Luke 15
15
CHAPTIR FYFTEEN.
The sheep forwanderʼt. The siller tint. The wastrel son comes hame. Tak ye tent oʼ the Lordʼs meanin!
1And thar war comin till him aʼ the tax men and the ill‐deedie anes to hear him.
2And baith the Writers and the Pharisees war yammerin at him, “This ane taks in ill‐leevin folk, and eats meat wiʼ them!”
3And he spak till them this parable, sayin,
4“Whatna man amang ye, haein a hunner sheep, gin he tine ane frae amang them, disna leaʼ the ninety‐and‐nine iʼ the muirs, and gang awa eftir the forwanderʼt ane, till he lichts on it?
5“And, faʼin in wiʼt, he heizes it on his shouther, rejoicin;
6“And, comin hame, he senʼs for his freends and neebors; sayin to them, ‘Be blythe wiʼ me! for I hae fun my sheep! the ane that forwanderʼt!’
7“I say tʼye, that in siclike sal thar be joy in heeven ower ae sinner repentin, mair nor ower ninety‐and‐nine gude oʼ the folk wha needit nae repentance.
8“Or whatna wumman, haein ten siller‐pennies, gin aiblins she tine ane oʼ them, disna licht a crusie, and soop her hoose, and seek wiʼ tentie care, till whatna time she lichts on it?
9“And, lichtin onʼt, she brings thegither her freends and neebors, sayin, ‘Be ye glad wiʼ me! for I fund the siller‐penny I tint!’
10“Eʼen sae, I say tʼye, sal thar be joy amang the Angels oʼ God ower ae sinner repentin.”
11He said, forby, “A particular#15:11 The Christians iʼ the East caʼ this “The Parable oʼ the Wonnerfuʼ Faither.” Thar are a hantel sic sons; but no aye siccan a faither! Godʼs mercy is infinite! man had twa sons;
12“And the young#15:12 We say “young” son, and (v. 25) “auld” brither in Scots; no as meanin the number oʼ their years, but juist “junior” and “senior.” son said till his faither, ‘Faither! gie me my portion that wad faʼ to me oʼ aʼ the gear!’ And he portioned oot till them his leevin.
13“And, a wheen days eftir, the young son gaitherʼt aʼ his gear thegither, and gaed awa frae hame till a far‐awa lanʼ; and thar sperflʼt his gear in riotousness.
14“But mair: whan aʼ was gane thar cam up an awesome famine oot?-?throwe yon lanʼ; and he begude to be wantin.
15“And he gaed awa, and was sornin on ane oʼ the men oʼ that lanʼ: and he sent him oot‐by to herd swine.
16“And he fain wad fillʼt his sel wiʼ the hools the swine war eatin; and nae ane gied them till him.
17“But, cominʼ till his richt minʼ, quoʼ he, ‘Hoo mony are the feeʼd servants oʼ my faither, wha hae rowth oʼ breid, and an over‐come; while I, here, dee oʼ hungʼer!
18“ ‘I will rise and gang tae my faither, and wull say till him, My faither! I hae dune wrang, again Heeven, and afore you;
19“ ‘Nae mair am I fit to be caʼd yere son; mak me like till ane oʼ the feeʼd servants!’ And, sae risin, he cam awa till his faither.
20“But, while he was yet haudin far‐awa, his faither spyʼt him, and was fuʼ oʼ compassion; and rinnin, he fell on his neck, and begude kissin him.
21“And the son said till him, ‘My faither! I did wrang again Heeven, and afore you: I am nae mair wordie to be caʼd yere son!’
22“But the faither said to the servants, ‘Waste nae time! bring oot a robe — the first and best ane — and pit it on him; and gie a ring for his fingʼer, and shoon for his feet;
23“ ‘And bring oot the stallʼd cauf, and#15:23 We may well believe that the cauf was fed iʼ the stall, to be ready for a sacrifeece. Tregelles, has it “sacrifeece,” in v. 23 and 30. But whatna occasion oʼ sacrifeece coud marrow that oʼ gettin back his lost son! kill it; that we may eat and be joyfuʼ!
24“ ‘For he my son, was deid, and cam to life again; he had been tint, and is fund again!’ And they begude to be joyfuʼ.
25“But his auld brither was iʼ the field: and, as he cam in, he drew nar the hoose, and heard music and dancin.
26“And, beckonin till him ane oʼ the feeʼd folk, he speirʼt what aiblins aʼ this micht mean?
27“And he said till him, ‘Yere brither has come back again; and yere faither has killʼt the stallʼd cauf, for that he gat him hame again aʼ safe and sounʼ.’
28“But he was fuʼ oʼ angʼer, and wadna gang in. His faither, thoʼ, cam oot, and was entreatin him.
29“But he, answerin him, said till his faither, ‘See! aʼ thir years hae I serʼt ye; and never did I gang ayont yere commauns; and at nae time did ye gie me eʼen a kid, that I micht mak a feast for my freends;
30“ ‘But whaneʼer this yere son, wha has devoorʼt yere leevin wiʼ harlots, cam, ye killed the stallʼd cauf!’
31“But he said till him, ‘Bairn! thou art aye wiʼ me! and aʼ that is mine is thine!
32“ ‘But it was richt we soud mak merry and rejoice; for he, thy brither, was deid, and cam back to life again; he had been tint, and was fund!’ ”
Currently Selected:
Luke 15: SCO1904
Highlight
Share
Copy
Want to have your highlights saved across all your devices? Sign up or sign in
Translated by Rev William Wye Smith. Published in Paisley, Scotland in 1904.
