John 20
20
CHAPTIR TWENTY.
“Joy comes iʼ the mornin!” Mary Magdalene, Peter, and Tammas; but Tammas was dour aboot believin.
1But on the first day oʼ the week, Mary oʼ Magdala comes earʼ — for it was yet mirk — to the tomb; and she sees the stane taen awa frae the tomb.
2Than she rins, and gaes to Simon Peter, and to the ither disciple wham Jesus loʼed, and says to them, “They hae taʼen awa my Lord oot oʼ the tomb, and we kenna whaur they hae laid him!”
3Sae Peter gaed oot, and the ither disciple, to gang to the tomb.
4And they ran baith thegither; and the ither ane ootran Peter, and cam first to the tomb.
5And he, loutin doon, saw the linen claiths lyin; but he gaed‐na in.
6Than Peter comes, eftir him, and gaed intil the tomb, and saw the linen claiths lyin;
7And the naipkin that was rowʼt aboot his heid, no lyin wiʼ the linen claiths, but rowʼt up in a place by itsel.
8And than gaed in the ither disciple wha cam first to the tomb; and he saw, and believʼt.
9For till noo they kent‐na the Scriptur, that he soud rise frae ʼmang the deid.
10The disciples than gaed awa again to their ain hame.
11But Mary stood oot‐by, at the tomb, and #20:11 Like a rainbow throwe the rain, Mary saw in her tears what Peter and John saw‐na wiʼ plain vision!greetin; and as she grat, she loutit doon, and peerʼt intil the tomb.
12And saw twa Angels in white, sittin, ane at the heid, and the tither at the fit, whaur the corp oʼ Jesus had been laid.
13And they say to her, “Wumman, why greetin sae?” She says to them, “For that they hae taen awa my Lord, and I kenna whaur they hae laid him!”
14Sayin this, she turned aboot, and saw Jesus staunin, and kent‐na that it was Jesus.
15Jesus spak to her, “Wumman, why greetin sae? Wham dae ye seek!” She, takin him to be the gairdener, says to him, “Sir, gin ye hae cairryʼt him awa, tell me whaur ye hae laid him, and Iʼll tak him awa.”
16Jesus says to her, “Mary!” She turned hersel, and cries oot, “Rabboni!” as muckle as to say, “Maister!”
17Jesus says to her, “Stay‐me‐na! for I am‐na yet gane up to the Faither; but gang ye to my brethren, and tell them, ‘I gang up to my Faither and yere Faither, and to my God and yere God!’ ”
18Mary Magdalene cam and tellʼt the disciples that she had seen the Lord, and that he had said thir things to her.
19Than, the same day at eʼen — the first day oʼ the week — whan the doors war #20:19 Here, and v. 26, the doors war steekit, yet Jesus comes ben. Profane wits hae demandit “Hoo cam he in? throwe the key‐hole?” He wha made aʼ things, winna be barred‐oot by a door! He cam and gaed as he wad; and mortal een warna aye permittit to see hoo.steekit whar they war gaitherʼt, for dreid oʼ the Jews, cam Jesus, and stude iʼ the mids, and said to them, “Peace be tʼye!”
20And whan he had said this, he schawed them his hauns and his side. Than the disciples rejoiced, seein the Lord.
21Than said Jesus to them again, “Peace be tʼye! As the Faither has sent me, eʼen sae send I you!”
22And whan he had sae said, he breathed‐oot on them, and says to them, “Receive ye the Holie Spirit!
23“Whase sins ye forgie, they sal be forgiʼen to them! and whase sins ye retain, they are retained to them.”
24But Tammas, ane oʼ the Twalʼ, the ane caʼd “The Twin,” wasna wiʼ them whan Jesus cam.
25The ither disciples than said to him, “We hae seen the Lord!” But he said to them, “Gin I see‐na in his hauns the prent oʼ the nails, and gin I pit‐na my fingʼer intil his side, I canna believe!”
26And eftir an aucht‐days again, his disciples war in, and Tammas wiʼ them, Jesus comes — the doors being steekit — and stude iʼ the mids, and says, “Peace be tʼye!”
27Than says he to Tammas, “Rax oot yere finger, and see my hauns; and rax here yere haun, and pit it intil my side; and be‐na dootin, but believin!”
28And Tammas, answerin, said to him, “My Lord! and my God!”
29Jesus says to him, “Tammas! for that ye hae seen me, ye believe; happy they wha haena seen me, and yet believe!”
30And mony ither ferlies maist truly did Jesus afore his disciples, whilk arena putten doon iʼ this buik.
31But thir are putten doon, that ye soud believe that Jesus is the Christ; and believin, ye micht hae life in his name.
Currently Selected:
John 20: SCO1904
Highlight
Share
Copy
Want to have your highlights saved across all your devices? Sign up or sign in
Translated by Rev William Wye Smith. Published in Paisley, Scotland in 1904.
