Yohana 18

Abhakangati bha Bhayahuuti ˆbhakamughööta Yesu

(Mataayo 26:47–56; Maariko 14:43–50; Ruuka 22:47–53)

1Hano Yesu amariri ghusabha, aghatanura na abhaanabheegha bhaache, aghaye amwambuko o ghataaro gha Ketirooni, ahaghiro hano haare ne ekinyaweera, Yesu na abhaanabheegha bhaache bhaghasöha‑mu.

2Yuuta uno ꞉amwigharoriini Yesu, naare aheeche ahaghiro hayo, gho kubha Yesu naare anariri ghuye‑mu eriibhagha ryaru haghirohamu na abhaanabheegha bhaache. 3Mbe, Yuuta akarikangata erikinda re bhaashirikare, haghirohamu na abhatamishi bhano bharuure mo‑bhakoro bha bhachaama na kwo Mabharisaayo. Bhaaghaye mo‑kinyaweera kiire, bhaghöötëriire ebhemore ne emyenge, ne ebhiröönërö.

4Mbe, Yesu naare eche ghoose ghano ghakuucha komubhöna, aghatanura aghaye akabhabhoori abhaato bhayo akabhugha, “Kana, n‑niwe moghutabhara?” 5Ibho bhakamugharokeri bhakabhugha, “Ntokomutabhara Yesu uno aruure Nasareeti.” Yesu akabhagharokeri akabhugha, “Eni niwe.”

Yuuta uno ꞉amwigharoriini Yesu naare imeeriire haghirohamu nabho. 6Mbe, hano Yesu abhabhooriire kubha, “Eni niwe,” abhaashirikare bhaare bhaghagharuka anyuma bhaaghagho haase. 7Yesu akabhabhoori wiiki akabhugha, “Kana, n‑niwe moghutabhara?” Ibho bhakamugharokeri bhakabhugha, “Ntokomutabhara Yesu uno aruure Nasareeti.” 8Yesu akabhabhoorera akabhugha, “Nebhabhooriire kubha, Eni niwe. Aribha moghuntabhara eni, mbe, mobhatighe abhaato bhano bhaanyi haghirohamu na neeni bhaghëndë.” 9Yesu ꞉naabhughiri hangʼu kubha ghahikeerane ghano ꞉asiikiire kubha, “Bhaare oheere nterumeeriri koru umu.”#18:9 Mööhi Yohana 6:39, 17:12.

10Simiyooni Bheetero naare ne ekinyamiino, aghakeruusi, akamunyëra omusësë o Muchaama Omokoro na komonunga oghotu gho kwiro. Omusësë uyo eriina reeche naare arabherekeru Marikasi. 11Amare Yesu akamuhatëka Bheetero akabhugha, “Bheetero, gharoki ekinyamiino keecho mo‑choobho yaache. Kana, tweche kubha nekwëndëru ninyaakibhu kinya bhuno Taata ꞉asëëmiri kubha ninyaakibhu?”#18:11 Kana, tweche kubha nekwëndëru ninyaakibhu kinya bhuno Taata ꞉asëëmiri kubha ninyaakibhu? Ekeyunaani ngekobhugha, Netaacha ghokenywera eghisënchö kino Taata aheere kubha nekenywere?

Yesu ˆakahiru o‑Anaasi

(Mataayo 26:57–58; Maariko 14:53–54; Ruuka 22:54)

12Mbe, omokoro o bhaashirikare, haghirohamu ne erikinda reeche, na abhatamishi bha bhakangati bha Bhayahuuti, bhakamughööta Yesu, bhakamubhöha. 13Mbe, bhakamohira singa o‑Anaasi, uno are ishebhiyaara Kayabha. Kayabha uyo niwe are Omuchaama Omokoro eriibhagha riyo. 14Ekeenyuma hayo, Kayabha niwe are abharwachiri Abhayahuuti kubha ngʼoni omooto umu aku gho ghiri e bhaato bhoose.#18:14 Mööhi Yohana 11:50.

