abahemba nibagira nk’okwo Yezu yabalagire, nibasemeza Paska. 20Mbe ka habere kebazo, naikara h’eliro n’abahemba be ikumi na babili. 21Aho baliga bali mw’ilya#26, 21 Ilya elyo n’ilya ly’enabalega ya Paska, eyo Abayahudi bona baliga balagirwe kulya olunaku olwo, etobene n’emikubi misalizi., nagira ati: Koto nkubagambira nti: Omo mul’imwe akuntunda. 22Nibabihirirwa muno, nibatandika buli muntu kugira ati: Si n’ine, Mukama wange? 23Wenene ka yasubiremo, nagira ati: Akukoza n’ene omukono ha lunanga, niwe akuntunda. 24Wenene Omwana w’omuntu yagenda nk’okwo chamwandikirweho; nawe omuntu ogwo aligabona, alitundaho Omwana w’omuntu! Kwakubere kuzima hali wenene omuntu ogwo akiba atazerwe. 25Yuda, ayamutunzire, nasubamo nagira ati: Si n’ine, Mukama wange? Namugira ati: Wakigamba.

YEZU NAGIRA ISAKRAMENTU LYA UKARISTIA.

26Bakili mw’ilya#26, 26 Kumara niho Yezu nagira Isakramentu lya Ukaristia, Paska ya Wenene., Yezu nakwat’omukate, nabarika, nahinzura, naha abahemba be, nagira ati: Mwanankure, mulye; kinu nizo ngingo zange. 27Nakwata ekikompe, nalamiriza, nabaha, nagira ati: Munweho mwena; 28kuba enu niyo nsagama yange y’omulago muhya, elisesekera bengi ha kukiz’ ebiheno#26, 28 Ensagama yonene eyo Yezu yasesere niyo eli mu Kikompe cha Misa.. 29Nawe nkubagambira nti: Tinkusuba kunwa ebirabo binu by’omuzabibu, kuhika ha lunaku olwo ndinwa n’emwe mu ngoma ya Tata#26, 29 Yezu nabezukiza okw’ali hehi no kugenda mu ngoma ye mw’igulu..

30Olwembo ka lwahwere, nibahuruka kugenda h’ebanga lya Zituni. 31Aho Yezu nabagambira ati: Mwena mukusitara kubera ine mu kiro kinu, kuba kikayandikwa kiti: Nditera omulisya, n’enabalega z’ekihyo zilinyarambuka. 32Nawe ka ndiba nazokire, ndibebemberera Galilaya. 33Nawe Petro nasubamo namugira ati: Naho bona balasitazibwa ha bwawe, ine tindisitaraho n’akati. 34Yezu namugambira ati: Koto nkukugambira nti: Mu kiro cha lero enkokoromi etakakokoromire, okuneyoga kasatu. 35Petro namugambira ati: Naho nkaba wo kufwa n’ewe hona, tinkukweyoga. N’abahemba bandi bona nibagira batyo#26, 35 Yezu akulaga okw’Entumwa ze zona zilairuka, n’okwo Petro alamweyoga..

YEZU NAYOYER’ENSAGAMA HA KABANGA KA ZITUNI.

36Aho Yezu naza nabo mu nsambu eyo bakweta bati: Getsemani, nagambira abahemba be ati: Mwikare hanu, ine ngende kuliya nsome. 37Natwara Petro n’abatabani ba Zebedeyo babili, natandika kubihirirwa no kuzuba. 38Aho nabagira ati: Omwoyo gwange guzubire kuhika kufwa; nimwikare hanu, nimukesye obwire n’ene. 39Nairirayo obusyo kake, nagwa buzumi, nalembereza nagira ati: Tata, raba nikihikibwa, ekikompe kinu kindabeho#26, 39 Ekikompe kinu ni kimanyisyo ch’obusasi n’obuzune bwingi obwo Yezu alabona. Yezu mu bumuntu bwe nasinya kutina obusasi, nawe naikiriza koto ebyo Mungu akwenda, naho bikamugumira.; nawe ti nk’okwo ine nkwenda, nawe bibe nk’okwo iwe okwenda. 40Naiza ha bahemba be, nasanga banagire, nagambira Petro ati: Hatyo timwahikize kukesy’obwire saha emo n’ene? 41Mukesye nimulembereze, niho muleke kubasibwa mu kurozibwa: kuba omwoyo gwanguhire, nawe engingo zinogire#26, 41 Yezu akwatura emihanda ibili zo kusinga mu kurozibwa: kwekenga no kulembereza. Omuntu atakwiruka kurozibwa takuhicha kusinga, kuba akwesigirira amani ge, nk’okwo Entumwa zakozire olunaku olwo.. 42Nasuba kugenda lwa kabili, nalembereza nagira ati: Tata, raba ekikompe kinu kitakuhicha kurabaho ntakinwereho, hona bigirwe eby’okwenda. 43Nasuba kwiza, nabasanga banagire, kuba ameso gabo galiga gazitohire. 44Nabaleka, nasuba kugenda, nalembereza lwa kasatu, ekigambo echo chonene nicho nagamba. 45Aho naiza ha bahemba be, nabagambira ati: Hati nimunagire, muhumure; lora, akatungu kahika hehi, kai Omwana w’omuntu akuherezibwa mu ngaro z’abaheni. 46Nimwimuke tugende; akuntunda yahikire hehi.

