Matayo 20

ABAKOZI BO MU MUZABIBU.

1Obukama bwo mw’igulu bukususana nka nineka ayahurukire kanencha muno kuza kuhiga abakozi bo kulima mu muzabibu gwe. 2Ka yalagene n’abakozi kubaha sumuni emo yo musana gwona, nabasindika mu muzabibu gwe. 3Ka yahurukire kuti mu saha ya kasatu, nasanga abandi bekere ha lubuga, batali na mulimo, 4nabagambira ati: N’emwe mwena nimugende mu muzabibu gwange, ndabaha ebihikire. 5Mbe nibagenda. Nasuba kuhuruka kuti ha saha ya mukaga na ha saha ya mwenda, nagira atyo. 6Kandi nasuba kuhuruka kuti ha saha y’ekumi n’emo, nasanga abandi bemerere, nabagambira ati: Mukwemerezibwa ki hanu musana gwona mutali na mulimo? 7Nibamugambira bati: Kuba tihaliho ayatuha emilimo. Nabagambira ati: N’emwe mwena nimugende mu muzabibu gwange. 8Mbe ka lyalagere, kana muzabibu nagambira omunampara we ati: Noyete abakozi obahere, olatantika n’abahereruka, omalize n’abatandiki. 9Mbe ka bezire abagenzire kukola ha saha y’ekumi n’emo, nibahabwa buli muntu sumuni emo. 10Abatandikire na bonene nibeza, nibachwa bati: tukuhabwa kukiz’aho; nawe na bonene nibahabwa buli muntu sumuni emo. 11Ka bagiherwe, nibarundumira nineka, 12nibagira bati: Abahereruka banu bakora saha emo yonka, kai wabenganisya n’etwe, abanaranara musana gwona n’empita. 13Wenene nasubiramo omo muli bonene nagira ati: Munwani, tinakusyera pai; si tiwalagene n’ene kuhabwa sumuni emo? 14Twara ebyawe, ogende; ine nkwenda kuha onu ayahereruka nk’okwo nakuha. 15Si tinkuhicha kukola ebyo nkwenda? nangu eliso lyawe n’ibi, obwo ine ndi muzima? 16Nikwo ab’enuma baliba ba mbere, kai aba mbere baliba b’enuma; kuba bakayetwa bengi, nawe abasozirwe ni bake#20, 16 Mungu Omuhicha wa byona akularika abantu bona fu kukol’ emilimo zo kuchungula emyoyo zabo. Abandi bakutandika bwangu kukol’ emilimo ezo, abandi batandika kulengahara, kumara bazikola. Esumuni egyo nibw’obulame obutahwaho. Bona abakuzikola bakubona sumuni, bakuhika mw’igulu..

YEZU NASUBA KULAGA OBUSASI BWE. — NINA BENDE ZEBEDEYO NABASABIRA.

17Yezu ka yanegere Yeruzalemu, naihaho abahemba ikumi na babili bwesereke, nabagira ati: 18Lora, twanegera Yeruzalemu, Omwana w’omuntu alisagarwa ha bakuru b’abasaserdoti n’abandiki, balimulamula kufwa; 19balimuha abasenzi bamusekerere, bamuteze amasanzu, kai bamulege ha musalaba, kandi ha lunaku lwa kasatu alizoka.

20Aho nina bende Zebedeyo namuzaho n’abatabani be, namugwa mu maguru, namusaba ekintu. 21Wenene namugira ati: Okwenda ki? Nagira ati: Kasinge, gira abana bange banu babili bekare mu bukama bwawe, omo ha bulyo bwawe, ondi ha bumoso. 22Yezu nasubamo nagira ati: Timukumanya echo mukusaba. Mukuhicha kunwa ha kikompe echo ine ndinwa? Nibamugira bati: Tukuhicha. 23Nabagambira ati: Nikwo mulinwa ha kikompe change; nawe kwikara ha bulyo bwange hamo ha bumoso ti mulimo gwange kubaha, n’abo Tata yachumire#20, 23 Bende Zebedeyo niz’Emtumwa Yakobo na Yohana, kandi nina niwe Salome. Bakafwer’edini bona ha bubili bwabo, nikwo kunwa ha kikompe cha Yezu.. 24Mbe abandi ikumi ka bahulire, nibanigahalira b’end’emo babili abo. 25Nawe Yezu nabayeta kumwiriraho nabagira ati: Mukumanya okw’abakama b’abasenzi babatwara, n’okwo abakuru babo bali n’obuhicha hali bonene. 26Nawe hal’imwe tibiliba bityo; nawe buli mul’imwe akwenda kuba mukuru, abe mukozi wanu, 27kai mul’imwe akwenda kuba wo kutandika, abe mwiru wanu; 28nk’okw’Omwana w’omuntu atezire kukolerwa, nawe kukola no kuha omwoyo gwe kuber’obuchunguzi bwa bengi.

ABAHUME BA YERIKO NIBAKIZIBWA.

29Ka barugire Yeriko, embaga ningi nemuruba. 30Nibo n’abahume babili bekere ha muhanda, nibahulira okwo Yezu akurabaho, nibasekana nibagira bati: Mukama wetu, notusasire, mwana wa Daudi. 31Embaga nebachahalira babuze; bonene niho nibaguma kusekana nibagira bati: Mukama wetu, mwana wa Daudi, notusasire. 32Yezu nayemerera nabayeta, nagira ati: Mukwenda mbakolere ki? 33Nibamugira bati: Mukama wetu, ameso getu gabururuke. 34Yezu nabasasira, nakwata ha meso gabo, aho n’aho nibabona, nibamuruba.

Currently Selected:

Matayo 20: KED1946

Highlight

Copy