Matíe 20

Glàyʋ̀làgba a mnɩ́ a nɔnʋzrɩ̀nyʋa a núnúó

1Zozíi anɩ́: «A dʋdʋ̀ Lagɔ a Léyibhlɩɛ́, nɩ̀ yɛ́ɛ́ a, nànɩ́ cémʋ́ lágbɩ̀kànyɔ so geglìàmí glù, lé ɔ́ gháyɩ nɔnʋzrɩ̀nyʋa a ká ɔ glàyʋ̀làgbaá nɔnʋʋ́ mʋ a. 2Ɔ yàsɔ́ núnu kɔ́ɔ̀kɔ́ á yruú a pɛ́lʋ́ɔ́ a zà, ɩ́mɩ́ ŋwɔ́ɔ mà nyɔ ka yruú a lɛblɩ̀ a moníi, fɩ́ɛ́ lé ɔ́ fa á lágbaá.#20.2 Yruú a lɛblɩ̀ a moníe mɩ́ ŋwɔ́ɔ: Flèejɩ̀è. 3Glíiyi á fɛna a tányɩ, ɔ́ flʋ zɔ̀ a, ɔ́ yɛ́ sɔ́kʋ́ nɔnʋzrɩ̀nyʋa àna crɩ́kpaá, a nɩ́ nɩ lɛ́. 4Lé ɔ́ srʋ á, ɔ́ anɩ́: A ká ná glàyʋ̀làgbaá mʋ bhè nɔnʋɔ́ a ná ká mɔ̀ɔmɔ̀ zrɩ a, ká amɔ ʋ wlú a moníe pɛ́ɛ. 5Lé nyʋaá mʋ lágbaá. Yrʋ́ ŋnɩ wlúnyɩ̀dɩ a, lágbɩ̀kànyɔ̀ɔ̀ blée sɔ́kʋ́ lé kosúgbo a glíiyi a ta a tányɩɛ́, céamúóó ɩ́mɩ́ ɔ́ nɩ. 6Lé kosúgbòglìyi a gbɩ́ a tányɩ, ɔ́ flʋ sɔ́kʋ́ zɔ̀ lé ɔ́ yɛ́ yígàdà nyʋa àna crɩ́kpaá lé ɔ́ yrá á: Bháa la lɛ́ geglìà kʋ́ a, lɛ́gbá a nie lé a kʋ dɛ́ crɩ́kpa a? 7Bhʋ́ nyʋaá srʋ ɔ́ mà: Nyɔ nɩ́ àyɩ àmɔ̀ nɔnʋ nyɛ́. Lé lágbɩ̀kànyɔ̀ɔ̀ srʋ á mà: Máà a mʋ ná lágbaá a ká zrɩɩ̀. 8Kosúgbo ŋnɩ a, glàyʋ̀làgbàà a kanyɔ srʋ ɔ́ nyɔɔ́ ɔ ŋwʋ́ɛ́ ɔ pɩ́ɛ́ fɩ́ɛ́ yɩ́ gɔ̀ a, mà: wle nɔnʋzrɩ̀nyʋ̀àà kàà pɛ́ɛ! Bháa ànàà bhɩa bɩ́kʋ́ a, jɩ̀ lé kà tagàanaá jɩ̀ zɔ̀ bhɩa! 9Bɩ́kʋ́bhɩa ánaá bháa nɔnʋ kʋ́ kosúgbo a glíiyi a gbɩ́ a tányɩ, ɔ́ pɛ́ɛ nyɔ, flèejìè a múó, múó. 10Mà tagànyʋ̀àà à zrɩ a, á yì la saá mà ánɩ pɛ́ɛ yi la gɔ̀ plɩ́, mà a sɛ́fʋɔ́, yru a nɔnʋ a flèejìè a múóó ɛ́mɛ́ á nyɛ́ á sáà. 11Á bhli a pɛ́ɛ kʋ́ a, á cíe lágbɩ̀kànyɔ̀ɔ̀ a neé kalɛ kʋ́. 12Ɩ́mɩ́ ŋwɔ́ɔ mà: Bɩ́kʋ́bhɩanyʋaá, glíiyie a múó a nɔnʋ á zrɩ, sɩ́tɛ̀ ɩ́ kʋ bhè ɩ̀ pɛ́ɛla àmɔ̀ bhísakʋ́, àmɔ̀ɔ zrɩ yruú a lɛblɩ̀ a nɔnʋ yrʋ́ kalʋ kʋ́ a! 13Lé lágbàà a kanyɔɔ́ srʋ á nyièdɩ a nyɔ mà: Bhée, bhè nɩ́ mɔ̀ dìflɛ́ li a! Yáa mɔ̀ sɔ́ à ŋwʋ́ʋ fɩ́ɛ́ yruú a nɔnʋɔ́ a flèejìè a múó a wɔlɩ́ɛ́ kʋ́ a, kpɔkplá á? 14Bhli nà pɛ́ɛ kʋ́ kà mʋ, mà céamúó ɩ́mɩ́ na ká yà bɩ́kʋ́bhɩanyɔɔ́ sɔ́ pɛ́ɛ. 15Mɔ́ mɔ̀glʋ̀ ná moníi, cémʋ́ ɩ́ wà a, sɩ́tɛ̀ mʋ́ na kɩ́ɩ́ mʋ́ nɩɩ. Ɛ̀ nɩ́ sɩ́tɛ̀ ŋwɔ́ɔ? Mà námɛɛ́ ɩ́ nie a, ɛ́mɛ́ nɩɩ́ wà a?» 16Bhʋ́ Zozíi sa né: «Nyʋaá kʋ̀ bɩ́kʋ́ a, á yi drɩ̀ plɩ́ɩ̀, lé drɩ̀ anaá yi bɩ́kʋ́ plɩ́ɩ̀.»

