Matayo 25

OLUGANI LW’ABAHARAKAZI IKUMI. — OLUGANI LWA TALENTA

1Aho obukama bwo mw’igulu bulilenganisibwa n’abaharakazi ikumi, abatwere emuli zabo nibagenda kwesungana omuswezi n’omwenga. 2Nawe batanu muli bonene baliga bali basiru, kai abatanu bali betegereza. 3Mbe abasiru batanu nibatwara emuli, nawe nibabura kutwara n’amazuta; 4kandi abetegereza nibatwar’amazuta mu bibikiro byabo n’emuli. 5Nawe omuswezi ka yerirwe kwiza, bona nibahunira nibanagira. 6Mbe mu kiro mw’itumbi omwano nigulira, bati: Ngugwo omuswezi, mugende kumwesungana. 7Aho abaharakazi abo bona nibemuka, nibasemeza emuli zabo. 8Mbe abasiru nibagira abetegereza bati: Mutuheho amazuta ganu, kuba emuli zetu zikulala. 9Abetegereza nibasubamo nibagira bati: Hamo gabure kutuhika itwe n’emwe, hakili nimugende ha baguzi, muze kwegulira. 10Mbe ka bagenzire kugura, omuswezi naiza; abaliga bechumire, nibataha nage mu menga, omulyango nigukingwa. 11Kumara niho nibeza n’abaharakazi abaliga basigereyo, nibagira bati: Mukama wetu, mukama wetu, notukingulireho. 12Wenene nasubamo nagira ati: Koto nkubagambira nti: Tinkubamanya. 13Mbe nimwikare mulozire, obwo mutakumanya olunaku n’akatungu#25, 13 Kana mageni ogwo niwe Yezu wenene. Aliza olunaku lwo kuhwaho kw’ensi kutahya mw’igulu abalisanga bamurubire, bahikize ebigambo bye. Abandi balikara hanza, nikwo kugenda mu muliro ogutahwaho. Amazuta g’olugani gakumanyisya obwenzi bwa Mungu n’enema ntakatifuza: atali nayo takuhicha kutaha mw’igulu, akaruba Yezu mu bukama bwe..

14Kuba hali nk’omuntu ayayenzire kuza mu lugendo, akayeta aberu be nabaha ebintu bye. 15Mbe omo namuha talenta itanu, ondi ibili, kai ondi emo, buli muntu nk’omwo amani gasubire, mbe aho naimuch’olugendo. 16Ayaherwe talenta itanu nagenda, nazikoz’emilimo nazazamo ezindi itanu. 17Nikwo n’ayaherwe ibili, wena nazazamo ezindi ibili. 18Nawe ayaherwe emo, nagenda nasimba mw’itaka, nasereka efweza y’esebugeni. 19Mbe naku ningi ka zarabireho, isebugeni aberu abo naiza nabatonga. 20Naiza ayaherwe talenta itanu, naleta ezindi itanu, nagira ati: Mukama wange, okampa talenta itanu, lora ezindi itanu ezo nazezemo. 21Isebugeni namugambira ati: Ni kuzima, mwiru muzima n’ow’omutima, obwo wagir’omutima mu bike, ndikuha kwemererera bingi; taha mu kusemererwa kw’omukama wawe. 22Kandi naiza n’ayaherwe talenta ibili, nagira ati: Mukama wange, waliga ompere talenta ibili, lora ezindi ibili ezo nazezemo. 23Isebugeni namugambira ati: Ni kuzima, mwiru muzima n’ow’omutima, obwo wagir’omutima mu bike, ndikuha kwemererera bingi; notahe mu kusemererwa kw’omukama wawe. 24Nawe n’ayaliga aherwe talenta emo wena naiza, nagira ati: Mukama wange, nkumanya okw’oli muntu musazi, akugesa ey’otabibire, n’akusoroza ey’otabikire; 25mbe nkatina ningenda kusereka talenta yawe mw’itaka, mbibi hanu ebili byawe. 26Nawe isebugeni nasubamo nagira ati: Mwiru mubi n’omulenga, sanga nomanya okwo nkugesa eyo ntabibire, ninsoroza eyo ntabikire, 27mbe gwakubere mulimo gwawe kusagara efweza yange h’abakugizazya, mbe ine ka nakwizire, nakubwene ebili byange n’ebyazerwemo. 28Hatyo nimumwake talenta, mugihe onu ali na talenta ikumi. 29Kuba buli muntu ali nabyo, niwe alihabwa, nakanisya; nawe atali nabyo, alyakwa n’echo akuba nasusa oti henda ali nacho. 30Kandi omwiru atakugasa mulimo mumunage mu mwirima gwa hanza; niyo haliba kulira no kuteranisy’ameno#25, 30 Talenta z’olugani lunu zikususanisya enema zona ezo Mungu atugabira zo kutuhwera kuchunguka. Mungu ha lunaku lwo kulamurwa alitutonga enema ezo zona; alasanga azikolize kuzima, alibona omugisa, nawe alasanga azigayire, zikabura kugasa, ogwo aligabona. Buli muntu wena akuhabwa enema zona ezimuhikire, achungule omwoyo gwe; atakuchunguka ni ntambala ya wenene wenka..

