Matayo 19
19
OBUSWEZI N’OBUBIKIRA.
1Mbe Yezu ka yamazire kwolekerera ebyo, nafuruka Galilaya naiza mu mbibi za Buyahudi ha mwambu gwa Yordani. 2Embaga ningi y’abantu nibamuruba, nabakirizayo. 3Abafarizayo nibamuzabo, nibamuroza nibagira bati: Angu omuseza akuhicha kwanga omukazi we kubera buli ntambala yona yona? 4Wenene nasubamo nabagambira ati: Si timukasomaga okwo ayahangire omuntu wa mbele na mbele, yabahangire omuseza n’omukazi, nagira ati: 5Nich’echo omuseza ali no kusigira ise na nina, yekara n’omukazi we, ha bubili bwabo babe ngingo zimo? 6Batyo tibakili babili, nawe engingo zimo. Mbe echo Mungu yakwatanisize, omuntu atakitaganisya#19, 6 Obuswezi bukagirwa Mungu wenene ka yahangire omuseza omo n’omukazi omo wenka: mbe obwo nibw’oburugo n’olulengo lwa buli buswezi bwona. Yezu, ka yamazire kusombora ekilagiro ch’era echo, narumya isumi elyo mu bantu nde.. 7Nibamugambira bati: Kai Musa akalagirira ki kuha omukazi olwandiko lw’obwangani no kumwanga? 8Wenene nabagambira ati: Ha bw’obugume bw’emitima zanu, nicho Musa yabafuhire kwanga abakazi banu, nawe kuruga mbele na mbele byaliga bitali bityo. 9Nawe ine nkubagambira okwo buli akwanga omukazi we, atamuzunanisye obukwate, kai akaswera ondi, akusihana; kai akuswera changwa, wena akusihana#19, 9 Yezu akwihaho kimo omwanya gwo kwangana ogwo Musa yaliga yahere Abayahudi kuber’obugume bwabo, nazibira koto abantu kwangana no kuswerana n’ondi, obuswezi bundi bukiliho. Nawe omo, omuseza hamo omukazi, akaruba entungwa z’obusihani, zikaba ha bweru, owezabo akuhicha kumuleka no kwikara wenka, nawe nzira kuswerana n’ondi, owezabo atakafwire..
10Abahemba be nibamugira bati: Raba ebigambo by’omuseza n’omukazi bili bityo, hakili kuleka kuswera. 11Wenene nabagambira ati: Ekigambo echo tibakisombokerwa bona, nawe n’abaherwe. 12Kuba haliho abakone abazerwe mu nda ya banina bali batyo; haliho abakone abagizirwe batyo abantu; kai haliho abakone abayekonire abene bonka kuber’ obukama bwo mw’igulu. Akuhicha kusombokerwa, asombokerwe#19, 12 Hanu Yezu akugamba eby’obubikira. Omulimo ogwo ni gw’abantu bake bonka, abo Mungu akusora bonka, kuba omulimo ogwo gugumire muno, kai gukuruga mu mani ga Mungu chonka. Nawe abo Mungu yasozire, bakagumya endagano zabo, balihabwa ikuso lingi mw’igulu, kuba nibo bakususana na Yezu koto..
YEZU NA BANAMUTO. — OMUSIGAZI MUHANGO. — EBINTU NI MUTEGO. — EMPERA Y’OBUHABI.
13Aho nibamuletera banamuto, abateho emikono no kubasabira. Nawe abahemba nibabachahalira. 14Nawe Yezu nabagira ati: Muleke banamuto, mutabazibira kwiza hal’ine, kuba abezabo abo nibo bakana ngoma yo mw’igulu. 15Mbe ka yamazire kubataho emikono, narugayo okwo.
16Mbe niwe n’omuntu naiza namugambira ati: Mwolekerezi muzima, nkore ki mbone obulame obutahwaho? 17Wenene namugira ati: Okumbuliza ki ekizima? Omuzima n’omo, Mungu. Mbe, raba noyenda kuhika mu bulame, nohich’ ebilagiro. 18Namugambira ati: Ni biha? Yezu ati: Otaitaga, otasihanaga, otaibaga, otabeherezaga; 19otinega iso na noko, kai oyendega owezanu nk’ewe omwene. 20Omusigazi namugira ati: Ebyo byona nkabihicha kuruga buto bwange; echo nkilebizeho ni kiha? 21Yezu namugambira ati: Raba noyenda kuba n’obuhikire, roko, oguze eby’oli nabyo, ogabire abahabi, olibona ensabo mw’igulu, mbe oize ondube. 22Mbe omusigazi ka yahulire ekigambo echo, nagenda azubire, kuba yaliga ali n’ebintu bingi.
23Aho Yezu nagira abahemba be ati: Koto nkubagambira nti: Kigumire omuhango kutaha mu bukama bwo mw’igulu. 24Kai nkusuba kubagambira nti: Changuhire entungabulende kuraba mu kahuru k’empindu kukira omuhango kutaha mu ngoma yo mw’igulu. 25Abahemba ka bahulire ebyo, nibakuma muno, nibagira bati: Alihicha kuchunguka ni ga? 26Mbe Yezu nabalora nagira ati: Echo tikikuhikibwa mu bantu, nawe hali Mungu bikuhikibwa byona#19, 26 Yezu akusomborera abahemba be nk’okwo ebintu by’ensi bikuzibira abantu bengi kuchunguka. Abatereho omutima mu bintu byabo balisingwa ebizibiro by’obutunga bwabo; nawe abakubukoza kuzima abo balichunguka..
27Aho Petro nasubamo namugambira ati: Lor’itwe, tukasiga byona nitukuruba; mbe kai tuliba tuta? 28Yezu nabagambira ati: Koto nkubagambira nti: Imwe abandubire, mu naku zo kuzarwa lwa kabili#19, 28 Ha muhero gw’ensi ebihangwa byona bilihinduka, bilisemera, nk’okwo embibo n’amati gona gahinduka nigasemeza ensi yetu mu naku z’ekitiko., Omwana w’omuntu k’alikara ha kitebe ch’ikuzo lye, n’emwe mwena mulikara ha bitebe ikumi na bibili, nimulamula enganda ikumi n’ebili za Israeli. 29Buli muntu alisiga enzu, hamo batabani babo, hamo bahara babo, hamo ise, hamo nina, hamo mukazi we, hamo abana, hamo nsambu, ha bw’ezina lyange, alihabwa ngendo igana, kandi alibona obulame obutahwaho. 30Nawe banamwingi abo kutandika baliba bo kuhereruka.
Currently Selected:
Matayo 19: KED1946
Highlight
Share
Copy
Want to have your highlights saved across all your devices? Sign up or sign in
First published in 1946 by the White Fathers. Published online with the permission of the White Fathers.