Taàda Zozíi cíle lɛ́ ɔ kwɩ́ yà ɔ́ galɔ̀ɛ̀ sɔ́ a wɔlɩ́

(Málɩ́kɩ 10.32‑34; Lúkɩ 18.31‑34)

17Zozíi yà ɔ́ kʋjɩ̀nyʋ̀àà sɔ́ kʋ Zelízalɛ́mʋ a nyúzɔ kʋ́, lé ɔ yà áa kʋ́gbá sɔ́ɔ́ sɔ́ gbʋ́gbʋ̀ lé ɔ́ srʋ á: 18«A dʋdʋɛɛ, à mnɛ yɩ́ lɛ́ Zelízalɛ́mʋ, náa srʋɛ yɩ́ lɛ́ amɔ mà, Nyɔɔ́ a Yuwliyʋɔ́, á yio Lagɔ̀bʋ̀bɔ̀nyʋ̀àkádàà yà lɔ̀ a másɛnyʋaá sɔ́ wlɩ pɛ́lʋ́ ŋwʋ́ a kɔ́ɔ́ bhlá. 19Á yio nyʋa à nɩ́ Lagɔ yì a, wlɩ pɛ́lʋ́ ŋwʋ́ʋ lé á yio nyɩa, á yio sɩ́á, á yio kúsu jɩ̀ kʋ lé ɔ́ yi kú, mà ɔ nɩ kú a, tayruó kʋ́, ɔ́ yi galɔ̀.»

Zebedée a ŋwnɔ́ sra Zozíi a drɩ̀ koti sá

(Málɩ́kɩ 10.35‑40)

20Zebedée a ŋwnɔ́ yà ɔ yúó sɔ́ mʋ Zozíi gɔ̀, lé ŋwnɔ́ɔ́ sra Zozíi a drɩ̀ koti sá, ɔ kɔ́ɔ́ zrà a. 21Bhʋ́ Zozíi yrá ŋwnɔ́ɔ́ mà: «Lɛ́gbá ɩ̀ yrá à?» Ŋwnɔ́ɔ́ anɩ́: «Ɩ́ yrá lé ná yúó sɔ́ɔ lɩ̀à, ká nà léyibhlɩɛ́ a mnɩ́ mɔ̀ɔ, mɔ̀ gɔ̀ bɔ́ɔ. Múó ká nà lilie kʋ́ bɔ́ɔ, lé ànɔ̀ɔ̀ ká nà kɔmɩa kʋ́ bɔ́ɔ!» 22Zozíi anɩ́: «Wɔlɩdrèè a yrálɛ lɛ́ mɔ́ɔ mʋ́ a, a nɩ́ a gba yì. A yi míi lé kalɩmɛ a plɩɛ́ ná ká lɛ́ mná a, a yie mná a?» Á anɩ́: «Aan, à yi míi!» 23Zozíi srʋ á ɔ́ anɩ́: «Cícása, kalɩmɛ a plɩɛ́ ná ká lɛ́ mná a, a yie mná. Mà ɩ̀ ŋwɔ́ɔ lɛ́ mà nyɔ ká ná lilie kʋ́ bɔ́ɔ, lé ànɔ ká ná kɔmɩa kʋ́ bɔ́ɔ a, mɔ́ɔ nɩ́ pá bhʋ́anɩ nyʋaá ŋnɩ́. Mà nyʋaá kà a zà ɩ́ Tʋ́ ŋwʋ́ ʋ́ bhʋ́anɩ bɔ́ɔdà a, ámá nà ka ʋ́ bɔ́ɔ.»