Bheetero ˆakamwanga Yesu

(Mataayo 26:58, 69–70; Maariko 14:54, 66–68; Ruuka 22:55–57)

15Simiyooni Bheetero no omoonamwegha owonde mbaare bharamoru anyuma Yesu. Omoonamwegha wuure owonde, Omuchaama Omokoro naare amweche, iwe aghasöha na Yesu mo‑riigho re nyumba e Muchaama Omokoro. 16Amare Bheetero akiimeerera anche mo‑kehita. Niho omoonamwegha owonde uno Omuchaama Omokoro are amweche, akahoroka anche. Aghasiikëra no omuukë umu uno are arachonga ekehita, akamwisherereri Bheetero ghusöha mo‑riigho.

17Mbe, omuukë uyo omochongi, akamobhoori Bheetero akabhugha, “Kana, iye woose taanyi umu mo‑bhaanabheegha bha mooto uno?” Bheetero akamugharokeri akabhugha, “Tiyaanyi, taanyi eni.”

18Abhasësë na abhatamishi bhaare mbaare bhiimeeriire hano haare no omororo gho kubha ꞉haare na nyighita, bhaakabha bharaata omororo. Bheetero woose naare imeeriire haghirohamu nabho, araata omororo.

Omuchaama Omokoro ˆakamobhoori Yesu

(Mataayo 26:59–66; Maariko 14:55–64; Ruuka 22:66–71)

19Mbe, Omuchaama Omokoro uyo, eriina reeche Anaasi, akamobhoori Yesu ighoro e bhaanabheegha bhaache na ameeghi ghaache. 20Yesu akamugharokeri akabhugha, “Eriibhagha ryose neere nerasiikëra na abhaato haheero, neere nereeghi abhaato mo‑risinaghooghi na mo‑riigho re Risëngërö rino Abhayahuuti bhaaru bhahaatëmëërana‑mu. Ntyeghiri ameeghi ghaane gho kobhisa. 21Mbe, ngwake okomboori eni? Obhabhoori bhano ꞉bhaare bharatëghëërëra hano neere nereeghi. Ibho mbeeche ghano neere nerasiikëra na kweghi.” 22Hano Yesu abhughiri ghayo, omoshirikare umu uno are imeeriire haghuhe nawe akamutëma orohe, akamobhoori akabhugha, “Hangʼu okomugharokeri Omuchaama Omokoro?” 23Yesu akamugharokeri akabhugha, “Aribha nebhughiri kobhe, nwërëki obhobhe bhoone. Amare erabha nebhughiri obhuhëënë, ngwake oghantëma?” 24Anaasi akahatëka kubha bhamohire Yesu abhöhuru hangʼu hangʼu kwo Muchaama Omokoro Kayabha.

Bheetero ˆakamwanga Yesu wiiki

(Mataayo 26:71–75; Maariko 14:69–72; Ruuka 22:58–62)

25Mbe, eriibhagha Bheetero are ikeere araata omororo, abhaato nyarebhe bhakamobhoori bhakabhugha, “Kana, na niiye taanyi umu o bhaanabheegha bha mooto uno?” Bheetero akabhagharokeri akabhugha, “Tiyaanyi, taanyi eni.”

26Amare umu o bhasësë bha Muchaama Omokoro uno are omohiiri o mooto uno Bheetero anyëriri oghotu, akamobhoori akabhugha, “Kana, eni nteekorooche eriibhagha onyi haghirohamu na Yesu mo‑kinyaweera?” 27Bheetero akaanga wiiki akabhugha, “Taanyi eni.” Hayo hayo, asërëëcha eghaghamba.

