Matayo 24

OLUNYAMO LWO KUKAMBUKA KWA YERUZALEMU N’OLWO KUHWAHO KW’ENSI.

1Yezu ka yarugire mw’eklezia, nagenda. Abahemba be nibamwizaho kumwoleka emyombekere y’eklezia. 2Nawe wenene nasubamo nabagira ati: Mukubona binu byona? Koto nkubagambira nti: Hanu tihalisigaraho ibale h’ebale lyezabo etalikamburwa#24, 2 Ekigambo echo kikahika koto, Abanaroma ka bezire kukambula Yeruzalemu, nawe munomuno mu naku za Yuliani, omuhakani w’edini.. 3Mbe ka yekere h’ebanga lya Zituni, abahemba be nibamuzaho bwesereke, nibagira bati: Notugambire aho ebyo biligwera, kandi olunyamo lwo kwiza kwawe n’ensi kuhwaho ni luha? 4Yesu nasubamo nabagira ati: Mulore omuntu atabaziga. 5Kuba bengi baliza mw’izina lyange, baligira bati: N’ine Kristu, kai baliziga bengi. 6Kuba mulihulira obulemo n’enkuma z’obulemo. Mulore mutalihaba, kuba ebyo bili no kubaho, nawe kuhereruka kutakahikire. 7Kuba ihanga lilimukira ihanga lindi, n’engoma, engoma endi, kai halibaho omuzibwe, n’enzala, n’ensi kutengeta ahandi. 8Nawe ebyo byona ni butandikiro bw’obunale. 9Niho mulisagarwa kunaranazibwa, balibeta; amahanga gona galibahatira izina yange. 10Aho balisitara bengi, balinaranazanya, balihatana. 11Balimuka abalagi b’obubehi bengi, baliziga bengi. 12Obwo obubi bulikana, obwenzi bwa banamwingi bulikeha. 13Nawe aliguma kuhika ha muhero, ogwo niwe alichunguka. 14Kandi Evanjeli y’obukama enu eliyolekererwa mu nsi zona, ha humanysia amahanga gona, mbe niho kuhereruka kulihika#24, 14 Hanu Yezu akulaga kukambuka kwa Yeruzalemu hamo no kuhwaho kw’ensi. Nizirabaho myaka makumi ana gonka, niho nibakambula Yeruzalemu n’eklezia..

15Mbe ka mulibona ihano ly’obubi lyo kutinisya, elyagambirwe Danyeli omulagi, lyemerere mu buturo butakatifu, akusoma asombokerwe#24, 15 “Obuturo butakatifu” niyo eklezia ya Yeruzalemu.. 16Aho abali Buyahudi berukire mu mabanga, 17kai ali ha luswi atahanantukaho kwiha ekintu mu nzu ye, 18n’ali ha musiri atasubira enkanzu ye. 19Nawe abali n’enda n’abakwoncha mu naku ezo baligabona. 20Mbe musabe kwiruka kwanu kutaliba mu naku z’embeho na ha lunaku lwa sabato. 21Kuba aho halibaho ekinaranazo kihango ekitakabonwaga kuruga ha buhangi bw’ensi kuhika hati, kai ekitalisuba lwa kabili. 22Kai enaku ezo zikiba zitakehesibwe, tihakukizire omuntu n’omo, nawe enaku ezo zilikehesibwa ha bw’abantu abasozirwe#24, 22 Yeruzalemu ka yakambukire, Abayahudi bengi bakaitwa, abandi nibaba beru, abandi nibalegwa ha musalaba, abandi nibetwa enzala n’obunale buhango.. 23Aho#24, 23 Aho Yezu akutandika kulaga eby’ensi kuhwaho no kwiza kwe kwa kabili. omuntu k’alibagambira ati: Ngugu Kristu hanu, hamo haliya, mutalikiriza. 24Kuba baliza ba Kristu b’obuzigi n’abalagi b’endimi abalileta enyamo mpango n’amahano, abasozirwe bona bakuzigazigirwe, bakaba nibahicha kuzigazigwa. 25Nikwo nabalaga. 26Mbe ka balibagambira bati: Ngugwo ali mu mbuga, mutaligendayo; ngugwo ali mu nzu, mutalikiriza. 27Kuba nk’olurabyo oluruga mu buturuka nilurabiza mu bugwa, nikwo no kwiza kw’Omwana w’omuntu kuliba kutyo#24, 27 Kristu k’alaiza kulamula abantu, balimumanya ahw’aho, nzira kutimatimya.. 28Honahona aho omutumbi guliba, niho empungu zilyekobyanya. 29Ekinaranazo ch’enaku ezo ka kilihwaho, aho n’aho izoba lililala, n’okwezi tikulileta olumuli lwakwo, n’enenezi zo mw’igulu ziligwa, kai amani g’igulu galitengesibwa. 30Aho olunyamo lw’Omwana w’omuntu lulibonwa h’igulu; niho amahanga gona g’ensi galilira, kandi balibona Omwana w’omuntu naiza mu mere g’igulu n’amani mengi n’ikuzo. 31Aho alituma bamalaika be n’ekikuli n’ilaka ihango; balikoka abasozirwe be mu mbazu ina z’ensi, kuruga ha butandikiro bw’igulu kuhika ha muhero gwalyo#24, 31 Nikwo kugira oti: abantu bona fu balyekobyanya aho Omulamuzi aliba ali.. 32Mbe nimwihe olugani ha muti gw’omutini. Itabi lyagwo ka linirira likasebuka, mwamanya okw’olwanda luli hehi; 33nikwo mutyo, ka mulibona ebyo byona, mumanye okw’ali hehi ha mulyango. 34Koto nkubagambira nti: Oluzaro lunu titulihwaho, ebyo byona bitakahikire. 35Igulu n’ensi bilihwaho, nawe ebigambo byange tibilihwaho#24, 35 Yezu takuhicha kuziga, ebigambo bye bikuhika nk’okwo akugamba..

