Yohana 11

Oroko ro Rasaaro

1Mbe, naare‑ho omooto umu eriina reeche Rasaaro, naare omubhabharu. Omooto uyo naare ariikara mo‑kyaro ke Bhetaniya haghirohamu na abhasubhaati bhaabho, Mariyamu na Marita. 2Mariyamu uyo are ömööbhö Rasaaro, niwe ꞉amuhakiri Omutëmi Yesu amaghuta gha keneeso na komusangura amaghoro gho chanchweri cheeche.#11:2 Mööhi Yohana 12:1–8. 3Mbe, Mariyamu na Marita bhaghatomani amangʼana o‑Yesu bhakabhugha, “Oo Omutëmi, musaani waacho Rasaaro m‑bhabharu.” 4Hano Yesu oghwire amangʼana ghayo, akabhugha, “Obhubhabharu bhuyo taanyi bho komwita, amare m‑bho kwërëki obhokumi obhokoro bho Ryobha, kubha Omoona o Ryobha aghongibhu kohetera obhubhabharu bhuyo.” 5Yesu ꞉naabhasiighiri chwee Marita, na Mariyamu na Rasaaro. 6Mbe, eriibhagha Yesu ꞉oghwire kubha Rasaaro naare omubhabharu, akëëngëra ghwikara hayo are gho chaasiko ibhere.

7Hano chehetiri chaasiko ibhere, Yesu akabhabhoorera abhaanabheegha bhaache akabhugha, “Ntugharuke wiiki Yuteya.” 8Abhaanabheegha bhaache bhakamugharokeri bhakabhugha, “Oo Omweghi, n‑ghano matiko Abhayahuuti ꞉bhëëndiri ghokurasa na amabhohe kubha bhaghwite. Mbe, neke okwënda ghogheera iyo wiiki?” 9Yesu akabhagharokeri akabhugha, “Kana, omwishe taanyi amasa ikomi na abhere? Omooto araghënda omwishe, taaghotora ghwituuratuura oghoghoro kooche gho kubha nakorighi obhwero bho mo‑se ino. 10Amare uno aghughënda obhotiko, naghwituuratuura gho kubha bhotaanyi‑ho obhwero bho komusakeri.”#11:9–10 Mööhi Yohana 8:12.

11Yesu eriibhagha abhughiri ghayo, akëëndërëra kobhabhoorera abhaanabheegha bhaache akabhugha, “Musaani wiito Rasaaro namisiri, amare neeghuye komosisimora.” 12Mbe, abhaanabheegha bhaache bhakamugharokeri bhakabhugha, “Oo Omutëmi, erabha amisiri, nakuhöra.” 13Yesu naare arasiikëra kubha Rasaaro nakuure, amare abhaanabheegha bhaache bhaghiituuri kubha nakobhabhoorera kubha, namisiri chandöörö. 14Mbe, Yesu akabhabhoorera haheero akabhugha, “Rasaaro chaasiko nchemoriire. 15Amare eni neghuchömëru kubha nteere‑ho eriibhagha Rasaaro aghoku, kubha inyu mubhönë ghonkumi. Ibheere ntughëndë ghokooche.” 16Omoonamwegha umu eriina reeche Tomaso uno bhamobherekiire Eghisare, akabhabhoorera abhaanabheegha bhaghëndi bhaache akabhugha, “Tughëndë na niitu toku haghirohamu nawe.”

Yesu naanyi na changuru che koryoki abhaku

17Mbe, Yesu hano ahikiri mo‑moghya o Bhetaniya, akabhöna Rasaaro amariri chaasiko inye mo‑mbeehera. 18Omoghya o Bhetaniya noore chakiromeeta ishato hangʼu koru Yerusareemu. 19Abhayahuuti bhaaru koru Yuteya ꞉mbiichiri Bhetaniya kobhasongoreri Marita na Mariyamu, gho ghiri e roko ro Rasaaro ömööbhö.

