Yohana 12

Mariyamu ˆakamuhaka Yesu amaghuta

(Mataayo 26:6–13; Maariko 14:3–9; Ruuka 7:36–50)

1Hano cheere chisaaghiri chaasiko ishaasabhe anyangi e Bhaasaka ehike, Yesu akahika wiiki Bhetaniya ahaghiro hano Rasaaro amanyiri uno Yesu aryokiri koru mo‑bhaku. 2Mbe, abhaato bha haghiro hayo bhakamukörëra ebhiinyakurë bhe mughörööbha. Marita akabha arabhahökëri. Rasaaro naare umu ghate e bhaghëni bhano bhiikeere mo‑meecha haghirohamu na Yesu. 3Niho Mariyamu akiimoki achubha e maghuta gha riighori ikoro gha keneeso ghichömu, akamuhaka Yesu mo‑maghoro, akamusangura na chanchweri cheeche. Anyumba ingima eghiichora ekeneeso ke maghuta ghayo.

4Amare umu o bhaanabheegha bhaache eriina reeche Yuuta Isikariyoote, uno akuucha komwigharurani Yesu, akabhugha, 5“Ngwake amaghuta ghayo ghataaghoruru chatinaari amaghana atato#12:5 Chatinaari amaghana atato nchiirëngʼiine na amareho gha mooto kwo mooka moghima. na kobhaha abhahabhe?” 6Yuuta taabhughiri hangʼu gho ghiri e kobhaghwera ebheghongi abhahabhe, amare n‑gho kubha are omwibhi. Iwe niwe are aratindeka eriighöchi re chambiiri. Naare ariibha chambiiri chino chetooruru mo‑riighöchi riyo. 7Mbe, Yesu akamugharokeri Yuuta akabhugha, “Otamunyaaki omukari uno, omotighe, antoorere amaghuta gho ghiri e rosiko runo bhakondyeka. 8Abhahabhe mookubha nabho chaasiko choose. Amare eni nteekubha haghirohamu na niinyu chaasiko choose.”

Abhakangati ˆbhakarwacha komwita Rasaaro

9Mbe, abhaato bhaaru bhakooghu kubha Yesu naare ahaghiro hayo. Niho bhaaghaye taanyi gho komorighi Yesu okwene, amare bhatore komorighi na Rasaaro, uno Yesu amoryokiri koru mo‑bhaku. 10Niho abhakoro bha bhachaama bhaghaköra ekiina ghe komwita Rasaaro woose, 11gho kubha gho ghiri yaache, Abhayahuuti bhaaru ꞉mbaabhatighiri, bhakamokumi Yesu.

Yesu ˆaghasöha Yerusareemu gho chandiryato

(Mataayo 21:1–11; Maariko 11:1–11; Ruuka 19:28–40)

12Atabhoori yaache, erikinda ikoro re bhaato bhano ꞉bhiichiri mo‑nyangi e Bhaasaka, ꞉mbooghwire kubha Yesu naanyi mo‑nchëra kuucha Yerusareemu. 13Mbe, bhakiimoki amato gha mitëndë, bhaaghaye komoturungʼanera Yesu. Bhaghatiiri eriiraka bharabhugha,

“Hosaana!#12:13a Hosaana n‑angʼana e Keyunaani. Kare haare egheteemoro keeche nkeere Toori, hamu Totoori ibheere. Amare mo‑riibhagha re Yesu angʼana ino ꞉niihökiiru gho koreghongi Eryobha hamu Kirisito.

Niitabhiiru uno akuucha kwo riina re Mutëmi Waryobha!

Niitabhiiru Omutëmi o Abhiisiraeri.”#12:13b Mööhi Sabhuri 118:25–26.

14Mbe, Yesu akamubhöna omoona o tikere, akamotiira kinya bhuno yandëkuru mo‑Mandëkö Amatööbhiyu kubha,

15“Inyu abhaato bha Sayuuni#12:15a Sayuuni. Kwo ngʼana ino, umööhi Yerusareemu mo‑mangʼana amaköngʼu. motatiina!

Mööhi, Omutëmi waanyu nakuucha,

atiiriri omoona o tikere!”#12:15b Mööhi Sakariya 9:9.