ELAMU YO KUHERERUKA.

31Mbe Omwana w’omuntu k’aliza mw’ikuzo lye, n’abamalaika bona bali nage, niho alikara ha kitebe ch’ikuzo lye. 32Mbe amahanga gona galyesoroza obusyo ye, kai alibataganisyamo, nk’okw’omulisya akutaganisya enabalega n’empaya; 33kandi enabalega alizita ha bulyo bwe, nawe empaya ha bumoso. 34Aho Omukama aligambira abaliba bali ha bulyo bwe ati: Mwize, imwe ababarikirwe Tata, mutware engoma eyo babachumire kuruga ha buhangi bw’ensi. 35Kuba nkarumw’enzala, nimumpa ebyo kulya; nkaitw’iliho, nimumpa echo kunwa; naliga ndi mugeni, nimunkuma; 36naliga ndi busa, nimunzweka, ndwere, nimunsura, naliga ndi mw’ibohero, nimunizaho. 37Aho abazima balimusubiramo bati: Mukama wetu, tukakubona lihi oli n’enzala nitukulisya, oli n’iliho nitukunwesya? 38Kai tukakubona lihi oli mugeni tukakukuma, hamo oli busa tukakuzweka? 39Hamo tukakubona lihi orwere hamo oli mw’ibohero, tukeza hal’iwe. 40Omukama alibasubiramo ati: Koto nkubagambira nti: Buli olwo mwakolere omo wo mu batabani betu banu banamuto, mukakolera ine. 41Kandi aligambira na banu abaliba bali ha bumoso ati: Mundugeho, imwe bazumirizibwa, muze mu muliro ogutahwaho, ogwo bachumire isitani n’abamalaika balyo. 42Kuba nkarumw’enzala, nimubura kumpa echo kulya; ndi n’iliho nimubura kumpa echo kunwa; 43naliga ndi mugeni, timwankumire; ndi busa, timwanzwekire; ndwere, kai ndi mw’ibohero, nimubura kunsura. 44Aho bonene balimusubiramo bati: Mukama wetu, tukakubona lihi si norumw’enzala hamo oli n’iliho, hamo oli mugeni, hamo oli busa, hamo orwere, hamo oli mw’ibohero, tukabura kukukolera? 45Aho alibasubiramo ati: Koto nkubagambira nti: Buli olwo mwabura kukolera omo wo mu banamuto banu, timwakolera ine. 46Mbe aho baligenda mu busasi obutahwaho, nawe abazima mu bulame obutahwaho#25, 46 Ebyo tukolera abezasu Yezu akubisusanisya kuti henda twabikolere Wenene; ha lunaku lwo kulamurwa alitubuza ebyo tulakolere abezasu: abalasanga bakolere abezabo kuzima balichunguka, nawe abalasanga batabakolere kuzima, baligenda mu muliro ogutahwaho..

Currently Selected:

Matayo 25: KED1946

Highlight

Copy