20Hano Marita oghwire kubha Yesu nakuucha, akahoroka anche aghaye komoturungʼanera, amare Mariyamu aghasaagha mo‑nyumba. 21Marita akamobhoorera Yesu akabhugha, “Oo Omutëmi, aribha ongabheere hano omwito tangakuure. 22Amare koru ibheere nyeeche kubha ghyokyose kino oghusabha Eryobha, ndeghokuha.” 23Niho Yesu akamugharokeri akabhugha, “Ömöönyu nakoryoka.” 24Marita akabhugha, “Oo Omutëmi, nyeeche kubha Eryobha eriibhagha rekobharyoki abhaato bhoose mo‑rosiko ro ntenero, woose nakoryoka na kubha muhöru wiiki.” 25Yesu akamugharokeri akabhugha, “Eni neeni obhoryoki bhuyo, no obhuhöru. Omooto wowoose uno aghonkumi eni, koru nangabha akuure, naakubha muhöru. 26Wowoose uno anyi muhöru ino arankumi eni, taaghoku naabha. Kana, noghoghakumi ghayo?” 27Marita akamugharokeri akabhugha, “Mahëënë Omutëmi, neghokumi kubha iye niiye Kirisito, Omoona o Ryobha, uno ëndiiru kuucha mo‑se.”

Yesu ˆakarera

28Hano Marita abhughiri ghayo, aghaye komobherekera Mariyamu. Mbe, akamobhoorera kibhacho akabhugha, “Omweghi hano anyi, naghokobherekera.” 29Hano Mariyamu oghwire ghayo, akabhooka bhwango, aghaye o‑Yesu. 30Yesu naare akeere ghusöha mo‑kyaro kiyo, naare haare haare hano Marita aghiire komoturungʼanera. 31Abhaato bhano ꞉bhaare bhaghiire komorighi na komosongoreri Mariyamu, ꞉mbaamorooche arabhooka bhwango na kohoroka. Mbe, bhakamutambana, gho kubha ꞉mbiituuriri kubha Mariyamu ˆaghaye mo‑mbeehera kubha arerere iyo.

32Eriibhagha Mariyamu ꞉ahikiri hano Yesu are, akamorighi, akabhuna ebheru ambërë yaache, akamobhoorera akabhugha, “Oo Omutëmi, aribha ongabheere‑ho, omwito tangakuure.” 33Hano Yesu amorooche Mariyamu ararera haghirohamu na abhaato bhano ichiri nabho, akabha no obhororo chwee mo‑körö yaache. 34Mbe, akabhabhoori akabhugha, “Hayi momotooriri?” Bhakamugharokeri bhakabhugha, “Oo Omutëmi, ntughëndë tokwërëki.” 35Yesu akarera. 36Niho abhaato bhano ꞉bhiichiri mo‑roko bhakabhugha, “Mööhi kebhuno are amosiighiri Rasaaro!” 37Amare abhande bhakabhugha, “Omooto uno niwe ꞉amuhöriri omohuku wuure, ngwake taaköriri ghyokyose kwo Rasaaro kubha ataku?”

Yesu ˆakamoryoki Rasaaro

38Yesu eriibhagha akeere anyi no obhororo mo‑körö yaache, akahika mo‑mbeehera. Ambeehera iyo, neere akööbhö ino bhakundekiiri ne eriibhohe ikoro ighoro yaache. 39Yesu akabhabhoorera abhaato bhano ꞉bhaare hayo akabhugha, “Moreruusi eriibhohe riyo.” Marita, uno are omosubhaati o uno akuure, akamugharokeri akabhugha, “Oo Omutëmi, ibheere ˆaghasëëma kohucha, gho kubha namariri chaasiko inye anyi mo‑mbeehera.” 40Yesu akamobhoorera akabhugha, “Kana, nteekobhooriire kubha, erabha noghokumi, nokobhorighi obhokumi obhokoro bho Ryobha kebhuno bhoonyi?”