16Eriibhagha riyo, abhaanabheegha bha Yesu bhataamënyiri ghayo. Amare hano Yesu aryokiri, bhakahiita kubha ghano ghaandëkuru ighoro yaache, nibhu abhaato ꞉bhaamuköriire.

17Abhaato bhano ꞉bhaare na Yesu eriibhagha rino ꞉amobherekiire Rasaaro koru mo‑mbeehera na komoryoki koru mo‑bhaku, ꞉mbaasanchiri amangʼana ghayo. 18Gho ghayo, abhaato bhaaru ꞉mbooghwire amangʼana gha kyërëkërëri kino ꞉aköriri, nikyo ꞉ghiighëriri abhaato bhaaru bhaaghaye komoturungʼanera Yesu. 19Amare Amabharisaayo bhakabhoorani bhakabhugha, “Mokorighi? Totaaghotora ghuköra ghyokyose! Mööhi, abhaato bhoose mbakomutambana iwe.”

Yesu ˆaghasiikëra ighoro e roko rooche

20꞉Haare na abhaato bhano bhataare Abhayahuuti ghate e bhano ꞉bhaaghiire Yerusareemu korisëngëra Eryobha mo‑nyangi e Bhaasaka. 21Abhaato bhayo bhakamusëëta Bhiiribho, omwikari o Bhetisaayita mo‑mukööwa o Ghariraaya, bhakamusabha bhakabhugha, “Omosooku, ntokwënda tomorighi Yesu.” 22Bhiiribho aghaye komobhoorera Andereya amangʼana ghayo, bhakamara bhombe bhaaghaye komobhoorera Yesu. 23Yesu akabhagharokeri akabhugha, “Eriibhagha reene eni, uno neenyi Omoona o Mooto, kubhöna obhokumi obhokoro ˆrekahika. 24Mahëënë ˆnekabhabhoorera, erabha ambusuro etarindiiru mwiröbhë na ghoku, teeghotora kumëra, amare erabha erindiiru eghaku, nekumëra na ghusönga amakorobhese maaru. 25Omooto wowoose uno akwënda kobhuhöni obhuhöru bhooche, nakobhobhori obhuhöru bho miishe ghyose, amare omooto wowoose uno ataakobhotereera obhuhöru bhooche mo‑se ino, uyo nakobhuhöni obhuhöru bhooche, kubha bhubhe bho miishe ghyose. 26Omooto wowoose uno akwënda kuuhökëri eni, nekwëndëru antambane. Wiiki hohoose hano neekubha, hayo niho no omutamishi waane akubha. Taata nakomosooka omooto wowoose uno akuuhökëri eni.

27“Ibheere ˆneghasëëma kubha na amacheeche chwee mo‑körö yaane. Nebhughe ke? Kana, nebhughe, ‘Oo Taata, ˆneghaghusabha ontoori kwo riibhagha re nyaako ino?’ Tiyaanyi, nteeghotora ghusabha hangʼu, gho kubha niichiri kunyaaka mo‑se ino. 28Oo Taata Waryobha, wërëki obhotoro bhoocho kebhuno bhoonyi.”

Niho hakarwera eriiraka koru Mwishaaro rerabhugha, “Oo Omoona waane, eni ꞉nyëërëkiri obhotoro bhoone na neghuköra hangʼu wiiki.” 29Erikinda re bhaato bhano ꞉bhaare hayo, hano bhooghwire eriiraka koru Mwishaaro, abhande bhakabhugha kubha, n‑orunanehi rokoruma na abhande bhakabhugha kubha, m-marayika o Ryobha aghosiikëra nawe. 30Amare Yesu akabhabhoorera abhaato bhayo akabhugha, “Eriiraka rino mooghwire retaare gho ghiri yaane, amare ndeere gho ghiri yaanyu. 31Ibheere ˆrekahika eriibhagha re Ryobha ghotenera ekiina ase ino. Ibheere ˆrekahika eriibhagha re Eryobha kuhëëbha Erishambu mo‑bhukangati bho se ino. 32Eni eriibhagha neghotiiribhu, nekobharuta abhaato bhoose bhaache ghokoone.” 33Yesu ꞉naabhughiri hangʼu kwërëki n‑oroko ke akuucha ghoku.