A nyièdɩ a nyɩ́kpɔkádɔ̀ɔ̀ ɔ́mɔ́ ŋwɔ́ɔ á lɔ̀fɩ́ɛ́ a cóyʋ

(Málɩ́kɩ 10.41‑45; Lúkɩ 22.24‑27)

24Mà tányɩɛ́ mʋ́ kʋjɩ̀nyʋ̀àà ànàà kʋ́gbáá nú wɔlɩ́ɛ́ nɩ́ayúóó sɔ́ɔ́ nɩ a, ɩ nɩ́ yɩ́ a duo kʋ́ náa. 25Bhʋ́ Zozíi srʋ á mà: «A yì saá cémʋ́ bhlɩ́ a kámanyʋa kámalɛ a lía géyuo bhísakʋ́ a, lé nyɩ́kpɔkádàà kwle á sáà kpanyɩ a. 26Mà à nɩ̀ ŋwɔ́ɔ amɔ a, sɩ́tɛ̀ mʋ́ ɩ nɩ́ a ká kʋ! Amɔ ànà a, ɔ̀ nɩ̀ yrá kámalɛ a, ɔ plɩ́ a cóyʋ. 27Lé ɔ̀ nɩ̀ yrá lé ɔ̀ kà a drɩ̀ kʋ a, ɔ plɩ́ a góo. 28Ɩ́ a múó ka ŋnɩ́ a zà Nyɔɔ́ a Yuwliyʋɔ́ yi, ɔ́ɔ nɩ yi lé nyʋa kɔ́ɔ́ gà zrɩ, mà ɔ́ɔ yi lé ɔ ká nyʋa gà zrɩ lé ɔ ká ɔ nyoku sa lé ɔ ká kú lé ɔ kwɩ́ɛ́ ká nyʋa kɔ́kɔ́mnɩ́ mʋ́ gba.»

Zozíi yalɩma yɩ́cucúbhlanyʋa a sɔ́

(Málɩ́kɩ 10.46‑52; Lúkɩ 18.35‑43)

29Tányɩɛ́ mʋ́ Zozíi yà ɔ́ kʋjɩ̀nyʋ̀àà sɔ́ wlʋ́ɛ́ Zelikóo lé á mnɛ a, nyʋa kɔ́kɔ́mnɩ́ jɩ́ ɔ́ kʋ́. 30Mà yɩ́cucúbhlanyʋa a sɔ́ bɔ́ɔ nyúzɔ kʋ́, á nú mà Zozíi plɩ́ɛ́ a, á bháʋ́ yrè a sasʋ́ kʋ́: «Kanyɔɔ̀, Davídɩ a yʋ́ʋ̀, ɩ́bhìè, yɛ́ à ŋazɩ kʋ́ àyé!» 31Mà á wle lɛ́ sɩ́tɛ̀ a, nyʋa faá cícíé, a ká nékʋ́ bhli, mà a nɩ́ mányɩlaá, á wle kɔ́ɔ̀kɔ́: «Kanyɔɔ̀, Davídɩ a yʋ́, Ɩ́bhìè yɛ́ à ŋazɩ kʋ́ àyé!» 32Lé Zozíi nynʋ́vʋ̀, lé ɔ́ wle á lé ɔ́ yrá á mà: «Wɔlɩ́ gbá a yrá lé nɩ nɩ amɔ a?» 33Á anɩ́: «Kanyɔɔ̀, ɩ́bhìè nɩ lé à yɩ́ ká wle lé à kà kʋ́ yɛ́!» 34Mà á ŋazɩ̀ɛ̀ ɛ̀ bhlá Zozíi a, ɛ́ nɩ lé ɔ́ gbɔ́gbɔ̀ a yɩ́ɛ́ lé ɛ́ wlée, á yɛ́ yɩ́ kʋ́, ɩ́ ka ŋnɩ́ lé á jɩ́ Zozíi kʋ́.

Currently Selected:

Matíe 20: NEY

Highlight

Copy