Abhakangati bha Bhayahuuti ˆbhakamohira Yesu o‑Bhiraato

(Mataayo 27:1–2, 11–14; Maariko 15:1–5; Ruuka 23:1–5)

28Mbe, hano bhookiire, abhakangati bha Bhayahuuti bhakamwimoki Yesu koru o‑Kayabha, bhaaghaye nawe mo‑nyumba e ghitëmi e mokoro o Bharuumi. Amare ibho bhataasöhiri mo‑nyumba iyo#18:28 Bhataasöhiri mo‑nyumba iyo. Kurëngʼaana na chaasughara che Bhayahuuti, erabha Omuyahuuti ꞉asöhiri mo‑nyumba e mooto uno ataanyi Omuyahuuti nighonchiri, tangatoriri kurë ekiinyakurë ke mo‑nyangi e Bhaasaka. kubha bhatighonchi, kubha bhatore kurë ebhiinyakurë bhe nyangi e Bhaasaka. 29Mbe, omukangati o Bharuumi, eriina reeche Bhiraato, akahoroka anche, akabhasëëta, akabhabhoori akabhugha, “Moonyi na amasëmö ke ighoro e mooto uno?” 30Ibho bhakamugharokeri bhakabhugha, “Aribha omooto uno tangabheere ne eriisari, totangamurëëtiri ghokoocho.” 31Bhiraato akabhabhoorera akabhugha, “Mbe, inyu momwimoki momotenere ekiina kurëngʼaana ne emeghiro gheenyu.” Amare ibho bhakamugharokeri bhakabhugha, “Totaanyi no obhotoro bho komotenera ekiina omooto wowoose kubha aku.” 32Ghayo ꞉ngaaköruru hangʼu, kubha amangʼana ghano Yesu ꞉abhughiri ghahikeerane kwërëki kebhuno aghoku.

Bhiraato ˆakamobhoori Yesu

33Mbe, Bhiraato aghasöha wiiki mo‑nyumba e ghitëmi, akahatëka kubha bhamurëëtë Yesu ghokooche, akamobhoori akabhugha, “Kana, iye niiye uno bhakobhugha, Omutëmi o Bhayahuuti?” 34Amare Yesu akamugharokeri akabhugha, “Kana, nombooriri hangʼu kwo miihëëbhö ghaacho iye mwene, ghasi na abhaato abhande bhakobhooriire amangʼana ghaane?” 35Bhiraato akamugharokeri akabhugha, “Kana, eni n‑Omuyahuuti? Abhaato bha ritöngö reecho haghirohamu na abhakoro bha bhachaama nibho bhakurëëtiri ghokoone kubha neghotenere ekiina. Kana, n‑eriisari ke uköriri?” 36Yesu akamugharokeri akabhugha, “Obhutëmi bhoone taanyi bho mo‑se ino. Aribha mbongabheere bho mo‑se ino, abhaanabheegha bhaane mbangandoniire kubha netaghöötu na Abhayahuuti. Amare obhutëmi bhoone bhotaanyi bho hano.” 37Mbe, Bhiraato akamobhoori akabhugha, “Kana, m‑mahëënë kubha iye n‑omutëmi?” Yesu akamugharokeri akabhugha, “N‑iye ˆokabhugha kubha eni n‑omutëmi. Eni niibhwiru mo‑se ino, wiiki niichiri kubha nebheeghi abhaato obhuhëënë. Omooto wowoose uno aghutambana obhuhëënë, naghoghooghu amangʼana ghaane.” 38Bhiraato akamobhoori akabhugha, “Obhuhëënë n‑ghento ke?”

Hano Bhiraato abhughiri ghayo, akahoroka anche wiiki, akabhabhoorera abhakangati bha Bhayahuuti akabhugha, “Eni ntiimara ndighi eriisari ryoryose re komusëma. 39Amare inyu moonyi na asughara e ghunsabha nebhiighorere omubhöhu umu eriibhagha re nyangi e Bhaasaka. Kana, mokwënda nemotighooroke Omutëmi o Bhayahuuti?”

40Amare abhaato bhoose bhaghaköra eriireghe bharabhugha, “Tiyaanyi! Otatwighorera omooto uyo, amare otwighorere Bharaabha.” Bharaabha uyo naare abhöhuru mwighërëcha gho ghiri e bhunyangara.#18:40 Obhunyangara. Egheteemoro ekende ngeghotora kubha, obhwigharurani.

Currently Selected:

Yohana 18: ntk

Highlight

Copy