34Mbe, erikinda re bhaato bhakamugharokeri Yesu bhakabhugha, “Ntooghwire mo‑Mandëkö Amatööbhiyu kubha, Kirisito naakubha muhöru emiishe ghyose.#12:34 Mööhi Sabhuri 110:4. Mbe, ngwake okobhugha abhaato mbakomotiiri Omoona o Mooto? Kana, Omoona o Mooto n‑niwe?” 35Yesu akabhabhoorera akabhugha, “Obhwero mboonyi haghirohamu na niinyu kwo riibhagha ighuhe hangʼu. Mughëndë mo‑bhwero bhuyo eriibhagha bhokeere bhoonyi‑ho, kubha ekengʼuuri ghetaacha kobhakinda. Omooto uno aghughënda mo‑kengʼuuri teeche hano aghuye. 36Motoore amiitëngʼërö ghaanyu mo‑bhwero bhuyo kubha mubhe abhaana bha bhwero.” Hano abhughiri ghayo, akaretigha erikinda riire, aghaye kwibhisa bhatamorighi.

Abhayahuuti bhaaru ˆbhakaanga komokumi Yesu

37Koru nangabha Yesu ꞉aköriri ebhyërëkërëri bhyaru ambërë yaabho, abhaato bhaaru bhataamokumiri. 38Ghayo ngabheere hangʼu kubha ghahikeerane amangʼana ghano omurööti Isaaya ꞉abhughiri kubha,

“Oo Omutëmi Waryobha, n‑niwe uno ꞉akumiri amangʼana ghiito?

Wiiki, obhotoro bho Mutëmi Waryobha mbwërëkuru waawe?”#12:38 Mööhi Isaaya 53:1.

39Bhataamokumiri gho kubha Eryobha ꞉ndeebhughiri kohetera kwo Isaaya kubha,

40“Eryobha ndehukwiri amiisho ghaabho

na ghoghiköra emetema gheebho ghibhe miköngʼu,

kubha bhatarighi kwo miisho ghaabho,

na bhatamënya mo‑miihëëbhö ghaabho,

kubha bhatagharuka ghokoone,

kubha nebhahöri.”#12:40 Mööhi Isaaya 6:10.

41Isaaya ꞉naabhughiri ghayo gho kubha ꞉naarooche gho kurë obhokumi obhokoro bho Yesu na kobhugha amangʼana ghaache.

42Koru hangʼu, abhakangati bhaaru bha Bhayahuuti ꞉mbaamokumiri Yesu, amare gho ghiri e Mabharisaayo, bhataamokumiri haheero, bhaghatiina kuhëëbhu mo‑risinaghooghi. 43Abhakangati bhayo ꞉mbaasiighiri chwee ghoghongibhu na abhaato, ghokera ghoghongibhu ne Eryobha.

Ntoghoteneru ekiina kwo mangʼana gha Yesu

44Mbe, Yesu aghatiiri amaraka akabhugha, “Omooto uno aghonkumi eni, taaghonkumi eni omwene chiri, amare nakomokumi na uno antomiri. 45Uno andooche eni, namorooche na uno antomiri. 46Eni niichiri mo‑se ino kinya obhwero, kubha omooto woose uno aghonkumi atighe kubha mo‑kengʼuuri.

47“Omooto wowoose uno aghutëghëërëra amangʼana ghaane, amare taaghoghatambana, eni nteekuucha komotenera ekiina, gho kubha ntiichiri mo‑se ino kobhatenera ekiina abhaato, amare niichiri kobhatoori. 48Omooto wowoose uno akonyanga eni haghirohamu na amangʼana ghaane, naanyi na uno akuucha komotenera ekiina. Amangʼana ghano nebhughiri nigho ghakuucha komotenera ekiina orosiko ro ntenero. 49Neekubha hangʼu gho kubha, ntesiikiire kwo bhotoro bhoone eni omwene, amare Taata uno antomiri, niwe ꞉andagheriiri ghano neghosiikëra, na kebhuno nekuucha ghughamba. 50Wiiki, nyeeche kubha amaraghereri ghaache ngakobhaha abhaato obhuhöru bho miishe ghyose. Mbe, eni neghosiikëra ghaare agheene Taata ꞉andagheriiri nesiikërë.”

Currently Selected:

Yohana 12: ntk

Highlight

Copy