YEZU NAKWATWA.

47Yaliga akifumora, niwe na Yuda, omo w’ekumi na babili, naiza ali n’embaga y’abantu bengi abali n’embanda n’amakoni, abaliga batumirwe abakuru b’abasaserdoti n’abagurusi b’abantu. 48Nawe ayamutunzire yaliga abahere olunyamo, agizire ati: Owe ndanwegera, niwe wenene; mumukwate. 49Kachwi n’ako naiza hali Yezu nagira ati: Nkukubwacha, Mukama wange. Namunwegera#26, 49 Omunwegero ni lunyamo lw’obwendani. Entumwa zaliga zimanyire kunwegerana na Yezu ha kubugangana nage. Yuda akumunwegerera obuzigi chonka.. 50Yezu namugira ati: Munwani, waletwa ki? Aho niberira hehi, nibataho Yezu engaro, nibamukwata. 51Mbe omo muli banu abaliga bali na Yezu, nagorora omukono, nasorotorayo embanda ye, natema omwiru w’omukuru w’abasaserdoti, namuchwah’okutwi. 52Aho Yezu namugira ati: Subya embanda yawe mu bilaro byayo; kuba bona abakwat’embanda balitw’embanda. 53Nangu okuchwa oti: tinkuhicha kusaba Tata, akandetera hati kukiraho legyo#26, 53 “Legyo” emo yaliga eli n’abasirikale bihumbi bitanu hamo mukaga. ikumi n’ebili z’abamalaika? 54Kai Enandiko zihikibwe zita? kuba nikwo bili no kuba bityo. 55Mu katungu ako Yezu nagambira embaga ati: Mukwiza kunkwata n’embanda n’amakoni nk’omusuma; enaku zona nekaraga mul’imwe ninolekerera mw’eklezia, nawe timwankwasire. 56Mbe ebyo byona byagirwa, niho Enandiko z’abalagi zihike. Aho abahemba bona nibamusiga, niberuka.

YEZU MW’ILAMULIRO.

57Mbe abaliga bakwasire Yezu nibamusagara owa Kaifa, omukuru w’abasaserdoti, eyo abandiki n’abagurusi baliga basumbire. 58Nawe Petro yamurubaga ali hara kuhika mu kibuga ch’omukuru w’abasaserdoti; natahamo, nahika kwikara n’aberu, nayenda kulora ebilagwa. 59Mbe abakuru b’abasaserdoti n’abalamuzi bona bahigaga ebyo kubehereza Yezu, bahiche kumwita; 60nawe tibabibwene, naho zezireho embona ningi z’obubehi. Kumara nihezaho embona ibili z’olulimi, 61nizigira ziti: Onu akagira ati: Nkuhicha kukambula eklezia ya Mungu, kai kumara naku isatu kugyombeka. 62Omukuru w’abasaserdoti naimuka namugira ati: Si tokusubamo kigambo hali ebyo banu bakukugambaho? 63Nawe Yezu nayesiza. Omukuru w’abasaserdoti namugambira ati: Nakulahirira Mungu asingire, notugambire raba oli Kristu, Omwana wa Mungu. 64Yezu namugambira ati: Wakigamba. Nawe nkubagambira nti: Kuruga hati mulibona Omwana w’omuntu aikere ha bulyo bw’amani ga Mungu, naiza mu mere g’igulu. 65Aho omukuru w’abasaserdoti natemura omwenda gwe nagira ati: Yazuma Mungu; kai tuchahigira ki embona? Lora, hati mwehulirira okwo yazuma Mungu. 66Mukutekateka ki? Bonene nibasubamo nibagira bati: Ahikire kufwa. 67Aho nibamuchwera mu busyo bwe, nibamuter’enfune; kai abandi nibamutez’empi mu busyo bwe, 68nibagira bati: Kristu, notulagire: ayakutera ni ga?

PETRO NAMWEYOGA.

69Nawe Petro yaliga aikere hanza mu kibuga; omuzana omo namwiriraho, nagira ati: N’ewe wena sanga oli na Yezu Omunagalilaya. 70Wenene nayanga, bona baliho, nagira ati: Tinkumanya ech’okugamba. 71Ka yarabire mw’ilembo, omuzana ondi namubona nagambira abaliga baliho ati: N’onu wena sanga ali na Yezu Omunazareti. 72Nasuba kwanga, nataho no kulahira ati: Ine omuntu ogwo tinkumumanyaga. 73Kurabaho katungu kanoro, nibeza abaliga baliho nibagira Petro bati: Koto n’ewe oli wo muli baliya; kuba emifumorere yawe yakusokora. 74Aho natandika kwelahirira no kulahira okw’atamanyaga omuntu ogwo. Mbe aho n’aho enkokoromi nekokoroma. 75Petro naizuka ekigambo cha Yezu echo yaliga amugambire, ati: Okuneyoga kasatu, enkokoromi etakakokoromire. Nahuruka h’esazi, nalira muno#26, 75 N’etwe abakweyoga Yezu buli lunaku n’ebiheno byetu, tutamwe nka wenene..

Currently Selected:

Matayo 26: KED1946

Highlight

Copy