Mark 4
4
CHAPTIR FOWR.
The sawer and the seed: and what the seed soud be. The stillin oʼ the storm.
1And he begude again to teach by the Loch‐side. And an unco thrang gatherʼt till him, sae that he gaed intil a boat, and sat iʼ the Loch; and aʼ the folk war by the Loch, on the lanʼ.
2And he was teachin them a hantle oʼ things in his parables, and said to them in his teaching,
3“Hear ye! Behauld, a sawer gaed oot to saw;
4“And it cam aboot as he sawed, some was strinklʼt aside the fit‐road; and the burdies cam and devoorʼt it.
5“And some fell on rocky bits, whaur it faund little mool; and at ance it brairdit, for that the mool was jimp.
6“And whan the sun raise heigh, it was aʼ birslʼt up; and for that it had nae rute, it dwined awa.
7“And ither fell amang the thorns; and the thorns cam up, and smoored it, and it brocht forth naething.
8“And ither fell intil the gude grunʼ, and gied frute, risin up and growin mair; and brocht forth to thretty‐fauld, saxty‐fauld, and a hunner‐fauld.”
9And he said, “Wha has hearin to hear, lat him hear!”
10And whan he cam to be by his sel alane, thae that war aboot him, wiʼ the Twalʼ, speirʼt at him aboot the Parable.
11And he says to them, “To you the mysteries oʼ the Kingdom oʼ God hae been giʼen; but to them oot‐by, aʼ thir things are gien in parables;
12“Sae that lookin they may look, and no see; and hearin they may hear, and no understaun: gin aiblins they soud turn, and it soud be forgiʼen them.”
13And he says to them, “Ken‐ye‐na this parable? Hoo then wull ye ken aʼ the parables?
14“The sawer saws the Word.
15“And thir are they by the fit‐road, whan the Word is sawn; and whansoeʼer they hear, Sautan comes and cleeks awa the Word whilk was sawn amang them.
16“And thir are they as weel, that are sawn on the rocky bits; wha, whan they hear the Word, tak it to them wiʼ joy,
17“And they hae nae rute in their sels, but staun only for a wee; than whan fash and persecution arises for sake oʼ the Word, at ance they snapper and faʼ.
18“And ither are they sawn amang thorns; they that hear the Word;
19“And the cark oʼ the warld, and the glamor oʼ riches, and the fainness for ither things comin in, ding oot the Word, and it is unfrutefuʼ.
20“And yon are they on the gude grunʼ sawn, sic as hear the Word, and tak it in, and bear frute; thretty, saxty, and a hunner‐fauld.”
21And he said to them, “Dae ye fesh a licht and pit it under a cog, and no to be putten on the staun?
22“For naething is hidden, except aiblins that it micht be brocht oot; nor was keepit secret, but that it soud come to licht.
23“Gin ony man has hearin to hear, lat him hear!”
24And he said to them, “Tak tent what ye hear! in sic measur as ye gie, it sal be measurʼt to ye again — and mair!
25“For he wha has, sal hae mair gien to him; and he wha has‐na, frae him sal be taʼen eʼen what he has!”
26And he said, “Sae is Godʼs kingdom, as gin a man soud cast the seed on the yird;
27“And soud sleep and rise, nicht and day; and the seed soud braird, and be raxin oot, he kens‐na what way:
28“For the yird brings forth frute oʼ itsel; first the braird; eftir, the heid; eftir, the fuʼ pickle iʼ the heid.
29“But whansoever the frute wad gie itsel up, he pits in the heuk, for that the hairst has come.”
30And he said, “To what sal we marrow Godʼs kingdom? or wiʼ whatna pictur sal we pictur it?
31“Like to a seed oʼ the mustard; whilk, whan it is sawn iʼ the yirth, is smaʼer than aʼ the seeds sawn iʼ the yirth.
32“Yet whan it is sawn, it schutes up, and comes to be greater than aʼ the yerbs; and schutes oot great branches, sae that the burdies oʼ the air may howff under the beild oʼt.”
33And wiʼ a hantle oʼ sic‐like parables spak he to them the Word, as they war fit to hear it.
34And but in parables #4:34 Gin he had spoken plain to them, and tellʼt them his Divine character, and the spiritual natur oʼ his Kingdom, they wadna hae listened to him: but he gied them parables to cairry hame, and for the Holie Spirit to work on them wiʼ. A hantle oʼ them wad see belvye!spak he na to them; and whan they war by their sels, he exponed aʼ things to his disciples.
35And the same day, whan gloamin had come, he says to them, “Lat us gang ower till the ither side.”
36And sendin awa the thrang, they tak him, juist as they faund him, iʼ the boat; and ither boats war wiʼ them.
37And thar cam up a great tempest oʼ winʼ; and the waves war dashin ower intil the boat, sae that the boat was fillin.
38And he was iʼ the stern‐sheets oʼ the boat, sleepin on a wee pallet: and they rouse him, cryin, “Maister! care‐ye‐na that we perish?”
39And he roused up, and challenged the winʼ; and said to the Loch, “Peace! Be quate!” And the winʼ gaed doon, and aʼ was lown.
40And he said to them, “Why soud ye be fleyʼd? Hae ye no yet faith?”
41And they war in unco terror; and quoʼ they ane till anither, “Wha can this be, that eʼen the winʼs and the waves obey him?”
Currently Selected:
Mark 4: SCO1904
Highlight
Share
Copy
Want to have your highlights saved across all your devices? Sign up or sign in
Translated by Rev William Wye Smith. Published in Paisley, Scotland in 1904.