41Mbe, bhakareruusi eriibhohe riyo. Yesu aghagharaamereri Mwishaaro, aghasabha Eryobha akabhugha, “Oo Taata, neghoghwitabheri gho kubha nooghwire amasabhi ghaane. 42Nyeeche kubha nohaanyoghu eriibhagha ryose, amare neghosiikëra ghano gho ghiri e rikinda re bhaato bhano, kubha bhakumi kubha n‑iye ontomiri.” 43Hano Yesu abhughiri ghayo, aghatiiri eriiraka ikoro akabhugha, “Rasaaro, horoka uche!” 44Niho omoku akahoroka ino amaghoro na amabhökö ghaache ghiinaariiru asanda. Wiiki naare ne eghitambara kino bhamubhöhiri mo‑bhosho. Yesu akabhabhoorera abhaato bhaare akabhugha, “Momusaasure asanda, momotighe aghi.”

Abhakangati bha Bhayahuuti ˆbhakarwacha komwita Yesu

(Mataayo 26:3–5; Maariko 14:1–2; Ruuka 22:1–2)

45Mbe, Abhayahuuti bhaaru mo‑bhano ꞉bhiichiri komorighi Mariyamu, hano bhagharooche ghayo Yesu aköriri, bhakamokumi. 46Amare Abhayahuuti abhamu bhaaghaye kwo Mabharisaayo bhakabhabhoorera ghano Yesu aköriri. 47Mbe, abhakoro bha bhachaama na Amabharisaayo bhakabherekera ekiina ke riibharacha eriikoro bhakabhoorani bharabhugha, “Tukörë bhu? Omooto uno naghuköra ebhyërëkërëri bhyaru. 48Aribha toramotigha kubha akörë ebheroghooro bhiyo hangʼu, abhaato bhoose mbakomokumi. Abharuumi mbakuucha na ghusari ase yiito ne Erisëngërö.”

49Niho umu mo‑bhakoro bhaare eriina reeche Kayabha, uno are Omuchaama Omokoro o mooka uyo, akabhabhoorera akabhugha, “Inyu moteeche ghyokyose! 50Kana, moteeche kubha ngʼoni omooto umu aku gho ghiri e bhaato bhoose, ghokera eritöngö riito ryose ghosireekereru?” 51Kayabha taabhughiri ghayo gho kwënda kooche omwene. Amare gho kubha naare Omuchaama Omokoro mo‑mooka uyo, naare aruusiri obhurööti kubha Yesu naaghoku gho ghiri e ritöngö re Bhayahuuti. 52Wiiki Yesu taaghoku gho ghiri e ritöngö riyo eryene chiri, amare kubha abhakome abhaana bha Ryobha bhano bhasanchiri, kubha bhabhe haghirohamu.

53Korwera orosiko ruyo, abhakangati bha Bhayahuuti bhaghasëëma obhorwachi bho komwita Yesu. 54Gho ghayo, Yesu aghatigha ghughënda haheero iyo Yuteya. Amare akaru hayo aghaye haghuhe na mwibhara, mo‑moghya uno okobherekeru Ebhurayimu, aghiikara iyo haghirohamu na abhaanabheegha bhaache.

55Anyangi e Bhaasaka e Bhayahuuti neere ˆeghatingʼi. Abhaato bhaaru bhaghatanura koru mo‑meghya gheebho ghuye Yerusareemu, kubha bhiiyeri anyangi iyo ekeere kohika.#11:55 Mööhi Kubhara 9:10; 2 Amangʼana gha Mabhagha 30:17–19. 56Hano bhiikomiine haghirohamu Mwisëngërö, bhaakabha bharamutabhara Yesu, bhakabhoorani bharabhugha, “Inyu morighi bhu? Kana, omooto uno taakuucha inkongʼorimu mo‑nyangi?” 57Abhakoro bha bhachaama na Amabharisaayo mbaare bhahatëkiri kubha, omooto wowoose uno eche hano Yesu anyi, arëëtë amangʼana kubha bhamughöötë.

Currently Selected:

Yohana 11: ntk

Highlight

Copy