OLUNAKU N’AKATUNGU KO KWIZA TIBIKUMANYWA.

36Olunaku olwo n’akatungu ako tihaliho akubimanya, n’abamalaika bo mw’igulu bona pai, niwe Tata wenka#24, 36 Tihaliho omuntu n’omo akumanya olunaku olw’Omulamuzi aliza. Mbe tuleke kunagira, twetegeke, nk’omuntu akutina kusyakwa abasuma.. 37Nk’okwo haliga hali mu naku za Noe, nikwo haliba na ha kwiza kw’Omwana w’omuntu. 38Nk’okwo byabere mu naku ezikebembera kaboza, nibalya nibanwa nibaswera nibagabura, kuhika ha lunaku olwo Noe yataha mu bwato, 39kai tibamanyire kintu kuhika kaboza neiza netwara bona, mbe nikwo no kwiza kw’Omwana w’omuntu kuliba kutyo. 40Aho niho baliba babili ha musiri, omo aihweho, ondi asigareho; 41abakazi babili baliba nibasya ha lumengo, omo aihweho, ondi asigweho. 42Mbe nimukesye, kuba timukumanya akatungu ak’Omukama wanu aliziramo. 43Mbe nimumanye ekigambo kinu: nineka akiba amanyire akatungu ak’omusuma akwiziramo, yakwikere nalora, tiyakulekire enzu kusimbwa. 44Mbe n’emwe mwikare mwechumire, kuba timukumanya akatungu ak’Omwana w’omuntu aliziramo. 45Omwiru mwesigwa n’omwetegereza ni ga owe isebugeni yatereho kwemererera abo mu ka ye bona, no kubaha ebilyo mu katungu ko kulya? 46Omwiru ogwo ali n’omugisa, isebugeni k’aliza, akamusanga agizire atyo. 47Koto nkubagambira nti: Alimutaho kwemererera ebintu bye byona. 48Nawe omwiru ogwo mubi mu mutima akagira ati: Tatabugeni yalangeza kwiza; 49kandi natandika kuter’aberu bezabo, nalya nanwa n’abatamizi, 50mbe isebugeni omwiru ogwo aliza ha lunaku olwo atategezaga na mu katungu ako atamanyaga; 51kai alimuchwagula hagati, omwanya gwe aliguta hamo n’abazigi; okwo niyo haliba kulira no kuteranisy’ ameno.

Currently Selected:

Matayo 24: KED1946

Highlight

Copy